A kaj da danas kuham? (463)

100 let moje Mame

Bum vas samo podsetil da je naslov ovoga bloga baš nasleđe moje Mame koju sam zval Baka. Več je punih deset let kak sam pod naslovom „A kaj da danas kuham?"počel pisati kolumnu pod tim naslovom v Glasu Podravine a brzo iza toga počel je i moj blog na Coolinariki. Tu rečenicu sam tolko put čul v ranojutarnjim razgovorima Bake i njezinih susedi i pajdašici. Pomalo ju i razmem. Negda je bilo puno teže kuhati jer su naprosto prilike bile čist drukčeše nego danas. Malo se toga imalo i moglo kupiti a jesti je trebalo saki dan. Bila su to zapraf vremena kad je bila prava vještina preživeti z onim skromnim mogučnostima. Tu je Baka bila zapraf pravi virtuoz. Bavila se svim i svačim. Na ono malo zemljice, koju je nasledima od svojih roditelja, gde je navek zraslo nekaj žita, kuruze, graha i krumpira trebala se prehraniti familija, živad i ishrane dva pajceka. Dobro se sečam da je po starom dvorištu, gde je danas moja kuča i garaža, bežalo kojekakve peradi a navek se našlo i koj dinar da se negde v to vreme ranoga prolječa kupe dva pajceka koji buju pravi smok tek v prosincu. Bila je majstor za pronajti vrganje i neke druge jestive gljive koje su mi i danas prava delicija. Pekmeze je pekla z kojekakvoga voča z našega vrta i gorici. Morti se bute setili da sam več spominjal dva odlična pekmeza koji se danas skoro nepoznati: od beloga tuduma i zelenoga paradajza. Đuro je zadnja dva leta počela peči pekmeza od crnoga tuduma, tzv katabe, koj je fakat pravi specijalitet i odlično se slaže z diganim testima kak su kifli ali i z palačinkama. Posebno se sečam bakinoga pekmeza od šipka kojega je brala po nekim sečama. A kiselina za zimnicu? Ni znala za turšiju al mi je v posebnom sečanju ostala paprika filana z belim i crvenim zeljem i tzv francuska šalata. Nema to veze z francuskom šalatom koju svi slažu za novo leto kak prilog krmetini. To je bila ukiseljena šalata od mešanoga rezanoga povrča: paprike, paradajza, luka i vugorki.

Baka je inače bila, za ono vreme v prvoj polovici prošloga veka, z dobro stoječe selske familije, rođena v Koprivničkom Ivancu pet kilometri od Koprivnice. No kak to več ide, dok je puno dece i grunt se razijde i smanji. Imala je troje brače, bila je druga po starini, i dok se udala za majstora Blaža, preselila se v Koprivnicu. To je naravno značilo i potpunu promenu načina života. Reklo bi se z Ivanca je pobegla al do Koprivnice ni došla. Trebalo je skrbeti za one tri-četri zemlice, iskati pomoč pri rodbini oko obrade grunta, obrađivati dost veliki vrt oko hiže a z druge strane brinuti o zaposlenome mužu i školovanju dece v gradu. Poznata situacija: držala je tri vugla pri hiži.

No štel bi nekaj reči o njezinoj kuhinji v nekakvim normalni vremenima.Nemrem reči da je imala neverojatan jelovnik al morem sigurno reči ovo: njezina kuhinja je bila vrhunske kvalitete. I još nekaj. Nigda nije oscilirala v kvaliteti kaj meni često ne uspije. Posebno mi je bilo interesantno kaj ona skoro nigda nije probala ono kaj kuha. Sve je to bilo jedno velko iskustvo i osečaj za meru. Bila je posebna i po tome kaj je retko za obed sela za stol z nama. Nigda nije preštimavala jela žlicom i tek dok je več bila v prikraju svojege života znala je reči:“Juha se mora jesti“. Slažem se z tobom Baka.

Jedna mala zanimljivost oko Bakinih leta.  Ona je bez konkurencije najstareša osoba v našoj široj familiji. Doživela je devedeset četri lete i osam meseci. Njezina je baka bila dugo rekorder z devedeset, mama joj je doživela osamdeset i četri lete a tata, moj deda Joška, jedva malo više od sedamdeset i pet. Brača su joj doživela od sedamdeset tri do sedamdeset i pet. I sad čujte ovo. Baka je celi život nekaj pobolevala, navek je bila uglavnom sam svoj majstor, bila celi život na nekakvim tabletama. Ne sečam se da je prešla vagu od pedeset i pet kila kaj je bilo i normalno kad je jela kak ptičica. Tata je pak bil čovek od dobroga apetita, nije nigda v životu popil koju više, discipliniran v svemu, navek je nekaj delal i vozil bicikla. Bil je i punih trinajst let stareši od mame. Doživel je samo sedamdeset i osam let kaj če reči da ga je baka nadživela za punih šesnajt let. Kak morete videti v životu baš nema pravila niti pravoga recepta za dugi život.

Na Bakin 100-ti rođendan Đuro i ja smo dali napraviti pri našoj cvečarki Marinki lepi buket cveča, na traki dali napisati samo brojku 100 i zapalili smo velkoga lampaša. Morti je baka sve to i vidla.

Imbra je proslavil rođendan

Več je nekak tradicija da moj šulkolega Imbra 11. 3. proslavi svoj rođendan v krugu prijatelja. No ta proslava ima i „radni karakter“. Najprije je slavil v krugu svojih suradnika z posla, onda je priključil nas nekoje z naše školske generacije jer smo se kakti morali dogovoriti za godišnjicu mature v lipnju a zadnjih osam let su priključeni i stareši članovi naše udruge „Gekoma“. Evo to smo i ovo leto oddelali na opče zadovoljstvo slavljenika al i svih ostalih gostiju. Kak sam prošli tjedan i napisal stol je fakat bil jako bogat al je njegova supruga Dubravka napravila jednu „greškicu“. Dok je na stol došla torta svi smo se zagledeli v one izdajničke brojke zapičene v tortu. Znam ja da smo Imbra i ja generacija al mi se činilo da mi je on letima nekaj tajil. Na torti je lepo velkim brojkama stajalo 79. Kaj je sad to? Ni valda tolko stareši od nas a da mi to nismo do danas znali? Onda je gospođa viknula:“Joj kaj sam to napravila? Okrenula sam brojku 6 naopak!“ Eto kak se časkom čovek more postarati za tri lete. I to ti još napravi vlastita žena.

Đurina „borba“ proti korone 

Setili se bute da sam znal pisati o tome da rat pri nama more početi jer se Đuro svako leto pobrine da napravi nekakve zalihe jer „kaj bum ja išla saki čas v dučan“. Dok je ovih dana počela utrka po dučanima i kupovanje svega i svačega, mi nismo ni pomislili ni v jednom trenutku da se tim ljudima pridružimo. A evo i zakaj.

• Imamo još nekaj krmečega mesa od kolinja
• Imamo i nekakve količine suhoga mesa i kobasi
• Nekolko piceki smo v Goli kupili negde oko novoga leta
• Tu i tam pri našem mesaru Tomeku kupimo kakav lepi falačec junetine i mlevenoga mesa

Ali sad čujte ovo.

• Pekmezi i đemova imamo od petnajtoga leta svako godište barem po desetak flašica
• Sirupa za sokove imamo od malina, kupina, aronije koprive, bazge, kruške u čisto primrenim količinama.
• Lepa je zaliha i ajvara takaj barem dva-tri godišta.

Malo smo deficitarni z normalnim brašnom ali zato Đuro ima navek pristojnu zalihu bezglutenskoga brašna. Od njega se baš nemreju peči svi kolači al zato je kruh čist v redu.

Ima Đuro i pristojnu zalihu špageti i još nekakve testenine „senza glutine“  a bome i rižinih rezanci. Svaki pu dok smo v šopingu zeme ona bar jedno pakiranje pa „nek  se najde“.

A ak nestane krumpira i friškoga povrča navek bumo našli koju kilu pri našim prijateljima v Goli. I sad vi meni rečite kaj nama treba jurišati na police v nekojem trgovačkom centru?

Probal se bum ovaj tjedan podsetiti jelovnika moje Mame. Nebum vam pisal za svaki dan nego si zberite kaj vam paše. Ak vam paše.

Juhe

One klasične kokošje i goveđe nebum ni spominja. A v to znate da idu rezanci, kašica sitna i krupna, grisknedli i leberknedli. Bile su tu naravno i nezaobilazne prežgana i paradajzova juha. No rado bi vam spomenul jednu juhu koja mi je bila navek fina al ju ja neznam tak slkuhati. Bila je to njezina krumpirova juha. Vu vodu je hitila par kockici krumpira, negda i koju mrkvicu, dodala malo kokošje masti. Krumpira je zdrobila na grubo, dodala soli, papra i friškoga peršuna. Dok je došla Vegeta i nju je dodala.

Naravno da je kuhala kojekakve kisele juhe: od pilečeg sitniša, pilečih želučeki i celoga pajšleca ili plučeca i fileki na kiselo. To su zapraf sve bili tzv „gulaši“ na kiselo z malo krumpira.

Mesna jela

Bila je tu čista klasika kak su pohanci, faširanci, pečenja od krmetine i peradi i ono kaj ja i danas delam: mesa na češnjaku. Moreju to biti razna mesa ala krmetina, junetina i piletina. Meni je na taj način znala podinstati i svinjske nogice. To je poseban gušt jesti naravno z prstima jer su tu vilica i nož alatke z viška.

Za Vuzem i još koj put za nekakav svetek pripremala je filana teleča prsa. Njoj je bilo šteta v to deti mleveno meso pa je slagala fil od jetrici, beloga kruha/žemlje, morti malo naseckanoga špeka i naravno začine. Mala napomena. Negda se pri nama i teletina mogla kupiti kak i druga mesa i nije bila tak skupa kak danas.

Kuhana mesa su v pravilu bila z paradajz ili hren sosom. Za razliku od mene ona je paradajz sos navek delala z malo vrhnja. Moram i ja to jemput napraviti.

A čušpajzi?

Kak sam i rekel. Neponovljivi i navek isti. Naročito je morala paziti da v petek bude obavezno grah. Naime pri mojim starcima je desetak let stanoval moj prijatel Mato koj je obožaval grah. Dok je jemput baka čisto radi promene skuhala nekaj drugo, pojel je samo dva zalogaja i ostavil s napomenom da mu više ne priređuje „takve šokove“. Sečam se i graha bez mesa samo z mrkvom. Dok se je ohladil ja bi za večeru navečer nadrobil samo kruha i to onda zmazal v slast. Bojim se da to danas baš nebi pojel v slast.

Testenine

E to je bila moja rak-rana. Delala je sve moguče testenine ala šiškrli, ščipanci, široki rezanci ili knedli. Verujte da to nisam nigda savladal. Svi su se vu familiji gutili z tim a ja sam se na to samo duril. Do danas sam savladal samo široke rezance ali moraju biti jako tanki. A baš je takva testenina bila jako često za obed a bome i za večeru. V dobrom sečanju si mi ostali bakini mlinci makar su bili bez mesa. Baka ih je pekla na ploči od šparheta, bili su tanki, pofureni z vrelom vodom, preliveni z svinjskom maščom i dobro začinjeni. Ja i danas mlince jako paprim.

Kolači

Bila je maher za sve digance ali sam zapamtil posebno jednoga kojega mlade žene ne delaju. Bili su to diganci z cimetom i svinjskom maščom. Razvaljala je digamo testo jako tanko, posipala ga z cimetom i cukorom i zalijala z malo masti. To je bilo jako fino friško al sam užival dok se malo ohladilo a mast i cimet su se staložili na doljnjem sloju z dobro pečenom koricom. Prefino.

Pekla je i sve štrukle a meni su bili, kak i danas, najbolši oni z tikvom i makom. Posebni su mi gušt bili paprenjaki: štrukli z dinstanim friškim zelje i dobro popapreni.

Ima jedna „savijača“ koju smo zvali mazanica. Baka bi one rubove od štrukli ponovno premesila, razvlekla i to posipala z malo orehi, cukora i polejala z malo masti.Zamotala i spekla v reš. Za mene nekaj prefino. Za tatu je pak pekla slane pogačice koje je on obožaval. Jednostavni sastojki: brašno, sol, malo vode i žlica-dve svinjske masti. To su bile tzv prfke pogačice. Za gorice nam je letima pekla najprostešu pogaču na svetu: brašno, voda i sol. Bila je slana i žilava. Dušu dalo za pijance.

Drobne nebum ni nabrajal. Delali su se naravno vu večim količinama za Vuzem i Božić a bilo ih je onda za celi tjedan.

Morti vam bu ovaj predlog jelovniki dobra ideja za ove teške dane v karanteni.