Moj profil
A kaj da danas kuham? (506)
A kaj da danas kuham? (506)

A kaj da danas kuham? (506)

17.1.2021.ivan944

Da su nekakva normalna vremena danas bi počele pripreme za tradicionalno Vincekovo, koje se v ovim našim kajkavskim krajevima slavi od navek dvadeset i drugoga sečnja (22. 1.). V ovim vremenima dragi moji Coolinaričari samo se moremo podsečati kak je to bilo još pred samo leto dana.   

Vincekovo bez Vincekova

Moram priznati da je ovo jako tužan tjedan za sve vinogradare v našemu kraju a predpostavljam i v drugim goričkim krajima. Verojatno se bu našla tu i tam neka manja klapica, malobrojna pajdašija koja bu otišla do gorici, odrezala koju lozicu, popila koju čašu vinčeka tel tolko da se običaji ne zateru. Kaj bum ja napravil v petek još nisam siguran al bum probal nagovoriti Jana i kojega njegvoga pajdaša da časkom skoknemo do gorici i toj mladoj generaciji prenesem bar delič onoga kaj mi stareši delalmo več desetlečima. Nije to ono pravo al bolje i to nego da nebu baš nikoga na taj dan v kleti.

Z tugom se sečam prošloga Vincekova dok još nismo ni slutili kaj se bu dogodili i ni v snu nismo mogli zamisliti da bu to i zadnja gorička pajdašina tokom prošloga leta.

Kak i letima prije otišel sam dan prije v klet da naložim onoga velkoga kamina koj grije dve vekše prostorije. V kuhinji mi je lako. Šest kvadrata prostora, velka zidana peč z dva rola je topla za dvajst minut. Dok nekaj malo povečeram, zavlečem se v onaj svoj starinski krevet, složim si nekakvu meni dragu mužiku, zemem kakvu knjigu ili križaljku i svakih vuru-dve hitim v peč kakvu kladu. Do dolaska pajdašije v jutro klet mora biti topla da se more komotno sedeti i spominjati se o događajima između Martinja i Vincekova. Oko devete vure navek je prvi došel Slavo z kojim bi dogovoril kak bumo dočekali ostatak klape. Dogovor bi tekel z kojim štamprlom rakijice i za Slavoja obavezna turska kavica. Od desete vure do podne bi stigla več cela klapa pa čak i ona naša tojica Zagreba: Boč, Joso i Atač.


Slavo na svojem „radnom mestu“

shimmer fallback

Onda bi trebali videti kak je v jenom momentu „okičen“ stol v kuhinji. Na njemu nema čega nema. Osim kaj Slavo počne rezati nezaobilaznog Podravkinog jegera, svaki od nas nekaj donese kakti svoj prilog za predjelo. Ima tu bar tri-četri vrste kobasi, tolko špeka, prezvuršt, nekolko vrsti sira, puterštangice i bar tri vrste kruha. Joso bi znal donesti čak i debele, crne, pečene masline koje je posebno obožaval Pepek. Nisu baš podravska tradicija al verujte da su pasale. Pomalo se prešlo na gemišt i dogovor gda se bu krenulo v trsje kak bi se obavilo ono kaj taj dan mora napraviti svaki pravi kletodomačin. Okupimo se oko trsa, domačin odreže pet lozi koje buju završile vu vazi kak bi za koj dan hitile mlade listeke i tak prognozirale kakvo bu goričko leto. I ovi naši Zagrepčani si rado zemu koju lozicu tak da imaju falačec gorici v zagrebačkom stanu. I naravno: popijemo svaki po gemišt ali i zalejemo malo trseka.

Obed na Vincekovo je počnjal negde posle druge vure. Stareši posedaju oko velkoga stola, Slavo sve posloži na peči a Braco kakti jedan od najmlajših posluži ozbiljnu pajdašiju. Kruno  i Robi najmlajši među nama  se izmenjuju v ulogi fiškuša. Te stare regule su negda davno naši stari preuzeli z literature Ksavera Šandora Gjalskoga  a mi uglavnom od Fjakinoga dede Jendraša koj je jako držal do tradicije. Velko je pitanje dal bu neko imal to naslediti od nas?

Vincekovo ni nigda moglo prejti da se ne setimo našega velkoga pokojnog pajdaša Vinka Česija Česke  koj je sve obaveze na taj dan otkazal i došel na pajdašiju v Koprivnicu i v naš Draganovec. Kak je puno toga napisal o goričnim običajima nemre prejti ni jedno Vincekovo, a bome ni Martinje, da ne prečitamo opis kojega goričkoga prigodnoga događaja. Tolko sam put več citiral njegve reči pa bum za ovaj put izvlekel sam jednu prigodnu rečenicu o Vincekovu z jedne od njegvih knjiga.

shimmer fallback



Veteran Boč i kletodomačin režu lozu na zadnjem Vincekovom

Prvo godišnje hodočašće u vinograde, kao obećanu zemlju. Jer, tko na Sv.Vinka ne uđe u trsje i ne odreže- još snijegom pokrivenu i ledenu lozu- gotovo i „nije pravi goričar“…

VINCEKOVA VIJEK NEK TRAJU VINOGRADI DOBRA RODA DAJU.

Kak bu to zgledalo ovo leto to vam nemrem reči al verujte da bu ja tužno. Otišel bum v gorice z Janom i Đurom, odrezali bumo koju lozicu i popili kupicu vina za sve one koji z nama više nisu il v ovome momentu nemreju biti. Duboko se nadam da ovoletnje Martinje nebu v takvoj atmosferi. Bez pajdašije nema ni goričkih svetki. Kak je to zgledalo bum vam napisal nekaj drugi tjedan.

Ak vam je falel prošloga tjedna jelovnik nadam se da bum vam ovaj tjedan pomogel.

Pondelek

Juha: Krem juha od mešanoga povrča z kašicom
Glavno jelo: Musaka od kelja
Desert: Puding

Tork

Juha/Glavno jelo: Čušpajz od poriluka i suho meso
Desert: Čaša gemišta

Sreda

Juha: Koprova juha z krutonima
Glavno jelo: Piletina na češnjaku, domači rezanci ili fuži
Desert: Nekakav sok

Četrtek

Juha: Prežgana juha z rižinim rezancima
Glavno jelo: Francuski krumpir, cikla
Desert: Šnenokli

Petek

Ovak je na Vincekovo zgledal jelovnik pedesetak let. Ja si bum probal doma skombinirati malo skromnešu varijantu ovoga tradicionalnoga jelovnika. Buju me pratili Jan i Đuro. Nemrete tak nemaj blogovati sami.

Aperitiv: Rakijica. Bilo je kojekavih al je najbolšu prođu imala od marelice ili tepke ruške
Predjelo:
Onak kak sam spomenul v gornjem tekstu: od svega pomalo
Glavno jelo: Bočing v pikantnom saftu od češnjaka, temfani grah, šalata od kiseloga zelja z koščičim uljem

V nekaj mlajšim letima je svakak za večeru bil i sekeli gulaš.

Desert: Krakojeva kuruzna zlevanjka i gemišta kolko ko more i oče

Subota

Makar bu to onak samo „imitacija“ obeda od Vincekova mislim da bu sigurno nekaj ostalo od jučer al bum dodal samo nekakvu kiselu juhu.

Nedela

Nek bu klasičan podravski obed
Juha: Anjgemahtec
Glavno jelo:Pohana piletina, pečeni krumpir v masti od pohanja, šalata
Desert:Verojatno štrukli z jabukama;
treba potrošiti one jabuke z podruma

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.