Kolovoz vam more biti jako interesantan ak vam se tak potrefi. Nije sve baš v zležavanju na nekoj jadranskoj plaži. Ima kojekakvih događaja em državnih, em crkvenih, em vam se dogodi nekakva godišnjica ili vu familiji imaju rođendan bliske osobe. Nemre čovek reči da mu je dosadno v Podravini makar ni videl ni more ni planine. Ovaj kolovoz je baš dinamičan za jednoga penziča. Ko zna kaj bu još do kraja meseca?
Dinamični kolovoz
Najavil sam več neke obiteljske rođendane koji su bili v prvoj polovici meseca a bili su baš onak intimni za najužu familiju. Seka Zvjezdana nas je najprije pozvala na popodnevnu zakusku z osvežavajučim zalogajem, pičem i kavom. Pretepli smo sve čega smo se setili, malo potračali i dogovorili kaj napraviti tri dana posle dok njezina kčer, moja nečakinja Jelena, ima takaj rođendana. Kaj je interesantno da je i moj pokojni pajdaš Pepek, njihov muž i tata, imal rođendana v kolovozu. Naravno da vam nebum otkril kolko su stare, ni pristojno spominjati damama leta, ali bum samo rekel da je Jelena slavila okrugli rođendan. Kak je ona kreativna mlada osoba v svemu, od posla do kuhanja, tak je i za svoj rođendan pripremila jedno malo iznenađenje. Odlučila je da nas bu počastila negde izvan Koprivnice. Nismo mogli ni sanjati da se bumo našli v Međimurju, tam negde oko Štrigove. E sad. Bilo bi lepo da vam morem dočarati kaj se sve događalo na tome putu. Da bumo komotni dogovorili smo se da Đuro vozi, tak da se nas troje more opustiti. Zapraf sam ja bil više kakti kufer, Zvjezdana je proučila kartu Međimurja a Jelena je surfala po mobitelu i čitala Đuri kam treba voziti: sad levo, sad desno, sad ravno i tak kilometrima. Verujte da sam bil dosta zbunjen jer toj vožnji se činilo nigda kraja. V jednom trenutku sam bil siguran da smo več v Sloveniji. I onda konačno: na izlazu ze Štrigove „Restoran Terbotz“. Nigda čul, al verujte da sam bil ugodno iznenađen. Videl sam ja kojekakve restorane v životu al ovaj mi se fakat jako dopal. Ovo ni „plačeni oglas“ al bi svakak štel zapisati svoje dojmove o jednome lepo provedeno popodnevu, v restoranu z odličnom kuhinjom. Međimurska kuhinja mi ni nepoznanica al su si ovi ljudi fakat dali truda. Seli smo za stol z pogledom na prelepa brdašca z puno gorici i lepo uređenih vikendici. Čim smo se smestili prišel nam je mladi ljubazni konobar Mihael i zel si brigu o nama za to popodne. Konobar kakvoga bi si poželel svaki fini restoran. Naručili smo aperitiv da pomalo pijuckamo dok listamo podeblešega jelovnika. Več su i aperitivi bili iznenađenje jer su pomalo neobični od slatkih damskih do finih pomalo gorkih na bazi viljamovke. Odabrati predjelo i glavno jelo verujte mali je „problem“ jer je tak sve izazovno i apetitlih da vam se teško odlučiti. Za predjelo smo pomalo kombinirali pa je tu bilo svega pomalo: od pretepene juhe ze štruklima, sira z vrhnjem do domače šunke, turoši, kosane masti i kobasi. Sad se bute začudili kaj je meni bila neverojatna delikatesa: mešani kuruzni kruh malo prepečen na špeku. Tak jednostavno a tak ukusno.
Tak je zgledal taj moj nezaboravni kruh
Da me ni bilo sram tu bi stal a glavno jelo nebi ni naručil. Glavno jelo smo naručili svaki po svojem guštu i verujte da je sve bilo više nego dobro: užitak i za oko i za nepce. Imam jedan mali „prigovor“: svaka je porcija bogata i za tak ozbiljne ljude kak sam ja je morti bilo dosta i samo predjelo.
Ovo je „teleči hrbat z temfanim krumpirom“
Z takvim jelom je odlično pasal dobro ohlađeni rizling. Naravno da je Đuri dobro sjela i dobro „ohlađena voda“. Kakav bi to bil rođendan da ne završi z desertom? I tu je bila odlična ponuda makar bi si ja najrajše desert zel za doma. Dame su se odlučile za „sladoled od tikve“ a Jelena i ja za međimursku gibanicu. Možda ni lepo za reči, a nije ni pristojno, ali sam pol te pozamašne gibanice moral ostaviti. Mogel sam morti mesto gibanice naručiri nekakav dežistiv. To bi bil puno bolši izbor posle takvoga obeda. Da je obed bil obilan dosta je reči da niko od te naše male ekipe nije ni pomislil na kavu. I kaj da vam velim za kraj? Dugo smo ze vozili, našli jedan odličan restoran z odličnom papicom i odličnom poslugom al ga bumo i dugo pamtili. Međimurci več dugo delaju odličan posel ze svojom gastronomskom ponudom.
Velka meša/velka gospa
Kak bi to bilo da ne napišem koju reč i o jednom velkom crkvenom događaju kak je Velka meša. Na sve strane Lepe Naše mogli ste videti ili čak doživeti toga svetka. Po broju okupljenih vernika taj dan je sigurno na prvom mestu tokom leta. Za mene su to danas malo prenaporna okupljanja al se bum podsetil toga dana, gde sam i sam bil dio toga slavlja.
Prva velka meša v mojem životu je bila ona v Močilama, koprivničkom prigradskom naselju. Imal sam tek šest-sedam let dok me mama zriktala a do crkve smo pešačili jednom starom stazom čez vinograde. Puno ljudi na ledini oko crkve, licitari ze svim onim svojim konjekima, srčekima i gvercom, slika je koja je za navek ostala v sečanju jednome malom Podravcu. Danas se v Močile na taj dan ide v organiziranoj povorki v kojoj su ne samo verniki nego i prvi ljudi koprivničke političke scene. Da mi je samo znati kak se oni osečaju na tom putu od tri-četri kilometra dok hodaju onak z noge na nogu. Verojatno su i gladni i žedni dok stignu do cilja?
Nekak se dogodilo da tom događaju najčešče bum prisutan v Kaštel Novom z jednostavnog razloga kaj sam ko klinac sva svoja letnja ferja provodil baš tam. To je v Kaštelima svako leto jedan poseban dan a ono kaj mi je za navek ostalo v sečanju je obed na taj dan. Mesto juhe je bil navek rižoto od celoga domačega pevca z friško ribanim parmezanom a za glavno jelo friško pečena janjetina, toga časa skinuta z ražnja, z kiselom lučicom. Za desert je sledila bevanda i na kraju lubenica koja se celu noč hladina vu kamenici.
Na Braču v Osibovoj je to na taj dan navek bil uglavnom podravski obed ali se znalo speči i janje. Ženski dio ekipe i deca bi navečer prošetali do Milne na kavu i sladoled i snimile bi kaj se događa na rivi i oko crkve. Zapraf je v Milni svetek dva dana za redom jer se jako drži i do Rokova koje je dan prije Velke gospe.
Največa proslava Velke meše pri nama v Podravini je sigurno ona v Molvama. Morti nije tak poznata kak ona v Sinju ali se cela Podravina najde na taj dan v tom lepom podravskom bogatom mestu. Kolko sam videl na internetu i ovo je leto sve bilo jako svečano, od samoga obreda do velkoga broja vernika. Molve su inače širom krugu ljudi v našoj domaji više poznate po nalazištima nafte i plina nego po vjerskom turizmu. V ovim teškim vremenima bumo morti malo više saznali i o Molvama.
Kak do kraja meseca imamo još nekaj dana neka slutim da bu se još nekaj dogodilo vredno pažnje i kratkoga zapisa.
Pondelek
Juha/Glavno jelo: Zeleni rižoto
Desert: Naravno štrukli z tikvom i makom od jučer
Tork
Juha: Graškova juha z kašicom
Glavno jelo: Pohana pileča krilca, pomfrit, šalata
Desert: Čaša pive
Sreda
Juha/Glavno jelo: Prisiljeno zelje z paradjzom; ja bum malo podinstal junetine
Desert: Vočna šalata
Četrtek
Juha: Jedna Podravkina z vrečice
Glavno jelo: Mesna pita, zelena šalata
Desert: Smuti od onoga kaj imam doma od voča
Petek
Juha: Koprova juha z krutonima
Glavno jelo: File grgeča na podravski, lešada od mešanoga povrča
Desert: Lagani gemišt
Subota
Juha/Glavno jelo: Filana paprika, pire; kak i navek ja bum malo dodal pol para kranjske i koj falačec pisanoga špeka
Nedela
Juha: Juha od pilečeg sitniša
Glavno jelo: Pečeni filani picek, krumpir na ploške, mešana šalataDesert: Kifli z pekmezom
:(Još nema komentara