O letima se raspravlja od kak je sveta i veka. Tak bu i sledećih dva milenija. Tu raspravu nemre zastaviti nikakva moderna tehnika i tehnologija osim ak kojim slučajem v skoro vreme ne zmisliju pomadu/lek/eliksir za vječnu mladost. No to ni vi ni ja nebumo doživeli.
Kad je čovek zapraf star?
Nedavno sam gledal na tv-u razgovor s jednim divnim čovekom, kojega jako cenim i čitam sve do čega dojdem z velikim užitkom. Radi se o trenutno načitanijem hrvatskom piscu Miri Gavranu. Nekak mi se čini da ga više čitaju i igraju po Evropi i svetu nego tu doma al je to nekak i normalno. Ko more biti priznat v svojemu selu? Eto baš je neki dan dobil i visoko priznanje od države Austrije. Kaj je dobil doma v Lepoj Našoj neznam al kak to pri nama ide dobil bu priznanje tek posmrtno.
Na pitanje voditeljice nekaj oko leta, umora, stvaranja i sl. gospon Gavran je odgovoril otprilike ovak: „Čovek i z osmadeset let more biti mlad ak stvara i gleda v napred. Isto tak more biti star i z trideset let ak gleda v natrag.“ Bravo gospon Gavran. To vam je velka istina. Samo me jako rastuži dok vidim sve posvud širom naše domaje kak baš ti tridest- i četrdestgodišnjaci furt gledaju v natrag i žive v toj nesretnoj prošlosti kaj nam nikak nemre biti od koristi.
Stara je izreka:“Star si tolko kolko se osećaš da si star!“ Doduše kad bi to bilo tak ja bi bil jako mlad. Nekak se osećam jako dobro dok delam sve kaj delam već letima kak sam v penziji. Natrpaš si kojekakve zanimacije na vrat i nemreš niti misliti na leta. Stalno zmišljaš nekaj novo, obaveza stiže obavezu i dani, tjedni i meseci preletiju v sekundi. Doduše oko mene ima jako puno mladosti koja me ipak potseća kolko ti je zapraf let. A baš na Velki petek je oko mene bilo jako šareno društvo po letima. Ja sam naravno prednjačil kakti veteran, onda su tu bile Đuro i kuma Biba, onda ona generacija oko četrdest i koju, pa onda oni z dvajst i nekaj i na kraju njihova deca v rasponu od četri do sedamnaest let. Onaj z četri je Đurin unuk Rafo koj nam drastično snižava prosjek. I kak da se v tom društvu osećate starim?
Kak adolescent sam štel biti navek stareši nek sam stvarno bil. Dok bi sviral za vreme gimnazijskih dana na moru, bilo je svakakvih simpatija i ak bi štel malo poofirati kakvoj curički navek bi rekel leto-dve više. Stareši dečki su ipak bolje kotirali. V tim letima bi drugi dan rođendana mam govoril leto više.
Znam neke meni bliske ljude koji nikak nisu šteli biti deda. Dok bi došli svojedobno kod kuma Frane v Kaštele i naš vnuk Jan ga je zval deda, jako bi se srdil. Kao nije on deda nego barba?! Baš dete z tri-četri lete zna razlikovati dedu od stričeka. Jen pak prijatelj z moje generacije, tam negde ze šezdeset let, nikak nije ni pomisliti štel da ga bu kad-tad njegov vnuk zval deda:“Nebum ja nikakav deda!“ Onda mu se dogodilo da postane deda z sedamdeset i dve (72) dok je već trebal biti pradjeda. Vidite kak to zijde.
Kaj je pa sa ženama? O njima i njihovim letima se prepričavaju kojekave zgodice a bome i vicevi. Ja vam nebum spripovedal vica nego istinu. Još za vreme studija moja je gazdarica imala dve prijateljice koje su jemput mesečno dolazile k nama na obed. Bile su v ono vreme stare 44, 45 i 50 let. I baš o toj najstarešoj je reč. Nazovimo ih: Marica, Barica i Štefica. Moj cimer Fjaka i ja smo ih od milja zvali teca iako nam nisu bile ništ v rodu. Sve je to lepo štimalo dok se jemput v autobusu nisam ovoj najstarešoj obratil s teca Štefica. Onak mi je samo pod vuho šapnula:“Ivek. Naj me više zvati teca Štefica. Zovi me samo Štefica!“ Ups!
Onak iskreno: bila je najstareša al je zgledala puno bolje i mlajše od svojih pajdašici.
Imam i jednu zgodu z našim gitaristom Hansom. Bil je najstareši v bendu al mi o tome nigda nismo razgovarali. Pa muškarci smo. No jemput je imal godišnjicu mature na dan dok smo v hotelu imali gažu. Rekli smo mu da taj dan nek ne dojde na gažu no on je to odbil i rekel:“Kaj bum se ja z tim starim ljudima spominjal. Samo se spominjaju o deci, vnukima, režijama, kreditima i sličnim glupostima“. Nakon jedne vure svirke smo ga ipak sterali na godišnjicu a ja sam tu zgodu jemput spripovedal njegovom školskom kolegi. Dok je ova to čul „poludel je“: „Pak je on leto dan stareši od nas!“. Pardonček. Dojdemo na gažu i ja ga pitam:“Kak si mogel reči da su to stari ljudi a ti si leto dan stareši.Ti si sigurno opetoval jednoga razreda?“ Čujte sad kaj je rekel:“Nisam ja opetoval razreda. Ja sam krenul v školu za vreme rata, bila su stalno bombardiranja pa nismo mogli iti redovito v školu. Onda je učitel odlučil ko pe pak v prvi ako v drugi razred. Mene je odredil da idem v drugi razred al su svi z moje vulice morali iti natrag v prvi razred. Onda sam rekel učitelju da i ja oćem iti v prvi razred!?“ Ste vidli kaj je prijateljstvo?
Kak se pak ja osećam z mojih sedamdest tri? Morem vam reči jako dobro. V prvome braku nisam imal dece, nisam osetil kraj sebe dečicu, pa sam nekak furt mislil da sam mlad. V poslu sam pak imal posla navek z dost mlajšim ljudima od sebe koji su mi nekak davali osećaj da sam im vršnjak. Dok sam se pak drugi put oženil, Đurina su deca bila velka, bili smo mam na ti, i pak ništ od osećaja visokih let. A Đurini vnuki? Ne živiju z nama pa nemrem imati preveć velki osećaj da sam deda.
A kaj imaju leta z kulinarstvom? Puno toga. Znate one manifestacije kak su „Kaj su jeli naši stari?“ Kaj god se danas zmišlja novo poziva se na stare bakine i mamine recepte. I to je ono pravo. Doduše nije baš sve onak kak su one kuhale. Kaj bi recimo danas delala izvorna bakina kuhinja bez Vegete? Bila bi dobra al malo siromašna v okusu. Jedna moja prijateljica mi već letima tvrdi da ona kuha juhe kak i njezina mama samo z puno povrća i falačecom mesa i bez Vegete. Nije to to. Meni su juhe, saftovi, gulaši i paprikaši pusti ak ne denem Vegetu i nekakavu kocku. Ni moja mama ni štela zadnjih par let biti bez Vegete.
Bake i mame su radi svojega velkoga iskustva naravno putokaz kak i kaj kuhati al to sve onda malo oplemenimo z nekim modernim začinima. Ja jedino v kuhinji ne trpim nekakve egzotične začine niti baš preštimavam kojekakvo voće i povrće koje ne raste tu našem okolišu.
No kak sam stareši menjam nekoje prehrambene navike. Dok sam bil mali nisam nikak mogel shvatiti mojega staroga koj je obožaval kiselo mleko z kuruznim kruhom. Ja danas obožavam kiselo mleko i jogurt. V detinjstvu sam se nekaj najel domaćih pekmezi i do nedavno ih nisam baš imal preveć za volju. Zadnjih par let mi je često večera kruh i pekmezi i čaša kiseloga mleka. Kak klinac sam bil lud za pečenjima i pohancima a danas mi je draža žlica. V detinjstvu sam obožaval drobne kolače i digance a danas volim i kremaste kolače. Kaj to morti znači da sam ostarel? Moram se malo preispitati.
I još nekaj. Do pred par let sam se mogel nabubati za večeru ili na našim feštama koječega i ni mi bilo ništ. Danas moram paziti da ne večeram posle šest vur navečer jer imam velke probleme po noći. I inače loše spim a posle obilne večere opće nema spanja. Pomaže mi samo sodabikarbona. Vidite na kak vam to v starosti zijde?
Morti se pitate a kaj je v tim letima z promjenom navika v piću. Drastično se sve promenilo. Za ilustraciju vam bum rekel kaj se dogodilo na Velki petek. Od četri odrasle žene i četvorice odraslih muškarci celo popodne i večer, posle onak bogatoga jelovnika, popilo se litru i pol vina. Teško mi je to i napisati. Na sam Vuzem nas petero za stolom popili smo dva deci vina!!! Posle doručka i šunke i janjetine za obed samo dva deci vina? Sramota. Uglavnom: z letima količina pića drastično opada. Imate i vi takav slučaj?
No imaju ova naša leta i prednosti. Imamo iza sebe ogromno iskustvo i mudrost, moremo v napred znati kaj se more dogoditi v nekim situacijama samo kaj nam to mlađarija ne prizna.
I da se vrnem k naslovu: Kad je čovek zapraf star? Držim se onoga kaj je rekel gospon Gavran. Bavim se z koječim furt gledam bar mesec-dva v napred, pa dok dura dura. Negda su stari ljudi govorili:“Stari je vrag koj nema krsnoga lista!“
Morem vam reči da je prošli tjedan jelovnik bil baš onak kak sam napisal: dojedanje vuzmenih ostanjki i mala improvizacija krajem tjedna. Nije bilo ni škole, Jan je bil na ekskurziji v Poljskoj, a ovaj tjedan pak sve spočetka.
Pondelek
Juha: Povrtna juha; potrošil bum sve povrće kaj mi se mota po frižideru
Glavno jelo: Zapečeni rezanci sirom, nekakva šalata
Desert: Znate već: kolači od jučer
Tork
Juha: Paradajzova juha z kašicom
Glavno jelo: Pileći rižoto, cikla
Desert: Kompot od jabuki
Sreda
Juha/Glavno jelo: Musaka od kelja
Desert: Šnenokli
Četrtek
Juha/Glavno jelo: Ćoravi gulaš; ja bum del nekaj malo mesnatoga i koju kožicu, tek tolko da mi malo zamiriši
Desert: Palačinke z pekmezom
Petek
Juha/Glavno jelo:Bogata riblja juha ala fiš i široki rezanci
Desert: Lagani gemišt
Subota
Čisti vegetarijanski obed
Juha: Krem juha od gljva
Glavno jelo: Gratinirani karfijol
Desert: Nekakvo voće
Nedela
Juha: Juha od „stare“ kokice z grisknedlima
Glavno jelo: Kuhana kokica, pire, koparsos
Desert: Lisnato z makom/orehima
:(Još nema komentara