Gledam vam ja neki dan na televiziji kak su vredni i brzi naši Zagorci. V kratko vreme su dobili certifikate za puricu, mlince i nedavno štrukle. Bravo za njih ali si sve nekak mislim da ima tu još jako puno zagonetki. Ajde da to probam malo raspetljati.
Zagorski štrukli, mlinci i purica
Protiv činjenica se nemre: Zagorci su fakat za otprilike leto dana dobili pravo da im čak tri proizvoda budu priznata kak izvorni hrvatski/zagorski proizvod. Fakat su v relativno kratkom roku uspeli kaj neki drugi krajevi v Lepoj Našoj nikak nemreju ostvariti. No ajmo se malo prvo pozabaviti ze štruklima.
Od kak pamtim, a pamtim dugo, v Podravini su se pekli kojekakvi štrukli i to jako fini. Nekak su najpoznateši oni sirom jer je naravno Podravina stočarski kraj pa je mleka i sira navek bilo v izobilju. I baka i mama su mi bile pravi majstori za te štrukle. Baka ih je čak pekla v krušnoj peči jer je svaka podravska hiža z puno članova familije imal i krušnu peč. No na daleko su v Podravini poznati i druge fele štrukli: z jabukama, zeljem, z hajdinskom kašom, z tikvom i makom, z višnjama, trešnjama pa čak i z kruškama koje zna tu i tam napraviti moja Đuro. E sad čiji su bolši? Svaka čast Zagorcima al nek mi oprostiju naletel sam baš v Zagorju i na kojekakve štrukle z kojima se gazdarica ili restoran baš i nebi smeli preveč faliti. Testo mora biti kak flispapir a to znaju napraviti samo iskusne kuharice. Imal sam prilike jesti štrukle sirom gde je testo bilo kak za lazanje ili burek. Ili da spomenem bučnicu. V jednom zagorskom restoranu gde je direktor hotela bil preštimani hrvatski kuhar, bila je poslužena bučnica koja je mogla biti više kakti slano predjelo nego kak desert. Tu moram nekaj priznati. Moj je favorit bil i navek bu štrukel z tikvom i makom a nikak sirom. V Podravini nisam nigde ni videl tu kombinaciju. Štrukli z jabukama su pak čista austrougarska delicija, kojega i danas v Zagrebu zovu apfelštrudel.
Pada mi nekaj na pamet. Bilo bi fakat jako zanimljivo napraviti takmičenje između Zagorja i Podravine v pripremanju štrukli sirom. Odabrati onak slučajnim izborom nekolko domačih ženica, dati im iste sastojke i druge uvjete i nek se to jemput za navek raščisti. Kladim se podravske dekle.
Nisam na čisto niti z mlincima. Skidam kapu zagorskim mlincima, pogotovo z puricom, al i mlinci se sečam od najranijeg detinjstva. Doduše pri nama se baš v ona vremena nisu često jeli z puricom nego kakti samostalno jelo za fruštuk. Dok je tata išel rezat gorice imal je obično pomače v nekome od svojih rođaka. Mama bi im onda v jutro speklamlince zalijala ih z vrelom vodom i zamastila z svinjskom maščom. Onaj posebno pamtim: mamini mlinci su bili jako tanki, fino su se listali bili su malo popapreni. Verojatno se sečate da sam puno put spominjal puricu z mlincima za Štefanje pri mojem pokojnom prijatelji i rođaku Pepeku. Podravke su i za mlince pravi majstori pa bi se i tu štel kladiti na podravske dekle. V ovoj poplavi kojekakvih gastronomskih priredbi morti nekome i padne na pamet nekakvo takvo takmičenje. Znam sigurno da ženice na Vinici, v jednom kvartu Koprivnice, organiziraju tzv „Štruklijadu“ ali nema takmičarski karakter.
Sad vidite kak je važno biti prvi v nečemu i kak se upornost splati. Setite se samo kojekavih sporova koje imamo mi Hrvati z naši susedima. Slovenci nam osporavaju ime sjajnoga vina teran i na kraju smo ipak pobedili. Slična je situacija i z kranjskim kobasama. Pred par let su nam i to osporili ali su se čini mi se zmešali Austrijanci pa i dalje imamo na našem tržištu kranjske kobase. Tu imam jedan mali savet za one kaj su zaljubleni v kranjske. Pogledajte cenu pa vam bu sve jasno. Pitam se ak su sve te kobase „kranjske“ kak moru cene biti v rasponu od 22 do 45 kuna po kili? Neko nas vara. Zato ja letima kupujem samo Podravkine.
Slične probleme smo imali Slovencima i dok su v pitanju čvarki. Ak se ne varam tu su ipak nekaj na zaštiti imena napravili naši Slavonci koji su zaštitili i šunku i špeka.
Mi smo Podravci zgubili jednu več dobivenu utakmicu od Belovara. Oni su naime zaštitili prgu kak svoj proizvod makar Podravci več stolječima imamo prepoznatljive prge. I v Koprivničkom Ivancu i v Koprivničkim Bregima se delaju prge od pamtiveka. V detinjstvu nisam ni znal za drugi sir nego za prgu i sir z vrhnjem. Na tome su odrastale generacije i generacije Podravaca. Al eto: prestigli su nas Belovarčani i prvi prijavili svoj kvargl. Morti su i Međimurci malo srditi kaj se nisu prvi setili prijaviti svojega turoša.
Za kraj jedna priča na tu temu o čuvenoj „paškoj janjetini“ koju su do nedavno prodavale sve birtije Širom Lepe Naše. Pred dost let sam bil na putu v Rijeci i naravno da smo na povratku v Zdihovu navrnuli na čuvenu „pašku janjetinu“. Pofalim se jednom dobrom prijatelju, koj se inače bavil trgovinom z mesom, kak sam jel finu pašku janjetinu a on me pita:“Si ti siguran da je to bila paška janjetina?“ Bil sam malo i uvređen da mene starog sladokusca more tak nekaj pitati. „Naravno da jesam. Navek dok s vračamo z puta v istoj birtiji V Gorskom kotaru jedem pašku janjetinu“. Onda on meni:“E moj prijatelju. To kaj si ti jel je čista „paška janjetina“ z Rumunjske. Moj partner i ja nekolko birtija snabdjevamo već duže vreme z janjetinom z Rumunjske!“ Evo ti ga sad na. Ko bi to rekel.
Uostalom znate osim paške postoje i druge janjetine za koje ljudi tvrde da su jedine prave. To tvrde i Ličani, i Dalmatinci a posebno otočani. Mi Podravci to ne tvrdimo al redovito prodajemo našu janjetinu Dalmatincima. Dugo vremena smo imali čoveka v jednom selu kraj Koprivnice koj nam je za neke prigode prodaval janjce. Onda nam je dva put otkazal naruđbu z obrazloženjem: „Dragi prijatelji najte mi zameriti al ovo leto nemam janjce. Došel je Dlamatinec i otpelal pun kamion janjci!“ Onda doznamo da su se širom naše obale vrteli podravski „paški janjci“. Pravda je ipak nedavno došla na svoje. Pažani su se dosetili jadu i odlučili su obilježavati svoju janjetinu i kontrolirati količine. Reda mora biti.
Na tu temu bi vam mogel još napisati čitavi roman jer znate onu:“Svaki Cigo svoga konja fali!“ Domače je domače!
Pondelek
Juha: Prežgana juha
Glavno jelo: Pileče jetrica na saft, pire
Desert: Sok ili samo zdena voda
Tork
Juha/Glavno jelo: Pretepeni mladi grah; začudo to je po želji Đure
Desert: Voće; imamo trenutno kruške a nebute verovali i grožđe v goricama
Sreda
Juha: Krem juha od karfijola i mrkvice
Glavno jelo: Musak od krumpira, mešana šalata
Desert: Štrukli od kruški
Četrtek
Juha: Juha od junečega flama
Glavno jelo: Kuhani flam, lešada od mahuni i krumpira
Desert: Nekakav sok
Petek
Juha: Juha od ribane mrkvice i celera
Glavno jelo: Pržene srdelice, krumpir šalata
Desert: Jako lagani gemišt
Subota
Celi dan v goricama pa moram prilagoditi jelovnik
Lagano predjelo za gablec: malo jegera i sira, paradajz i paprika, slani klipiči
Glavno jelo: Čevapi i ražnjiči z prilogima
Desert: Kad smo več v goricama nek bu gemišt od graševine i za Đuru nekakav sok
Nedela
Juha: Teleča juha z rezancima
Glavno jelo: Kuhana teletina, šalša, kuhani krumpir
Desert: Nek to bu Đurin problem
:(Još nema komentara