A kaj da danas kuham? (488)

Povijest mojih godišnjih odmora (5)

Zadnji ste put mogli videti da si za gablec baš nismo bili mačehe a tak je bilo i za obed. Jelovnik se nije puno promenil v odnosu na kuhanje doma ali je znalo biti iznimki ak bi moji koštaši zaželeli nekaj posebno.Verujte da nisam nigda improviziral z nekakvim obedom na brzinu jer mi kakti treba vremena za “kupanje i sunčanje”. Nisam bil željan ni kupanja ni sunčanja.Obed je moral biti kak i doma: juha, glavno jelo i desert. Druga je varijanta bila čušpajz z odgovarajučim mesnim prilogom.

Od remena do vremena sam bil pošteđen kuhanja jer smo znali biti pozvani na obed k našem susedu Buci. Imal je kuču z velikom terasom na pedeset metri od nas a kaj je još : imal je brzoga glisera. Skoknul je časkom na Šoltu gde je bilo uzgajalište brancina i druge ribe i obed je bil tu. Od njegve supruge sam se nafčil kuhati “fažol na bruet”, jedno sjajno jelo posebno za posne dane. Dok spojite frišku morsku ribu, grah i testeninu, imate v tome i Podravinu i Dalmaciju. Nismo mogli ostati Buci dužni pa smo, ak se sečate, navek bili domačini na Velku gospu i njegvoj familiji i dvoje divni starijih susedi teti Veri i barbi Nikoli. Svi su oni uživali v našoj podravskoj kuhinji i Đurinim kolačima. Bilo je naravno prilika i za kojekakve druge prigode za zajednički obed ili večeru.

Ovak je zgledala moja svakodnevica: kupače gačice, fertun i očale

Nekaj se z tih leta posebno pamti: maratonske partije bele. Naše prijatele i susede Bucu i Jakšu smo nekak zarazili z belom i to su nekolko let bile tradicionalne  partije bele “ljutih protivnika” između Dalmacije i Podravine. To se obično događalo prek vikenda ili za svetke dok bi naši pajdaši došli na vikend. Znalo se početi z kartanjem več v petek navečer a trajalo je z prekidima do nedele popodne dok je išel zadnji trajekt za Split. Naravno da ni kartanje nije moglo bez blagovanja. Naruđba su bili tradicionalni špekfileki vu velikim količinama. Kakti mali obroki su bili kanapeiči ze špekom, pršutom, sirom ili kakvim zdenim pečenjem. Kartanje se prekidalo za subotnji i nedelni obed i naravno za spanje. A toga je bilo jako malo jer, ruku na srce, ni se znalo ko više grize Dalmatinci ili Podravci. Naravno da smo morali imati i fiškuša koj je pazil da furt ima i zdenoga vina i zdene vode.

Mislite da smo se kartali za peneze? Ni govora. Čisti prestiž i zafrkancija. Ak se dobro sečam mi smo Podravci bili nekaj uspešneši jer su se naši “protivnici Dalmoši” znali fest pokefati oko toga ko je „falija“. Bojim se da bum tu doma i zaboravil igrati belu jer je v našem okruženju nekak zišla z mode. Doduše več letima dogovaramo jednu partiju bele z našim Dalmošima v Draganovcu al do današnjega dana to još nismo realizirali.

Moram vam nekaj priznati. Sva ta leta v Milni ja nisam nigda bil v centru navečer. Oni mlajši su se čak i prvih leta  z Kupinovih luka prek brda znali otputiti na piče ili sladoled. Z Osibove je bilo normalno da tu i tam žensko-dečja ekipa potegne do Milne pogotovo ak je bil nekakav svetek ili čisto da se “izvedu v život”. Ja bi ostal doma z kartašima, nekaj bi prizalogajili i popili, zel  bi križaljku ili pak kakvo lakše štivo i poslušal muziku na kakvoj lokalnoj radiostanici. Kaj vam više i treba. Kaj mi ni bilo dosta gužve i nočnoga života tam do pedesetoga leta? Svega se čovek more zasititi.

Leto 2005 posebno pamtim. O tome sam nekaj napisal pred dost vremena. V Hrvatsku sam dopelal z Njemačke svojega poslovnog partnera, mentora a danas i prijatela, Dietera i njegvu suprugu Reginu. Bili su malo oprezni jer su mislili da smo još navek pomalo v ratnoj zoni no nakon dva dana v Koprivnici več su promenili mišljenje. Na putu prema Braču smo posetili Plitvice, bili na obedu pri mojim kumovima v Kaštelima i desetak dana proveli skupa v Osibovoj. Njihovom duševljenju z prirodom, plažama, gastronomijom i ljudima nigda kraja. I do danas mi Dieter zna v svojim pismima spominjati to predivno leto i Lepu Našu.

Zadnje letovanje v Milni

Leta 2015-toga smo otišli kak i navek v kolovozu z voljom ali samo nas troje: Đuro, Jan i ja. Nismo se praf ni smestili i več nakon pet dana smo morali krenuti put Podravine. V pitanju je bila Đurina zdravstvena situacija  i kak ozbiljni ljudi smo se spakirali i  na Janovu žalost morali smo se vrnuti v Koprivnicu. Zakaj na Janovu žalost? Kak je on od desetoga meseca života bil z nama v Milni jednostavno se zaljubil v taj falačec našega mora. Tam je prohodal, proplival, našel je stalnu pajdašiju njegvih leta i osečal se bolje neg doma. Navek je govoril “moj Brač ili moja Milna” pa i dandanas se zna setiti Osibove.  Taj dan odlaska pamtim i po još jednom drugom tužnom događaju. Dok smo čekali v Supetru trajekt na radiju smo čuli tužnu vest:”Umro je Arsen Dedić”. Bil je 17. kolovoza. Jedna loša vest nigda ne dolazi sama. Verujte da mi je kak bivšem muzikantu bilo jako teško. Tolko smo let proveli z njegvom divnom muzikom i čovek se teško pomiri z tom činjenicom. Fakat je bil velik i još navek je.

Kak smo “preživeli” ovih pet let bez mora? Možda smo prvih leto-dve i osečali nekakvu laganu potrebu za godišnjim na moru no sad je to čist normalno. Svojedobno sam baš v Glasu napisal tekst v kojem sam se pital:”Zakaj opče iti na more”? Puno toga morete imati i v Podravini. Imamo bazen “Cerine”, imamo Šodericu a v zadnje vreme čujem da mladost ide i na Čingilingi kraj Molvi, jedno jezero ala Šoderica. Nisu nama Podravcima ni troškovi zanemarivi. Morete si kojekaj privuščiti za jesti i piti za male peneze. Setil sam se da je prije ove korone bilo i kojekakvih kulturnih sadržaja i v gradu i na Šoderici. I to bu prešlo pa se bumo, nadam se uskoro, vrnuli na neke bogate  sadržaje na koje smo navikli i doma.

Imal bi tu još kojekaj dodati al mislim da je vreme za neke nove teme.

Dok bute ovo čitali v našem bu kraju več navelko počela berba ranih sorti grožđa. Mene je zapraf navek veselil baš taj dio leta: rana jesen. To vam je nekaj. Od navek sam se veselil tim ranojesenskim danima makar je puno posla i obaveza. Nebum vam rekel ništ novoga ak napišem da je ovo leto po puno toga jako “čudno” posvakud oko nas širom Lepe Naše pa tak i v goricama. Kak bu to zgledalo bum vam nekaj napisal dok završimo sve te goričke poslove koji su pred vratima.

Jedno znam sigurno. V ovo doba nemam baš nikakvih problema z kuhanjem. Povrča i voča ima v izobilju i samo nam treba malo mašte i naravno volje. Ak imate svojega dobroga mesara bute našli i pravi falačec mesa za saki dan a bome i za svetek.

Pondelek

Juha: Juha od krumpira
Glavno jelo: Kajgana, šalata; naravno da bum kajganu malo obogatil ze špekom ili šunkom
Desert:Zdeni sok mi navek paše

Tork

Juha/Glavno jelo: Čušpajz od mahuni; kak podlogu bum podinstal malo junetine
Desert: Voče; imamo fala bogu i jabuki i kruški i breskvi i grožđa

Sreda

Juha: Koprova juha z kašicom
Glavno jelo: Pečena špicrebra, krumpir, šalata od friškoga zelja
Desert: Kuruzna zlevanjka

Četrtek

Juha: Krem juha od karfiola
Glavno jelo: Piletina na češnjaku, hajdinska kaša, zelena šalata
Desert: Puding od vanilije

Petek

Juha: Juha od šaranove glava i repa z malo povrča
Glavno jelo: Šaran v kuruznome brašnu, šalata od krumpira ili nekakva mešana šalata
Desert: Lagani gemišt

Subota

Juha: Prežgana juha z krutonima
Glavno jelo: Pileči rižoto; najte štediti na parmezanu a šalata ak vam paše
Desert: Dobra bu i zdena voda

Nedela

Juha: Juha od junečih kostiju z rezancima
Glavno jelo: Pohani krmenadli, povrče na putru, šalata
Desert: Student kocke; ljudi misliju da je to nekakav skromni kolač al je zapraf odličan i sočni kolač od jabuki, maka i koječega drugoga.