A kaj da danas kuham? (413)

Radovi v goricama i još kojekaj

Svi kaj se malo razmu v gorice znaju da se v ovo vreme mora kojekaj obaviti v trsju ali i okolo njega.  No Đuro i ja smo si dali još nekaj drugoga  posla jer smo procenili da je za to baš sad vreme. Tak smo vam mi odlučili sniziti i suziti našu živicu ispred kleti. Ta vam živica inače služi za obranu od prašine koju podignu auti  z ove suhe ceste. Boga molimo da padne malo ozbilneša kiša i malo pokupi ovu zimsku prašinu. E sad. Te živice vam ima dost a kombinacija je ligustre i grabrove živice. Lepo se razgranala, otišal i vu visinu i vu širinu, kaj je dobro, al ima jednu manu. Ovakva ljudina kak sam ja ima problema dok treba poštucati po visini. Znam da bute rekli da za to more poslužiti i lojtra al i tu je jedna caka. Lojtru morem postaviti zvana, kaj će reči na cesti, a podloga je neravna i postoji velka opasnost da zviznem na cestu. To mi se već dogodilo al srećom bez večih posledica. Denem si ja i šamrla al je i on dost nestabilan. Najbolje je onda sve to prilagoditi mojim fizičkim mogućnostima. I tak smo vam Đuro i ja uspeli za dva dana oštucati celu tu živicu koja sad zgleda kak kokoš golovratka. Srećom kaj se ta živica brzo oporavi pa bu za koj dan pak lepa zelena. Samo usput: nagutali smo se one fine prašine koja se taložila mesecima. No i za to je bilo leka: retki gemišt ili sok za Đuru. Uspeli smo za mirnoga vremena i spaliti sve te hrpe viška živice.

Onda smo se hitili na košnju gorica. Nije ni to baš mali zalogaj za nas dvoje. Ruku na srce i za to treba barem dve vure napornoga rada. Na mestima je buknula trava, napravila je otočiće deteline ali i drača koj se zove črevec. Dok kosilica dojde na to busenje mam se zgasi pa vam to pomalo ide na živce. Đuro ide za menom i z flaksericom kosi oko trsja. I znate kaj? Baš smo se umorili ali i zaželeli nekaj pojesti. Palo mi je na pamet baš nekaj jako određeno i za pojesti i za popiti. Mi vam naime vu frižideru navek imamo dve vrste Podravkinih konzervi  koje mi posebno pašu v goricama: delikates i pikant šunka i posle toga čaša pive. Morti si mislite kakav je to goričar i gurman koj jede konzerve i pije pivo? Ha čujte. Svi smo na svoj način bedasti. Navek posle košnje paše mi popiti pivo čak i samo z brusketama. Srećom kaj navek stanem posle jedne krigle pive. V goricama imam baš tri prave reklamne krigle još z vremena dok je Podravka proizvodila „Panonia pils“. Meni vam tak povremeno dojde da si zaželim onak nekaj jednostavno i svakidašnje kak su sendviči ili jeger. Tak sam i Đuru i sebe počastil z tzv „Đuro sendvičom“. To vam traje još od vremena dok sam aktivno delal v Opelu a Đuro me čekala i hodala po placu i dučanima v Zagrebu, Splitu ili Rijeci. Ja recimo delam dva dana od 8.00 do 16.00. Imam nekakvoga glavnoga obroka al drugi dan posle odma sedamo v auto i put Koprivnice. Nemamo vremena za pravi obed pa mi onda Đuro kupi sendvič kojega bum pojel vu auto. Nadam se da ste zapamtili da ja ne vozim ni auto. Kak zgleda „Đuro sendvič“? To vam je standardno ovak: lepinja, dve vrste salame, obićno mortadela i parizer, i šnita dve ementalera. Ne volim nikakve dodatke ala paradajz, krastavci ili nedaj bože list šalate. Naravno da je i to žedno pa z tim paše dobro ohlađena crna piva. Srećom kaj sad na svakoj pumpi moreš kupiti nekaj za osveženje. Ništ bogznakaj al čoveka veseli. Dok smo doma onda se to još malo oplemeni i napravimo si topli sendvič od te kombinacije.

No nije sve vu goričkim radovima. Kak sam glavni urednik naše nove knjige „Maturanti staroga kova 7“ imam pune ruke posla  z prikupljanjem priloga i fotosa za novu knjigu. To vam je dost mukotrpan posel. Ovi stareši gimnazijalci nisu baš doma z kompjuterom pa mi donesu i rukopise a ja to moram i prečitati i unesti v određenu kućicu. Dok bu sve gotovo još bum kriv da nekaj ni dobro zišlo. No o tome vam bum nekaj napisal dok bu knjiga promovirana početkom lipnja.

Ostal sam vam nekaj dužan. Prošli sam tjedan pisal o rođendanu mojih prijatelja pa vam sad šaljem jednu scenu z toga rođendana koju mi je naknadno poslal naš prijatelj Atač.

Kak morete videti strogo smo se podelili na ženski i muški dio ekipe. Đuro vam je četvrta z desna ispod one bele slike. Glečte kak se zadovoljno smije. Kak i nebi kad je moja žena.

I sad ti napiši nekakavsuvisli jelovnik za ovaj tjedan. Malo mi je Jan poremetil ritam jer ga malo ima malo nema zbog obaveza v školi. Mislim da bum dosta improviziral. Samo da saznam koj dan Jan dolazi.

Pondelek

Juha/Glavno jelo: Kisela juha od želučeki
Desert: Naravno da bu rolada od jučer

Tork

Juha: Prežgana juha z jajcima; ja si v to denem i par krutončići
Glavno jelo: Krumpir na ploške z špekom, šalata od friškoga zelja
Desert: Sok ili zdena voda

Sreda

Juha/Glavno jelo: Čušpajz od kelja z faširancima; već dugo ne delam klasične faširance. Napravim štrucu i denem ju v rol.
Desert: Nekakvo voće

Četrtek

Juha: jedna Podravkina z vrečice
Glavno jelo: Krpice zeljem;  naravno da si Đuro skuha nekakvu svoju testeninu. Bum zdinstal i falačec bočinga.
Desert: Kompot od breskvi

Petek

Jan je zaželel lignje pa mu bum ispunil želju. Ima jedan problem. Dok pripremam lignje na pariški strašno mi šprica ulje pa me zna i speći. Zato bum  danas lignje napravil na drugi način.

Juha: Krem juha od povrća
Glavno jelo: Punjene lignje, lešada od mrkve, karfiola i krumpira. Jan ovu lešadu više voli od klasične blitve z krumpirom
Desert: Čaša vina za mene a za njih Jana i Đuru student-kocke

Subota

Mislim da bumo otišli v gorice i spekli laganu peku.
Predjelo: Malo špeka, kobasi i sira z vrhnjem
Glavno jelo: Pod peku bum del samo celoga piceka z krumpirom i malo povrća; ako napravite dobru vatru jedno vreme ste bez brige pa morete nekaj i delati.
Desert: Vjerojatno samo nekaj standardno ala gemišt ili čak musolini.

Nedela

Verujte da me v nedelu navek vleče na nekakvu podravsku klasiku: picek pečeni ili pohani ili pohana krmetina jer me navek podseća na detinjstvo.
Juha: Anjgemahtec
Glavno jelo: Pohana piletina, rizibizi
Desert: Diganci z orehima i ružičkima; ja baš ne volim z ružičkima ali vole neki drugi naši v široj familiji