A kaj da danas kuham? (460)

Štikleci prošloga tjedna

Najrije vam bu spripovedal jednu „revolucionarnu“ novost z naše familije od prošloga tjedna.  Naime za Jana i sebe sam napravil jedne špek-fileke baš po mojemu guštu: puno friško dimljenoga špeka, fileki mekani kak puter i sve to dobro začinjeno. Dok smo se Jan i ja baš onak dobro napucali svaki z dve dobre porcije i dost parmezana, ostala je još jedna porcija koju sam nameraval ostaviti za drugi dan. Evo popodne Đure od kčeri Irene, gde čuva vnuku Tiu, i čujem da nekaj petlja po kuhinji al nisam ni v snu mogel predvideti kaj bi to ona mogla delati. Za par minuta dojde i veli:“Moram ti nekaj piznati!“ Znate kaj muž prvo pomisli: ili je razbila auta, ili je kupila nekaj kaj nam „jako treba pri hiži“ a puno košta ili je morti nekakva treča nepodopština? „Reči o čemu se dela?“ pitam ja. Ovo kaj je sledilo me je „šokiralo“:“Danas su ti fileki fenomenalni!“ Pa ljudi moji ja to znam več desetlječima al kak ti to znaš kad ih do sad nisi nigda ni okusila? Izgleda da je v njoj odavno tinjala želja da počne jesti te „frotire“ a ovaj put je to bilo jače od nje i ni mogla odoleti da ih ne proba. Kaj proba. Baš ih je lepo zmazala. Tak smo Jan i ja dobili kompu za uživanju u ovoj deliciji.

Neznam zakaj mi je došlo prošli tjedan da idem kuhati opet hladnetinu. Otišel sam do svojega mesara Tomice, zvlekel mi je od nekud z frižidera četri nogice, nekaj friških kožici a ja sam kupil još pol kile pilečih želuci. I mam sam se popodne dal na posel. Hitil sam v lonec materijala, sve začine kak i navek i verujte da sam sve to krčkal na laganoj vatri prek četri vure.  Dok se materijal skoro „raspadne“ onda počne onaj fini posel: spandlati nogice, odstraniti kosti a kožice i želuce narezati na trakice. Onda sve to zmešam v jednoj večoj posudi kaj bu svakud ista količina mesa i zalijem z juhom po zdelicama. Naravno da na svaku porciju potepem malo slatke paprike. Prek noči želatina napravi svoje i evo meni jednoga posebnoga gableca. A kak ju jedem več znate: samo ju prelijem z dobrim domačim koščičnim uljem. Najte misliti da sam svu tu količinu ostavil za sebe. No govora. To Đuro lepo razvozi prijatelima i svojoj deci. Kak ste mogli videti to je bil obed v subotu.

Prošle srede sam imal jednu velku obavezu. Naša je udruge gimnazijalci imala godišnju skupštinu jer nam je to zakonska obaveza. Znate več kak to ide: kojekakvi izvještaju o tome kaj smo delali prošlo leto, kak stojimo financijski, onda program rada za ovo leto i tu i tam nekakva rasprava o rečenome. Takvi skupovi mi baš nisu preveč dragi ali dok ste predsednik udruge morate jemput na leto i tak nekaj obaviti. Najvažnije je ono na kraju: zakuska uz gemišt. Ovaj smo put naručili ketering od jednog restorana kojega su nam preporučili neki prijateli. Obzirom da je to sve onak z nogu bili smo praktični i naručili papicu bez žlice. Bil vam je tu fakat svega: pršuta, buđole, sireva, lepinja, nekaj ala mini pica, kanapeiči i pogačice z čvarkima.

Gemišt je bil od jednog proverenog podravskog vinogradara i nismo se razočarali. Kolega Tonč je kak i navek donesel nekolko flaši svojega portugisca koj mu je ovo leto jako dobar.Verojatno pogađate da je ovo treče poluvreme najduže trajalo. Pa neke članove udruge vidimo samo o skupštine do skupštine.

Ovo vam je dio ekipe koja pažljivo sluša kaj im njihov predsednik ima za reči o prošlom leti i naravno kakvi su nam planovi do kraja ovoga leta. Morete videti koja je to ozbiljnost jedne stare gimnazijske udruge.

Kaj mi ovih prvih petnajst dana ožujka sledi več znate: rani radovi v goricama. Kak je priroda več počela delati svoje moramo se prilagoditi i obaviti rezidbu i ono prvo špricanje protiv kojekakvih neželjenih pojava na lozi. Meni je lako z mojih tristo loza al oni z velkim goricama moraju malo jače zasukati rukave.

Da vam onak samo usput velim jednu pomalo komičnu situaciju. Onih sam dana dobil od naše vrle banke informaciju da sam za prošlo leto 2019. dobil jednu (0,01kn) lipu kakti dobit. Probajte zračunati kolko je koštala kuverta i dva lista papira na kojima su mi pojasnili kaj se to dogodilo tokom 2019. ze svim mojim transakcijama. Pa kak nebi čovek bil sretan i zadovoljan. Probal sam zračunati kolko bi mi let trebalo da z takvom kamatom skupim za jednu kavu. Nisam uspel. Probajte vi ak imate dost živci.

Da sam meteopat to ste več morti mogli primetiti v nekim mojim tekstovima. No Đuro zna kak mi pojasniti proljetni umor i najti opravdanja i za njezine i moje tegobe:“A to ti je ovo nesretno proljetno vreme!“Mam mi je lakše i malo živnem.

Pondelek

Juha/Glavno jelo: Kisela juha od pilečih želuci; navek dodam malo krumpira pa rado pojedemo nekaj na žlicu.
Desert: Imamo naravno još onih „čudo šniti“ od nedele

Tork

Juha: Prežgana juha z jajcima
Glavno jelo: Pečeni krumpir na ploške „popločan“ z nekolko šnita špeka
Desert: Čaša crne pive

Sreda

Juha/Glavno jelo:Sarma; nisam ju dugo kuhal a imamo još nekaj zelja. Verojatno bum napravil malo veču količinu i spremil za još jedan obrok. Kak prilog ne delam pire jer mi se onda zgubi pravi okus sarme.
Desert: Slani klipiči

Četrtek

Juha: Koprova juha z kašicom
Glavno jelo: Dinstana piletina na češnjaku, hajdinska kaša
Desert: Nekakav sok

Petek

Juha: Juha od ribljega sitniša
Glavno jelo: Šaran v kuruznom brašnu, krumpir/grah šalata
Desert: Jedan lagani gemišt a za Jana musolini

Subota

Juha/Glavno jelo/Desert:
Kak su počeli radovi v goricama bumo verojtno nekaj improvizirali. Za gablec bu malo kobasica, špeka i sira a za obed morti vinski gulaš. Da ne gubim vreme meso bum podinstal dan prije. Za desert ima kojekakve tekučine: od gemišta, pive do sokova.

Nedela

Juha: Juha od purečega sitniša
Glavno jelo: Pečena pureča bocka, rezanci od palačinki, zelena šalata;
*Moram dati malo pojašnjenje: juhu bum pojačal z dost povrča i z jednom kokošjom bockom jer verujte da nisam još nigda kuhal juhu samo od purečega sitniša. A bocka od one čuvene Đurine „purice“ zgledala je kak šunkica od malo jačega odojka. Pak bumo imali obed za bar dva dana ili bumo pozvali nekoga na obed.
Desert: Štefanič šnite; to je kolač kojega je negda znala peči moja mama.