A kaj da danas kuham? (328)

Lepo je prek leta i doma

Kak i  sami vidite ili čitate po našem Jadranu se sakaj događa. Veseli kaj bu jako dobra i bogata turistička sezona al me rastužuju ovi grdi požari kak i  kojekakve grde situacije i ispadi i domaćih ljudi al i turista. Vidim da i Hvar i Pag ratuju z golačima i partijanerima makar se mora priznati da i oni donesu lepi dio turističkoga kolača. Mene je neki dan pak jako nasmijala ona informacija o “rezanju pize” v Milni na Braču. Morti se neko od vas seća da sam ja tam letoval prek dvajst let i dobro poznam sve birtije v Milni i oko nje. Tu sam piceriju dobro zapamtil, a to v Milni ni teško jer je sve na udljenosti od dvesto metri, jer sam baš tu imal jednu simpatičnu situaciju. Čim bi Đuro i ja v jutro obavili našu uobičajenu jutarnju kupovinu seli bi v naš kafić popiti kavicu. No jemput smo, a neznam zakaj, seli mam rano v jutro baš v tu piceriju. Na terasici nigde nikoga od gostiju a bome niti konobara. Onda se odnekud konačno spukne jedna mlada konobarica i lepo si sedne dva-tri stola dalje od nas, ali samo sedne, i pije svoju kavicu i puši. Čekamo mi koju minute, kakti slučajno se spominjamo malo glasneše, ali ona ne trza. Tek dok smo se digli i krenuli poiskati nekoj drugi kafić ona se zbudila i “iznenađeno” rekla:”Ajme skužajte. Nisan vas vidila!” I nebuš nas više vidla. I sad vidim na jednom portalu ovo. Čovek je snimil jelovnik gde postavljanje stola košta 12,00kuna?! A ak oćete da vam picu i narežu to vas bu koštalo 3,00 dodatne kune?! Da čovek ne veruje. Još bute morali plaćati kaj vam narežu picu na falačece. A kaj je z rezanjem šnicla? Kolko to košta?

Sad mi je stvarno drago kaj sam ostal v Koprivnici. Celo leto se v gradu nekaj događa a i na našem podravskom moru Šoderici je saki vikend nekakav zabavni program: od bajkera, prek kaubojade do Kerekeš teatra. Đuro i ja smo bili desetak dana čuvari kujice Bele v letnjem period a prek vikenda se selimo v Draganovec jer bumo imali majstora da nam sanira posledice one poplave od proljetos.

Znam da vam nebum ništ novo rekel ak se požalim malo na ono kaj se događa v prirodi. Verujte da za svojih sedamdeset i nekaj let ne pamtim takvo leto z tak čudljivom prirodom. Baš v ovom momentu dok ovo pišem v Koprivnici je samo 18 (osmnajst) stupnjeva. Jučer je bilo 24 a pred dva dana 35 (trideset pet) stupnjeva. Jel to normalno? V goricama se događaju jako neugodne stvari. Počela se sušiti loza, napala ju nekakva bolest o kojoj do ovoga leta nismo ni čuli, već par dana moremo normalno jesti zobatice a berba bu verojatno najraneše za ovih trideset i sedam let kak sam goričar. Naravno ak nas ne snajde nekakvo zlo kak je snašlo naše susede Zagorce i Međimurce. Salauka je zasad obilazila koprivnički kraj ali se zato ne pamti već dugo takva suša. Tu i tam padne kakvih par kapi kiša, trava je čist žuta pa već više od mesec dana nisam kosil ni doma ni v goricama.

Imamo vam mi v goricama petnaestak betvi paradajza i četri struka paprike. Dok smo prošlo leto od iste te količine čak i kuhali paradajza za zimu, ovo se leto još nismo ni pošteno najeli. Vredno mi to saki dan zalevamo i čini mi se da sam potrošil više vode nego nam je steklo vode za vreme poplave, a rezultat bu nula. Već sam nekolko betvi spukal a i ostalo se suši na očigled. Na placu je paradajz pri proverenim kumicama po tri kune i to onaj lepi starinski kvrgavi kaj  idu tri komada v kilu. Moram se malo požaliti i na voće. Jednu smo ranu krušku  već obrali i bila je kolko tolko v redu. Ona druga, prekrasna viljamovka, ima fest ploda ali se počelo ovih dana sušiti lišće. Je da je malo preveć lepih velkih plodova na mladoj kruški al se nadam da bu zdržala još par dana dok ne dozreli. Imam i tri prelepe jabuke koje sunce nemilice prži pa su neki plodovi već dobili prave pravcate opekline i svaki dan po koja opadne.

Neki sam da bil pri prijatelju Ivini v Goli i čul takaj jednu ne baš lepu vest. Već je ovih dana počela berba rane kuruze kaj retko i najstareši Golčani pamte. Kuruza prisilno sazreva na toj peskovitoj zemlji al v njoj nema života. Zrno je suho i kvaliteta bu nikakva. Srećom kaj  Ivinina žena Slava ima velkoga vrta kojega zalevaju pa je povrće baš kak bog zapoveda. Donesli smo si malu zalihu za bar tjedan dana.

Da samo ne kukam ima i jedna dobra vest. Išel sam neki dan k svojemu mesaru malo obnoviti zalihe i ugodno se iznenadil. Naišel sam na prekrasne mlade fileke, lepo carsko meso i malo svinjske lopatice. Onda sam tek reda radi pital dal morti ima juneće repove jer to nisam videl vu vitrini. Na velko moje čuđenje rekel je da ima i donesel je z hladnjače prekrsanoga repa baš onakvoga kak voli Đuro. Al sad čujte cenu. Očekival sam kak je i v drugim mesnicama ili trgovačkim centrima, naravno dok ga ima, oko četrdeset kuna. Pogledam ja na račun kad ono samo 20,00 kuna za kilu. Mislil sam da se zabunil no rekel mi je da je to pri njemu takva cena od navek. Zanima me otkud takva razlika od mesnice do mesnice za jednu te istu vrstu mesa. Za ubuduće smo se dogovorili da ga zovem koj dan prije jer ga retko dobiva repe a potražnja je velika. Sad si bu Đuro svako malo omastila brk.

Sve v svemu posla imam kolko očeš, dosadno nebu a imam i poziv od kuma Tase da dojdemo kojput na Šodericu. Napravil je pred par let zgodnu vikendicu sto metri od vode pa se bumo, ak nam dojde baš želja, mogli i okupati na našem podravskom moru. Makar vam moram nekaj priznati. Imam malu odiozu prema kupanju v slatkoj void. Na Šoderici sam se kupal zadnji put još prije rata.

Dobra je vest i to da nemam nikavih problema z kuhanjem. Oko nas je tolko svega v izobilju da mi se teško odlučiti kaj koj dan kuhati. Sad imam problem kak i  moja mama negda:”A kaj da danas kuham?”

Pondelek

Juha: Imam juhu od jučer samo bum zakuhal frišku testeninu
Glavno jelo: Imam i hladno pečenje od jučer ali bum napravil mešanu šalatu i nekakvoga friškoga priloga.
Desert: Malinov sok

Tork

Juha: Koprova juha z kašicom
Glavno jelo: Musaka od patliđana, šalata
Desert: Voće

Sreda

Juha/Glavno jelo: Složenac od povrća i janjetine
Desert: Palačinke z pekmezom

Četrtek

Juha: Juha od goveđih kostiju z rezancima od palačinki; jučer je Đuro spekla malo više palačinki pa sam si napravil rezance, posušil ih i sad imam za nekolko put
Glavno jelo: Junetina na češnjaku, hajdinska kaša, šalata
Desert: Čaša zmiksanoga voća po glavi ukućana

Petek

Juha: Juha od smrznutoga oslića z rižom
Glavno jelo: Prženi brancin, lešada od krumpira i karfiola
Desert: Čaša moje graševine

Subota

Juha/Glavno jelo: Paprikaš od teleće/svinjske lopatice, domaći rezanci ili fuži.
Desert: Subota je. Popite laganoga škropca.

Nedela

Imam v škrinji lepoga domaćega piceka kojega treba potrošiti, pa bum napravil ovak

Juha: Juha od pilećeg sitniša
Glavno jelo:Lepe komade bum mariniral i spohal sezamom; za prilog bum napravil fino varivo z nekolko vrsti povrća jer Đuro to voli. Šalata mi tu ne paše.
Desert: Ledeni veter. Toga kolača vole Đurini vnuki a ostal bu koj falačec i za nas.