A kaj da danas kuham? (404)

Vincekovo je prešlo

Kak znate ovo je leto Vincekovo bilo v tork al nisam trebal posebno podsećati svoju pajdašiju na taj važan datum. Ja sam naravno imal pripreme koj dan prije. Moral sam zapisati na cedulu sve kaj mi treba za taj dan, dogovoriti se z Husom kolko toga treba i onda to sve nabaviti. V pondelek me Đuro već v popodnevnim satima otpelala v gorice da počnem kuriti jer ova moja postareša gospoda moraju dojti drugi dan v toplo. To vam je fest posla: treba nakuriti peć v kuhinji i kamin v sobi, donesti drva kaj bum svake dve-tri  vure hitil kakvu kladu na vatru i kaj bu i do jutra žara. Za biti v kleti v zimi se treba i pripremiti. Doduše došli su v jednom momentu Hus, njegov brat Kruno i Robi delat mi malo društvo a posle se zabavi sam. Imam v kleti navek kakvu knjigu, križaljke a naravno da si najdem na radiu muziku koja mi paše. Nemrem vam ni reči kak je ugodna toplina v kleti i kak se čovek fino oseća v starinskom krevetu z jastukima i dunjom od perja. Nikakav „Dormeo“ to nemre zameniti.

Na samo Vincekovo v jutro sam očekival da bu se Draganovec sav zabelel al se to ni dogodilo. Bil je zapraf jen lepi zimski sunčani dan koj vabi čoveka na zrak. Dečki su počeli dolaziti već oko desete vure i naravno da su se, po starom dobrom obićaju, svi rivali v kuhinju.  Za vuru vremena se v kuhinju više nemre i Hus ima velikih problema z pripremom i predjela i obeda. Onda vam počne rad v podkomisijama. Jedni komentiraju kvalitetu kobasi, jedni komentiraju rukometne utakmice a treći se posvetiju degustaciji mlade graševine.

Kak i navek predjelo je jako bogato. Verujte da nemrem niti nabrojiti čega se najemput našlo na stolu. Bilo je bar 4-5 vrsti kobasi, nekolko vrsti špeka, prezvuršta, dve vrste jegera i nekakvoga sira. Đuro je spekla klipiče, kum Tinča je donesel puterice a Hus i Robi su donesli tri vrste kruha. Dok koštate od svega pomalo već ste siti. Moram vam priznati da je dost toga i ostalo pa sad razmišljam kad i kak to potrošiti.

Pred obed sam kak kletodomaćin moral održati kratko slovo i naravno pozvati pajdašiju v trsje da po našoj staroj tradiciji zalejemo i trseke. Zadnjih par let kak su nas napuštali dragi pajdaši malo smo popustili, nije to bilo baš onak kak treba, pa sam odlučil da se malo trgnemo i vrnemo starome običaju na Vincekovo. Posegnul sam za knjigom „Vincekovo“ našega pokojnoga vrloga pajdaša Vinka Česija Česke, pozval pajdašiju v trsje da se posvetimo starim dobrim običajima. Tu vam je cela hrpa kojekakvih regula a jako je važno izreči ovo:

Sveti Vinko očuvaj nas:

• Od hude zime
• Pramaletnoga mraza
• Peklene vručine
• Dežđevitoga leta
• Pirike i skojačkoga drača
• Peronospore ljute
• Filoksere lisne
• Od tuče ledene
• Od strele nebeske
• Od jognja žarečega
• Od žulof krvavih
• Od žeđi kre lagvovo
• Od napasnih međašic
• Od praznih lagvov
• Od maloga prihoda, OČUVAJ NAS , MOLIMO TE SVETI VINKO.

Očuvaj nas, molimo te sveti Vincek, od svega kaj bi našemu trsu, grozdju, mošteku, vinčeku, kletički, kak jednak i vsem nam goričarom i pajdašom naškoditi moglo. AMEN!

Tak vam je to zgledalo za vreme molitve našem trseku.

Sledi rezanje loze koju mora spremiti gazda, deti vu vazu z vodom a ona bu na toplome čez par dana pokazala kakvo nam bu sledeće leto i berba. I drugi pajdaši z ekipe oćeju  lozu odnesti doma samo neznam kaj bu ona pokazala pri Josi i Boču v toplini njihovoga zagrebačkoga doma?

Ovak vam pak zgleda dok  se zaleva trsek. Kak morete videti da skoro svi čvrsto držiju svoje kupice kak bi i oni mogli sebe zalejati.

Iza ove goričke ekipe morete videti i falačec kroha kleti mojega pokojnoga kuma Fjake pri kojemu smo vinske svetke slavili desetlećima. Viša je sila štela da zadnjih par let prejdemo z of kraj međe a zapraf smo na istom podolju. Dok sam kupil gorice, pred trideset i devet let, prvo kaj sam napravil je bilo rušenje nekakve ograde kaj nas je delila. Tak je ostalo i do danas i bu dok smo mi na nogama.

Dobro smo se sfriškali i sad smo mogli sesti za stol. Ono društvo z kuhinje se malo proredilo jer nem šanse da tam gde Hus kuha stane za stol više ot tri-četri čoveka. Očeš-nečeš drugi moraju sesti za velki stol v prvoj sobi. Kak zgleda glavni obrok za taj dan već znate:

Bočing na češnjaku, dinstani grah i šalata od kiseloga zelja z koščićnim uljem. Ovo leto sam malo dodal i jedna lepa špicrebra. Dok sam kupoval bočinga ta su me rebra baš „izazivala“ i nisam im mogel odoleti. Dečki se nisu srdili na taj „dodatak“.

I desert nije iznenađenje: Krakojeva kuruzna zlevanjka.

Svojedobno smo kakti obavezno imali i sekeligulaš al smo već pred par let odustali jer ga je retko ko i jel. Njemu smo se drugi dan veselili samo kum Fjaka i ja dok smo išli počistiti klet i oprati suđe. Znate i sami da je tak nekaj drugi dan prava delicija za oporavak.

I kaj da vam velim? Društvo se počelo razilaziti dok su naši Zagrepčani morali na vlak. V tom je trenutku već lepo počel padati sneg i verujte da je bilo jedna prelepa večer za rastanak pajdašije. No ima još jedna stvar. Negda davno je naš pajdaš Joško rekel:“Svakome pravome pijancu je dost da oddela jednu šihtu od osam vur.“ Dok je on to rekel bili smo mladići a v ovim letima treba zdržati osam i više vur za stolom punom ića i pića.

 Eto i ovo je Vincekovo prešlo. Dan posle smo Đuro i ja otišli videti kaj treba počistiti makar su dečki v kuhinji bili jako vredni pa je po stolima ostalo samo nekaj čaša i flaša. Važno je bilo zaprti vodu da nam se ne zamrznu cevi i da nam ne napravi  štetu. V gorice bumo počeli češće hodati tek za mesec-dva dok bumo počeli rezati lozje.

Pondelek

Juha: Juha od jučer friško zakuhana
Glavno jelo: Krmenadli od jučer z friški prilogom
Desert: Šarena pita od jučer

Tork

Juha/Glavno jelo: Čušpajz od poriluka z koječim; Đuro me kaštiga kaj jedem sve to kaj mećem v čušpajze, a znam da je to velko zlo za giht. Bude tu falačeci špeka, kožice od špeka i par kobasi. Kak čovek tome odoleti.
Desert: Imamo još par flašici kompota od breskvi i kruški.

Sreda

Ovo je Janov dan pa ga bum iznenadil z juhom jer ju pri nam još nije jel

Juha: Juha od kuhane testenine z vrhnjem i rezancima. Odlična je ali samo ak ju delate z domaćim testom. To Đuro nsme jesti pa si složi njoke svojimkbezglutenskim brašnom i na toj vodi završi juhu.
Glavno jelo: Krmenadli ala Samobor ali mesto krumpira bum na onaj saft hitil kuhane domaće rezance.
Desert: Puding od vanilije

Četrtek

Juha/Glavno jelo: Ćoravi gulaš; iskoristil bum one ostanjke predjela od Vincekova.
Desert: Dobar bu i nekakav sok ili zdeni kompot od jabuki

Petek

Juha: Juha od kozici
Glavno jelo: Lignje na pariški, kuhani krumpir, tartarsos: more mi neko reči kak zfrigati lignje a da ne špricaju?
Desert: Čaša vina

Subota

Za danas smo pozvali moje drage rođakinje Zvjezdanu i Jelenu pa bum složil onu divljač kaj sam dobil krajem prošloga leta od prijatelja v Goli.
Juha: Juha od fazana z rezancima
Predjelo: Kuhani fazan z nekakvim sosom. Dok sam to isto delal tam negde v prosincu napravil sam zmešani sos od hrena i češnjaka. Bil je odličan.
Glavno jelo: Srnetina z lulekima od kolko-tolko testa, zelena šalata. Luleke bumo delali z Đurinim brašnom.
Desert: Verojatno kakva čaša vina i Đurina šuskava torta

Nedela

Morti vas bum razočaral al mi se nekak čini da bumo imali ostanje od jučer. Ak nebu dost ostalo bum išel na lakšu varijantu
Juha: Juha od kuhanoga pevčevoga sitniša z grisknedlima
Glavno jelo: Kuhani sitniš i šalša; ovo bu zadnja flašica šalše koju smo kuhali još v jesen.
Desert: Bu sigurno i torte od jučer.