A kaj da danas kuham? (465)

Dobrovoljna samoizolacija

Kuhinja
Na sve strane, na svim medijima, danas morete v svakom momentu videti ovu preporuku:OSTANITE DOMA! Ja kak penzič i čovek v rizičnoj skupini to bez pogovora slušam. Za dva tjedna sam samo dvaput bil vani da nekaj najnužnije nabavim a tak dela i Đuro. I verujte ništ nam ne fali. Eto bum vam otkril „tajnu“ kak se čovek more doma čist lepo zabaviti, delati kojekaj i da mu dan bu zapraf još i prekratki.

Da kuham to vam netrebam posebno naglašavati kak i da uglavnom trošim zalihe od prije i neka friško kaj sam ovih dana nabavil i tak malo proširil jelovnik. Za Đuru i mene fakat ni teško kuhati jer smo skromnih zahteva a i Jan nam ne dolazi na obed. On ove dane dežura doma na kompjuteru i onom pametnom telefonu i čeka da mu profesori pošalju kakvu domaču zadaču i upute kak delati. Alo čujte ovo. Zove neki dan Jan več pred večer i veli:“Deda! Trebam tvoju pomoč! Dobil sam zadatak da napišem za domaču zadači nekaj na temu čobanac. Kaj je to i recept al na njemačkom“(?!). Ljudi moji kaj je to sad? Mislil sam kak ja današnjim matutrantima nemrem nikak pomoči jer me je naravno vreme davno pregazilo kaj se tiče školstva. Ja i kurikularna reforma. I kaj sad? Napisal sam mu  jedan krači tekst dal mu nekakav moj recept a na njemački nek ga prevede sam. Otkud bi on mogel znati nekaj o čobancu?Zamislite sramote da ja to i prevedem na njemački Jan bi morti dobil jedinicu iz zadače.

V ovoj situaciji čovek mora biti fakat malo i kreativan v kuhinji ak nemaš baš sve kaj ti treba za neko jelo. Najprije smo se našli malo v brigi jer smo doma imali samo malo germe v prahu kaj Đuri treba za njezin kruh. To je ipak najvažneše. Ja sebi kruha morem kupiti, narezati i deti v škrinju. No onda smo uspeli dobiti prek mojega mladog prijatela Robija jedno pristojno pakovanje germe i to z Podravke. Sad smo jedno vreme mirni al smo za svaki slučaj malo surfali i našli neverojatne mogučnosti za pečenje kruha i kolači bez klasičnoga kvasca. Kak je Đuro poznati eksperimentator v ovom trenutku dok ja ovo pišem ona meša nekaj da nam speče kifliče. Našli smo i nekolko recepti za pečenje kruha gde se mesto germe rabi soda bikarbona. Ak ste malo znatiželjni idite na internet i bute našli neverojatan broj kojekakvih recepti bez germe.

Ovih smo dana jeli neke stvari na koje smo več i zaboravili. Osim klasičnih žganci z čvarkima jedan dan je Đuro za fruštuk napravila prosenu kašu z prepečenim lukom. To je negda volil jesti moj stari. Žganci su inače jako dobar prilog i za kojekave saftove i naravno za divljač. Samo gde v ovo vreme nabaviti divljač? Malo nas muči kaj nemremo dobivati friško kravlje mleko za delanje domačega kefira pa bu Đuro eksperimentirala z friškim mlekom z dučana. Z mlekom v tetrapaku vam nemre pomoči nikakva gljiva da ga skiselite. Nebute verovali kaj sam prošle nedele kuhal. Dobili smo pred neko vreme pri prijatelima v Goli Đureka/Jureka ali bez Katice. Mislim da ga zovu i cvergel. On celi očiščeni nema više od pol kile al čisto dost za nas dvoje. Računal sam ovak: Imamo jednu dobru juhu, kuhano meso za dvoje, paradajzsos i pire krumpir. No dogodil mi se peh na kojega nisam računal. Izgleda da je Đurek bil več v pristojnim letima. Del sam ja njega kuhat dost rano al i nakon tri dobre vure on je još navek bil živahan. I kaj sad? Odgrabil sam dio juhe, zakuhal rezance i zvadil povrče. Đureka sam pustil kuhati još skoro dve vure pa smo imali finu ranu večeru. Ostalo je naravno i juhe za drugi dan.

Prošli sam tjedna moji dragim suradnicama Coolinarikama obečal da ih bum obavestil kak je uspel Đurin pokušaj da napravi krpice i rezance od svojega brašna. I znate kaj? Uspela je biti baš kreativna. Napravila je i rezance za juhu i krpice al se poslužila z jedni „trikom“. Pomešala je svoje bezglutesko i pirovo brašno i bil je to pun pogodak. Rezance smo zakuhali v kobasičju juhu a krpice zeljem su bile čak i po mojim kriterijima jako zadovoljavajuče.

Nabava namirnica

Več sam spomenul prije tjedan dana da imamo zahvaljujuči Đuri kojekave zalihe ali je to trebalo malo dopuniti kak bi mogel skombinirati normalni jelovnik sledečih tjedni. Tak smo prošle subote odlučili da to obavimo v što kračem vremenu i z najmanje rizika. Najprije sam nazval svojega mesara Tomeka da vidim kakva je situacija z ponudom i eventualnom gužvom. Rekel je v koje vreme moremo dojti a ja sam mu mam zdiktiral naruđbu. Do toga vremena smo skoknuli do najbližega trgovačkog centra. Gužve nije bilo ali su imali poseban režim. Puštali su samo određen broj kupaca v dučan i svakojemu su dali broj kojega mora vrnuti dok plati na blagajni. A opskrba? Čist normalna. Ničega ni falelo pa čak ni onoga jako traženoga papira. Kupili smo nekaj više voča i povrča i nekaj zmrznute ribe.

Pri Tomeku sam kupil samo mešano mleveno meso za par obroki i celi friški kravlji sir kojega nabavlja na jednom OPG-u v đurđevačkom kraju. Moram vam reči da smo mam drugi dan za fruštuk jeli sir z vrhnjem i malo preterali. Naime v sir i vrhnje smo narezali lepu količinu češnjaka a dodali smo i malo domačega špeka. To je fakat delicija z jednom falingom. Jako je žedno.

Dok smo se vračali doma onak usput smo navrnuli do naše apoteke da vidimo dal imaju maske. Za čudo nije bilo ni gužve a imali su i maske. V apoteku nemrete al imaju na vratima složenoga obločeca čez koja vam daju ono kaj trebate a vi im date lovu. Tek sam se posle zapital kaj bi bilo da sam plačal z karticom kak i preporučaju da plačamo z „plastičnim nofcima?“ Znate kaj je interesantno? Cena maski. Jedna poznata apotekarica nam je rekla da one obično koštaju v nabavi na veliko manje od kunu. Ove sam platil 9,5 kuna komad. Još sam navodno i dobro prešel jer vidim v medijima da su neki baš jako preterali z cenom v ovim našim teški trenutkima.

Nekaj za dušu

Kak mi kuhanje ni preveliki potrošač vremena lepo sam ga rasporedil na nekolko zanimljivih stvari. Dve moje „velke obaveze“ pisanje kolumne v Glasu Podravine i Prigorja i blog na Coolinariki rešim z velikim zadovoljstvom. Sad bar ni problem najti temu za pisanje. Okrenul sam se čitanju al samo prema lakšoj, zabavnoj literaturi.  Vrnul sam se k mojoj simpatiji Ephraimu Kishonu na kojega sam več pomalo i zaboravil. Našel sam najprije jednu odličnu knjigu pod naslovom „Essen ist meine Lieblingspeise“ kaj če reči „Jesti je moje najdraže jelo“. Čitam priču po priču o  kojekavim njegvim razmišljanjima o hrani i anegdotama v restoranima. Em se nasmijem em vežbam njemački kojega nemam često prilike govoriti. Tu i tam samo razmenim za svetke kojega e-maila z mojim starim prijatelom Dieterom. Druga knjiga je jako zabavna jer me jako podseča na ove naše sadašnje prilike. Knjiga se zove „Kučna apoteka za zdrave“. Baš se od srca nasmijem jer su to večne teme svima nama jako poznate. Kak imam skoro sve Kishonove naslove prevedene na hrvatski mislim da bum ponovil gradivo a od srca preporučam i vama koji volite čitati toga majstora dobre humorističke literature.

E sad na red dolaze križaljke. Zamislite ovaj prizor. Ležim na kauču ispred televizora, na stoliču do mene je osim vrpe knjiga i vrpa križaljki. Na tv-u nastojim pronajti nekakvu glazbu koja me ne smeta dok se koncentriram na rešavanje križaljki. Ja inače najrajše rešavam one klasične pa talijanke. Skandinavke mi idu malo na živce al su za silu i one dobre.

Muzika je pak večito prisutna po celi dan a kombiniram ovak: naš radio Koprivnicu, Radio kaj i drugi program HR-a. Ako pak ni na programu muzika po mojem ukusu imam vrpu svojih kazeta i CD-a. Tu morem delati kaj oču. Slušam moje omiljene dame v jazzu kak je Ella Fitzerald ili Natalie Cole, pa  Nata Kinga Cola ili velike revijske orkestre koji su predivna glazbena kulisa dok nekaj delam na kompjuteru. Ak se pak zaželim domače glazbe imam i toga dost v mojoj diskoteki. Tak sam se jučer zaželil malo dalmatinske atmosfere i brzo sam si del jedan Oliverov CD. Niko me nemre tak otpelati na Jadran kak Oliver ili pak koja dobra klapa.

„Obaveze“ prek dana

Ono kaj delam rano v jutro morti i nebi trebalo biti pod navodnikima jer je to nekak postalo standardno. Naime ja sam i prije znal v jutro malo vežbati al kak sam pred skoro leto dana imal problema z kolenom poslušal sam doktora i vežbal svako jutro konkretne vežbe. Jedno dva meseca smo Đuro i ja vežbali skupa jer je i ona imal slične tegobe z kolenom. Onda je to prešlo v naviku a v ovih nekolko dana kak čučim doma to je postalo i jako potrebno. Odvežbam nekolko standardnih vežbi i onda vozim par minut kučnoga bicikla. Nisam baš lud za vežbanjem al sam primetil da mi to baš pomaže pa mi je nekak i lagano zadovoljstvo. Moram nekak nadoknaditi one aktivnosti v goricama. Ovih dana moram i pokositi travu oko hiže jer travi i kojekakvome draču strašno paše ovakvo vreme.

Posle vežbe i higijene Đuro i ja se držimo svojega staroge rituala oko fruštuka, kave i tri partije bele. No v zadnje vreme ima jedna novost v našem jutarnjem prehrambenom ritualu prije nego pojedemo nekaj konkretno. Morti vam se ovo dopadne.

Napitak za imunitet ala Đuro

• V jednu flašicu je zmešala med, đumbir, limun i cimet!
• To pogutnemo po jednu jušnu žlicu. Na prvi pogled se čini da je to jako fino al verujte kak kombinacija mi nekak više sliči na nekakvu lekariju. Za imunitet bi čovek sve dal.

Ja pojedem par badema a onda sledi smuti ala Đuro.

To vam ovak zgleda:banana, naranča, kivi, jabuka, kurkuma, papar, cimet, đumbir i med. I sad vi meni rečite: jel moguče da čovek kraj takve jutarnje vitaminske bombe oboli?

Da mobiteli rade to je normalno. Čujem se z prijatelima a posebna mi je „obaveza“ nazvati dvojicu prijatela koji su v samoizolaciji: Atača i Davora. Prokomentiramo kojekaj oko ove naše situacije ali i razmenimo informacije oko kuhanja. Atač me je neki dan čist ozbiljno pital da kak se kuha kuhani krumpir. Davor mi je pak spripovedal na kakav je načil pripremil piletinu. Bravo dečki. Samo vi kuhajte. Davoru je ovo i prava prilika da skine koju kilicu. Inače na dijetu putuje več letima.

Z čim sam malo nezadovoljan?

Glečte ovak. Mediji moraju ljude obaveštavati kaj se događa i upozoravati na ponašanje i disciplinu v ovim teškim vremenima. To nije i nesme biti sporno. No bitno je znati ko sve treba davati informaciju i kak ju dozirati. Na svojemu sam facebooku napisal nekaj o tome i mislim da se ljudi z menom uglavnom slažu. Imamo stožer sastavljen od stručnjaka čije bi informacije trebale biti merodavne.Informacije idu nekolkoput dnevno na svim medijima čist dost za našu infomaciju.Te informacije smeju prenositi i odgovorni političari i naravno stožeri po županijama i gradovima. To bi trebal biti kakti „zakon“. Imam osečaj da nas zasad ti ljudi dobro informiraju i da nema nekakvih muljanja i prešučivanja.

No ono kaj me smeta kaj informacije šalju i zvani i nezvani. Šalju se proturečne informacije daju ih kojekakvi „stručnjaki“ i kojekakvi mediji. Morem razmeti da se mediji boriju za nekakve „ekskluzivne informacije“ al sam siguran da to ne doprinosi smirivanju situacije. Ak još dodamo informacije o potresu v Zagrebu onda se situacija još pogoršava. Ogromna količina informacija dodatno opterečuje narod i pridonosi opčoj atmosferi, širenju glasina, stvaranje nemira pa i panike. Rezultat toga je i ova prekomerna kupovina kojekakvih namirnica i nepotrebna zaliha koječega drugoga.

Ja vam dragi moji OSTAJEM DOMA i čekam neka bolša vremena. Fale mi naravno moji prijateli, gorice i ovi proletni radovi al i to bu došlo na red za koj dan.

Sad fakat imate dost vremena pa se posvetite malo više kuhanju.

Pondelek

Juha/Glavno jelo:Povrtno pileči ragu; to bu danas jedino jelo ali bogato i z povrčem i piletinom.
Desert: Imamo punčkifle od jučer. Oni se moreju jesti danima i sve su bolši

Tork

Juha: Prežgana juha z krutonima
Glavno jelo: Dinstana junetina z hajdinskom kašom; cikla
Desert: Kompot od jabuki

Sreda

Jan si je ovo naručil al bu došel samo da mu složimo v porcije i blagoval bu doma.
Juha: Paradajzova juha z noklecima
Glavno jelo:Štefani pečenje, pekarski krumpir, turšija
Desert: Pita od sira

Četrtek

Juha/Glavno jelo: Čušpajz od poriluka, malo suhoga mesa
Desert: Palačinke z pekmezom; barem pekmeza imamo v izobilju

Petek

Juha: Krem juha od graha z rezancima
Glavno jelo:Frigane srdelice, grah šalata
Desert: Tu bu pasala čaša vina

Subota

Obzirom da nema odlaska v gorice onda bu več tradicionalni dan od testenine
Juha: Juha vu vodi v kojima su se kuhale krpice ala Đuro; znate več da tu ide dost vrhnja i treba dobro začiniti. Morete i nekaj v to zakuhati.
Glavno jelo: Krpice ala karbonara; tu ne štedim ni na špeku ni na parmezanu
Desert: Sok se navek najde

Nedela

Nek bu danas nedelna klasika
Juha: Anjgemahtec
Glavno jelo: Pohana piletina, rizibizi, šalata
Desert: Vočni kup, kapučino