A kaj da danas kuham? (442)

Jan je 25. 10. postal punoljetan

To je morti najvekša novost v našoj užoj obitelji al ima još nekaj važno. Naš je pajdašGino navršil sedamdesetu a Đuro i ja slavimo godišnjicu braka. I sad ti ostani normalan, drži dijetu i nemoj ništ popiti? Takav karakter pak nisam. Moram samo jako paziti da lepo rasporedim snage na nekolko dana.

I to smo dočekali. Jan je navršil osmanajst let. Jako se dobro sečam kaj se događalo na taj dan. Za jednu zagrebačku firmu sam držal seminar na Belolasici, popodne dojdem v Zagreb i dočeka me velka novost: rodil se Jan, prvi Đurin vnuk. Jan se naime rodil v Zagrebu jer mu je mama Irena dijabetičar pa je morala porod dočekati v Petrovoj. Kak su za taj događaj več doznali neki moje pajdaši nazvali sume i rekli ovak nekaj: „Čestitamo. Od danas buš spal z bakom. Ak očeš spati studenticom upiši ju na fakultet.“ Đuro je ipak ostala samo baka. Sva ta leta Jan je nekak bil dosta vezan za nas. Več z osam meseci je bil z nama v Milni na Braču a tak je bilo još letima. Više nije drukče govoril nego „bumo i ovo leto išli na moj Brač“. Sad kak više nejdemo Đuro i ja na more više nije ni zainteresiran za letovanje na moru. Više mu znači naša Šoderica i pajdašija.

Ovak zgleda Jan z osamnaest let. Slikal se nedavno na nekakvome aeromitingu v Češkoj.

Nekak v zadnjih leto dana sve češče zove svoju pajdašiju kojekakvim prigodama k nama v gorice i  morem vam reči da se jako dobro zabavljaju. Mi im pripremimo klopu, dobiju nekaj vina a ostalo si organiziraju sami. Posebno im se dopada kaj tam moreju i spati. Ak se dobro rasporede komotno more spati njih šestoro a ak ih je dvoje imaju mesta i preveč. Još do prošloga leta Jan je rođendan slavil i z pajdašijom i z nama starcima no ovo se leto sve promenilo.To je i normalno. Mi bi mogli samo smetati. Doduše isti dan dok Jan slavi rođendan mi imamo slavlje pri gore spomenutom Ginoju tak da moremo sudelovati samo v pripremi klope. Jan je to ovak zamislil a mi bumo realizirali:

• Njegva mama Irena bu spekla jedan kolač i dala novce za ostalo
• Đuro  bu spekla drugoga kolača i klipiče a
• na meni je da pripremim meso za roštilj i napravim paštetu koju Jan obožava
• Piče ih bu čekalo v podrumu
• Ekipa  se odlučili na roštilju za čistu klasiku; Čvapi, ražnjiči, belo pileče meso i vratina. Z kojekakvim prilogima naravno. (Nemrem nikak shvatiti da ti mladi rajše jedu belo suho meso nego bocke i lopare. Moral bum meso rezati malo deblje i deti ga prek noči v pac)

Realizacija je njihova. Jan i još neki njegvi pajdaši buju došli vuru-dve prije da zakuriju vatru tak da ostatak klape dojde na gotovo. Scenarij za nastavak fešte nemrem ni  uz pomoč mašte baš predvideti. Znam da navek donesu svoju glazbenu liniju mak imam i dobar CD-plejer, dobar radio i dobar izbor „goričke muzike“. Doduše njihov i moj izbor muzike su dva različita sveta. Kak bu sve završilo bumo znali tek v nedelu dok dojdemo videti kak zgleda „bojište posle bitke“

K nama Jan dolazi, kak več i znate, svaki tjedan dvaput na obed nekak od šestog-sedmog razreda osnovne. I naravno na sve velke svetke kak su Vuzem i Božić. Znamo kaj voli jesti i tak se navek za te dane i pripremimo. No moram priznati da nije posebno zbirljiv a znamo da je „lud“ za juhama. Počel je z paradajzovom juhom, krenul na bistre i krem juhe da bi zadnjih par let „poludel“ za kobasičjom juhom. Ona mu je apsolutni favorit tak da sam još do pred dva tjedna čuval par domačih dimljenih kobasi bez kojih se takva juha nemre ni zamisliti. Odavno sam ga nafčil jesti fileke i sad još mora savladati „žlundrice“ koje ja obožavam. Dok kuham bočing ili nekaj slično svi oni prefini želatinozni falačeci mesa završavaju v mojem tanjuru. Nije baš lud ni za mesom na kostima ali za to treba malo vremena da skuži da je meso na kostima najslajše.

V našoj kuhinji nek još ovo leto uživa. Nakon mature sledi Zagreb a tam se bu moral snalaziti sam i pomalo eksperimentirati. Navodno da danas više ni v Studentskom centru ni tak loša hrana kak je bila za mojega vremena. Druga mu bu varijanta da se pati čez tjedan a prek vikenda opet dojde k baki i dedi pojesti ono kaj si zaželi.

Kak je zgledalo na Ginojevom rođendanu bum vam napisal drugi tjedan. V ovome momentu znam sigurno: za svojih sedam banki je pozval sedamdeset gostiju i znam da bu živa muzika.

Kaj se tiče Đure i mene mi se bumo ovaj put prešvercali. Nemremo isti dan baš sve proslaviti. Mi si bumo složili samo za sebe jedan intimni obed a ak nam neko dojde čestitati več bumo našli kakav zalogaj i kakvu čašu vina. Nije nam nekakva velika obletnica pa nam to pajdašija more i oprostiti.

Priznajte da v ovakvoj situaciji baš i ni lako napraviti nekakav jelovnik. Znam da bu iza Jana ostalo koječaga pa mi bu trebalo malo mašte da sve to uklopim v jedan normalni

tjedni obiteljski jelovnik. Ili još bolje: napravil bum jelovnik kakvoga bi složil Jan.

Pondelek

Juha: Krem juha od semenki z kašicom
Glavno jelo: Mesna pita z puno šalate
Desert: Puding od vanilije;znate kaj je interesantno: Jan kak i ja ne voli čokoladu!

Tork

Juha/Glavno jelo: Špekfileki z malo pirea i puno parmezana
Desert: Šnenokli

Sreda

Juha: Koprova juha z krutonima
Glavno jelo: Bočing v češnjaku, široki rezanci od palačinki, šalata od cikle
Desert: Obična zdena voda; v sredu  Jan ide posle obeda na trening pa si popije samo vodu

Četrtek

Juha/Glavno jelo: Čušpajz od poriluka z faširancima; v zadnja vreme ne delam klasične faširance nego ih pečem kak „pogaču“ v rolu i pečene zrežem na kvadratiče.
Desert: Jogurt torta; neznam zakaj se zove „torta“ kad je to običan kolač i reže se kak kremšnite

Petek

Jan voli ribe pod uvjetom: da nema kosti. Negda mu je baka čistila ribu a sad smo praktični: kupimo nekakav file ili lignje.
Juha: Juha od zmrznutoga osliča z povrčem i rižom; njemu igra i juha od kozici z kašicom i lignje na sve mile načine
Glavno jelo: File osliča na pariški, slani krumpir, tartarsos
Desert: Student kocke

Subota

Juha: Juha vode v kojoj su se kuhali domači rezanci. Z puno vrhnja naravno i nekakvom sitnom testeninom
Glavno jelo: Domaći rezanci ala francuski krumpir, šalata; i Jan i Đuro obožavaju i običan francuski. Srečom kaj Đuro ne voli kobase v tom jelu pa sve završi v mojem tanjuru.
Desert: Dobar bu i nekakav sok

Nedela

Jan bi v nedelu odabral verojatno nekakvo meso z gljivama al voli i ovo
Juha: Bistra juha od pileče sitnine z rezancima. Juha mora biti fest gusta.
Glavno jelo: Pečeni filani picek, krumpir na ploške i, nebute verovali, turšija. I još nekaj: od mesa bu jel belo ali mu je glavni fil z piceka. Napravim fil od mlevenoga mesa i to malo pikantniji.
Desert: Verojatno bi zaželel bakine šaumrole

Mogel sam predložiti još kojekaj jer ima fakat široki izbor jela kaj voli jesti, a voli otkrivati i navek nekaj novo. Dok je ono došel z Češke pital me:“Čuj deda? Si ti jel v Češkoj z gulašom one nekakve knedle? To mi je jako fino.“ Naravno da sam jel i nekak mi to još ni došlo na jelovnik jer to Đuro nesme jesti. Dok prvom prilikom nabavim nekakvu divljač, ili fini falačec govedine, bum mu složil i semelknedle.