A kaj da danas kuham? (379)

Za mene nije sezona kiselih krastavci

Dok mi je prijatelj Atač v nudo kampu v Koversadi nema sezone kiselih krastavci. Mobiteli, SMS-ovi i mailovi furt putuju na relaciji Koprivnica-Koversada. To vam traje već prek dvajst let. Atač je davno postavil svoje autoprikolice v tom najpoznatijem nudističkom kampu a kolko se sećam verojatno je i najpoznatiji, a morti je bil i prvi, na našoj obali. Onda vam počneju Atačevi pozivi prijateljima v Koprivnici da se spremiju i dojdu na par dana delat mu društvo. Mislim da nema nikoga od naših muških članova klape koga nije animiral i kak mu se do dana današnjega nije još niko odazval počel je nagovarati i naše žene. I kaj da vam velim: v životu upornost navek pobjeđuje osim v Atačevom slučaju. Naravno da on ne odustaje makar su naši, a posebno moji, argumenti jako čvrsti i imamo kojekakve protuargumente. Da nas primami pošalje nam i neke scene z kampa ali ni to ne pali pri meni. Baš mi je jučer poslal mailom jednu „očaravajuću“ scenu z njegovoga susedstva: njegov pri sused v Adamovom kostimu stoji pred roštiljom i peče navodno krumpira. Prvi sam put čul i videl da se na roštilju peče i krumpir. Vama za informaciju samo podatak: golišavi gospon je stareši od mene a bome ima i jedno tridesetak kil više od mene. Nekaj za videti. Dobar tek! Najte mi zameriti na ovom komentaru al nekak mi to nejde z finom klopom. Nisam protiv nudizma, bil sam svojedobno i sam na takvoj plaži, al navek imam nekakve ograde dok je v pitanju kuhanje i higijena.

Čujte i ovo. Pred par let me Atač nazove v momentu dok smo se baš nakon godišnjega na Braču spremali put Koprivnice. Pita on mene da gde sam? Lepo mu velim da krećemo z Milne prema Podravini a on meni:“Odlično stari. Kad ste već na putu navrnite k meni v Koversadu!“ I kaj da mu čovek veli? Tih nekaj više od četiristo kilometri na zapad je njemu usput. Zgleda mi da se bu još malo strpel dok  neko od nas dojde do Koversade.

Prošli je tjedan jedna mala ekipa nakon par let konačno odlučila vrnuti posetu našim prijateljima z Nespeša. Naime već skoro dvajst let naši stari prijatelji Dražen, Ludva i Ico dolaze 20. 11. vužgati svečicu našem pokojnom pajdašu Česki na koprivničkom groblju. Onda se obićno najdemo pri meni v kleti, nekaj pojedemo i popijemo i naravno evociramo uspomene na pajdaša, na prekrasna leta druženje v Nespešu i Draganovcu i naravno na leta provedena v Podravki jer smo skoro svi i bivši Podravkaši. Nakon par let smo konačno prošli tork odlučili prihvatiti njihove dugogodišnje pozive i napraviti izlet do Nespeša, do Ludvine kleti. Kak za takav put od stotinjak kilometri trebate pouzdanoga vozača volan je v ruke zela Đuro a prijatelji Tonč, Slavo i ja smo se udobno smestili i vozili se bez ikakve brige. I znate već kaj je sledilo: pozdravili se z pajdašijom, popili rakijicu, prizalogajili malo predjela, prešli na kotlovinu i vudrili po gemištima. Kak se Đuro ni baš uklapala v naše stare, više put prežvakane teme, otišla je v klet malo si prespala i pogledala nekakvu svoju seriju. Nama je bilo dobro i pod brajdom. Kak je v neposrednoj blizini i bivša klet našega zajedničkog pajdaša Česke, časkom smo otišli pogledati kak zgleda mesto gde smo tolko putr tulumarili, i usput vužgali lampaša pred kapelicom koju je još i Česka pomogel podignuti. I kaj da vam velim? Nismo još niti završili sve priče i već je bil čas za povratak v našu Koprivnicu. Naravno da je pal i dogovor za ponovni susret v studenome v našem Draganovcu. Čujte još i ovo. Pala je jedna oklada između Dražena i mene koju bi mogel vrlo verojatno i dobiti. Moramo samo dobiti potvrdu oko predmeta oklade. V pitanju su jedni fileki i janje. Kak got završilo sigurno si bu ekipa omastila brk.

Prošloga petka su pak kak naši gosti bili naši dragi prijatelji Marica,Vlado, njihova deca. Poznamo se već desetljećima i navek se lepo zabavimo. Ja Vladu znam još kak dobroga suradnika z Podravke dok smo zajedno počinjali pionirski posel na obrazovanju mladih informatičara. Doduše ja sam bil samo organizator i animator polaznika a Vlado je kak inženjer elektrotehnike i dobar pedagog, vodil nastavu z još nekim mladim kolegama. I tak je jedan posel zbližil dve familije. Sad vam to ovak zgleda.  Svako leto jemput igramo belu pri njima a jemput pri nama. Za tu priliku smo Vlado i ja zamenili partnerice jer je tak interesantneše. (Nadam se da niste pomislili ništ grdo?!). Al znate kaj je najvažneše? Večera! Najprije popijemo aperitiv,  nekaj prizalogajimo za predjelo, odigramo partiju dve i onda bogata večera. Posle deserta nastavak bele. Nebum se faliti ali Marica i ja smo vam skoro pa „profesionalci“. Evo baš neki dan smo bili malo izvan forme i Vladi i Đuri je išlo malo bolje. I kaj sad napraviti? Ima jedan provereni trik: za zadnju partiju predložite da se igra jedna za sve! Znate ko je dobil tu za sve? Naravno Marica i ja.

No ima jedna stalna tema na našim susretima: hrana! I oni i mi volimo papati pa se međusobno informiramo gde ima čega dobroga za kupiti, kakve su cene i naravno kak se sve to priprema. Marica i Đuro redoviti razmeniju recepte za nekakve kolače. Moram nekaj naglasiti. Kak Marica i Vlado znaju Đurin problem z glutenom redovito napraviju nekaj od bezglutenskoga brašna tak da se i Đuro more osladiti. No najte misliti da se mi družimo samo na kartanju. Kak dragi prijatelji redoviti su težaki pri meni na berbi goric a Vlado je i naš apsolutni autoritet dok kupujemo nekakvu tehniku ili treba nekaj popraviti na televizoru ili liniji. To nam puno znači. Kak su Marica i Vlado dobili pred par meseci treće unuče, ovaj put unučicu od kćerke Maje, pozvali smo ih v gorice na malo druženje i zakusku. Nebu nikakvoga kartanja. Imamo mi i drugoga, pametnešega posla. Na friškom zraku pod brajdom  se navek more nekaj malo prigristi, nekaj malo zroštiljati i popiti koju kupicu vina. V takvom ambijentu razgovor nekak lakše teče pa makar bil pak i o hrani.

Moram vam reči z čim se zadnje vreme borimo iako za sad dosta neuspešno. Naime već jedno duže vreme krtice po svakud delaju  velkoga zuluma. Nemremo od njih živeti ni doma ni v goricama. Neki je dan Đuro odlučila tome stati na kraj.Najprije je od šogora Željka posudila „mišolovku za krtice“ i doma v dva navrata uspela vlovili napasnike. Kak ju je to ohrabrilo odemo mi neki dan v jednu poljoapoteku i naoružamo se z koječim. Doma je postavila one solarne tjeralice krti koje se zapičiju v zemlju, skupljaju sunčevu energiju i saki čas zacviliju. To navodno na smrt preplaši krtice i mam pobegnu k susedima. V goricama dolazi do izražaja drugo oružje. Dok vidite friškoga krtovinca, skopate rupu, pogledate od kud dolaze krtičini hodniki i tu postavite krtolovku. Kak krtice dobro ne vide zalete se na taj uređaj i hop! Do sad još nismo vidli nekakve velike rezultate al bum vas obavestil za koj mesec o uspehu krtolova.

Moram vam se malo i „požaliti“. Gorice su stvarno rodne, grožđa za sad ima kaj blata, al nas brine ovo nemoguće vreme. Sunce, tu i tam kiša i nemoguća vlaga su dušu dali za kojekakve boleštine v goricama. Loza je jako osetljiva biljka. Moramo dobro paziti još ovih jedno mesec i nekaj dana da sačuvamo kvalitetu kakva je bila zadnje dve-tri lete. Najte se bojati. Do sad još nisam bil bez vina a z leta v leto je i potrošnja  sve manjša. Više vina podelim nego ga moja klapa i familija popiju.

Znate kaj? Z jelovnikom nastavljam  v skladu ze sezonskom ponudom. Nek bu samo lagana klopica z puno povrća i voća. No najte se bojati. Bu i mesa.

Pondelek

Juha/Glavno jelo/Desert: Kak je fakat prestrašna vručina odlučil sam napraviti samo jednu bogatu mešanu šalatu z malo polumasnoga sira. Vu frižideru imamo furt zdenoga domaćaga soka. Imamo v jednom vrču složenoga soka, kraj toga je litra zdene vode i jedan od naših domaćih sirupa. I tak cele dane.

Tork

Juha/Glavno jelo: Zdena juha tzv tarator. To vam je onaj bugarsko/makedonski specijalitet od kiseloga mleka, kravljeg ili ovčjeg svejedno je, i nutra se dodaju kockice krastavci i malo orehi.
Desert: Neznam kaj bi tu mogel biti desert osim još koja žlica taratora.

Sreda

Juha/Glavno jelo: Čušpajz od mahuni, z vrhnjem naravno. Da baš nebuju samo mahune morete dodati par hrenovki. Ovaj se čušpajz more jesti za večeru onak lepo hladni.
Desert: Šnenokli. To bu Đuro napravila već vjutro kaj se do obeda lepo ozdeni.

Četrtek

Juha/Glavno jelo: Gulaš juha. Podinstam malo junetine i dodam dost povrća pa imamo i juhu i glavno jelo.
Desert: Voće. Imamo svoje kruške ali već naveliko jedemo i naše rano grožđe. 

Petek

Juha/Glavno jelo: File oslića na pariški i krumpir šalata  z malo majoneze.
Desert: Tu se mora popiti lagani zdeni gemišt.

Subota

Kaj bumo mi imali za taj dan nemam pojma al vam bum zapisal kak je zgledal jelovnik z našim prijateljima.
Predjelo: Bogati  narezak i kojekakvo povrće. Sir i vrhnje ali bez češnjaka jer to naš prijatelj Vlado ne voli. Đuro je spekla klipiće.
Glavno jelo: Mešani roštilj, tikvice i gljive na žaru; za one koji to vole spekli smo i malo brusketa.
Desert:Znate već da v goricama postoje i nekakvi standardi kak je gemišt. No kak je to mešano društvo bilo je naravno i soka. Đuro je spekla štrukle z makom i tikvom, a ohladili smo i lubenicu i dinju. Ovo vreme naprosto vapi za osveženjem.

Nedela

Otišli bumo v gorice od jutra jer se tam ipak najde više svežine. V samoj kleti je više nego ugodno v odnosu na vanjsku temperaturu. Napravili si bumo malo obilniji gablec i kasni obed. Kuham samo na rešou jer bi se kraj one moje starinske peći vužgal.
Juha: Juha od mladoga pevca z rezancima
Glavno jelo: Kuhani pevec i kojekakvo povrće z juhe na maslinovom ulju.
Desert: Imamo voća, ima gemišta, soka pa čak i pive. Nek si zeme ko kaj oće.