Več sam prošli tjedan napisal kak su vremena jako ozbiljna a na moju velku žalost v tom tonu moram pomalo i nastaviti jer se dogodilo ono kaj još prije samo par dana nisam mogel ni očekivati: Ovo leto nebumo imali na Martinje krštenje mošta. Ne preostaje mi ništ drugo nego da se podsetim skup z vama nekih raneših Martinja dok još nismo ni slutili da se tak nekaj more uopče dogoditi.
Morti se bute setili da sam prošli tjedan napisal ovo:”Čak i dok sam otišel vu vojsku uspel sam biti na Martinju. Vu vojsku sam otišel krajem studenoga a vrnul sam se krajem listopada. Kak je Martinje prešlo bum vam nekaj napisal drugi tjedan”.
Martinje bez Martinja
Martinje je prešlo tak da ga ni bilo. Dugo smo bili sigurni da bu sve v redu do Martinja no dok sam čul pred par dana kakva je situacija v našemu kraju z ovom nesrečom, ipak smo odlučili da ovo leto nebu obilježavanja ovoga velkoga vinskoga svetka i da bumo ovu tradiciju prekinuli i odgodili za neka bolša vremena. Ovo smo leto prepustili nekolko rođendani i drugih naših okupljanja al se nadam da bi do Vincekova, 22. 1., situacija mogla biti takva da moremo sve te svetke deti na vrpu tak da se stara pajdašija more najti i popiti čašu draganovečkoga gemišta.
Ovak je to negda zgledalo
Nadam se da mi nebute zamerili kaj vas bum podsetil na vremena dok smo Martinje slavili kak bog zapoveda. Ovo sam napisal na stranicama Coolinarike pred otprilike sedam-osam let.
“Do prije par let Martinje se ni slavilo masovno kak danas niti je bilo tak komercijalno zloupotrebljavano kak danas. Danas Martinje slave širom Lepe Naše, čak i v Dalmaciji a bome i v Hercegovini. Našu pak tradiciju v Draganovcu, to vam je gorički kraj pet kilometri od centra Koprivnice, nemre nam niko zeti, osim ak mlađi naraštaji, skloni pivi, ne prestanu hodati v gorice. Ja sam Martinje počel slaviti nekak na kraju gimnazije od kak se družim z mojim kumom Andrijom-Fjakom. Kak je njegov deda Andrija strašno držal do vinskih svetki mi smo sve te regule zdušno prihvatili i fala bogu obdržavamo ih i do danas. Kaj se događa na Martinje? Svaki stari goričar zna: na Martinje mošt prelazi vu vino, mladoga mošteka krstimo vu vino. Imamo lepe stare regule, imamo biškupa i miništrante i krštenje more početi. Za nas je naravno pak jako važno kaj se bu na Martinje jelo. Tu bu koječega za predjelo ali za glavno jelo je guska zakon. A zakaj baš guska? E, ak je točna, priča ide ovak: Na taj su dan pred ohoho stolječa guske svojim gakanjem spasile Rim od provale barbara. I mesto da podignu spomenik guski i njoj se klanjaju, ovi spašeni "barbari" su prinesli žrtvu vu vidu zaklane guske, a mi to eto delamo i dan danas. Kak ju slažemo? Dobro ju nasolimo, nafilamo z nadevom od mesa i kruha i spečemo v rolu na drva. Kak prilog je obavezno hajdinska kaša z guščjim jetrima i mešana šalata od crvenog i belog zelja z koščičnim uljem.
Jednu pak martinjsku priču ili ak očete anegdotu malo ljudi zna. Znate koji je jedini pravoslavni svetek prije a ne trinaest dana posle naših svetki? Mitar! Priča ide ovak: Martin i Mitar su krenuli skupa pokrstiti mošta, jer su bili međaši, ali nisu imali gusku. I onda je Mitar predložil Martinu da fkradnu gusku v jednom usputnom dvorištu. I kaj se je dogodilo? Pes je zalajal, guske i kokoši su se razgakale i raskokodakale, došel je gazda i zaprl je Martina v kokošinjec. Mitar je zbrisal i mošta je pokrstil taj dan, a Martin tek dok ga je gazda pustil. Tak je ostalo i do dan-danas. I još nekaj. Rasprava među goričarima več letima traje: treba slaviti 10. 11., pa dočekati Martina biškupa, ili na samo Martinje 11. 11. Martina papu? Dragom bogu je sejedno. Glavno da je guska i dobra pajdašija. Martinje v Draganovcu ne propuštaju niti naši dragi prijateli rođeni Koprivničanci Boč, Joso i Atač, koji več fanj let živiju v Zagrebu. To je lepa prilika da se vidimo, malo pospominjamo i prisetimo kojekakvih priča z naše mladosti- naravno po stoti put. I tak drugo leto pak spočetke. Tak i tak bumo zaboravili o čemu smo se spominjali prošlo leto. Mladi bi rekli: Martinje je zakon!
Tak je to zgledalo letima
Pametan piše, bedak pamti
Da malo razbijemo ovu preozbiljnu situaciju bum vam spripovedal nekaj kaj se dogodilo prošle nedele. Morti bu vas to potsetili i na neke vaše situacije ze spremanjem zaliha v škrinju.
Prošle nedele sam vam ja delal lagani obed za nas dvoje. Del sam kuhati pol stare kokice z puno povrča, imal sam šalšu i dodal malo kuhanoga krumpira. Kaj zakuhati v tu odličnu juhu? Setim se da v škrinji imamo četri paketiča zmrznutih “grisknedli”. To navek napravimo i z leberknedlima dok imamo malo viška. Imam jednu posebnu žličicu z kojom navek zakuhavam knedliče i samo sam čekal da se dignu jer je to znak da su gotovi. V tom trenutku dojde Đuro i pita:”Kaj si zakuhal knedle v riblji temeljac?” Morete zamisliti kaj sam joj sve rekel. Kakav riblji temeljac? Kak morem zakuhati knedle v kokošju juhu? Doduše ostalo mi je nedavno ribljega temeljca v škrinji al kome bi palo na pamet tak nekaj? Onda me dočekalo drugo iznenađenje. Knedli nikak da se pojave na vrhu juhe al i nema ih ni na dnu. Čisti misterij: nema nigde knedli al nema niti nikakvih ostanjki. Juha imam čisti okus riblje juhe al nema knedli. Mislite da smo otkrili o čemu se dela? Ni govora. Đuro je odlučila da bu odmrznula jednoga od preostala tri misteriozna paketiča i pokušala odgonetnuti otkud “grisknedli z okusom ribe” v našoj škrinji. Morti bi bilo najsigurneše dati to na analizu v Podravkin laboratorij. Moglo bi se otkriti nekaj revolucionarno. Znate da su se mnoga revolucionarna otkriča dogodila slučajno. No Da nebu samo Đuro “kriva” bum vam otkril kaj se jemput dogodilo meni. Išel sam nekaj delat v gorice i zel sam si “lepi falačec teletine” da imam kaj za prizalogajiti. Del sam sve to v ranjglicu tople vode da se lagano odmrzne. Nakon jedne vure sam išel pogledati kaj se na peči događa. Imal sam kaj i za videti. “Lepome falačecu teletine” ni traga al sam zato imal par metri “lepih tankih creva” koja su mi ostala još od kolinja. Srečom kaj navek imam vu frižideru komadič špeka ili kakvu konzervu. Sečam se da se tak nekaj znalo događati i mojoj pokojnoj mami v prvo vreme dok su škrinje došle v modu. V trenutku dok se meso i druge namirnice spremaju v škrinju sledi ona čuvena rečenica: “Znam ja valda kaj sam spakirala”. Negda sam v situaciji da idem pripremiti za obed od onoga kaj otkrijem tek dok se odmrzne.
Dani hajdine
Gledam neki dan na tv-u emisiju VTV-a “Dani hajdine” v Kučanu i Zbelavi. Ženice su napravile fakat pravi festival kojekavih delicija od hajdine ali se pofalile da se tak nekaj dela samo v njihovom kraju i da je to njihovo izvorno. Onda mi padne na pamet kak smo mi Podravci pak “zakasnili na vlak”. Dobro se sečam da sam negda davno jel tzv“štrukle kašnjake”na badnjak jer je to bilo kakti posno jelo. Sečam se da je to bil omiljeni zalogaj našemu pajdašu Česki. Doduše to je mala kalorijska bomba jer dok imaš testo, dinstanu kašu i dodaš k tome i koščično ulje, od dva štrukla si sit dva dana. Hajdina je negda odhranila pol Podravine. Danas smo ju sveli uglavnom na delanje čurki. I još nekaj.Glas je več pisal kak su nam v Belovaru “fkrali” prgu i zaštitili ju kak svoj proizvod. Neznam kaj bi na to rekli Bregovci al sigurno znam da je moja baka Jela v Ivancu od navek delala prge. Bilo je normalno da deda Joška v gorice zeme “prgicu i falačec kruha”. Za tim se mam mogla popiti čaša zdenoga tuduma. Probajte sami ak ne verujete meni.
Pondelek
Juha/Glavno jelo: Kisela juha od vrganji z malo krumpira
Desert: Znate več: kolač od jučer
Tork
Juha:Prežgana juha z jajcima i krutonima
Glavno jelo: Pohani mesni narezak, pomfrit, šalata
Desert:Kompot od breskvi
Sreda
Juha/Glavno jelo: Čušpajz od poriluka, par kranjskih
Desert: Puding od vanilije
Četrtek
Juha: Koprova juha z kašicom
Glavno jelo: Mesna pita, zdela šalate
Desert: Sok
Petek
Juha/Glavno jelo: Oslič ala bakalar
Desert: Čaša vina
Subota
Kak ni bilo Martina bul skuhal nekaj ala martinjski obed
Predjelo: Malo špeka i jedna prgica
Glavno jelo: Piletina na naglo, hajdina, šalata od friškoga zelja
Desert: Čaša mladoga vina
Nedela
Juha: Bistra goveđa juha z “pravim grisknedlima”
Glavno jelo: Juneča pečka v saftu od luka, luleki od kolko-tolko testa, šalata
Desert: Diganci od maka i ružički
:(Još nema komentara