Kak i svako leto krajem svibnja i početkom lipnja počneju godišnjice mature. One male,one srednje a bome i one velke. Svi su restorani puni i ak se na vreme ne setite rezervirati pravo mesto morete imati problema. Moja generacija takvih problema nema. Ak nije jako velka i okrugla, stvar je jasna: dobre buju i moje gorice.
Godišnjice matura
Puno mojih i stareših pa i onih nekaj mlajših je prošli vikend imal godišnjicu mature. Moji stareši pajdaši Joža i Boč su ovo leto slavili punih šezdeset i pet let od mature kaj je morate priznati lepa brojka. Ne preskočiju niti jedno leto da se nebi vidli i nekak su uzor nama nekaj mlajšima da i tak nastavimo z našim sastankima kak to delamo zadnjih pedesetak let. To vam je već pomalo pri nam potreba jer nas je sve manje i manje i svaki takav susret je lepo obnavljanje uspomena.
Druga grupa slavljenika je generacija mojega velkoga pajdaša Atača. Njegva je generacija imala 55-tu godišnjicu al oni preskaču one „male“ obljetnice i najdu se samo na ove okrugle. Nekak mi se čini da se nisu baš preveč naspominjali jer je jedna ekipa bila već v sedmi vuri navečer pri Ataču na terasi. O tome mi je Atač nekaj malo pripovedal jer je došel k meni drugi dan v gorice da vlovi malo zraka, pojede desert i popije kapučino.
Ima još jedna dobro držeča generacija koja je z leta v leto na istoj brojki. Tri su lete od nas stareši, slavili su 59-tu obljetnicu i došlo ih je dvadesetak. Bravo za njih. Oni se po tradiciji sastaju v koprivničkoj pivnici „Kraluš“ v separeu koj je taman za jednu takvu ekipu. Ono kaj je začuđujuće je kaj imaju još živu razrednicu, jednu divnu profesoricu Olgu Jančić. Rođena je 1922., predavala je hrvatski jezik al je nažalost otišla v Zagreb dok smo mi bili v prvom razredu i hrvatski nam je predavala prof Perčinović. Nju su generacije od milja zvale „Baba Latina“ jer je osim hrvatskoga predavala i latinski.
E a kaj je z mojom generacijom?
Kak sam i rekel mi ove „male obljetnice“ uglavnom obavimo pri meni v kleti ili kak ja to zovem „Pri veselom bedaku“. Em je jeftineše, emo smo na zraku em smo komotni. Dojdete v trapericama i majici i nemate brigu dal se bute zamazali, nedaj bože zamastili ili polijali. No moram vam reči jednu novinu v našem jelovniku. Prvi put se dogodilo da v gorice naručimo ketering. Kak smo mi gospoda v letima moramo jako paziti da se preveč ne umaramo a verujte dok čovek ima takav posel more se fakat jako nadelati. Ovak smo se dogovorili: ja bum pripremil predjelo a za glavno jelo bumo naručili ketering z restorana „Mia“ koja ima odličan roštilj. Tak je i bilo.
Glavne su ipak bile pripreme koje me nikak nisu mogle zaobijti. Trebate dosta noga nabaviti i v dučanu i na placu. Ovak vam je to zgledalo.
V devet vur v subotu Đuro je pokupila moje gimnazijske pajdaše Didija, Đuru (to nije moj ženski Đuro) i mene i sve kaj smo trebali je da kupimo kruha i drobne kolače v jednoj poznatoj koprivničkoj pekari. Čim smo došli v gorice krenula je priprema predjela: Đuro je rezal sira, ja sam rezal šunkaricu, špeka i jegera a Didi je sve slagal na ovale.Dodali smo naravno i paradajza, papriku i masline. Ostala je pajdašija mogla dojti.
Skupilo nas se dvanajst veterana i posle pozdrava počelo je prepričavanje novosti od prošlog susreta i, kak to već ide, prepričavanje starih događaja z naše mladosti.Naravno da su to uglavno stare priče a su nama pak sve „nove“.
Ketering su dopelali točno kak smo se dogovorili: 12.30. Tu vam moram priznati svoj jedan „promašaj“. Kak nigda nisam siguran kolko se bu ljudi odazvalo, a strah od „gladi“ je navek tu, ja obično naručim malo više klopice. Odma da priznam: svega je bilo baš jako obilno. Da je barem gladnih ljudi.
Na tacama je bilo složeno:
- Čevapa,
- Ražnjića (pilećih i krmećih)
- Pljeskavici obićnih i z kajmakom
- Punjeni pileći file ze sirom
- Tenfani grah
- Pekarski krumpir
- Luk, ajvar i
- Brdo lepinja.
Kak da se ovak ozbiljna gospoda hrvaju z tak moćnom klopom? Jest da sam posle narezal još mali i „pajdašeki“ al sam z toga zvlekel jednu velku pouku: dogodine svakak naručiti skromneše količine.
Desert je imal malo „industrijski štih“: kupili smo kilu drobnih kolači (imali su dobru prođu) a naše cure su još dodale mađaricu i dva meni totalno nepoznata kolačića. Kavu sam moral kuhati čak dvaput kaj me malo iznenadilo obzirom da moramo ipak paziti na naše zdravlje. A gemišt? Naravno da ga je bilo. Prijatelj Đuro je donesel svoje vino a dok je toga nestalo krenuli smo v moj podrum.
I sad jedna zanimljivost za kraj. Kak sam već i rekel, nama je teško hodati po štengama gore-dole pa smo odlučili zeti nekakvu pomoć. Bilo je kojekakvih predloga i onda se setim: Jan! Tak i tak dolazi skoro svaki vikend svojom pajdašijom pa kaj nebi mogli malo posluživati nas starešu gospodu? Prihvatil je predlog i rekel je da si bu zel još jednoga pajdaša. Odlično. Kad ono dopela baka Đuro njega i njegvu djevojčicu!Ups! Uglavnom. Kak ugostitelji se baš nisu proslavili, to nisam ni očekival, al su zato puno pažnje poklanjati sebi. Deca su se lepo gledala, igrali se svojim mobitelima, i uglavnom se posvetili pretežno sebi. Da nam nekaj donesu moral sam svaki put malo podviknuti. Očito da moram z Janom malo više trenirati i savjetovati ga koja je uloga fiškuša i konobara v goricama. Dogodine bu bolje.
Pondelek
Juha: Recimo Podravkina dalmatinska
Glavno jelo: Špinat, pohani kruh, jajca na oko
Desert: Naravno da ima rolade od jučer
Tork
Juha: Koprova juha z krutonima
Glavno jelo: Krmenadli v saftu od gljiva, restani krumpir
Desert: Pita od sira
Sreda
Nedavno sam delal jedan „čudan“ čušpajz pa ga bum pnovil za Jana.
Juha/Glavno jelo: Čušpajz od tikvice/krumpira/kelja; na malo luka sam dodal dva češnja češnjaka, na to hitil naribanu tikvicu i jedan krumpir i dodal pol glavice kuhanoga kelja. Neki dan to isto napravil ali mesto kelja sam naribal mrkvicu. Kakti „prilog“ sam dodal par kobasi i falačec suhoga mesa.
Desert: Pita od jagoda
Četrtek
Juha: Juha od pilećih želučeki
Glavno jelo: Jetrica na venecijanski, žganci
Desert: Vanil kifli
Petek
Juha: Krem juha od semenki
Glavno jelo: Skuše (konačno!) na žaru, blitva z krumpirom; skuše mi je nećakinja donesla Zagreba.
Desert: Čaša vina; za Jana bu i kifli od jučer
Subota
Juha/ Glavno jelo: Špagete bolonjez z puno parmezana, zdela šalate
Desert: Voćna šalata
Nedela
Juha: Juha od telećih kostiju
Glavno jelo: Filana teleća prsa, pekarski krumpir, zelena šalata
Desert: Štrukli z črešnjama; morti ste primetili da ovo leto črešnje brzo doju i još brže odu. Uništava ih kiša i škvorci.
:(Još nema komentara