Moj profil
A kaj da danas kuham?" (517)
A kaj da danas kuham?" (517)

A kaj da danas kuham?" (517)

Retko bute našli Koprivničanca koj još ni bil na PRC-u (Podravkin rekracijski centar) i blagoval vu Kleti i Štaglju. Ja sam pak bil privilegiran jer sam stotine put biti tam z gostima, poslovnim partnerima ali, nebute verovali i privatno v kojekakvim prilikama. Sečam se vremena dok se na početku v Kleti moglo “zmrznuti” jer ni baš funkcioniralo grijanje v zimskim mesecima a sečam se i dok je v Štaglju još bil zemljeni pod baš kak je to negda bilo i v svim štagljima širom Podravine. Sečam se i kojekakvih promena koje su se dogodile i v interijeru, eksterijeru a bome i v jelovniku.

Štagelj kak obrazovni centar

Ovih sam dana videl informaciju kak se čeka da se otpre Štagelj i primi prve goste i naravno da je ta informacija pri meni izazvala dost znatiželje. Rada bi videl kak to danas zgleda i kaj to preuređeni Štagelj nudi svojim gostima. Ja vam bum pak ponudil malo sečanja na dane dok sam bil jako redoviti konzument njihovih usluga jer se v tom prostoru dogodilo jako puno lepih skupova z domačim ljudima, poslovnim ljudima a ni sam neznam broja kolko sam tu održal seminara i treninga. Čak sam bil i sukreator jednoga jelovnika nakon jednoga renoviranja Štaglja.

Negde oko ovoga nesretnoga rata v Podravkinom marketingu smo počeli razmišljati o Štaglju kak obrazovnom centru za potrebe školovanja kadrova svih fela kak nebi morali navek iskati nekakav prostor gde se more održati skup na kojem treba puno mira i tišine, prostor gde se buju sudionici nekoga skupa mogli koncentrirati na nekakvu korisnu temu. Morem vam reči da smo več daleko dogurali z pripremama oko celoga posla ali znate več: ratna vremena nisu baš pogodna za takve akcije a posebno ne za investicije. No ipak smo se snašli. Sam prostor Štaglja bi za vreme seminara pretvorili v učionicu. Ovisno o veličini grupe  složili bi stolove v prizemlju al niti na “tavanu” ni bilo loše. Nebi se mogel setiti kolko sam takvih seminara napravil al verujte da ih je bilo jako puno. Ono kaj je bilo važno imali smo navek puno mira i odličnu ponudu ugostiteljskih usluga. Posebno je bilo važno kaj smo v tom prostoru mojim seminarcima mogli pokazati svu raskoš Podravkinih proizvoda i mogučnosti pripreme vrhunskih delicija z tim proizvodima. Dobro se sečam oduševljenja Podravkinih suradnika koji bi dolazili z onih zemlji gde je Podravka imala svoje firme. Prodefilirali su čez taj prostor suradnici ze svih zemlji ex-Yu ali i z Mađarske, Slovačke, Češke i Poljske.

Posebno mi je v sečanju ostal jedan prigodni edukativni skup za naše menađere vu vreme dok se Podravka počela otpirati prema stranim tržištima. Dopelali smo čoveka zaduženoga za protokol, bil je svojevremeno zadužen i za Tuđmanov protokol, koj nam je održal kratki tečaj kak se ponašati za stolom z poslovnim partnerima v inozemstvu. Ono kaj posebno pamtim je bil jelovnik kojega smo slagali kolega Davor i ja. Počeli smo od hladnog i toplog predjela, prek juhe  do glavnoga jela i deserta. Sve je bilo v podravskom ali i internacionalnom stilu da vidimo kaj moremo ponuditi gostima dok dojdu v našu Podravinu ali i kaj nam se more dogoditi dok dojdemo nekam v beli svet. Za ponudu piča smo dopelali jednoga odličnoga somelijera Zagreba koje je z našim jelovnikom spasal piča od aperitiva do vina z jelom i desertom. Ne sečam se da se više igda tak dobro jelo i pilo kak tom prilikom v Štaglju.

I kaj da vam velim. Svoje seminare pamtim po mnogim mladim ljudima koji su prodefilirali čez moje programe ali i po nezaboravnim  delicijama koje su naši kuhari pripremali v svim tim prilikama.

Ono kaj sam gore spomenul da sam bil suautor pri kreiranju jelovnika i to vam je živa istina. Zapraf bila je oformljena jedna ekipa Podravkinih gastronoma, tehnologa, marketingaša, mene je takaj zapalo jedno mesto, z namerom da kreiramo za Štagelj, ali i Klet, celi jelovnik i podravske nazive tih jela. Moram vam reči da su to Podravci prihvatili baš onak z puno simpatija a gostima koji nisu baš doma z našom kajkavštinom to je bilo jako simpatično i zabavno samo kaj smo im tu i tam morali “prevesti” na hrvatski jezik.

Istine radi moram reči da smo neke seminare delali i v Podravkinom Muzeju prehrane koj je takaj imal odličnu kuhinju i divnu ekipu v kuhinji.

Zlatna kokoš

Podravkin marketing je takaj v Štaglju znal prirediti kojekakva događanja koja su baš pasala v taj ambijent. Posle jedne velke nagradne igre za juhe, glavna je nagrada bila kila zlata v obliku kokice. Morate priznati da je to jako atraktivna nagrada. Zvlačenje glavne nagrade, ali i desetine manjih nagradi,vodil je legendarni Oliver Mlakar, čovek koj je letima z Stevom Karapandžom delal emisiju “Male tajne velikih majstora kuhinje”. Ne sečam se ko je dobil zlatnu kokoš al se sečam da je v glazbenom delu glavna gošča bila Doris Dragović. Lepo smo se družili i još bolje blagovali.

Bilo je tu i promociji interesantnih kuharici, pa je tak jednu promoviral i naš poznati pisac i kritičar Igor Mandić. Dobro pamtim jednu zgodu z te promocije. Kak je Igor kak pravi Dalmatinec malo preveč falil tradiciju dalmatinske kuhinje, naš legendarni koprivnički novinar Vinko Česi Česka malo je zločesto potiho promrmljal:”On je još bil lignja dok smo mi kajkavci imali krapinskoga čoveka!”

Mnoge su firme svojevremeno tam negde v prosincu imale sindikalne večeri kakti oproštaj od staroga leta. Nemrete ni zamisliti bolji ambijent od Štaglja za tak nekaj. Kaj je interesantno da smo imali jedno leto čak i svoj bend sastavljen baš od marketingaša. Kolko se sečam tu su bili i svati Zvonka Mršića, vu vreme dok se još ni ni slutilo da bi jednog dana mogel biti predsednik uprave. Bili su tu i svati mojega kumčeta Slavojeve kčeri Eje ali v nekim novim vremenima dok ja više nisam bil Podravkaš.

Promocija moje knjige

Oni kaj me malo više poznaju znaju da sam svojedobno napisal i knjigu na temu moje profesije tak da nebute mislili da ja pišem samo o “krkanju i lokanju”. Naime kak sam se prije rata bavil v Podravki z psihologijom prodaje iliti prodajnim treningima, a v Lepoj Našoj ni bilo nikakve literature na tu temu, napisal sam jednu knjižicu z naslovom “Prodavati ali kako?” Bilo je to namenjeno našim trgovačkim putnikima ali i menadžerima v prodaji. Za to vam je bilo dosta interesa i izvan Podravke. No dok sam otišel z Podravke, bavil sam se još navek z istim poslom, pokazalo se da bi tu knjižicu trebalo malo doraditi i proširiti. Zapraf sam vam ja svoja predavanja i treninge pretvoril v jedan praktičan priručnik. Moj pokojni suradnik Ivan Haramija Hans je sve to lepo ilustriral svojim karikaturama. Morem vam reči da je to za ono vreme bilo jako traženo štivo. Naravno da je pomogla i Podravka. Promociju smo napravili v Štaglju a Podravkini kuhari su mi napravili jedan bogati švedski stol za moje goste i mnogobrojne prijatele.

Posle službene promocije goste su zabavljali naši Kraluši i naš pajdaš Krešimir Trumbetaš Boč

Moram spomenuti i jedan velki doživljaj koj je još jemput dal do znanja Koprivničancima da imamo jednoga fakat velkoga umjetnika, našeg sugrađana Atača. V Štaglju mu je visoku francusku kulturnu nagradu dodelila sama francuska ambasadorica v Lepoj Našoj. Kaj to ni velka stvar? Posle svih lepih reči i Atačeve zahvale jedino kaj smo opet mogli napraviti da sve to okrunimo dobrom papicom i čašom vina i tak nazdravimo i čestitamo dragom prijatelu na toj velkoj nagradi. Konačno on je to itekak zavredel. Pak je on jedan od kreatora i realizatora i Pivnice, i Kleti i Štaglja i još puno toga v Podravki i Koprivnici.

Jedva čekam da Štagelj pak širom otpre svoja vrata i Koprivničancima i drugim radoznalim gostima.   

Ja vam se od vremena do vremena naluknem v onu staru kuharicu “100 Vegeta specijaliteta” jer verujte da je još navek jako od koristi. Bum ovaj tjedan nekaj zbral baš z nje.

Pondelek

Juha/Glavno jelo: Povrtno-mesni ragu
Desert: Ogulite koju mandarinu

Tork

Juha/Glavno jelo: Seljački složenac;v to vam ide svega pomalo: od frišketine, malo suhoga mesa do kojekakvoga povrča. Nemrete fulati.
Desert: Spašite si nekaj sami.

Sreda

Juha:Prežgana juha z kašicom
Glavno jelo: Omlet od šunke, šalata
Desert:Kompot od jabuki

Četrtek

Juha. Zemite jednu Podravkinu
Glavno jelo:Musaka od rezanci, šalata; mesto mlevenoga mesa morete ju napraviti recimo z povrčem ili gljivama.
Desert:Puding od vanilije

Petek

Juha/Glavno jelo:Kaubojski grah; za to trebate suho meso al morete skoristiti i ostanjke šunke koja vam je morti ostala od Vuzma
Desert: Najte razmišljati: gemišt-dva

Subota

Lepo je proletno vreme i napravite si nekaj v goricama/prirodi.
Predjelo: Kak i navek: od sega pomalo
Glavno jelo: Bogati roštilj ze svim prilogima koji vam pašu; dobro dojde i kotlovina kak varijanta B.
Desert: To znate i bez mene.

Nedela

Juha: Juha od mešanoga povrča
Glavno jelo: Rolada od carskoga, pečeni krumpir, matovilec; mesto carskoga morete rabiti vratinu ak ju lepo razrežete tak kaj dobite malu “plafticu”. Filu napravite po vlastitoj inspiraciji.
Desert: Štrukli sirom

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.