Moj profil
A kaj da danas kuham? (522)
A kaj da danas kuham? (522)

A kaj da danas kuham? (522)

Gledam ja neki dan kaj to preporučaju moji “kolege kuhari”za jelovnik v svibnju? Ima tu svega al kaj bi rekel jedan moj pajdaš “teško bi čovek v tome jelovniku zamastil žlicu”. Naravno da su tu uglavnom jela od “povrčki i vočki” pa pretpostavljam da je v toj sugestiji imal svoje prste nekakav strogi nutricionist ili čak vegetarijanac. Ja spadam v one koji zagovaraju “uravnoteženu prehranu”. Mora biti raznovrsno za sakoga nekaj.

Svibanjska ponuda

Onda se pojavi jedna prigodna proljetna knjižica jedne velke trgovačke kuče v kojoj je malo dručeše svetlo na sve to hitil uvaženi i popularni kuhar Tomislav Špiček koji je za jednu velku trgovačku kuču preporučil nekolko deliciji za roštilj a to nikak nemre biti bez lepe vrpe kojekakvoga mesa. Od njega se kak kuharskoga “manekena” tak nekaj i očekuje. Morete zamisliti da je čovek njegovoga formata i iskustva živel samo na povrču? Doduše zbog nekih okolnosti ja bum ovaj mesec tak i tak imal malo skromnešu prehranu ali bum se ipak držal po onoj: od svega pomalo. Sigurno je jedno: nebum išel na dijetu. Baš nekak v to vreme ranijih let, naravno prije korone, puno je naših dragih ženica krenulo na dijetu jer su počele pripreme za godišnji odmor. Naravno na moru a tam se ipak moraš sleči i pokazati kaj si marljivo skupljal prek cele zime. Znate več da se od sv Nikole do Tri kralja jako lako skupi koja kilica više jer je fakat teško odoljeti svim onim izazovima kaj za zapovedane a kaj za kojekakve zmišljene svetke. Teško si čovek more biti mačeha, pogotovo ak je takve mentalne građe kak sam ja.

Proljetne delicije

Oču-neču posle onih predloga za svibanj setil sam se kojekakvih zgoda na račun “zelenoga jelovnika”. O špinatu znate sve još od detinjstva jer je od navek bilo uverenje da je “špinat jako zdrav za decu”. To je zapraf bil svetski problem i, kolko sam ja informiran, onaj legendarni crtič o Popaju je i nastal tak da se deca zaljube v špinat koj ima v sebi puno železa a čovek dobi posle porcije špinata neverovatnu snagu. “Problem” nastane ak dete fakat voli špinata, kak je to v jedno duhovitoj Kišinovoj priči, a starci i dalje ponavljaju tu staru ofucanu rečenicu o tome kak “se špinat mora jesti”. Za divno čudo i mi doma imamo sličnu priču: Jan voli špinata pogotovo dok je šnicl kak lopata i na njemu dva jajca na oko. Jedan je pak moj poznanik, nakon kaj su mu otkrili cukora, moral promeniti prehranu a za to se pobrinula njegva žena ali i sneha. Jedan dan mi se požalil:”Čuj stari moj. Nemrem više jesti te trave. Morti je to zdravo al moj organizam išče i nekaj malo drugo. Sve ja to pojedem kaj one skuhaju al si ja to nadoknadim. Idem redovito svaki vikend v lov da se malo ojačam z kakvim srnečim paprikašom i gemištom!” Kak je ta priča završila nemam informaciju. Jedno je sigurno: za zadnjih pedesetak let nismo nigda v goricama ponudili nikakvu “travu” kak prilog.

 Z graškom imam takaj jednu zgodnu priču. Još kak student sam kuhal mojim cimerima Fjaki i Micoju. Dok sam jemput složil francusku šalatu, i bil jako zadovoljan kaj sam napravil i majonezu, serviram sve lepo na stol z nekakvim mesom, vidim ja da nekaj ni v redu. Moj je kum Fjaka počel po tanjuru driblati. Zbira zrno po zrno graška i lepo na rubu tanjura dela kraluša. Verujta da za vreme našega cimerskoga života nisam više imal na jelovniku francusku šalatu. A samo usput: ja ju baš  i ne volim pa ju ne delam čak ni za novo leto. Oni kaj su bili vu vojski još za one države se buju morti setili da su vrli vojni kuhari znali od graška delati i pire. Sečam se da su neki moji suborci to navek ostavljali na tanjuru a za veliko čudo ja sam to pojel baš onak v tek.  Z dobrim falačecom meso mi je baš pasal. I danas graška rado pojedem v juhi ili delam tzv “fino varivo” kaj če reči da na puter hitim kuhanoga graška, mrkvu i krumpira zrezano na kockice. To obožava Đuro pa joj znam ispuniti tu želju. Odlično paše recimo z pohanom piletinom. No ak malo bolje pogledate proletne jelovnike sigurno bute našli graška na putru kak prilog z janjetinom. Doduše vele da je to engleski specijalitet a ja, najte mi zameriti, baš ne verujem v englesku kuhinju. Znate vi morti nekaj više o toj kuhinji osim “fajf o klok te”?

V tu kategoriju klope spada bob i leča koji nisu baš često na mojem jelovniku. Boba moram ovih dana pripremiti po Đurinoj želji a leču takaj nisam jel još od vojske. Tam su pripremali nekakav, recimo, čušpajz z junetinom. I bilo je dobro.

Dok smo bili deca navek sam se veselil prvome mladome krumpirom z maminoga vrta. Navek smo imali vekšu gredicu krumpira, manje više na jednom te istom mestu i to naravno z vlastitim semenskim krumpirom, pa se je normalno malo prevrgel i bil je z vremenom sve sitneši. I baš sam takvoga obožaval. Znal je biti veličine trešnje cepike, bilo ga je malo teško oguliti, al mi je i do danas ostal v sečanju kak nekaj posebno. Mama ga je hitila celoga na svinjsku mast, dobil je lepu zlatnu boju, trebalo ga je samo malo osoliti i posipati z friško skosanim peršunom. Z tim paše samo zdela zelene šalate z dost češnjaka i koščičoga ulja. Probajte nebu vam žal.

Neke su proljetne zelenjave jako kvalitetne makar ih baš često ne koristimo pa čak i nisam sigurna da ih opče moremo više najti. Kak deca smo se do sita znali najesti kiselici kojih je bilo posvakut. Od njih se more napraviti i juha i dobar sos. Z koprivama je nekaj lakša situacija. Mladih ima i pri nama v goricama samo si treba dati malo truda i nabrati ih. Prošlo leto sam delal od njih sos al i “ala špinat”. Dobra je i juha a čak smo dva paketiča blanširali i spremili v škrinju. Čovek mora biti samo oprezan dok ih bere mada stareši ljudi tvrde da je speči se na koprivu jako zdravo jer leči neke tegobe kak je na pr. reuma.

Počela je naravno i sezona jagodi i to ne samo onih z juga nego i naših domačih. Prošli sam tjedan spomenul da smo imali več i tortu i kolače z jagodama. Nisu ni preveč skupe pa mi se čini da buju dost često za desert na jelovniku. Da vam praf velim meni su najbolše zdene z malo štaubcukora. Eventualno dodati žlicu-dve šlaga. Neznam kakva je ponuda črešnji v dučanima al kak vidim po goricama tek je otpal cvet i bumo morali počekati još jen čas da se osladimo z našim domačim. V našem su vrtu negda bile dve. Jedna jako rana i jedna kasna cepika. Ona rana bogica nigda ni imala šansu dozreleti. Čim se malo zacrvenela več smo ju počebrali. Nije to bila bogznakakva kvaliteta al su bile prve a želja prevelka. Zato je cepika dobila priliku da sazreli do kraja.

A višnje? Verujem da mam pomislite na štrukle ili pak na višnjevaču. Letima je mama, a danas i Đuro, dela višnje z cukorom, dene ih par dana na sunce da se to sve lepo včini i onda zaleje z rakijom. Najte misliti da je za višnjevaču dobra i lošija rakija. Dapače kaj bolša rakija to bolša višnjevača. Po mojemu iskustvu posebnu ju obožavaju gospođe.

Dok je višnja v pitanju ima jedna delicija koja se v Podravini jako retko dela: sos od višnje kak prilog z divljači. Samo oprez: ne to delati z višnjama z rakije nego z friškima! Inače morete mam iti spat.

Znate kaj se navek pitam? Višnja je često i lepo žensko ime. A zakaj se niti jedna žena ne zove Trešnja?

Sigurno znate da puno ljudi obožava štrukle z višnjama i trešnjama. Sečam se puno hotela i restorana, v kojima sam blagoval na svojim putovanjima, koji su na jelovnike metali te štrukle, oni bi rekli savijače, kak poseban specijalitet kuče. Ja vam pak moram nekaj priznati makar se z tim baš ne fali: Ja opče ne jedem te dve vrste štrukli! A zakaj? To vam nesmem i neču priznati. Svi mi imamo nekakve svoje mušice v glavi.

Pondelek

Juha: Paradajzova juha
Glavno jelo: Gratinirane palačinke z mljevenim mesom, sezonska šalata
Desert: Znam da imate kolač od jučer

Tork


Juha: Podravkina z vrečice
Glavno jelo: Krmenadli na naglo, pomfrit, šalata od friškoga zelja
Desert: Ovo išče čašu pive

Sreda

Juha/Glavno jelo:Čušpajz od vugorki, faširanci
Desert: Šnenokli

Četrtek

Juha: Krem juha od mešanih semenki z krutonima
Glavno jelo: Pečena špicrebra, mladi krumpir, zelena šalata
Desert: Kompot od jabuki

Petek

Juha: Juha od škarpine (z leda naravno)
Glavno jelo: Kuhana škarpina, blitva i kuhani krumpir
Desert: Čaša vina

Subota

Juha/Glavno jelo: Špagete z povrčem; dajte si mašti na volju kaj se tiče izbora povrča i začina
Desert: Sigurno imate nekakav sok
Ak bum v goricama jelovnik bu čist drukčeši

Nedela

Juha: Janjeća juha z graškom i kašicom/noklecima
Glavno jelo:Kuhana janjetina, kuhani krumpir, šalša od paradajza
Desert: Pita od jagodi

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.