Vele ljudi da je ovo vreme za medije “sezona kiselih krastavaca” i da se novinari moraju snalaziti na kojekakve načine da napuniju novine ili tv emisije. Ja se z tim baš ne slažem. Barem kaj se tiče ovoga leta. Ima tu svega.
Letnje zanimacije
Najprije reč dve o katastrofalnim požarima po našoj prelepoj Dalmaciji. Teško se moru i stareši Dalmatinci setiti da se tak nekaj dogodilo a posebno ne pred vratima prelepoga Dioklecijanovoga grada. Samo velkom požrtvovnošću i vatrogasci i građana Splita izbegnuta je velika katastrofa. Nadam se da se tak nekaj nebu uskoro ponovilo. A ova naša politička “elita” se pak pokazala v svojem pravom svetlu. Kaj je ovaj narod bogu zgrešil da nas vode takvi vrli političari. Valda smo si i sami krivi.
Onda ove žege. Prošlih sam dana nekaj o tome već napisal a me ovo vreme pak iznenadilo. Par dana nemrete dojti po noći do zraka a onda se pak nekolko dana morate malo pokriti jer se pri nama v Koprivnici temperatura spustila na 10-11 stupnjeva po noći. Iznenađenja iz dana v dan. Kiše pri nama ni za lek. Da v goricama ne zalevamo onih par betvi paradajza i paprike već bi odavno sve zgorelo. Trava je v trsju kaj drotkefa. Sve je požutelo samo je tu i tam nekakav zeleni otok trave v nekakavoj seni i pod brajdom. Dok perem auta od silne prašine moram usput zalejati i mlade kruškice i jabuke da malo oživiju. Inače ništ od jesenske berbe voća. Srećom kaj trsje ni prezahtjevno kaj se vlage tiče pa do sad nismo vidli nikakve štete i boleštine. Dapače čul sam na televiziji da ovakvo suho vreme jedino pogoduje baš lozi. Ak nas nekakvo zlo do berbe ne potrefi odzgora ovo leto bu pak pun podrum dobre kaplice.
Moram vam se malo pofaliti. Prošli tjedan mi je majstor Kruno složil na garaži nova vrata a jučer smo uspeli sanirati v kleti zidove od one poplave na ovogodišnji Dan žena. Moja ženska ekipa, Đuro, njezina kćer Irena i sestra Violeta su lepo pomaljale sve zidove v obadve sobe pa majstor Kruno more za koj dan početi z postavljanjem poda. Pripomogel je oko maljanja i moj prijatelj Atač koj je kak poznati slikar odavno savladal mešanje boja pa je njegov savet jako dobro došel.
A da znate da je već usred leta počela “akcija zimnica”. Đuro je već napravila hrpu sokova od breskvi, kompot od breskvi i pristojnu količinu odličnog pekmeza od marelici. O tom pekmezu vam moram nekaj reči. Naša marelica doma je ovo leto imala lepi urod al da prostite nekakva je čudna sorta. Prelepo zgleda al mi je tek nekak neobičan. Onda smo za pekmez dobili ponudu od naših prijatelja z Gole. To je bil pun pogodak. Marelice su nekakve sitne, za oko nezgledne al okus je neponovljiv. Dok sam mešal toga pekmeza užival sam v prekrasnoj aromi poluproizvoda. Miris me je podsetil na pekmeze koje je negda davno pekla moja mama.
Mislite da je tome kraj? Ni govora. Sad slede kojekakvi mešani pekmezi, marmelade i đemovi a bome i pristojna količina kompota od kruški. Viljamovke buju za koj dan taman one tvrdoće kak za kompot trebaju biti. Sledi naravno uskoro turšija, pa ajvar i bogtepitajkajsvene. Se sećate kaj mi je Đuro rekla pred par let dok sam rekel da preteruje z količinama? Dok su sve stalaže v podrumu bile krcate ja sam ju pital: “Ko bu sve to pojel?” Samo mi je odgovorila: “Kad je meni lepo videti dok su stalaže pune!”. Povijest se rado ponavlja. Nek joj bu. Pol bumo kak i navek poklonili. Naši prijetelji i deca se nebuju srdili na domaće poklone.
Dok ovo pišem čekam prijatelja Atača. Idemo v Legrad jer tamošnjem groblju klesari dovršavaju spomenik našem prijatelju Čvrknji. Naša je klapa investitor toga grobeka. To je jedna tužna priča o kojoj vam bum nekaj napisal drugom zgodom.
Kak sam neki dan i napisal prek leta imam fakat slatke brige oko kuhanja. Jedini mi je “problem” kaj bu prije na redu. Em Đuro kojekaj kupi na placu em smo ovih dana pri našim prijateljima z Gole dobili kojekakve povrćke. Tikvice, krastavci, mahune, mlada mrkvica, patliđani, paradajz a već smo omastili brk i z šećercom. Kupite kakav falačec mesa i morete delati kojekakve letnje varijante svakodnevnih obroka. Ak još dodate obilje našega voća kojega bu do kraja desetoga meseca onda vidite z kakvim se “problemom” moram hrvati ovih letnjih meseci. Pravi je pak problem kak potrošiti još one suhe delicije kaj čekaju v škrinji. Imamo još i suhih kobasi, šunke, bunceka i špeka. Nekak moram sve to skombinirati recimo za gablec. Tak sam danas v jutro imal ovakvu kombinaciju: malo kuhane šunke, malo špeka, malo kobase, paradajz z koščićnim uljem i prisiljeni kiseli krastavci. Morti vam to zgleda obrok za šumskoga radnika al verujte da su to bile jako male količine: od svačega pomalo. Istina je pak da je to bez obzira na količine jako žedno. Srećom kaj i za to ima leka.
Pondelek
Juha: Krem juha od tikvice z krutonima
Glavno jelo: Kraljevski rezanci, zdela šalate
Desert: Dobro ohlađeno voće
Tork
Juha/Glavno jelo: Đuveđ; nekakav je standard jedan krmenadl po glavi ukućana
Desert: Nekakav sok
Sreda
Juha: Kokošja juha z vrečice
Glavno jelo: Pileća krilca, fino varivo; ja zmešam sve moguće povrće koje mi se najde pri ruki
Desert: Voćna šalata
Četrtek
Juha/Glavno jelo: Čušpajz od krastavci, faširanci
Desert: Kompot od breskvi; ja ga dobro ohladim
Petek
Ferje je al Jan i njegov bratić Ivor dolaze k nama na obed. Jan je ovak naručil
Juha: Krem juha od kozica
Glavno jelo: Lignje na pariški z tartarom, slani krumpir
Desert: Mislim da bu Đuro napravila nekakav kremasti kolač kak to Jan voli.
Subota
Opće nema dileme. Obed je v goricama. Đuro bu imala generalku v kleti a ja se bum motal oko kuhinje i trsja.
Juha/predjelo: Juhe nebu al bu nekakvo predjelo.
Glavno jelo: Samo mešani roštilj i puno priloga. V zadnje vreme su svi navalili na patliđane z češnjakom i maslinovim uljem
Desert: Osim gemišta sigurno bu i ohlađena lubenica ili dinja.
Nedela
Juha: Lagani pileće-povrtni ragu
Glavno jelo: Pohana piletina, rizibizi
Desert:Sladoled i ledeni čaj
:(Još nema komentara