Iza mene je nekolko jako interesantnih dana, bilo je tu od svega pomalo a tak bu čini mi se i do kraja ove čudne veljače. Teško mi se setiti ovakvog vremena, od jake hladnoče do čistoga prolječa. Pamtim jedan predratni vikend početkom veljače dok je bilo tak toplo da smo moja dva pajdaša i ja sedeli ispred kleti samo v košuljama, pomalo grickali špeka i prgu i pili gemišt. Tak je bilo nekaj slično i ovih dana dok me je sunce izmamilo v trsje da obavim neke poslove v trsju. Doduše dok ovo pišem meteorologi več najavljuju promenu na gorše pa bu veljača ipak ostala “prevrtača”.
“Fašnik” pri Ataču
Več smo se priviknuli da pri Ataču nemre ništ biti normalno, navek zmisli nekaj novo i drukčeše pa je i ovaj put bil dosledan. Javil nam se Zagreba dobrih sedam dana prije fašnika i predložil da dojdemo k njemu na krafle i kuhano vino. I kaj sad? Fašnik prije fašnika! Nek i bu tak jer nemremo baš preveč birati. Dok Atač zove ta se prilika ne propušta. Skupilo nas se nekolko z naše stare klape da se malo spripovedamo, razmenimo koji trač ako ga ima i, kak bi to rekel naš pajdaš Gino, da se malo družimo. Naravno da se tjedan dana prije fašnika nismo zamaškarali jer to valda ovak ozbiljnoj gospodi više ni ne paše. Ruku na srce ja se do sad još nisam nigda v životu zamaškaral. Bilo je i negda prilika za tak nekaj al sam i kak dete to navek izbegaval. Znam da neki ljudi živiju za tih nekolko dana da buju “neko drugi”. Jednom sam prilikom v živo videl ljude i decu na karnevalu v Opatiji koji su fakat uživali v nepreglednoj povorki kojekakvih likova.
Atač nas je lepo dočekal v njegovom prostranom dnevnom boravku z vatrom v otvorenom kaminu kaj navek daje posebni ugođaj. Na stolu jedan mali švedsk stol, kaj če reči od svega pomalo, a “glavmo jelo” su naravno bili lepi z pekmezom filani krafli. Saka čast. Z tim navek paše šalica kuhanoga vina a posle toga slede priče o koječemu po onome modelu:”Se ti sečaš dok smo prije trist let...”. Naravno da se sečam al je pitanje Atač jel se ti sečaš? Naime kaj. Več dugo čekam da mi Atač najde jednu sliku z naše rane mladosti i sad sam se konačno dočepal te slike. Doduše trebalo je tu biti puno interesantnih fotosa koji su pravi dokument jednog vremena al je i ovo kaj smo našli jako interesantno. Pronašel sam sliku jedne dječje predstave “Čarobne papučice” koja se odigrala 1956-toga leta a režirala ju je naša poznata Koprivničanka, moja razrednica Božena Loborec. No kak bilo da bilo, znate kak je to več pri nama ozbiljnim ljudima, prisetili smo se koječega a najčešče je bilo ono:”Ko je to na ovoj sliki?, Kad je to bilo?”, „Ko je ta/taj drugi z desne strane”...
Kak pri Ataču doma več dugo nismo bili nekakvom takvom prigodom, nekak sam imal osečaj da je red donesti mu nekakvoga “poklona”. I setil sam se: Bum mu donesel “frišku figu”. Imal sam baš doma jednu frišku dalmatinsku. Nadam se da Podravci znaju kaj je “figa”? Ak neznate poglečte sliku ili se raspitajte kod svojih stareših kaj je figa.
Čim je Atač razmotal poklona mam ga je pojel
I kaj da vam velim? Naš fašnik prije fašnika je uspel i bez maski. Lepo smo se pospominjali, prizalogajili od svega pomalo i proveli dve-tri vure v ugodnom pajdaškom razgovoru.
No zato su se zamaškarala naša najmlajša vnuka Tia. To njoj i paše. Deca, naročito curice, naprosto v tome uživaju.
Tia i njezin ovoletnji kostim
Mislite morti da mi doma nismo pak pekli krafle? Jesmo i to na velko. Đuro je udružila snage ze svojom sestrom Violetom i napravile su krafle za celu familiju.
Ovi ostanjki od krafli su za mene posebna delicija
“Šokantna” objava
Baš na sam fašnik surfan vam ja po internetu i najdem ovakav naslov:”10 specijaliteta Jugoslavije- izbirljivci to nebi jeli ni za lijek”.Pomislil sam več na nekakvo strašno “otkriče”, na stvari kojih smo se negda “grozili”, nekaj prestrašno, jela koja su začinjena “bratstvom i jedinstvom”i sl.... Ni govora. Dal sam si truda da to malo bolje i pažljivije proučim. Kad ono vidim da je autor/autorica jako, baš jako promašil/a metu. Nekak bi prije rekel da je čovek prepisal jela z nekakve hrvatske kuharice po receptima svoje mame ili bake.
Ta “šokantna lista” vam počinje z “hladnetinom” o kojoj sam pisal pred nepunih mesec dana a po našim kuharicama imate bezbroj uputa z “pravim receptima” ze svih krajeva Lepe Naše. Ak se malo potrudite našli bute i ovakve nazive: sulc, pača, drhtalica ili kaj bi naši istočni susedi rekli pihtija ili aspik.
Onda malo dalje najdem “pohani kruh” i naravno da se začudim da se to našlo na toj listi. Evo baš smo Đuro i ja pred par dana imali za obed “raštiku ala špinat z pohanim kruhom i jajcima na oko. Letima smo na godišnjem bar dva-tri put tjedno jeli za doručak pohani kruh. Naravno z nekakvim konkretnim dodatkima.
Onda na top 10 listi najdu “pluča na kiselo”. Mi bi doduše rekli “plučeca na kiselo” iliti “pajšlec na kiselo”. Probajte moje dečke z klape deti pred izbor: bečki šnicl ili pajšlec na kiselo? Pri njima sigurno nema dileme. Tu moram nekaj pojasniti. Pajšlec je malo bolši materijal jer osim plučeca podrazumeva još i krmeče srce i jezika. Da bi si danas mogli tak nekaj skuhati morate imati nekavu vezu pri mesaru ili kupiti celoga živoga odojka/janjca pa da vam ostale pajšlec. Verujte da bi ja to rado i češče pojel da nema jednog objektivnog problema:gihta! Ako patite od toga zla plučica/pajšleca nesmete ni pogledati.
Mogel bi se kladiti da je “pohani svinjski mozak” još navek na jelovniku nekih finih zagrebačkih restorana. Bila je to od navek delicija za gospodu i fino nepce. Pak morate iskati vezu pri mesaru.
Kakti čudo od delicije navodi se “žumanjak sa šečerom”. Da bi to konzumirali morali ste biti malo bolje stoječa familija ili mamin mezimac jer ni bilo tolko jajci kak danas. Doduše danas je to skupo obzirom na cenu jajci. Sečam se da je to jedan prijatelj dobival v posebnim prilikama ali v ovoj kombinaciji: celo jajce, šečer i prošek. Priznajte da dobro zvuči i prava je kalorijska bomba.
Na listi su se našla i jela kak su mahune, fileki, zelje ze suhim mesom i kruh i mast, koja su i dandanas na našim jelovnikima. Kaj se tiče ovoga zadnjega, ja v natrag nekolko meseci sve češče za večeru skombiniram kruh i mast z malo soli i crvene paprike. Ak pak imate mast od nekakvoga pečenja i dodate malo češnjaka, imate jako bogatu i finu večeru. A znate kaj posle toga paše? Kiselo mleko, jogurt ili kefir. Razmislite malo i probajte.
Pondelek
Juha/Glavno jelo: Kisela juha od pilečih želučeki
Desert: Verojatni imate šaumrole od jučer
Tork
Juha/Glavno jelo: Čušpajz od poriluka, suho meso
Desert: Puding od čokolade
Sreda
Juha:Paradajzova juha z noklecima
Glavno jelo: Krmenadli na naglo, pomfrit, turšija
Desert: Voče
Četrtek
Juha: jedna Podravkina z vrečice
Glavno jelo: Pileči rižoto, cikla
Desert: Nekakav sok
Petek
Juha: Krem juha od mešanih semenki i mrkve
Glavno jelo: Faširanci, dinstani grah, zelena šalata
Desert: Čaša vina
Subota
Juha/Glavno jelo: Raštika ala špinat, pohani kruh, jajca na oko
Desert: Tu more pasati i obična zdena voda
Nedela
Juha: Janječa juha z grisknedlima
Glavno jelo: Kuhana janjetina, puno povrča z juhe
Desert: Punčkifliči, kapučino
:(Još nema komentara