Moj profil

A kaj da danas kuham? (481)

26.7.2020.ivan944

Evo tek pri trečemu nastavku ovoga mojega „putovanja“ po Draganovcu vidim da sam napravil jednu „veliku“ grešku. Naime i sveti Vid, gde su bile gorice mojega Blaža, su zapraf takaj vu Draganovcu. Bilo bi nekak točneše da sam napisa „Od sv Vida do Mirnoga dola“. Nadam se da mi stari Draganovčani nebuju zamerili.

Od sv Vida do Draganovca (3)

Morti mislite da smo mi negda v goricama samo krkali i pili? Ma ni govora. Bilo je tu svega al se je to nekak sve lakše događalo z čašom gemišta v ruki. Zapraf bi štel podsetiti na neke događaje koji se pamte, na ljude koji su dolazili v te naše gorice al i spripovedati neke anegdote kojih se jako rado setim. Od kupovine goric mi smo udvostručili kapacitet podolja a v slučaju kakve vremenske nepogode imali smo i lepi prostor v kletima.

Negda nam je taj kapacitet baš bil jako potreban jer se najemput znalo na istome mestu najti i prek pedeset ljudi. Pogotovo dok bi Atač dopelal hrpu kulturnjaki i druge pajdašije Zagreba. A dok je saki čas puno ljudi na jednom mestu z dobrom papicom i dobrim gemištom, zna se kojekaj dogoditi kaj je vredno zapisati. Puno je tih anegdota baš z nekim poznatima, danas bi se reklo selebritima, koji su rado dolazili v Podravinu. Da se najprije podsetim zgodica vezano za klopu.

Atač je od navek bil zbirljiv kaj se tiče klope pa je mislil da su takvi i njegvi gosti. I tak jemput on kontrolira kaj sve imamo ponuditi njegvim gostima i spazi nekaj njemu nepoznato:

Atač:“Kaj je to?”

Hus: “Brizli. Juneče žlezde!”

Atač:”Jeste vi normalni. Pa ko bu to jel?”

Dolazi vrpa ljudi na podolje i mam prilazi stolu na kojem je bilo sve kaj je trebalo speči na roštilju. Među njima je bil i čuveni kazališni režiser Petar Selem koj je dignul poklopca od ranjgle i zakiknul:”Ljudi. Pa to su brizli!” Atač više ni imal kaj za reči.

Inače ti Zagrepčani i nisu bili baš preveč zbirljivi al dobroga apetita su navek bili. I bome jemput se dogodilo da smo potrošili sve kaj smo pripremili, približavala se polnoč a društvo je još navek bilo razigrano. Kaj ponuditi? I odlučim: skuhal bum prežganu juhu i dodal suhoga kruha. Trebali ste to videti. Navodno da tak dobru juhu još nisu nigda jeli.

Jemput sam se pak ja jako “proslavil”. Štel sam biti jako pametan pa sam odlučil da napravimo nekolko tzv gangova kaj bu zgledalo kak vu finim restoranima.Posle rakijice, dali bumo jedno lagano predjelo z jegerom, špekom i ribljom paštetom. Onak kak se delaju deci pajdašeki. V dva-tri navrata veli meni Hus:”Čuj Ivo. Mogli bi početi peči roštilja!” “Pusti to Slavo meni. Znam ja kaj delam!” No brzo su se gosti počeli pogledavati a v očima si videl:”Gde je nekaj konkretno?”. Kad smo počeli peči stajali su v redu ze svojom šnitom kruha v ruki i čekali da im nekaj udjelimo. 

Dok smo jednom zgodom bili skoro več na odlasku navrnulo je nekolko pajdaši kakti slučajno na gemišt a bili su i gladni. Podelili smo ono malo kaj smo još imali al kak se kum Fjaka kak dobar domačin osečal odgovoran za “nestašicu” malo je podviknul:”Ivo. Kaj bum ja moral abdicirati?” I kaj sad? Imali smo još skoro celu štrucu kruha i glavicu češnjaka. Prepekel sam na tavi nekolko šniti kruha i fest ih narajbal z češnjakom. Svi su se složili da se iza toga fakat more v tečno popiti gemišt.

Teško mi se setiti svih tih poznatih faca al je kroz te gorice prodelifiralo na desetke likova koji su nekaj značili v kulturnom živoru Zagreba. Tak je posle jednoga snimanja za televiziju jednom prilikom na pajdašiji bil i naš Podravec Martin Sagner Dudek. Sečam se Jasmine Nikić i njezinoga supruga Mladena, veliki glumci Vanja Drach, Rade Šerbeđija i Drago Krča, akademik Tonko Marojević, bivši ministar Božo Biškupić ali i naš hlebinski naivac Jožek Generalić. Meni je pak bilo drago kaj je jemput svojom familijom došel i Zvonko Špišić z kojim je naš bend negda i nastupal.

Dobra čaša vina znala je biti poticaj i za nekakav malo neobičan događaj v goricama. Znalo se recimo i recitirati. I tak se jednom prilikom najde na kupu nekolko poznatih ljudi koji su odlučili recitirati našega Frana Galovića. Najprije je to onak dost korektno obavil Drago Krča, nije on baš pravi kajkavec, a onda se toga posla prijel Tonko Marojević. Nek mi ne zameri al moram reči: ipak je on Dalmatinec. Kaj mislite ko je to napravil kak bog zapoveda? Naš Podravec Joško Gudić. Stari Brežančan koj je letima imal i gorice v neposrednoj blizini Galovićeve kleti. Kak je bil dugogodišnji direktor i glumac v našem GAK-u znal nam je ugoditi i z drugim lepim pesmicama. Dok je videl da smo “zreli” često je odrecitiral Jesenjivovu čuvenu popevku “Pismo majci”.

Jedne se zgode jako dobro sečam. Naš poznati podravski slikar Joža Turković i naš Vinko Česi dopelali su na jednu pajdašiju jednoga Večernjakovoga novinara Dalmatinca. Taj je mam na početku podcenil delovanje Fjakine graševine i rekel kak on “neče piti gemišt od tog kiseliš, nego če piti cilo”. I kaj se dogodilo? Najprije je počel pisati nekakve svoje stihove po zidu, nekaj recitirati al ga je Joža brzo moral otpelati na spanje. Nakon par dana smo sreli Jožu koj nas je ukoril:”Kaj ste to napravili od čoveka. Uneredil mi je celu hižu a celo prijepodne sam se moral z njim šetati po dravskome nasipu”.

Kak smo velka klapa čez leto se se skupilo puno ”radnih dana” za kojekakve svetke i proslave. Zadnji put sam napisal da se doma pri Fjaki slavilo Jendraševo a moram dodati da se doma obilježavalo i Štefanje pri Pepeku Šestaku. Sve ostalo se događalo pri Fjaki ili pri meni v goricama. Ja sam v zadnjih dvadesetak let nekak imal malu prednost za okupljanja za lošega vremena jer sam napravil v kleti malo više komfora. Mi smo ipak ozbiljna gospoda i malo smo več razmaženi. Kolko smo sve skupa obavili rođendani, novih leta i drugih svetki to niko nezna. Ja se pak dobro sečam da sam pri Fjaki imal svoje druge zaruke a znal sam k njemu dopelati i i poslovne partnere. Ak se pak dobro sečam pri meni je nekaj poslovnih partnera prodefiliralo. Bili su tu Njemci, Česi, Slovaci ali i profesori ze zagrebačkih i varaždinskih fakulteti.

Pajdašica i kuma Biba i ja smo proslavili nebrojene rođendane jer se nekak dogodilo da su nam rođendani jen do drugoga. Nebumo valda kak šparni Podravci delali dva rođendana. Ista klapa, ob jednom strošku obilježimo taj događaj samo kaj naši gosti moraju odjemput kupiti dva dara.

Ima nekaj kaj mi v ovim vremenima jako fali: jedan intimni ugođaj v malome društvu. Pri Fjaki smo znali za kišnoga vremena sedeti v saletlu, nekaj pomalo grickati, pijuckati gemišta i razglabati o kojekekvim “svetskim problemima”. Za ovih pak srpanjskih  dana dok su jako dugi dani, znali smo na podolju sedeti i do desete vure navečer. Nisu nam smetali komarci a verujte da nigda nije falelo ni teme za razgovor. Zimski su pak dani bili najlepši kraj stare zidane peči, društvo od pet-šest ljudi i, negda dost često, dečki bi hitili  nekolko partija bele. Kak ja dugo nisam znal kartati verojatno pogađate da sam bil zadužen za pripremu pajdašeki i nošenje friške litre i vode.

Skoro sam zaboravil. V nekim ranešim letima imali smo običaj obilaziti našu pajdašiju po brdu. Napravili bi jedan mali križni put da vidimo kaj nam međaši delaju. Krenete prema Iveku Blažeku, on nam se srečom još dobri drži, navrnete do Mireka Dolenca, spustite se kraj Iceka i Jelice do Đureka, pogledate kaj dela Stevo  a več vas zove na gemišt i Pavel. Negda bi pak krenuli malo do Stipe, Gustija ili pak prošetali do našega Čvrknje. Celi je breg nekak odisal jednom ugodnom pajdaškom atmosferom. Danas nažalost nemam više kam otijti. Ostala su samo sečanja na te divne ljude.

Pondelek

Juha/Glavno jelo: Sataraš
Desert:
Kolači bu od jučer

Tork

Juha/Glavno jelo: Čušpajz od krastavci z faširancima
Desert:
Ak vam se da spečite palačinke

Sreda

Juha: Juha od mešanoga povrča
Glavno jelo: Špinat, jajca na oko, pohani kruh
Desert:
Nekakvo voče

Četrtek

Juha: Koprova juha z krutonima
Glavno jelo: Pileči rižoto, šalata
Desert: Sok

Petek

Juha/Glavno jelo: Fileki z grahom; stvar je jako jednostavna. Fileke napravite kak i navek, može i bez špeka, i na kraju dodate kuhanoga graha i dobro začinite. Količine graha odredite prema količini fileka.
Desert:
Z filekima mi je navek pasalo malo pivo.

Subota

Ote v prirodu i napravite si za familiju mali roštilj
Predjelo: Od svega pomalo: nekakav jeger, kobasu i dobar sir.
Z tim se zabavljate dok napravite vatru.
Glavno jelo:Mešani roštilj
onak svega pomalo: malo vratine/krmenadla, carsko meso, koj falačec piletine, roštilj-kobase, nekolko čevapa i ražnjiča. Priloge dodajte kak ekipi paše.
Desert: Mislim da to i sami znate.

Nedela

Juha: Juha od junečih kostiju
Glavno jelo: Juneče rolice v saftu, tzv španjolske ptičice, nudli od kolko-tolko testa, šalata
Desert: Čupavci;
veli Đuro da se to tak zove.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.