ČA SE ODUVIK KUVALO U MOJOJ FAMILIJI (2.dil)

SJEVER ZONA - Kuvanje kad me još ni bilo

Početak tvog početka ni lako i jednostavno za reć kad je. Početak tvog početka ni isti ka ča ti piše u matičnin knjigama. Početak tvog početka more odudarat od službenog po nekolko godin. Početak tvog početka je od kad pantiš sebe. Početak tvog početka je dokle ti dopiru sićanja. Sve drugo nisi bija ti sam, nego ti je ispričano od nekog drugog pa ti znaš da je to bilo tako...

Kad me tako još zapravo ni bilo, bila je najveća studen-zima tega februara kako u mome rodnem mistu, tako i šire, državi, regiji i kontinentu. Bija je snig od dva metra i otac je jedva đipon stiga po mater i mene u bolnicu kad nas tribalo odvest doma.

No prija tega je bia moj začetak. A on je bija na jedvite jade, ja san četvrti pokušaj.  Prva dva pokušaja počivaju u grebu tamo u mojon zoni-istok o kojon će posli bit rič, a treći nije do tamo ni stiga. Onda su moji roditeji prominili zonu i došli na siver tu di će me začet. Bome je bilo povuci-potegni oćel i taj pokušaj uspit, mater je živila u straju i zavitovala se da ako ostanen živa (ko god da buden jerbo onda se ni unaprid znalo ča će se rodit), da će platit nekon svecu. To je ona u sebi jerbo su taka bila vrimena, a i otac je bija oficir i komuništa pa da ne pukne bruka. (Poslin puno godin, kad san ja već bila cura, stigla je na našu adresu zafalnica od te crikve jerbo je moja tetka, a materina sestra, tek tad uplatila . Materi je tako duša konačno bila mirna da je zavit učinjen i obraz ipak spašen. Ovo je moje svidočanstvo iz prve ruke, ni rekla-kazala.)

Živili su u jednome stanu od sobe i kuhinje, sa drvenin podovima, u tipičnoj posavskoj kući – ispod je bilo prizemje od matuna, cigle. (Kuću opisujen kako je se sićan sama od poslin.) To prizemje pantinda je bilo vlažno i smrdljivo, tu su bili ka podrumi ili tako nešta. Pa se drvenin skalama pelo na gornji drveni balkon iz kojeg se ulazilo u stanove. (Osin moji roditeja tu su živili još neki drugi, al se o njima nikad ništa nije pričalo.) Kuća je bila uvučena sa glavne ceste u dvorište sa bunaron po sredini u kojen su bile još dvi slične kuće. U drugoj ni ne znan ča je bilo, a u trećoj su bili susidi s kojiman su moji i poslin, kad su priselili, ostali u dobre.

Na gornjen katu te  treće kuće, koja je bila vrlo slična ka ova di su moji živili, al manja, živila je gazdarica sviju ti kuća, nika gospoja kojon se imena ne sićan. Živila je sama i bila vrlo stara. Moj otac joj je pomaga kad bi ča tribalo, pa tako i oko njenega pokopa na židovskemu grobju. (To grobje san otkrila kad san već bila veća, kad smo išli nekomen na sprovod, mislin da je to bija neki njen rod. Znan da je bilo jako tamno od pusta drveća, kiša je padala i bilo je jako ladno - od straja il zaprave, ne znan, samo se sićan da san oca držala čvrsto za ruku. Bija je to moj prvi susret s grobjima. I sad me ježuri spopanu kad se sitin tega.)

Ispod gazdarice, u prizemju, baš na tleju (jerbo su njiove dvi ponistre od primaće sobe bile na glavnoj cesti i ja san ka dite mogla zavirit unutri ako nisu koltrine bile navučene na ponistre) živili su Draksleri. Imali su dvoje dice koji su bili puno, puno stariji od mene i koje ja nikad zapravo nisan ni vidila jerbo smo mi brzo po momen rojenju odselili, a ta dica su otišla u Kanadu. Drakslerovi su pantili i boja vrimena jerbo me je uvik fascinira klavir u tomen malon stanu i puno kristala u kredencu od mahagonija i još đinđa od porculana koje se ni smilo taknit – balerina, muzička kutija, pas, labud, vaze i take stvari...Oni su bili starosidioci i pričali baš po domaću, sa puno švapski riči. Mene su puno volili, biće jerbo su in dica bila daleko, a ja san in mogla bit ka unuka. (E da, sad se sićan da su od te njiove dice još puno, puno godina poslin stizale čestitke za nove godine iz Montreala i da san ja bila sva važna ča stižu iz tega daleka svita. Strogo su vodili računa da napišu „drug“ za moga oca.)

Striček Toni, mužikaš, je ima plave oči i izgleda ka Imbra Grabarić – Presvetli iz serije „Gruntovčani“. Teta Seka je bila puno pobožna i svaki dan je „lizala oltar“ kako su je svi ogovarali. To moje ni omelo da se druže i puno godina poslin. Samo je jedne godine otac reka materi da neka mi teta Seka prestane poklanjat piturana jaja u lipin korpicama za Uskrs. Ja tad nisan znala zašta i bilo mi je žaj. Jaja su pristala stizat, al su se oni i dalje družili.

Kad bi došli u ti mali mračni stan, pun vlage, sidili bi u kužini čiji prozori su gledali u nigde, u zaraslo šipražje, i imali one gvozdene rešetke da lopovi ne uđu. To bi mater i ja navratile sa pazara na kafu. Mislin, nji dvi bi pile čaj i to je meni bilo jako čudno - kako pit čaj ako nisi bolestan? Normalno se ide na kafe, u našu kuću su susidi dolazili na kafu, a ne bit bolesni. Meni bi teta Seka namazala friškega masla i svoje marmelade jerbo ni bilo kolača svaki dan ka danas. Kolači bi se pekli samo od sveca do sveca – krancle, makovnjače i take stvari. Ja san se divila plaven porculansken čudu di je držala maslo pod poklopcen. Mi takvo šta nismo imali. Kad bi to izila, postalo bi mi dosadno i samo bi tila ić taknit malo klavir u primaću sobu. Teta Seka je rekla da more, a mater da neka nipošto ne diran ništa drugo. A u primaću se išlo kroz spavaću. Namištaj je bija starinski, taman i mračan ka i cila soba isto, sa isto ponistrama u ono ništa, pa bi brzo pretrkala priko nje ostavjajuć vrata otvorena da čujen nji dvi, za svaki slučaj. Onda bi malo lupkala po tipkama. Striček Toni bi zna reć, kad je bija doma popodne, a mi došli s ocen u tu primaću (jer kako će njega primat u kužinu, za ime božje!), da „bu nekaj od nje, mala tak fajn svira“. On je to tako samo govoria da udobrovoji oca, znan ja, jerbo posli nikad ništa ni bilo od mene po tomen pitanju. Mislin, pivala san ja u zboru poslin, i to po sluhu, note nikad nisan mogla razumit -  kako bi to onda mogla svirat moj striček Toni...

Teta Seka je znala za teškoće u nastajanju mene i morebit da je zato zavolila moju mater. Pomagala jon je dok me nosila u trbuju da ne čini teške stvari. Isto ka i moj daleki rođak kad je taj jedini put bija doša u nas. Mislin, bija je dalek jerbo je živija daleko, a u stvari bija je sin jedinac moga barbe, brata moga oca, strica. Mišo su ga zvali, a u stvari je ime ima isto ka moj otac. I prezime. I triba je bit jedini naslidnik očeve familije, da nosi isto prezime. Al nije...

Mišu su doveli kod „nas“ (mislin „nas“ jerbo san ja već bila velika u materinon drobu, a njegov otac je bija na Golen) da strini bude malo lakše u životu. Tili su da se razvede od mog barbe, strica. Pa jon je moj otac pisa pisma da istraje i da pošaje malega malo „nama“. Ne znan kako nisu otvarali ta pisma, al ocu se ni više ništa grubo desilo jerbo je dotad već prigrmia prvi udar kad su barbu, strica safatali u Splitu, strpali ga u pržun na Gripama i posli odveli u Bileća. Mater je na tu vist oma ga išla positit, a oca su isti dan zvali na „razgovor“ da ča njegova žena ima ić u positu jednen ibeovcu. Poslin san saznala da je priča nike viceve...

U to vrime mater je radila ka prodavačica u jednoj butigi o spize. Sve je bilo refužo, stavjalo se na onu debelu, smeđu kartu i vagalo. I ta karta je bome sama od sebe dobro pizala, pa bi tako, ako biste kupovali bokun kvasca oliti germe (tako se zvalo tamo gori na siveru, al i u  mojon istočnoj zoni o kojon ću posli pisat, di su mater i otac tada stali) kvarat bruta je bila ta tara od karte. Onda je mater skontala da se tu naplaćuju šolde i za tu kartu koja se ni obadala ka trošak butige. Butiga je bila narodna, naravski, u to vrime i materi je bilo žaj naroda. I tila taman sutra reć šefu za to, tu taru o kartušine, al šef ni doša. Ni prikosutra. Ni još pet dana. Onda je mater pitala stariju drugaricu kolegicu ča je od šefa. Drugarica kolegica je rekla – Mala, ovo si samo sad pitala i nikad više!...Šefa je pojia mrak ka ča je skoro izija i moga barbu, strica.

I tako je Mišo bija kod „nas“ i vidija kako mater bruškinaje one drvene skale po kojiman se penjalo gori na balkon s kojega se ulazilo u „naš“ stan i reka – Strina, daj meni da ti pomognem da se seki nešta ne desi! Ka da je bija vidovit i zna da san ja - ja. A takin posebnin judiman ni suđeno da traju...

Kako san već rekla, ta zima je bila puno gadna i studena. U sobi su gorile dvi peći na drva kad su me donili iz bolnice. Voda se u bunaru sledenila pa su je lomili i donosili led u kuću otopit pa za kuvanje i piće. Za prat pelene je bija veći problem. Tribalo je poć na riku, a i ona sledenila, judi su prilazili prike nje umisto priko mosta. (Poslin je bila još jedna takova zima za koje san i ja odala po zaleđenoj rici. O tomen će posli bit rič.) Mater je probijala led i prala robu koja bi se oma ukočanjila i takvu je donosila doma, u onu sobu di su dvi peći grijale, i razapinjla priko konopa (oli štrika - kako san govorila dok san gore na siveru živila).

Ovo su slike kad san učinila prve korake druge zime iste te godine, u toj ulici di su me donili iz bolnice, i kad san već postojala u krevetiću. Postojala na oven svitu, al samo po slikama. Jer to još ni bija moj početak...