A kaj da danas kuham? (311)

Jedan dan na privatnom jezeru gospona Šustera

Neki sam se dan listajući nekakve stare slike našel nekolko zgodnih slikica z jednoga prelepoga izleta v Njemačku pred sam rat. Za uvod vam moram reći samo par reči kak bi razmeli kak je došlo do toga da se okupi jedna takva šarena ekipa v kojoj neki ljudi nisu imali baš prevelike poslovne veze z gosponom Šusterom.

Gospon Šuster (Schuster) je bil visoko pozicioniran menadžer v njemačkoj firmi Henkl koj je videl pol sveta i ničega ni bil željan. Da bi se dobro osećal pri nama v Podravini, njegvi direktni poslovni partneri su mi predložili da za njega i njegvu ekipu napravimo nekaj pri meni v goricama. Tak je i bilo. Moj prijatelj Hus i ja smo osmislili jedan domaći jelovnik koj je zgledal otprilike ovak:

Aperitiv: Dve-tri vrste rakijice poslužene z kriškama kruški i grožđem. Kak je bila jesen grožđe sam ostavil na trsu pa si je gospon Šuster sam bral kaj je štel.

Sledilo je malo domaćega predjela, pa juha od gljiva, pa pečenja z prilogima i naravno domaći kolači. Posebni desert su bili pečeni kostanji. Naravno da smo mu dopelali i žive tamburaše, v ono vreme jako poznati sastav “Doktor Jelić i prijatelji”.

Kak je to završilo bum vam opisal v dve rečenice.

Gospon Šuster koj ne ostaje nigde duže od sedan vur navečer, ostal je do dve vure iza polnoći. Bil je oduševljen z celom ponudom, a iznedađen je bil dok je videl da Hus v kleti kuha na peći a šokiran je bil dok je videl da pečemo kostanje na otvorenoj vatri na podolju. Pital je da kaj to smemo delati? Kaj nebuju časkom došli vatrogasci? Još ni bil svestan da je v Hrvatskoj. Rezultat toga druženja: sve nas je pozval v Njemačku ali je svakak moral z nama na put i doktor Jelić, bez tamburaša, i naš glavni kuhar Hus.

I tak je ekipa od sedam ljudi krenula jednog lepog dana put Njemačke do poznatoga grada Ulma, rodnog grada velikoga Alberta Einsteina. Dobili smo točan itinerer kak bumo došli do hotela, al bome i kak trebamo biti oblečeni za prvu večeru v jednom kineskom restoranu i drugi dan na druženju na Šusterovom privatnom jezeru.

Kak je bilo v kineskom restoranu to vam sigurno ni baš interesantno jer je to mogel biti bilokoj restoran v bilokojem gradu na svetu. Moram samo spomenuti da nismo jeli ze štapićima nego z nožom i vilicom jer bi morti još i danas bili tam pri predjelu.

Jezero je smešteno desetak kilometri od Ulma veličine nekakvih 100x100 metri, zaštićeno zelenom ogradom i žicom v toj zelenjavi samo da se posjed  zaštiti od divljih životinja. Rekel nam je z ponosom da je sav taj okoliš sam odnjegoval svojim rukama čez punih dvadeset i sedam let.Po jezeru su plivale debele, dobro utovljene kojekakve ribe koje on nigda ni lovil jer “su to moja deca”. Dozvolil je ipak našoj jedinoj članici ekipe hititi udicu ali je to neslavno završilo. Naša se prijateljica, iako poznati sportski ribolovac, sva zapetljala vu flaks i od pecanja pak ništ ni bilo. Imali smo fala bogu kojekaj za jesti i bez toga ulova. No sam doživljaj ambijenta oko jezera je za nas bil malo iznenađujući i tek smo onda razmeli iznenađenje i šok gospona Šustera dok je videl da mi kurimo vatru v kleti i delamo lomaču dok pečemo kostanje. Naime njegva je kućica, ja bi čak rekel barakica, bila skromneša nek su naše klečićke po Podravini. Zapraf je moja klet v Draganovcu za tu njegvu kućici prava vila. Njemu je to služilo samo za držanje alata z kojim dela na održavanju okoliša a jednoga maloga rešoa je imal ilegalno samo ak si oće na brzinu skuhati kavu ili čaj.

Daklem kak vidite na slikama bil je to jedan pravi piknik na njemački način ali je glavni cilj bil da nam gospon Šuster vrne istom merom. Neće ni on biti gorši od Podravci.

Dan nam baš i ni bil naklonjen, bilo je onak malo prohladno, ali smo se brzo uspeli zagrijati uz dobro iće i piće. Njegva je ekipa podigla šator, jer smo se jedino tu mogli skloniti v slučaju kiše, a i sav ostali pribor za kuhanje je bil na otvorenom. Ak se dobro sećam sve je to moral prijaviti vatrogascima za slučaj nezgode.

Bilo vam je tu na jelovniku svega i svačega i ruku na srce točno se i ne sećam kaj smo sve jeli. Zapamtil sam tri stvari. Bila je bela juha od luka z kobasicama kaj je specijalitet Šusterovog rodnoga kraja. Na roštilju je bil juneći file dobro napacan v sojinom sosu i narezan tanko kaj flispapir. To se hitilo na roštilj i samo se okrenulo na jednu pa drugu stranu i već je bilo gotovo. Na ražnju se pak okretal fanj komad junećeg karea ili vratine. To vam je zgledalo kaj odojak na ražnju ali bez glave i nogici. Lepo, dobro i ukusno. Kaj je bilo sve za prilog nek sam bog zna.

Dio podravske ekipe kontrolira gospona Šustera dok loži po kotlićem z belom juhom

Internacionalna ekipa se raspjevala. Gospođa Mila nam je poveznica: malo je naša malo je njihova.
V pozadini se vidi falačec zelenila oko jezera. V prvom planu je ražanj kojega smo već “očistili”.

A piće? Naravno da je bilo kojekvih aperitiva, bila je bačvica pive pa si toči kak i  kolko očeš a v jednoj povećoj limenoj kadici bilo je v ledu fanj buteljki kojekakvoga vina. Pitate se a gde su bile žene? Osim naše kolegice Zlate bila je tu i gospođa Mila, poslovna žena z našega kraja a gospođa Šuster je došla v pratnji svojega Lesija, samo na kratko vreme tek da nas pozdravi.

Gospon Šuster predvodi pjesmu uz asistenciju kolegice Zlate i kolege Zvonka. Iza desnoga ramena gospona Šustera se vidi falačec jezera.

I kaj da vam velim? Kak se smanjivala količina vina i pive, raslo je raspoloženje, temperature je rasla, pala je pjesma čas njemačka, čas hrvatska a bome i po koja internacionalna. Gospon Šuster nam je ostal v jako lepom sećanju. Nažalost dok smo za dan-dva došli v Sloveniju počinjal je rat. Nismo se više imali prilike družiti ali je gospon Šuster napravil jednu predivnu gestu. V našoj mu se ekipi još v Koprivnici jako dopal moj prijatelj Hus, zval ga je Kumpl, pa je inzistiral da i on dojde v Njemačku. Dok je pak čul prek godpođe Mile da je Hus v ratu poslal je po njoj jednu pristojnu cifru marki nek si Hus kupi pancir košulju. Prelepa gesta jednoga velkoga poslovnoga čoveka kojega su Podravaci uspeli šarmirati svojom gostoljubivošću. I on, i koje leto kasneše moj poslovni prijatelj Dieter, su pri meni jako promenili predođbu o “tipičnim Švabama”. Ko zna kaj je danas z tim dobrim čovekom Šusterom?

Kak sam prošli tjedan i napisal uglavnom smo celi tjedan bili ma “ostanjkima” uz pokoju povrčku i žlicu. Mislim da se ovaj tjedan moramo manje-više zadržati i dalje na zelenjavi i žlici.

Pondelek

Juha/Glavno jelo:Prisiljeno zelje z nekakvim falačecom mesa ili samo jedna hrenovka po glavi ukućana
Desert: Jagode z malo šlaga ili z malo štauba

Tork

Juha: Koprova juha z kašicom
Glavno jelo: Krmenadli na naglo, lešo karfiol na prezlima
Desert: Bilokakav sok

Sreda

Juha/Glavno jelo:Paprikaš od pileće sitnine z malo više želučeki, domaći rezanci,šalata ak vam paše
Desert:Voćna šalata

Četrtek

Juha/Glavno jelo: Složenac od janjetine i puno povrća
Desert: Palačinke z pekmezom

Petek

Juha:Prežgana juha z krutonima
Glavno jelo: Frigane srdelice, krumpir šalata
Desert:Pa znate već da riba mora triput plivati

Subota

Danas bumo v goricama roštiljali jer naša Irena ima četrdeset let
Predjelo: Kak i  navek svega pomalo
Glavno jelo: Mešani roštilj: čevapi, ražnjići, malo piletine i par komadića carskoga mesa. Prilogi buju standardni z obaveznim brusketama namočenima v maslinovom ulju.
Desert:Za to se bu pobrinul Đuro: za Irenu buju svakak kardinal šnite i morti još nekakav drobni kolač. 

Nedela

Juha: Juha od junećega flama z rezancima i leberknedlima
Glavno jelo: Kuhani flam z hrensosom, pire; hrena nam je ostalo do sledećega Vuzma
Desert:Rolada z bananom