A kaj da danas kuham? (485)

Povijest mojih godišnjih odmora (2)

Te 1964. sam več ozbiljan čovek, akademski građanin i pravi pomagač barbi Anti i kumu Frani. Naravno da se dosta promenil i dnevni red mojih zanimacija ali je atmosfera još navek ona prava kak je to vu Vrtlima bilo letima. Doduše malo sam promenil dnevni raspored slobodnog vremena jer su me pod svoje zeli nekaj stareši dečki z kojima sam se družil ne samo na plaži nego i na večernjim izlascima. No moram nažalost reči da nijedan od tih dobrih ljudi više nije među živima. Dok navratim v Kaštele navek se raspitam o njima ili odem na groblje i zapalim im svečicu.

Sledečih šest let nisam videl kaštelanske plaže ni osetil domaču „dalmatinsku spizu“. Tih šest let sam se potepal po gažama počevši pak od Opatije, pa Crikvenice, Maloga Lošinja, Poreča, Umaga do Selca. V Kaštele sam navrnul 1971. na kratki godišnji pred odlazak vu vojsku dok sam več delal v Podravki, a 1972. mi je godišnji „organizirala“ bivša vojska v Ljubljani i po brdima oko nje. Posle vojske imam kombinaciju: za vreme godišnjega ili sviram po meseca dana negde na moru ili se pak vračam v Kaštele ali sad z mojom bivšom  suprugom. No sad se fakat puno toga promenilo. Kum Frane je napravil novu kuču na čist drugom mestu a ja odsedam kod njegve sestre Mandine i njezine kčerke Vanje v staroj hiži kaj mi je posebno drago jer se tam osečam kak doma. Doduše nema više Mice, nema odlaski „u poje“, nema tete Karmele ni barbe Ante, koji su mi bili kakti baka i deda. Ja naime nisam nigda upoznal svojega dedu po ocu, po kojem sam dobil ime, a z barbom sam provodil jako puno vremena za celo vreme ferja. Sečam se ondašnjih rastanki z barbom na kraju leta. Moj kufer je bil pripremljen na odlazak, barba se negde „skriva“ po dvorištu a ja se motam nekaj po sobi i nikak da dojdem dole i pozdravim se z pet-šest susedi koji su me došli pozdraviti. Znala je pasti i po koja suza i ono za kraj:“Vidimo se sledeče leto“.

Ta su kaštelanska leta z bivšom suprugom fakat bila pravi godišnji. Šetnje, kupanje, dobra papica i večernji izlaski. Imali smo na novoselskom portu jednu klapu ozbiljnih ljudi koja si je  znala ponekad i ugoditi. Šjor Bire je bil zadužen za nabavu ribe, znal je kad je nižeša cena, spekel ju je pred svojom kučom nedaleko porta, a moje je bilo da se pobrinem za dobro vino i kruh. Vino sam letima nabavljal v jednoj konobi našeg prijatelja Marina. Njegva je žena Tonka držala letima konobu na samoj rivi a ja sam točno znal z koje „demijane“ je najbolše vino. Daklem tak friško pečena riba na gradelama, friški kruh i bevanda su obrok koj se pamti. Navek sam obožaval takve improvizirane obroke na neobičnim mestima.

Nakon Kaštela čisto promene radi krenuli smo na nova odredišta: Vis, Komiža, hotel Biševo. To pamtim po dve krajnosti: jako loše hrane v hotelu i odličnih večera/obedi v jednom restoranu na komiškoj rivi. V to je vreme tam bilo sve tak jeftino, obzirom da još nije bilo stranih gostiju, da su cene bile na nivou osrednjeg restorana v Koprivnici.  Nekaj se slično dogodilo i v Tučepima samo kaj su tam cene v restoranu ipak bile primerene žepu malo bolje stoječem gostu.

I onda je počela era Brača i Milne. Z mojom bivšom sam bil do rata barem tri put v jednoj prekrasnoj uvali kod mojega cimera i kolege z kojima sam par let sedel v istoj kancelariji a često smo skup išli na službeni put. Dakle to je bil odmor pomalo „ala Robinzon“. Do te ste uvale, zove se „Kupinove luke“, mogli dojti z čamcom ili peške prek brda a v uvali su bile samo dve vikendice. Od terase do mora smo imali točno devetnajst (19) štengi. Frižider na plin, cisterna vode prek dvajst hiljada litri, solarni paneli za rasvetu i za tranzistor. Kaj vam više treba? Dobar dio mesa donesete z Podravine a po friško povrče i kruh sam svaki dan išel po onoj kozjoj stazi v Milnu. Za frišku ribu je bil zadužen naš Roko legendarni milnjaranski ribar. To je bil moj svakodnevni trening. Četrdesetak minuta do tam, pokupuješ kaj ti treba, strpaš v ruksak, popiješ z poznatim pajdašima kavicu i piče i vrneš se doma. Pak četrdesetak minuta planinarenja. Doduše bil sam tridesetak let mlajši  pa mi takva „šetnja prek brda“ ni bil nikakvi posebni napor.                                                    Onda počinje prelepi obred:

• Čašica travarice
• Bogati gablec
• Čaša-dve bevande od kaštelanskog opola. Naime i na dolasku na Brač sam navek navrnul v Kaštele i pri Marinu osigural odgovarajuču količinu vina za celi godišnji. V ono ste vreme morali imati jako puno sreče da v Milni kupite donekle kvalitetno vino.
• Sledi osveženje v moru pa priprema za obed.
• Popodnevni odmor, lenčarenje na plaži, pa večera i...

Morate priznati da zvuči dost primamljivi posebno ak vam nekakav hotelski smeštaj više ni nekaj posebno. No moram vam spripovedati koju o našim susedima v onoj drugoj vikendici. Bili su to Jele i Jozo, nekaj stareši bračni par ze Splita. Gospođa Jela je bila Milnjaranka koja je nasledila parcelu v toj uvali pa bi bil greh da se na tom prekrasnom mestu ne napravi vikendica i za sebe, decu i vnuke. Oko vikendice su imali zgodan falačec vrta gde su mogli uzgojiti puno toga za svakodnevnu prehranu. Osim toga Jozo je mogel vloviti svaki dan koju ribicu za obed ili večeru. Zazidali su i lepi roštilj/peku v kojem se mogel speči i odličan kruh. Često smo popili zajedno kakvo piče a nije bilo retko ni da pripremimo kakav zajednički obed. Jedna prekrasna pajdašija. Gospođi Jeli nije pak bilo nikak jasno zbog čega ja svako jutro odlazim „priko brda na noge va Milnu kad ona može časkom ispeči kruh“. Nije ona mogla razmeti taj moj sport jer oni celi godišnji nisu išli do Milne. Moram reči nekaj o tom njenom kruhu. Nije bil dobar, bil je izvrstan. Meni pak nije bilo jasno da takav kruh more speči na tak malo drva i v tak kratkom vremenu. Jozo mi je otkril „tajnu“: dole je bila šamotna cigla a drvo je moralo maslinovo ili od smokve.

I tak do rata. Pred sam rat dogodila se i rastava i puno toga se promeni pa vam nekakav godišnji niti ne pada na pamet.

Tu završavaju moji godišnji v bivšoj državi. Bilo je fakat svega, na kojekakvim mestima i z kojekakvim iskustvima. Trebalo je iskati nekaj drukčeše i v novom društvu.

Prošli tjedan sam napisal z čim sve raspolažem i verujte da imam još navek „problema“ da sve to potrošim i nekak posložim tjedni jelovnik.

Pondelek

Juha/Glavno jelo: Povrtno-pileči ragu
Desert: Voče; imamo kruške, nekakvu ranu jabuku pa i ranoga grožđa

Tork

Juha: Bistra juha od flama z kašicom
Glavno jelo: Kuhani flam, šalša, slani krumpir
Desert: Vočna šalata

Sreda

Juha: Koprova juha z fritatama; ta je juha trenutno Janov favorit
Glavno jelo: Musaka od krumpira, mešana šalata
Desert: Pita od jabuki

Četrtek

Juha: Juha od ribane mrkvice
Glavno jelo: Krmenadli na naglo, mlade koprive ala špinat, pire
Desert: Sok

Petek

Juha: Juha od kozici z kašicom
Glavno jelo: Punjene lignje, lešo krumpir
Desert: Čaša vina, šnenokli

Subota

Juha/Glavno jelo: Čušpajz od krastavci z kobasama
Desert: Nekaj se bu več našlo

Nedela

Juha: Krem juha od mešanoga povrča
Glavno jelo: Filana teleča prsa, pekarski krumpir, zelena šalata
Desert: Štrukli z tikvom i makom