A kaj da danas kuham? (386)

Svi „moji“ hoteli (2)

Z putovanjima za Podravku sam počel mam nakon mesec dana kak sam došel v Podravku. Bilo je to vreme kad se je Podravka počela jako širiti i ja sam kak psiholog dobil posel oko izbora novih suradnika na terenima širom EX-Yu. Prvi je put bil za Beograd i Novi Sad ali vam moram nekaj priznati: pojma nemam gde smo stareši kolega Slavko i ja spali. Sećam se pak da smo dobro jeli jer su nas častili uglavnom poslovni partneri v čijim smo prostorijama obavljali razgovore s kandidatima. Ne sećam se točno kaj smo blagovali ali v jedno sam siguran: v Beogradu je bilo roštilja v izobilju a v Novom Sadu rečne ribe i jako ljutoga fiša. Ak v ono vreme niste jeli roštilj pri „Oraču“ ili pri „Aci devetki“ fakat niste ni jeli roštilj.  No nekaj me je v Srbiji navek jako iznenadilo: retko je na jelovniku bilo juhe al je bilo navek kojekakvih predjela. Jedamput se dogodilo prijatelju Adamu i meni da tri dana nismo ni okusili juhu i na putu za doma smo navrnuli v jednu birtiju na autoputu v nadi da bumo konačno pojeli juhu. Malo brus. Imali su samo „čorbast pasulj“.

V Novom Bečeju je Podravka imala svoje predstavništvo pa je to nekak bila naša baza. Odsedali smo v „hotelu“, pazite ovo, „Plavi Jadran“. Takav čumez fakat više nigdar nisam videl ali druge mogućnosti nisam imal. Nedaj bože da sam tu još moral i jesti. Navek smo jeli negde vani a ono kaj se moglo podnesti je bil bend z pjevaljkom. V ono vreme niste mogli najti v Srbiji lokal koj ni imal mužiku s obaveznom pjevaljkom. Čim bi pak došli v birtiju domaćini bi mam pital:“Šta ćeš?“ Dok sam prvi put rekel da bi „za aperitiv popil „gorki pelinkovac“ sledil je ispravak:“Ma ne pitam te to! Pitam koju pesmu oćeš?“ Onda sledi: napravi se lista popevki koje društvo oće, to pomnožite s 10 ili 20 dinara i to pošaljete  šefu benda. I tak sve do fajrunta. Tek nakon par let v Bečeju su napravili novi hotel „Tiski cvet“. To je bilo čist nekaj drugo kaj se tiče konfora al ga dandanas pamtim po jednoj zgodi. Platil sam naime hotel Diners karticom al nigda nisam dobil račun na naplatu. I toga je negda bilo.

V Beogradu sam spal barem v 5-6 različitih hotela i nemrem reči da nekaj posebno pamtim jer kak sam rekel jeli smo v kojekavim restoranima i to dobro. Jedino smo navek doručkovali v hotelu al je to navek bila čista klasika. Ni bilo švedskog stola navek ste dobili: šunku z jajima, jaja na oko ili kajganu, malo putra, pekmeza i čaj ili belu kavu. No onda se dogodila „revolucija“. Navodno je hotel „Jugoslavija“ v Zemunu bil prvi hotel v bivšoj državi koj je imal švedski stol. Ko bi znal jel to istina al je ponuda bila stvarno dobra.  Dok su prvi put dvojica kolega pojeli fanj toga za doručak pofalili su se: „Da su oni znali kolko mi moremo pojesti nebi nam sve to ponudili“. Fakat se trebalo nafčiti kaj je to „švedski stol“.

V Lepoj Našoj sam spal v jako puno hotela no jedan mi je ostal nekak v jako dobrom sećanju:“Bonavia“ v Rijeki. Nemrem se reči da je imal nekakav komfor al mi je jedan ambijent unutar hotela napravil navek velku ugodu. Govorim naravno o tome hotelu prije rata jer znam da je prije valda dvadesetak let totalno adaptiran.

Kaj mi je to delalo ugodu? Imal je za lepih dana, tam od svibnja do rujna, otprtu terasu okruženu z okolnim zgradama.To samo po sebi ni bilo ništ „bogznakaj“ ali je terasa bila sva v zelenjavi tak da te zgrade niste mogli ni primetiti. No najvažneše je bilo nekaj čist drugo. Na izlazu z restorana je bila rashladna vitrina gde je bila izložena sva ponuda za večeru. Kojekakve ribe, rakovi i kojekakvo meso na koje ste mogli pokazati z prstom i reči: Oću to i to mi spremite tak i tak. Je da je to bilo nekaj skupleše nego nekava gotova jela al svaki se gušt mora platiti. I onda šećer na kraju. V kutu je bil klavir kojega je sviral jedan ozbiljan gospon i tak začinil celi taj okoliš. Znal je svirati  sve evergrine ovoga sveta pa mi je zgledalo kak da je mene pital kaj bu sviral. Ak ste još bili v dvoje  mogli ste baš zapraf uživati. V tom sam hotelu bil tam  i za vreme ratnih leta i moram vam priznati da je „Bonavia“ zgledala dost otužno i naprosto je vapila za preuređenjem.

Ajmo se malo potepat po Europi.

Moj prvi izlazak v strane zemlje je bil negde ranih sedamdesetih i to mam v Njemačku v Bielefeld gde je bilo sedište našega tadašnjega licencnog partnera Dr Oetkera. Bil sam poslan v tu firmu da snimim i da me poduče kak školovati naše trgovačke putnike. Tjedan dana sam stanoval v jednom motelu, kojega se baš i ne sećam, ali se sećam dobro privatnoga hotelčića, ili ak oćete pasiončića, gde se održaval seminar. Doručak je bil klasičan, obed takaj ali su mi v pamćenju ostale dve stvari: predjela i jedan gulaš. Za predjelo smo dobivali svaki svoju daščicu i beštek a na pladnju svega obilja. Bilo je tu kojekakvih nareski, sireva i svačega kaj z tim ide. I dandanas vam je to meni gušt delati, pogotovo v zimi dok ima svega na tavanu ili pak dok mi ostane hladno pečenje. A gulaš? Tu sam se skoro osramotil. Za večeru smo jemput dobili „ungarische gulasch“ a v njemu gruđva šlaga. Već sam štel reklamirati al dok sam videl da to dečki jedu, jel sam i ja. Štos je bil v tome kaj je kuhar napravil šlag od kiseloga vrhnja. Negda je dobro stvari malo proveriti.

V Muenchenu posebno pamtim,   naravno po dobru, dva hotela: Holidey In i Quins. Ovaj prvi je bil nekaj posebno. Za pet dana boravka kuhari su nadmašili sami sebe. Barem si ja tak mislim. Na zadnjem katu hotela je bil restoran z kojega ste mogli videti celi Muenchen. Švedski stol je bil čaroban. Krenete od nepreglednog  niza hladnih predjela, više vrsti juha i završavate z neverojatnom ponudom glavnih jela. Desert se poslužival na posebnom stolu a najizazovnije je za mene bilo piće. Po restoranu je furt hodal konobar z punim kolicima kojekakvoga pića: od aperitiva donevjerojatne ponude vina. To vam je bilo nekaj. Moj kolega Franjo i ja smo posle završetka seminara i kasnoga obeda znali sedeti tak dugo dok nisu rasvetlili celoga Muenchena. I znate kaj? Konobar je celo vreme bil tu negde v blizini.

Quins je pak nekaj drugo. Ni bil tak visoke kategorije al mu je ponuda bila odlična. Posebno su mi se dopali doručki jer sam si mogel sam nekaj napraviti. Imali su ono vruče kamenje i više vrsti sirovoga mesa lepo začinjenoga pa si ti peći kak oćeš. Napravil sam i jedan gaf. Zadnji dan posle doručka smo kretali doma a ja sam nam za put zel nekaj zamotano misleći da su to nekakve fine slastice. Dok sam za vuru dve otprl to fini pakovanje imal sam kaj i videti. Nutra je bil „prekrasni suhi dvopek“.

Dok sam delal za Opel bil sam v kratko vreme čak četri put v Augsburgu i nemrem vam ništ lepo za reči. Navek sam bil v jednom te istom hotelu i morem ga se setiti samo po jednome: za lošu klopu sam platil jako puno. Tak smo Đuro i ja večerali jako skromno i večeru, jedno pivo i sok platili oko 100 eura. Bilo je to vreme dok su Njemci prešli z

marke na euro. Sećam se da je v ono vreme koštal tramvaj 3,5 eura kaj je bilo jedno tri put više nego v Zagrebu.

V Budimpešti sam spal v nekolko hotela z puno zvezdica al je najbolši dojam na mene ostavil „Meriot“. Ponuda je već po tradiciji za hotel visoke kategorije bila sjajna al je doručak bil malo drukčeši. Mogel si na švedskom stolu zbrati kaj oćeš ili se zapičiti na drugu stranu gde su stajala trojica mladih kuhara i nekaj ti nabrzinu pripremali od bogate ponude z vitrine ispred njih. Biraj kaj ti srcu drago i zapovedaj kak da to začine. Bolje nemrete ni zamisliti.

E sad nije to baš sve navek tak primamljivo kak vam se čini. Ima to i drugu stranu ak ste malo duže v jednom te istom hotelu. Bil sam z jednim kolegom čak devet dana v Slovačkoj i Češkoj. Četri dana smo delali v Bratislavi v hotelu „Forum“. Švedski stol za doručak, obed i večeru, izbor jako dobar i baš se preveć nisam žalil. Odemo dva dana v češke Luhačovice, nekakve  toplice, koje domaći zovu „češka Opatija“. Opatiji ni blizu. Klopa ni spomena vredna. Onda se pak vrnemo vu „Forum“ i pak sve spočetka na švedski stol. I znate kaj? Nisam više mogel jesti ona „ušminkana“ jela za doručak, obed i večeru. Dva zadnja dana mi se činilo da furt jedem jedno te isto. Za doručak bi pojel samo kroasanu i popil zdeno mleko. Za oko je to sve jako bilo lepo al sam si već zaželel domaće podravske juhe i nekaj z mamine kuhinje. Nazval sam mamu i rekel: „Dolazim doma sutra popodne. Kupi komad govedine, skuhaj juhu i složi hren sos z malo pirea. Dosta mi je više švedskoga stola“. Nisam siguran da je mama igda saznala kaj je to „švedski stol“  al me je doma čekalo ono kaj sam naručil.

V Pragu je bil jedan jedan hotel, mislim da se zval Romans ili Renesans, koj je imal jako interesantnu ponudu. Platić 30,00 maraka i jedeš do mile volje. Plaćaš samo piće. To je bila mala navlakuša. Ti fakat pojedeš za više od 30,00 marki al si onda jako žedan a to te išče piće koje te dojde puno više nego sva ona klopa.

Jel sam i v Poljskoj recimo juhu od cikle, v Bratislavi krem juhu od češnjaka  v kajzerici ili v Pragu pečenu racu z dinstanim friškim  crvenim zeljem i knedličkima. V Bukureštu sam prvi put jel pršut z dinjom i ni mi baš pasalo al dok sam čul da je to bilo omiljeno predjelo Luciana Pavarotija nekak sam i ja to probavil.

Bilo je toga još al bum vam spomenul još samo jedno mesto. Moj prijatelji Davor i ja smo jemput na putu z Praga odlučili prek vikenda ostati v Gracu. On je bil česti gost v jednom malom obiteljskom pansionu gde su ga svi dobro poznali. Daklem tak toplu domaću atmosferu retko gde najdete. Lepo smo povečerali v prostoriji kaj je meni zgledala kak moj dnevni boravak. Čisti stolnjaki, jedna mlada dama nam je na stolu vužgala svečicu i poslužila finu večericu. Posle potepanja  čez noćni život Graca, dobro smo se odmorili i oko devete vure bili na doručku. Dežurna je bila jedna draga starija gospođa pa mi se činilo kaj da sam doma pri mojoj baki. Netreba ti pet zvezdica da bi se jako dobro osećal.

Kad smo već pri obiteljskim pansionima, znate kak je nastal radler? Kupil sam ovakvu priču. Negde v austrijskim Alpama je jedna obitelj imala pansion za one kaj voliju zimske sportove. Dok se jemput društvo malo opustilo pive je bilo sve manje. Kak su imali dost limuna, počeli su ga cediti i mešati z pivom. Gosti zadovoljni a domaćin spasil obraz.

Onak v poverenju: taj radler i ni bogznakakvo piće.

Pondelek

Juha: Imam višak juhe od jučer samo ju bum friško zakuhal
Glavno jelo: Imamo i pevca od jučer al bum danas napravil za prilog hajdinsku kašu i frišku šalatu
Desert: Znate i sami: imamo štrukle od jučer

Tork

Juha/Glavno jelo: Gulaš juha z dodatkom malo vrganji
Desert: Kompot od jabuki

Sreda

Od ove školske godine nam Jan dolazi na obed v sredu i petak pa bumo tak prilagodili i jelovnik
Juha/Glavno jelo: Filana paprika z pireom; znate već kak ja to navek pojačam?Obavezni jedodatak špek i par kranjskih
Desert: Student kocke;obzirom da imamo jabuki v izobilju sad bu Đuro to stalno kombinirala z makom ili orehima.

Četrtek

Juha: Prežgana juha z krutonima
Glavno jelo: Pečena špicrebra, krumpir na ploške, mešana šalata
Desert: Nekakav sok

Petek

Juha:Krem juha od ribljih glava i graha
Glavno jelo: Pržene orade i lešada od više vrsti povrća
Desert: Čaša vina za mene, voćni biskvit za Đuru i Jana

Subota

Juha/Glavno jelo: Špagete karbonara, zelena šalata
Desert: Voće

Nedela

Juha: Krem juha od karfiola
Glavno jelo: Svinjski šnicli na pariški, rizibizi, šalata
Desert: Kifli z pekmezom