Moj profil

A kaj da danas kuham? (408)

Čini mi se da je vreme nekak poludelo. Za svojega se života sećam i takvih veljači kak je ova al mi se to baš ne dopada. Priroda bi mogla „poludeti“, ili već je, pa pomalo zbunjuje i biljke i ljude. Bumo se morali prilagoditi pa kaj bu-bu.

Proljetni radovi

Neki mi je dan prijatelj Kruno išel rezat ovih mojih šest voćkici v goricama i trebal sam se malo pripremiti. Moraš čoveku ponuditi nekaj za pojesti i popiti v toploj kleti. Đuro i ja smo došli pol vure raneše, zakurili peć v kuhinjki, jer se tam zagrije časkom, i čovek more sedeti v toplome i pomalo nekaj prizalogajiti. No dogodilo se nekaj malo čudno za veljaču. Verujte da v kuhinji nismo sedeli ni minute. Čim je Kruno došel počeli smo s poslom, hodali smo po podolju i skupljali otpiljene i odrezane grane i grančice i začas smo morali skinuti onu deblešu obleku. Za vreme pauze seli smo pod brajdu i pustili suncu da nas lepo grije. Samo smo si pod stražnji dio tela deli jastučiće kaj nam nebi stradala pozadina. Verujte da smo celi dan mogli v predahu od posla odmarati  na zraku, spominjati se i pomalo deti v zube koj falačec špeka i kobase. Pasal nam je naravno i gemišt kojega nismo trebali ni topiti. Taman je pasala podrumska temperatura. Sve me to podsetilo na jedan davni prvi vikend vu veljači dok smo moja dva pajdaša i ja mogli sedeti ispred kleti v košuljama  i uživati v prekrasnom sunčanom zimskom danu kaj će reči da su se i negda znale  dogoditi tople veljače.

Posel smo onak lagano uspeli napraviti do druge vure pa čak i pokupiti sve ostanjke granja koje smo odma drugi dan i vužgali. Sad pak čekam jedan lepi dan da obrežem i lozu. To ni prevelki posel jer sam v jesen već odrezal lucnjeve i Đuro ih je zvlekla, složila dio na hrpu za roštilj a dio smo spalili. Sad mi je lako: samo moram svakome trseku napraviti „frizuru“ kaj je jako važan posel. Još negda davno, dok sam bil vinogradar početnik,  mi je jedan pajdaš ovak rekel:“Ak oćeš biti pravi vinogradar moraš se prvo nafčiti rezati gorice. Moraš paziti kaj bu rodilo ovo leto, kaj buš ostavil za drugo leto a moraš paziti i na estetiku trsa“. Bil je jako vu pravu. Ja se nastojim  toga držati samo kaj svako leto režem sve oštrije kaj znači: manje roda ali vekša kvalitete vina.  Manje mi pak vina z leta v leto treba jer je pajdašija sve stareše i sve je manjša potrošnja. Jen mi je pak dragi pajdaš Pavel jemput rekel: „Čuj mali, milo zlato. Z trsekom se moraš spominati. Kaj god oko njega delaš moraš mu navek nekaj lepo govoriti. On ti sve to razme.“ Nažalost kaj nas je taj pajdaš već odavno napustil a mi ga i dandanas v razovoru zovemo Milo zlato. Zavredel je.

Doma imam jednu predivnu i jako ukusnu breskvu koju već po tradiciji reže šogor Željko. Odlična breskva koja jako dobro rodi. Najedemo se i mi i naša pajdašija a Đuro bome napravi i desetak flašici kompota.

Ovih dana imamo još jedan puno veće posel z rezanjem. Prošlo leto nas je napustil moj pajdaš Pepek , muž moje setričene Zvjezdane, koj je doma odavno zasadil jedan poveći voćnjak. Tu vam ima fakat kojekakvih voćki koje treba održavati, koje su malo zapuštene jer Pepek to zadnjih dve-tri lete ni mogel baš dobro održavati. To bu pak rešil naš majstor Kruno. Em je jedan od najmlajših v klapi a Pepek mu je negda v srednjoj školi bil i profesor. I tak se bumo našli nas nekolko da to obavimo. Kruno bu glavni majstor za one stručne poslove a mi bumo nosili granje na hrpu o pomalo kvacali za biootpad. Nekak si mislim da bi v tom voćnjaku trebal biti i malo veći zahvat jer je toga malo i preveč a neke su se voćkice i zdošle.  Zvjezdanina bu zadaća da napravi dobar obed. Morti sam se i prevaril. Obed bu morti napravila njezina kćerka Jelena a Zvjezdana bu z nama na friškome zraku. Svima nam treba malo promene jer dost sedimo  za računalom ili pred televizorom.

Ovaj tjedan bum i dva dana delal v jednoj firmi pa bum Đuri prepustil kuhaču. Nek i ona malo sproba kaj znači stajati 3-4 vure kraj peći. Malo je zišla z grifa i navek joj se „dogodi sol“. Dok ja kuham zna mi prigovarati kak jako solim hranu. Njoj se pak bogici skoro redovito dogodi da je jelo slano kak da joj je Tuzla opala v čušpajz. Zna biti čak i za mene malo preslano. Srećom kaj ona uglavnom ne čita moje tekstove na blogu. Ubila bi me da ovo prečita.

Ja na seminaru pak jedem z mojim đakima v restoranu te firme i uglavnom je to dost korektan obed. Ja inače jako pazim v takvim situacijama da jedem malo jer posle obeda treba još 3-4 vure delati. Z punim želucom nemreš biti preveč koncentriran na seminarce.

Prvoga ožujka je rođendan mojega pokojnoga kuma Fjake. On je doduše tradicionalno slavil Jendraševo, svoj imendan 30. studenoga, al ja bi obićno na rođendan otišel k njemu da mu čestitam i da popijemo čašu vina. Ovo mu leto bum samo otišel vužgati svečicu.

Prošli sam tjedan imal godišnju skupštinu naše Udruge gimnazijalaca v restoranu „Klas“ pa sam osim kojekakve govorancije kak predsednik imal još jedan zadatak: naručiti papicu. Mi baš nismo kak udruga preveč penežljivi pa je bilo dosta skromno. Imali smo za grickanje fine klipiče i kojekakve pogačice  od koprive i još nekakve zalogajčiće kojima nisam znal sastav. Za glavno smo jelo imali mešani roštilj z pomfritom, ajvarom i lukom. Za popiti je naravno bilo gemišta, za dame soka a ko je štel mogel je naručiti i nekaj slatko i kavu. Za stariju gospodu svega dost i preveč.

Pondelek

Juha/Glavno jelo: Povrtno-pileći ragu
Desert: Puding od vanilije

Tork- Đuro kuha

Obzirom da je to njezin jelovnik mislim da bu ovak
Juha: Prežgana ili paradajzova juha
Glavno jelo: Musaka od krumpira, šalata
Desert: Kompot od kruški
. I njega ima još nekolko flašici v podrumu.

Sreda

Juha/Glavno jelo:Prisiljeno zelje z paradajzom;naravno da bum za pojačanje podinstal malo junećeg bočinga. Znamo već dugo da Jan voli sve gde je malo paradajza.Dugo to nisam kuhal jer je do pred par meseci i Đuro frkala z nosom na tu klopicu.  Sad pak to pomalo i fali jer je počela jesti z Janom i veli da je čisto v redu. I još nekaj: ja v to svakak denem malo kumina. Taj okus mi je ostal još od moje mame.
Desert: Štruca od lisnatoga z pekmezom od marelice.
Jako je lako napraviti a baš je fino.

Četrtek- Đuro kuha

Juha/Glavno jelo: Slepi gulaš; ona bi najrajše da bu to čisti krumpir-gulaš al zna da za mene mora biti barem malo nekakav falačec mesa barem na kosti i nekakva kožica od špeka. Ona bi danas složila najrajše francuski krumpir al nemre baš v dva dana dvaput jesti nekakvo jelo od krumpira.
Desert:
Mogla bi speči štrukle sirom jer smo dobili friškoga sira

Petek

Juha/Glavno jelo: Oslić ala bakalar; delam ga od filea i na njemu ne štedim. Kolko krumpira tolko oslića.
Desert: Mafini filani z nekakvim đemom ili pekmezom;
to bu za Jana i Đuru jer ja mafine baš ne jedem. Pogotovo ne z bezgluteskim brašnom.

Subota

Nisam već dugo delal ovo pa bum ispunil Đuri želju
Juha/Glavno jelo: Špagete bolonjez z puno parmezana;
dok ovo kuham navek denem za vreme dinstanja par klinčići. Negda sam od kume Vinke v Kaštelima jel makarone tak začinjene pa mi se zdopalo.  Čist je jedan drugi okus. Mi smo Podravci negda klinčića podnosili jedino v kuhanom vinu.
Desert: Nekolko kriški mandarine ili naranče.
Sad sam se setil da ove zime još nismo jeli kivije a nisam siguran da sam ih videl v dučanu.

Nedela

Juha:  Juha od junećih kostiju z grisknedlima; ak bu na kosti kaj mesa to nam bu malo predjelo.
Glavno jelo: Gradiščanski odrezak iliti španjolske ptičice;
to se po receptu dela od junećega šnicla al bu dobro i ze svinjskim. Z tim dobro paše nekakva testenina, mi bumo zbog poznatih razloga imali rezance od palačinki. Ovo nisam delal godinama. Toga sam se setil neki dan i pronašel da sam to preporučil na mojemu blogu pred četri leta i četri meseca- 13. 10. 2014.
Desert: Mađarica;
malo  bu Đuro napravila više jer je to po naruđbi njezine vnuke Vite. Ni drugi se ne srdiju na taj kolač.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.