A kaj da danas kuham? (384)

Odlična atmosfera na berbi

Kak je berba samo jemput na leto treba se taj dan malo raneše dići z kreveta, proveriti sve kaj smo pripremili, sve to lepo spremiti v auto a Đuro se mora naravno pobrinuti i za Mimi jer bu celi dan sama. Pokupili smo prijatelja Đuru i našu prijateljicu Maricu, kupili kruha i par minuta prije devete vure već smo bili v goricama. Jedan dio muške ekipe već je nestrpljivo čekal z pitanjem:“Gazde bi trebali navek dojti prvi i ponuditi štamprl rakije!“ Brzo smo to ispravili, donesli rakijicu od tepke ruške a Đuro i Marica su mam počele z posluživanjem gableca. Kaj je sve bilo napisal sam prošli tjedan ali moram dati malu korekciju kaj smo pripremili za glavno jelo. Bila je lepa svinjska plečka ali v mesnici nisam  mogel odoleti prekrasnom komadu carskoga mesa. Dok je to sve bilo fino spečeno v rolu moje goričke zidane peći carsko je za obed imalo bolju prođu od plečke. Za drugo leto bumo takvo pečenje ponovili.

Težaki su se skupili tam do pol deset, lepo zasjeli, počeli blagovati i morem vam reči da se nikome ni preveč žurilo v trsje. Krenuli smo negde oko jedanajste vure a kak je bilo po tri brača na jedan red moral sam napraviti jednu pauzu kak međaši nebi mislili da nemamo kaj brati. Za vreme pauze se pak lepo sedne, malo prizalogaji, popije koj gemišt i kavica, razmene se najnoveši događaji z Koprivnice i okolice i opet na posel. Kaj da vam velim: koju minutu prije  jedne vure bili smo gotovi z berbom. V trsju je bila pretežno ženska ekipa a onaj težeši dio su povlekli dečki: imali smo dva putara, jedan je bil na muljači i dvojica na preši i bednju.  Do obeda je bilo sve sprešano i pospremljeno v bedenj a bome i oprano sve mertučje. To je posel. I kaj sad? Svi težaki su lepo posedali pod brajdu osim naravno onih koji su imali pune ruke posla v kuhinji. Kolko nas je točno bilo nisam baš brojil al tu negde oko dvajst. Jedna ekipa koja je komotno mogla časkom obrati još jedne gorice. Opuštanje je počelo, razgovor se vodil oko kojekakvih tema al mi se nekak v jednom času činilo da svi govore v jedan glas i da svaki ima svoju temu. Smeh se oril tam do drugoga brega. Đuro je procenila da je to bila jedna jako vesela, pa čak i nestašna berba.  Znate valda na kaj mislim?

I da vam velim rezultat ove utakmice. Dobil sam nekaj manje od petsto (500) litri mošta z tim da nisam sve do kraja sprešal. Već letima ja odtočim samo onolko kolko mi stane v bačvu za vrenje a ostatak  damo Đurinom sinu da zmeša ze svojim tudumom. Dok mošt prevri i maknemo ga z taloga tam oko Martinja imal bum oko 450 litri vina. Za našu potrošnju i preveč. Samo za informaciju Coolinaričarima: kraj svega kaj sam ovo leto podelil vina prijateljima v berbu sam ušel z 150 litri čiste graševine. Po tome morete videti da v našim letima potrošnja sve više pada. Se sečate kaj sam prošli tjedan napisal o ceni grožđa i mošta? Nekak smo Đuro i ja fakat posle ove berbe počeli razmišljati da se nama ne splati delati gorice. Odemo do prijatelja Stipe v Baranju i dopelamo si količinu mošta  ovogodišnje berbe samo za cenu kolko potrošimo za papicu na berbi. To je naravno samo jedno usputno razmišljanje a znam i sam da od toga nebu ništ još koje leto.

No berba još nije gotova pri prijateljima. Tak smo vam mi v sredu bili najprije pri Atačevom bratu Leonu v jednoj čudnoj berbi. Zakaj čudnu? Mi vam tam beremo već letima a nigda niko ne proba to vino.  Beremo posebno crno, posebno belo, dobro si pojedemo, malo popijemo i odemo doma. Kaj Leo dela z tim vinom to niko nezna. Jednoga dana nam bu valda otkril ovu dobro čuvanu tajnu.

Prošle smo se subote pak podelili: Đuro je išla v berbu k prijatelju Đuri vrnuti težaka a ja sam bil pri Vilku, mojemu međašu, sinu kuma Fjake. O njihovim jelovnikima vam nesmem ništ napisati al mislim da bu jedna klasika. Pri kumu Fjaki je navek bilo bogato predjelo z pršutom jer je njegva žena ipak Dalmošica. Posle je navek vinski gulaš i odojak z prilogima. Navek su i nekakvi drobni kolači i naravno gemišta v primerenim količinama.

Kaj mi sad sledi? Berba jabuka. Kak sam već i napisal, sve je dozrelelo jako rano. Ovih dana imam berbu sve tri moje jabuke jer, kak su jako rodne, već danima padaju i od njih ništ za zimu. Obral bum one lepe i zdrave koje mam spremam v podrum. Veseli me posebno jedna japanska  sorta „mucu“ koja se baš udomaćila pri nam v Podravini. Odličnog je okusa a, kaj je jako važno, more i jako dugo more stati a da se ne pokvari.  Obzirom da su kruške i breskve prešle sad prelazim svako jutro na jabuke. Kaj bu Đuro sve delala z onima kaj baš lepo ne zgledaju to samo ona zna. Srećom kaj Jan voli i štrukle i pitu z jabukama.

Moram vam nekaj priznati. Na velkoj sam „muki“ kak sastaviti jelovnik za ovaj tjedan. Imamo nekolko stvari koje smo zamrznuli a ovaj tjedan smo naručili novu pošiljku piceki z Gole. Moram to nekak skombinirati da malo oslobodim mesto za nove zalihe.

Pondelek

Juha: Čista prežgana juha z kašicom
Glavno jelo: Dobili smo ostanjke prasetine od kume pa bum složil samo malo nekakvoga priloga i frišku šalatu.
Desert: Naravno da imamo i ostanjki kolača

Tork

Juha: Koprova juha z krutonima
Glavno jelo: Dinstani bočing (iz škrinje naravno) na češnjaku, fuži,  mešana šalata
Desert: Friško voće

Sreda

Juha/Glavno jelo: Čušpajz od mahuni (iz škrinje naravno); bum dodal ostanjke šunke od berbe
Desert: Sok i još jemput sok

Četrtek

Juha: Paradajzova juha z rezancima od palačinki
Glavno jelo: Musaka od patliđani
Desert: Malo grožđa ak nam bu pasalo

Petek

Juha: Krem juha od karfiola
Glavno jelo: Pileći file na naglo, pečene paprike, hajdinska kaša
Desert: Čista zdena voda

Subota

Juha: Juha od vode v kojoj su se kuhali rezanci
Glavno jelo: Rezanci z makom ili orehima
Desert: Sok od friško prešanih jabuki; jabuki ima kak pleve pa i svaki čas moremo zmleti i scediti sok

Nedela

Juha: Bistra juha od pilećega sitniša; kuhani sitniš bumo oglodali malo za predjelo
Glavno jelo: Pohana piletina (iz škrinje naravno), rizibizi, šalata
Desert: Štrukli od jabuki