A kaj da danas kuham? (466)

Vuzmeni svetki kakve bumo pamtili

Dok sam prošli tjedan pisal tekst za Coolinariku nisam dobro pogledal na kalendar, bil sam v jednom čisto drugom filmu, al znam da nisam jedini kojemu baš ni preveč važno koj je dan v tjednu jer su mi nekak svi dani manje više isti.

Daklem nisam mogel predvideti da se bu nakon tolko let, i tradicije vu Velikom tjednu, sve promenilo i da se bumo Đuro i ja morali prilagoditi blagovanju za samo nas dvoje.  Prek dvadeset i pet let taj je tjedan bil manje-više isti. Z jelovnikom smo v tjednu malo šarali al su to bile nijanse. Bilo je važno da smo čez tjedan jeli manje više skromno a na Velki petek su letima k nama dolazili prijatel i kum Hus, njegva familija i Đurina deca i vnuki. Znalo nas je biti i do petnajstak za stolom za kasni obed, ranu večeru. Počeli bi z dobrom rakijicom, poslužili bi malo predjela ala riblja pašteta, pa šalatu od hobotnice ili lignji, pa bogata riblja juha ili bakalar, a na kraju za glavno jelo nekakva riba. Najčešče je to bil panirani file od soma, slani krumpir na putru i tartar sos. File je rešenje za sve a posebno za one koji nisu ludi za ribom pogotovo ak ima kosti. Sledili su nekakvi kolači i naravno čaša vina.

Prvih leta su ove večere bile doma pri nama no kak se familija povečavala, došli su neki novi klinci, zadnjih par let smo to okupljanje delali v goricama. Klet je dost prostrana i za veče društvo i čovek je nekak komotneši. Ako je bilo lepo vreme deca su se mogla igrati na zraku dok stareši pretepu neke „važne teme“. Kak je to navek bil obično bogati stol skoro smo navek mogli imati i obed za drugi dan pa i dati našim gostima koj zalogaj za doma.

Ovo se leto ta tradicija naprasno prekinula. Nema okupljanja, nema prijateli, kumova ni uže familije. Morali bumo to nekak nadoknaditi v nekim bolšim vremenima.

Zato si bum dal oduška pa vam bum zapisal recept za jedno odlično prigodno jelo, kojega sam dobil več davno od jedne prijetelice na Braču a moji su gosti na Velki petek to jako rado pojeli. Zove se „Fažol na bruet“.Mi bi to Podravci rekli „bažul/grah v paradajz sosu“. Znam da je to morti jedno normalno jelo v Dalmaciji i verovatno puno domačica v Dalamaciji to odavno kuha, al v Podravini je to čista nepoznanica ili se morti kuha nekakva drukčeša varijanta.

Fažol na bruet

Za to vam treba:

• 3 glavice luka, 3 češnja češnjaka
• 4 paradajza/pelati
• Riba: po izboru. Ja koristim zmrznutu škarpinu, može i oslič ili nekaj slično. Nebi bil loš niti sveži bakalar al je to onda dost skupo jelo.

Luk, češnjak i pelate dinstati na maslinovom ulju, podlevati z vinskim octom i vodom; mesto ovoga može poslužiti i gotova šalša od pomidora iliti paradajza.

Ostali začini: origano, lovor, ružmarin, ljuta paprika

Na zdinstano povrče denite osliče i/ili škarpinu narezano na veče komade

Dok je riba kuhana, treba joj oko 15 minuta, očistiti ju od kostiju i vratiti ju v posudu

Dok je sve to onak lepo sljubljeno treba doda kuhani grah i testeninu. Moreju se koristiti makaroni ali su dobri i fuži ili čak naši domači široki rezanci. Začiniti po ukusu ukućana.

Moram vam reči da to neki moji obožavaju bez obzira kaj su na vi z ribom. Znate ono: Grah je ipak grah!

Kak sam več i rekel ovo leto smo morali ovu tradiciju nažalost prekinuti. Đuro i ja smo bili sami, v petek v jutro smo pojeli pržene sardelice a za kasni obed složili smo bakalara kojega smo dobili od kume z Kaštela još pred više od mesec dana. Popili smo po čašu vina. Sve je nekak skromno jer nam fali ona atmosfera kak svih ovih prošlih leta. V subotu smo naravno imali malo ostanjki i počeli smo se spominjati kak napraviti obed za dvoje na sam Vuzem. Takvo iskustvo još nismo imali. Ne sečam se da je igda v našoj familiji za mojega života bil obed za dvoje. To nam se normalno događa za obične nedele al za Vuzem neznate kaj i kolko toga pripremiti?  

Odlučili smo se na ovu skromnu varijantu:

Fruštuk

• Kuhani sušeni buncek z jacima, hrenom i mladim lukom. Navek koristim friškoga hrena naribanoga ili narežem štapiče jer su nekak manje ljuti. Nismo ništ pili ali smo pojeli malo drobnih kolača.

Obed

• Juha od falačeca junečega bočinga z rezancima
• Toplo predjelo: kuhani bočing z hren sosom
• Glavno jelo: Pečena janjetina, krumpir na ploške pečen na masti od pečenja, zelena šalata
• Desert: Kardinal šnite, čaša vina, kapučino

 I kaj da vam velim? Savladali smo sramotno male količine i tak naravno odma rešili obed za Vuzmeni pondelek. Iskreno vam bum priznal: v društvu je na takve svetke puno lepše blagovati. Al kaj bute? Nemamo baš prevelkoga izbora.

Znam da nije baš prigodno za svetke načeti nekakvu preozbiljnu temu ali nadam se da me bute razmeli. Svih ovih dana probam kaj je više moguče pratiti sve te tužne informacije z kojima nas čitave dane bombardiraju mediji al moram priznati da mi baš ne uspeva. To je postal obavezni obred tokom dana. Pregledam informacije kaj se događa v Lepoj Našoj, pogledam na koprivnica.net kaj se događa v gradu i pomalo v svetu. Onda se vloviš koj čas da si jako zadovoljan (?!) kaj se situacija ni promenila na gorše v zadnjih par vur i kaj več jedan dan nije niko prešel prema gore. Ne traje to „zadovoljstvo“ baš preveč dugo al mam pomisli kak nam malo treba za jedan takav trenutni osečaj. Nekak se potajno nadam da bu to ipak prešlo v jednom razumnom vremenu i da bumo pak živeli kak i do pred samo dva meseca. Ima i jedna poznata teorija koja veli „Svako zlo za neko dobro“ o kojoj sam nekaj napisal pred par let na ovome blogu. Oni koji su imali prilike prečitati moju knjigu „Ko to ne voli Podravce'“znaju da sam jedno poglavlje napisal baš pod tim naslovom i to z nekakvoga svojega životnoga iskustva. Ona pak varijanta „Svako dobro za neko zlo“ mi se baš i ne dopada makar i v tome ima malo istine.

Od jelovnika sam za ovaj tjedan čisto odustal iz jednostavnog razloga kaj sam prošli tjedan zbog svoje zaboravnosti dal čisto krive sugestija za kuhanje. Za prošli vikend ste mogli videti kaj sam imal na jelovniku a ovaj tjedan bum pomalo improviziral i snalazil se z ostanjkima i nekakvim laganim obrokima.

Znam da bu v pondelek skoro isti obed kak i na Vuzem a za ostale dane bum zmislil jela na žlicu. Đuro je predložila jedan dan čoravi gulaš, za mene bu jedan dan kisela juha od pilečega sitniša. Kak je Đuri uspelo napraviti široke rezance od bezglutenskoga i pirovoga brašna, bum jedan dan napravil kraljevske rezance. Kolače bumo imali za celi tjedan a imamo i kojekave sokove i naravno tu i tam čašu vina. V ovim vremenima za dvoje odraslih ljudi čisto dosta. Ako pak k nama jedan dan dojde Jan, po njegvoj bum želji složil gulaš z semelknedlima.

Verujem da me razmete.

Još jemput zakašnjela čestita za Vuzmene svetke i OSTANITE DOMA! Bumo mi to sve pregurali.