NEKAD SE ZNALO...

Nekad se znalo da li će stara Verka dočekat zimu i kako se zovu dica u mistu i čiji su i u koju skulu gredu. Po škurama se znalo koji vitar puše i oćel stat il će polako fermavat.

Niko ni jema leroj , a svi su znali kolko je uri. U poju pogledaš u sunce i znaš da je dosta za danas.

Po zvuku se znalo koji vapor ulazi u porat. Svi su ga čekali ka da je fešta. Iz grada stizala pošta koju je pošćer Jure ubaciva u veliku boršu, pisma i koji paket. Oćel Stipe stić sa budućon? Eno Tonke i male Anke. Daj skoči, pomozi jon s kuferima!

Znalo se kome zvona tuku kad im ni ura i dal će noćas bit ribe.

Znalo se kaće furešti arivati i kome lipa Kate drži otvorenu ponistru.

Znalo se u koga su najdebje gujice i koja dica ne liču na očeve.

Znalo se ko ča kuva - bilo je dovojno prostrit neku veštu na tiramol i provirit kroza susidovu  ponistru. ( A nije ni mirakul sve znat kad su sve ponistre gledale jedna u drugu.)

Znalo se da Jure neće vratit vriće za lavandu ni ove godine i koja će mu budala jopet ponovo dat. Čak je i ćoravi Stipe zna po nečemu čije su mudantine na špagu.

Sve se to znalo jer se uvik ponavljalo.

Znalo se kaće doć Dinko i Anica sa onom smišnom dicom. Pa će se puni borši i kufera popet uz Jadransku kod svojih – treća vrata desno. A dica ka dica - oma će tit na kupanje. Uveče bi dugo ostajali uz ribu i bičerine,  uz smij i radost ča su opet svi zajedno.

Lita su onda bila duga, a opet kratka ča se sve tilo...

A tribalo je isplanirat kaće se kaić piturat, treba li zakrpit mriže, ča jema u poju, oćel bit grozdja, imal ribe i di su dobre pošte. Ko je od prošle zime umra, a ko je skoro krepa.

E, nekad se skoro sve znalo...

I da se vaja ustat kad projde Tonko sa tovaron i ča znači kad laste nisko letu i da sutra neće biti kruva. A znalo se di se gola kupa lipa Švabica i zašta se baš tu stalno čuvaju maslinjaci.

Nekoliko godina prin iz Australije se vratija barba Đoni oliti moj stric Ivo po naški.E ča je on gušta pričat kakva su tamo čuda, kako su sloni ka općina , a zmije duže od rive. I mi dica smo znali da laže, ali on je tako lipo laga. Jedino se ni znalo za koliko će slagat.

A vrime je curilo, curilo ka tanki mlaz mirisne lavande iz lambika. I ka da je odjednon iscurilo.

Baba Verka je umrla u lito gospodnje 1967. kad me vapor odnija u bili svit. Skula se zatvorila, ono par dice gre u susidno misto il su u Splitu il Zagrebu. Škure su na novin kućama zaminile rolete pa se ne more znat koji vitar puše. A i vitrovima nije više za virovat - maestral podbaci usrid lita, marčane bure priskaču svoj misec.

Sad svi jemaju leroje, al ne znadu koja je ura. Jer da znadu ne bi ustajali iza podne i ligali u zoru. Jedino još moja stara Lukica i Tonči ligaju s kokošiman i dižu se s pivcima.

Vapor je presta dolazit u naše misto davno, nerentabilno rekli.

Zvoni samo po nediji kad dojde mladi popić iz susidneg mista. Priostalo malo svita, skoro sve starčad. (Biće i to nerentabilno?) Od ribara ostali samo Joškovi i to usitno. Ne isplati se. Za jednu noć na ribe more se od furešti duplo naplatiti za afitavanje.

E, bravo,  jedino turisti dolazu, to se ni prominilo. Ma sad dolaze priko svake mire. Kate je utekla u Auštriju s jednin momkon ča je litova prikoputa.

Nima si više cura za odmiravat, ostarile. Dica s poznatin i nepoznatin očevima davno otišla u gradove za poslon.

Niko skoro ne stoji u starin kalama, tisne in i kale i kuće. Izgradili nove u poju, stare propale. Kakoš znat ko šta kuva?!

Jure se domalo bacija u turizan, lavandu zapustija, prista straj o nevraćanja vrića. Sad ne znaš više kolko ima budala. Ćoravi Stipe, Bog da mu dušu prosti, umra u sritnen momentu, kolpalo ga kad je...ma znate.

Davno nima Dinka i Anice ni njiove smišne dice, ne dolazu. Dinko i Anica umrli, dici misto postalo premali jerbo su oni postali preveliki. Jadranska se sad zove Alojzija Stepinca.

Niko ništa ne planira. Zarad čega? Kaići, Bogu fala, plastični pa ni potribe pituravat. Mriže krpaju još oni Joškovi i to domalo. U poju drača, kakvo grozdje, kakva jematva. Umire se sve manje jerbo je sve manje zimskog svita. Liti se ne računaju Česi ča otplivaju i otplutaju u smiraj i Švabe čije srce ni dočekalo gliser.

Ne ustaje se više stariman, Tonko i njegov tovar su partili pod zemju i s njima svaki red. Laste ne dolazu odavno. Kruva jema, al ni sladak ka nekad. Gola Švabica nije nikom više zanimljiva da bi neko čuča po zvizdanu, pa makar i u ladu maslinika kojih, začudo, još jema jerbo je sad moda gojit masline. Vidija san ih čak u gradu kad san lani dolazija.

Dici nima  ko lipo pričat, makar laži ka moj pokojni barba Đoni. Zauzeti, zaposleni, užurbani. A sigur bi in i te priče bile dosadne – sve oni to jednin klikon znadu.

En ti pasa i ćunku...i sve!

Zapravo san osta samo ja. Više nisan ni dite ni čovik ni starac. Ništa san.

Ovdi san iza sedan gora i sedan mora. Ovdi ni važno ča puše, kad počinje jematva i dal će masline rodit. Ovdi so ne štipje oči, ovdi vali ne tuku. Ovdi niko ovo ništa ne zna.

I sve ča je u banku da bi za kašetu srdela tek istrešeni iz puni mriž. Nisan gladan - samo da pomirišen friškinu...