A kaj da danas kuham? (469)

Prekid još jedne tradicije

Prošli je tjedan dragi moji bil Prvi maj, Prvi svibnja ili ak baš očete Praznik rada. To znaju svi stareši živuči ljudi a morti nekaj manje ovi mlajši kaj stasaju v ovim sadašnjim vremenima. Mi koji smo krenuli v život tam krajem četrdesetih i pedesetih let prošloga veka smo živeli z tim pod normalno. Stareši su hodali na taj dan na paradi z parolom “Živio prvi maj” a mi smo deca imali navek prigodnu priredbu i sudelovali  v nekakvim sportskim takmičenjima. Jedno se vreme rabila jedna malo prilagođena parola:”Živio prvi maj četri dana fraj!” Priznajte da dobro zvuči a to su vam bili nekak i začeci onog famoznoga spajanja svetki kaj nam je nekak ostala navika i do dana današnjega.To doduše  nama penzičima više ne igra nikakvu ulogu al onima koji očeju imati jedan mali godišnji odmor nekolko put v letu to je itekak važno. Doduše nekak mi se čini da bu jako malo ovo leto prilika za puno godišnjega i spojenih svetki. Događaji oko nas buju sve aktivne mlade ljude, pa i neke stareše, naterali da delaju više nego je to bilo do ove prestrašne nepogode i potresa. Nekak se bumo morali zvleči z te fakat teške i neugodne situacije.

Nebum vam sad držal predavanje o povijesti toga praznika ali samo za uvod vam bum rekel par ključnih podatki koje sam zapisal v mojoj knjigi “Ko to ne voli Podravce”. Morti i pogrešim kojega datuma al mi najte zameriti. Daklem ovak!

“Povod za obilježavanje toga datuma su nemiri v Ameriki 1886. na Trgu žitne burze v Chicagu. Sve je zapraf počelo v kapitalizmu a tek posle su sve to oberučke prihvatili v socijalističkim zemljama. Doduše v Ameriki se radnički pokret odrekel prvoga maja i sve premestili na prvi pondelek v rujnu. Crkva je takaj pobegla od karaktera toga datuma pa je 1. 5. proglasila Danom sv. Josipa radnika. Z tim nisu ništ postigli jer mi, mislim ja i  meni slični, sad slavimo i Josipovo 19. 3. i 1. 5. pa makar kak se on zval. V Evropi su se zbudili malo kasneše, 1889. v Parizu, jer je to bila stota obletnica Francuske revolucije a Rusi su to počeli slaviti tek posle Oktobarske revolucije i onda prenesli i na druge komunističke države. Ono pak kaj se pri nama zna je krvavi Prvi maj v Puli koja je bila poznata po borbenosti i jakom sindikalnom pokretu. Jel dosta povijesti? Naravno da je. Ajmo se mi malo bavit z onim kaj se događa tu i danas pri nama v Koprivnici, v Draganovcu v Mirnom dolu”.                                                                                            

Moja vam je klapa na okupu više od pedeset let i nekak je normalno da imamo svoje regule, redovita druženja i velku tradiciju. Jedna je od tih i proslava Prvoga maja v goricama. Ovo leto nakon tolko let ta se tradicija prekinula, kak i vi znate, zbog više sile. Nema okupljanja za više od pet ljudi a nas je kak god brojim još navek dvadesetak na okupu. Neki su nas nažalost več napustili ali baš  zbog sečanja na njih moramo zadržati tradiciju. Istinu za volju nismo mi to baš tak jako obilježavali prije rata al nekak oko toga vremena smo si mislili da bi bilo dobro vrnuti tu tradiciju jer smo mi svi v klapi ipak radnička deca. Inicijatori i glavni organizatori toga posleratnoga okupljanja, Fjaka i Pepek, napustili su nas nažalost pred četri odnosno dve lete. Mislim da bi bili tužni i nezadovoljni da ovo leto nebu puno podolje na adresi Draganovec, Mirni dol, kučni broj 22 i 24. Zakaj dva kučna broja? To su vam brojevi kleti mojega kuma Fjake i mene a kak smo prvi međaši bilo je normalno da se takve proslave delaju za velko društvo na dva podolja i v dve kleti. 

Kak je to pri nama zgledalo?

Naš tradicionalni jelovnik

Jelovnik se uglavnom znal letima a znala se i podjela posla oko nabave namirnica i pripremanja pojedinih jela. Naše bolše polovice su se pobrinule za hladno predjelo, slance i kolače i sve one priloge z glavnim jelom. Jedna je posebnost bila kaj smo imali dva predjela: hladno i toplo. Dok bi se okupljali na stolu je bilo hladno predjelo, v isto se vreme pripremala vatra za roštilj kojega je za tu prigodu pekel Pepek. Bil je to jedan bogati mešani roštilj z obaveznim pljeskavicama koje od navek pri nam priprema Hus.On smesu pripremi dan prije, prije pečenja doda samo sitno seckanoga luka a formiranje pljeskavici prepusti našim deklama. Kaj da vam velim? Delikatesa! Več nekak v to vreme kreče i priprema za pečenje nezaobilaznoga janjca. I njega smo naravno nabavili dan prije, pustili da se prek noči ohladi i onda pak dali v ruke Husu da ga dobro nasoli i natakne na ražanj. Moram vam reči da bute teško našli v birtiji tak dobro pečenoga i ukusnoga janjca. Da vam nekaj priznam? Nije to baš lafki i jednostavan posel. Morate imati pravu vatru z pravim drvima, stalno poriktavati vatru pod prave delove pečenke i naravno stalno malo podmazivati. I janjca i sebe. Kraj janjca treba stajati i do četri vure.

Znate čemu sam se navek čudil na tim našim okupljanjima? Kak neko more posle hladnoga, toploga predjela i janjca još pojesti  kojega kolača? Posle toga jedini desert more biti gemišt podrumnske temperature ili pivica z frižidera.

Moram vam reči i reč dve o prilogima. Bila je tu naravno klasika kak su luk, rokvica, paradajz, paprika, ajvar al su na roštilju bile i gljive, patliđan ali i bruskete. Baš su naše ženice bile najvekši potrošači tih brusketa. A to je čas posla. Obrnete sim-tam lepo narezanoga kruha v maslinovom ulju i par put ga okrenete na roštilju. Poseban gurmanski užitak je pljeskavicu deti na brusketu i smazati kak sendviča.

Dio klape se okupil oko majstora Husa i naravno janjca

Dok je janje v pitanju moram vam nekaj spripovedati oko nabave i kvalitete janjci. Na početku smo naravno dost lutali dok nismo pronašli pravi izvor nabave. Kupovali smo v Jankovcu, Sokolovcu, Peterancu, Hudovljanu dok se nekak nismo namerili na čoveka od poverenja v Borovljanima. Najavili se nekolko dana prije, dogovorili vreme da dojdemo po očiščenoga janjca i uredno ga platimo. Onda se jedno leto javimo kak i navek al čovek nam  saopči zabrinjavajuču vest:”Žal mi je dečki al ovo leto nemam janjci. Došel je Dalmatinec i otpelal mi sve janjce. To je stara mušterija, kupuje na veliko i nisam ga mogel odbiti”. Kaj vam oču reči? Čovek je letima prodaval podravsku janjetinu a njegova mušterija je to lepo prodavala v nekoj birtiji na Jadranu pod čistu dalmatinsku, otočku ili možda čak pod pašku janjetinu. I svi su gosti bilo jako zadovoljni.

Grah kak masovna klopa!

Grah je z gornjim jelovnikom mogel biti samo kakti prilog glavnom jelu al sigurno znate da je taj grah jelo bez kojega se nemre zamisliti okupljanje za prvi maj bez graha. Kuha se v kotlima z puno mesa i za puno ljudi. I to mora biti dobro. Poznato je da su od navek tvrdili da je najbolši tzv “vojnički grah” baš zbog činjenice kaj se kuha velika količina.

V Zagrebu je več tradicija da v Maksimiru graha deli vrli zagrebački gradonačelnik Bandić. Baš me zanima kaj bu napravil ovo leto? Popularnost mu nigda ni bila tak nisko, furt mu ružiju z ranjglama i loncima, pa me zanima kakav bu štos ovo leto izvel za svoje građane. Od njega morete svakaj doživeti.

Z grahom ima jedan “misterij”. Od navek se v Podravini, a verojatno i v drugim kajkavskim krajevima, jelo puno graha. Bil je obavezan na jelovniku v petek a bome negda i v sredu. Jelo ga se na sve mile načine al je i dandanas jedno omiljeno jelo za puno ljudi. Tak je bilo i pri meni doma i znam da je imal dobru prođu čak i onaj bez mesa. Moja je mama v mojem detinjstvu kuhala dva odlična graha: grah na čušpajz z mrkvom i pretepeni grah. Dok smo se malo okohlali kuhal se naravno navek z dodatkom nekakvoga mesa i bil je navek odlične kvalitete. Več sam jemput javno priznal: imam sve namirnice kak i mama, imam više mesa nego mama al još navek nemrem pogoditi onaj pravi žmah kakav je bil “mamin grah”.

I da se vrnem na početak ove priče o prekidu tradicije. Znam da bu svima v klapi falelo ovo naše okupljanje al se bumo strpeli. Ak bu za koj mesec sve v redu bumo si prvoga maja napravili tam negde oko berbe. Mašta more svašta. Ko nam to more zabraniti.

Pondelek

Teška su vremena pa znate da bum iskoristil ostanjke od jučer. Morti bute rekli da je to pri meni več standard. V pravu ste. To je živa istina.
Juha: Prežgana juha
Glavno jelo: Zagrebački od jučer z friškim prilogom; zakaj imamo mikrovalku?
Desert: Naravno da ima i rolade od jučer

Tork

Juha/Glavno jelo:Čušpajz od korabe z vrhnjem; v taj čušpajz denem malo špeka al obavezno denem par domačih kobasi ili kranjske.
Desert: Sok ili čista zdena voda

Sreda

Dolazi Jan pa bu danas po njegovoj želji
Juha: Koprova juha z krutonima
Glavno jelo: Štefani pečenje, pekarski krumpir, šalata
Desert: Pita sirom

Četrtek

Juha: Jedna Podravkina z vrečice
Glavno jelo: Pileča jetrica na saft, žganci
Desert: Kuruzna zlevanjka z dost vrhnja i pekmezom

Petek

Verojatno ste primetili da sam pak promašil prošli petak jelovnik jer nisam vodil računa da je Prvi maj. Doduše nije se ništ posebno dogodilo je smo Đuro i ja bili sami. Zato si bumo napravili „simulaciju“ prvoga maja a pridružil na se bu i Jan.
Predjelo:Namaz od graha
Glavno jelo:Mešani roštilj:carsko meso, čevapi, ražnjiči; prilog bu verojatno samo mladi luk i naš domači ajvar; sve bum to spekel na električnom roštilj
Desert:A kaj drugo nego gemišt? Morti Đuro napravi kakvoga kolača'

Subota

Juha/Glavno jelo: Pileče-povrtni ragu; ak očete obogatiti ragu dodajte kakve noklece
Desert: Voče

Nedela

Juha:  Juha od malo stareše kokice z rezancima
Glavno jelo: Kuhana kokica, hren sos, pire
Desert: Princeskrafli, kapučino