Moj profil

A kaj da danas kuham? (323)

Ovi dani su za one kaj nejdu na more i ostaju doma, idealno vreme da prečitaju nekaj kaj već dugo odgađaju ili pak da se opuste uz nekakvo štivo gde morete pustiti mozak na pašu. Tak bum baš ja napravil jer imam fest kojekakve literature koja stoji na mojem regalčiću kraj kreveta i koja samo skuplja prašinu. Sad bum nekaj od toga konačno i realiziral.

Kaj čitati v ove letnje dane?

Vele ljudi da je leto i godišnji odmor prava prilika za nekaj zabavno prečitati jer dok ležiš negde na plaži v hladu pravi je moment za čitanje. Naravno ak ne zaspiš od umora ili si tak fjakast da ti se ni to neda delati. Sećam se jednoga staroga vica na temu lenčarenja negde v hladovini recimo pod smokvom.

Leže njih trojica negde v Dalmaciji i leškare. Nakon nekog vremena veli jedan:

“Judi moji ija bi smokav.”

Nakon par minuta doda drugi:

“A ko će ti ih brat?”

Onda nakon par minuta treći:

“A judi moji. Kako vam se da i govorit?”

Moram vam nekaj priznati još z mojih studentskih dana za vreme dok sam bil još muzikant. Na morske gaže smo odlazili prvog petog ili najkasneše prvog šestog. Taman vu vreme dok su počinjali glavni ispitni rokovi a vraćali smo se negde v listopadu dok su već glavni rokovi prešli. Onda bi ja onak mlad i nadobudan, pomalo i naivan, nosil sebom hrpu knjiga na gažu jer “bum ja svaki dan učil dve tri vure i onda časkom skočil do Zagreba i položil kojega ispita”. Kak je to na kraju zišlo morete mam pogoditi. Knjige su uglavnom ostale zaprte iako bi ja danima govoril kompićima z benda kak idem posle obeda v stan učiti. Naravno da su brzo skužili da ja zapraf idem posle obeda ubiti oko. Moji ispitni rokovi su počinjali tek v jesen dok su spašavali godinu onak vredni student kakav sam bil i ja. Naravno da sam se z letima opametil i na gažama sam uglanom čital nekakvu žutu štampu, rešaval križaljke eventualno prečital kakvoga krimića.

E a kaj bum čital ovo leto. Ono kaj sam spomenul v uvodu ni baš nekakva literarura za opuštanje. Tak na primjer imam jednu jako ozbiljnu knjigu “Povijest svjetske književnosti” čiji je autor akademik Milivoj Solar. Kak mi je tu knjigu poklonil z posvetom sam profesor Solar počel sam ja to čitati pred mesec-dva dana i moram vam reči da me je baš zainteresirala. Došel sam negde do polovice ali, najte mi zameriti, to ipak ni knjiga za ove letne prevruče dane. Ipak bum ja to dokrajčil tek negde v jesen ili čak v zimi. To ni triler roman kojega morate gutati na dušak.

Na ponudu imam i puno lakše štivo. Prvo se bum vlovil za knjižicu od nekakvih stotinjak stranica pod naslovom “Škola vina, Bakhova sina” autora Ive Kozarčanina. V toj knjižici morete doznati kojekaj o vinima, o sortama grožđa i njihovim rođacima a bome i kak i  v koje vreme konzumirati koje vino. Do sad sam ju samo prelistal a sad krečem v detalje. O vinima se navek more nafčiti nekaj novo.

Na temu vina imam još jednu knjižicu, otprilike istih dimenzija kak i  ova prva, a zove se “Vino kao lijek”. Savršeno za sve vinoljupce jer dok piju vino moreju reči kak nisu pijanci nego se samo lečiju. Autor je Hans Wagner, agronom i novinar. Dobro je to skombiniral. Piše o vinima, obilazi kojekakve vinarije, gazde ga počaste z kojekakvim delicijama a on to konzumira uz neko kvalitetno vino. Za uzvrat napiše odu o tom gazdi i njegovom vinu a usput i spomene na kaj konzumacija toga vina deluje. Bravo! Tak se to dela. Baš me zanima za kaj bi preporučil našega tuduma iliti direktora. Znamo da v normalnim količinama djeluje na razinu cukora v krvi al kaj je z onima koji povlečeju malo više. Baš sam neki dan čul od mojega kuma da njegov sused dnevno popije i do pet litri tuduma. Jest da tudum baš i nema puno alkohola al kaj je preveč je preveč. Ili je to samo preventiva da ne postane cukorljivi? Preporuka za konzumaciju vina v ovoj knjigi je v ovome: ”Ljekovita snaga vina jača srce i krvotok, izbacuje otrove iz tijela i pomaže da se dobro osjećamo”. Kaj oćete više. Meni se najviše dopada ovo “da se dobro osjećamo”.

Na čekanju imam kak i  navek nekaj od Ephraima Kishona. Tu nemrem pogrešiti. Kak imam sve kaj je tiskano na hrvatskom, ili si samo tak mislim, zemem si nekaj kaj već dugo nisam čital i pak mi je sve novo. Čak imam i dve knjige na njemačkom pa malo vežbam ono kaj sam negda znal. Jedna se zove “Essen ist mein liebling Speise” kaj će reči “Jesti je moje najdraže jelo”. Ak mi nebu dost ovo kaj sam nabrojil bum posegnul za Vojom Šiljkom. Imam četri njegve knjige viceva koje zemem v ruke svakih leto-dve i svaki put se dobro nasmijem kak da ih čitam prvi put.

Imam još jedan malo naivan plan ali bum još videl kaj z tim. Pišem paralelno tri teksta za tri knjige, ili ak oćete knjižice, kaj bi v sledećih leto-dve štel tiskati. Jedan naslov je naravno ovaj moj blog “A kaj da danas kuham?” ali samo izbor nekih od 320 tekstova z jelovnikima širom Lepe Naše. Drugi bu na temu povijesti jednog benda a treći bu na temu moje Koprivnice i moje klape. No sigurno već pogađate. To sve skupa treba isfinancirati. Imam nekakve ideje kak to realizirai al o tome bum počnel razmišljati tek na jesen. Bum pokušal najti izdavača pa morti i uspem. Ak ne pokušam nebum nigda saznal dal sam mogel uspeti.

I tak vam je to dragi moji. Kak vidite plan je tu a kaj se bu dogodilo bum vam rekel negde krajem rujna. Dobro mi se odmorite i zabavite tokom ovoga paklenoga leta.

Pondelek

Juha/Glavno jelo: Samo jedna bogata juha od mešanoga povrća
Desert: Voće;
srećom kaj imamo trenutno dobar izbor marelici i breskvi

Tork

Juha/Glavno jelo: Kajgana i zdela zelene šalate
Desert: Štrukli z breskvama;
ste to negda jeli? Ak niste probajte.

Sreda

Juha:Koprova juha
Glavno jelo:Piletina na češnjaku, hajdinska kaša,
prisiljeni krastavci z malo koščićnoga ulja
Desert:
Dobro ohlađeni sok

Četrtek

Juha/Glavno jelo: Filana paprika z malo pirea; ja navek denem malo nutra i koji falačec kranjske i čak malo šarenoga špekića.
Desert: Palačinke z pekmezom od marelice

Petek

Juha:Prežgana juha
Glavno jelo: Frigane srdelice, mešana šalata
Desert: Lagana bevandica

Subota

Juha/Glavno jelo: Čušpajz od tikve z dinstanim bočingom
Desert: Puding od vanilije

Nedela

Na obed nam dolaze deca pa se moram malo potruditi
Juha: Juha od junećeg repa z rezancima
Predjelo. Kuhani rep z malo kopar/paradajz sosa
Glavno jelo: Pečena janjeća plećka i rebra z krumpirom, šalata
Desert:
Đuro bu opet spekla štrukle z tikvom i makom jer to deca, a bome i ja, obožavamo

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.