Moj profil
A kaj da danas kuham? (510)
A kaj da danas kuham? (510)

A kaj da danas kuham? (510)

14.2.2021.ivan944

Dok se ljudi naviknuna dobru papici i ugodan ambijent, počneju o tome pripovedati i priča se brzo proširi. Zovu te i zvani i nezvani, pa se to pomalo pretvori v restoran „Pri veselom bedaku“. Najte misliti da je to bilo meni žal. Dok sam mogel ljudima ugoditi zakaj ne?

Mali gastronomski razgovori (2)

Jučer je bilo Valentinovo i vaš je bloger naprosto zaboravil za nedelu 14. 2. predložiti malo bolši jelovnik. Nadam se da ste i bez mojega predloga napravili onak baš malo bolši obed. Z malim zakašnjenjem SVIM ZALJUBLJENIMA I SVIM DRUGIM LJUDIMA DOBRE VOLJE SRETNO VALENTINOVO!

Ko su bili moji gosti?

Kak sam i napisal na kraju prošloga broja tjedna oko ove teme ima kojekakvih lepih priči.

Bum se vrnul na onu vrpu jelenjega mesa koja je ostala iza onoga plemenitaškoga lova. “I kaj sad z tim mesom?” Baš tak me je pital naš domačin.Velim ja njemu:”Čuj. Bumo napravili od toga jelenje kobase.” Onda je sledila njegova čuvena rečenica:”Ma boga ti materina te ti boga materina kako češ napraviti kobase od jelena?” Očito čovek ni imal baš ideju kaj delati z takvim mesom. Na brzinu sam mu dal upute:”Nabavil buš par kil špeka i začine a ostalo prepusti Slavoju i meni!” I fakat. Dva dana kasneše sve smo to zmleli, začinili i dobro zmešali. Zišla je lepa vrpa kobasi. Dok smo napravili probu z nekolko pari pečenih kobasi naš domačin ni mogel dojti k sebi da se tak nekaj more dobiti od jelenetine. Kakti za plaču smo i mi dobili nekolko pari te čuvene delicije.

Jako se rado setim mojega mentora i gospona Dietera Sommera. Upoznal sam ga 2001. v Njemačkoj dok sam bil na usavršavanju v jednoj autokuči za koju sam delal v Hrvatskoj prek deset let. Dieter i ja smo kliknuli več na prvom susretu iako sam ja bil malo oprezan dok su v pitanju poslovni odnosi z Njemcima. Posle četri odlaska v Augsburg nas smo dvojica bili i suradnici ali i prijateli. Strašno mi je puno pomogel v mojem usavršavanju na području edukacije v autobranši al je najvažneše da smo se našli na istoj liniji kaj se tiče papice. Čovek je obožaval jesti pa sam mu omogučil da upozna našu hrvatsku kuhinju. Pozval sam ga na godišnji odmor v Lepu Našu i ukratko to vam je zgledalo ovak. Najprije smo bili dva dana v Koprivnici i naravno da smo bili i v Draganovcu. Bil je prekrasan dan baš tak da moreš uživati v prirodi.

shimmer fallback

Malo društvo posle blagovanja v opuštenom razgovoru. Familije Sommer i Ferenčak v hladu Fjakinoga podolja. Chef Slavo nas pažljivo prati.

Treči smo dan krenuli prema Jadranu, posetili Plitvice i našli se na obedu pri mojim kumovina v Kaštel Novom. Posle obeda z dalmatinskim specijalitetima kak su pršut i sir, filana paprika i lešo janjetina, krenuli smo trajektom prema Braču na naše staro odredište v Milni v uvali Osibova. Tu smo čez deset dana šarali z jelovnikom od plodova mora i ribe, prek roštilja do čušpajzi na podravski način. Đuro se pobrinula da bu svega za desert: od palačinki do štrukli. I da zaključim. Dieter i njegva gospođa Regina su se zaljubili v Lepu Našu, v Jadran i naravno v našu gastronomiju. Letima se dopisujemo iako je korona malo poremetila naše redovito dopisivanje. Moram ovih dana proveriti kaj se događa z familijom Sommer.

Puno naših gostiju su bili jako često ljudi kojima je bil pun kufer hotela z pet zvezdica i restorana pa im je Draganovec bil dobro došlo osveženje. Ugostili smo profesore ze zagrebačkog  Tehnološkog fakulteta i profesore z varaždinskoga FOI-a. Varaždinci su nam i žestoko uzvratili i počastili nas jednodnevnim izletom na Urban- i Varaždin breg. No jemput smo v mojoj kleti Slavo i ja ugostili “koprivnički AFŽ”. Nesmem vam otkriti imena tih dama al vam moram reči da je bilo jako veseo. Mi smo napravili dobru večeru a one odličan štimung. Jedna je od njih donesla harmoniku i morem vam reči da se z malom pomoči gemišta na veliko popevalo.

Pamtim i jednu ekipu velkoga poslovnoga partnera z Češke. Posle službenih razgovora v Podravki šteli su videti i nekaj mimo protokla pa smo ih naravno otpelali, a kam ako ne v Draganovec. Ovaj put su se za štimung pobrinuli “Kraluši”, naš verni kučni bend. Bilo kuda “Kraluši” svuda. Trošek zanemariv a takvi se događaji ne zaboravljaju.

I još jedan nezaboravni događaj vezan uz gospona Schustera, Njemca nekadašnjeg velikog Podravkinog poslovnog partnera. Taj je mam na početku rekel da ga ne zanimaju nikakvi restorani jer “celi život putuje po svetu i puna mu je kapa i hotela i njihovih specijaliteta”. Još je napomenul da se ne želi dugo zadržavati. Najduže do sedme vure. Naime bil je več gospon v letima. Trebal bi vam na dugačko i na široko pripovedati kak je  zgledala naša ponuda pa bum onak telegrafski. Od aperitiva z rakijicom i kriškama kruške i grozdeki koje je sam rezal, prek domače juhe z rezancima, pečenja v peči na drva, domačega gemišta i do kostanji pečeni na velkoj vatri od loze. Čovek je “poludel” od zadovoljstva i ugođaja. Za štimung se pobrinul v ono vreme popularni koprivnički tamburaški bend “Dr Jelić i prijatelji”. Rezultat: čovek i njegova ekipa su ostali do iza polnoči a svi smo dobili poziv na njegovo privatno jezero v Njemačkoj kraj grada Ulma. To smo fakat i realizirali taman nekak pred sam početak rata. Čovek je skoro celu našu ekipu ugostil između ostaloga i na svojemu privatnom jezeru. Ko veli da su Njemci zdeni i negostoljubivi?

shimmer fallback

Gospon Schuster priprema tradicionalnu juhu od luka i kobasici, specijalitet svojega kraja. Podravci ga pažljivo pratiju.

MN: O čemu sam negda maštal?

Več je odavno “prešla baba z kolačima” al sam fakat negda razmišljal da bi bilo lepo napraviti jedan mali gorički objektič gde bi mogel primiti tak oko desetak odabranih gostiju koji očeju nekaj drukčeše od standardne  birtaške ponude i ugođaja. Jest da je to posel al mi se i z današnje perspektive čini da bi to uspelo. Imaš lepi izbor domače rakijice, fina predjele kojima ni zbirljivi gosti nemreju prigovoriti, nekolko podravskih glavnih jela ala “tak su kuhale naše bake”, koje malo doteraš, a deserti moreju biti samo nekaj ala diganci i štrukli. Pijača isključivo vino i gemišt. Pive ni blizu. Sve v svemu skoro sam siguran da bi to jako dobro delalo ali...? Znate več. Došel je rat i život se obrne v nekakvom drugom smeru. 

Negda smo neki moji istomišlenici i ja razmišljali o još nečemu. O Koprivnici kak “gastronomskom centru sveta” ili bar Lepe Naše. Je da imamo pivnicu „Kraluš“ i PRC-a al bi i cela Koprivnica trebala biti v tom znaku. Pa kaj Podravka ni največa kuhinja v ovome delu sveta? Hrana je ono kaj ljude privlači i nekak mi se čini da bi gomile ljubitelja dobre papice jako rado dolazile v naš lepi grad Koprivnicu i okolicu. Z velkoga iskustva znam da je za mnoge ljude bivše države Podravka i Vegeta bila poznateša nego Koprivnica. 

Malo Koprivničanci zna da se svojevremeno v Koprivnici jako dobro jelo  v Podrakinom Muzeju prehrane na staroj klaonici. Osim samoga muzeja tu su bile preuređene prostorije gde su se mogli održavati neki sastanki a ja sam tam napravil bezbroj seminara. Naravno da je tu bila i kuhinja v kojoj je bil profesionalni kuhar al i ženice, kakti pomočna radna snaga. Verujte da sam se baš veselil dok su samo one kuhale. Nisu bile dobre. Bile su sjajne kuharice.

Pondelek

Juha/Glavno jelo: Vinski gulaš z malo krumpira
Desert:
Sigurno bute imali kremšnite od jučer

Tork

Juha: Prežgana juha z jajcima i krutonima
Glavno jelo: Pečeni krumpir na plošte z nekolko šniti špeka, šalata od kiseloga zelja
Desert: Pogačice sirom; popite i lagani gemišt

Sreda

Juha/Glavno jelo: Čušpajz od poriluka suhim mesom ili kobasama
Desert: Kuruzna zlevanjka

Četrtek

Juha: Paradajzova juha z noklecima
Glavno jelo: Štefani pečenje, restani krumpir, kiseli krastavci
Desert: Kompot od breskvi

Petek

Juha: Krem juha od kozici
Glavno jelo:Pečeni brancin, lešo blitva z krumpirom
Desert: Čaša dobroga vina

Subota

Juha/Glavno jelo: Lazanje; to več dugo nisno jeli; mesto lazanji morete napraviti i mesnu pitu
Desert: Čaša pive

Nedela

Juha: Juha od mrkvice i graška z kašicom
Glavno jelo: Piletina na pariški, rizbizi, šalata
Desert: Kremšnite

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.