A kaj da danas kuham? (300)

Evo me i 3oo-ti put!

Primite se nekakvoga posla i mislite se malo zabavljati kad ono preleti par let a vi ste još navek tu i još navek se najde nekakva temica z kojom bi šteli nekaj reči svojim čitateljima, mojim Coolinaričarima.

Ja sam vam džod navek volil nekaj malo deti na papir. V osnovnoj školi mi je bilo drago napisati domaću zadaću z hrvatskoga, nije mi bilo teško napisati ni zadaću z njemačkoga a školske zadaće sam jedva čekal. Z toga vremena evo i dva kratka štikleca.Imal sam v gimnaziji kolegicu kojoj njemački ni bil baš dragi predmet pa sam i njoj i sebi znal napisati kraći sastav ali naravno da sam se moral potruditi da buju različiti. Tak sam se vežba. Dok smo pak pisali zadnju školsku i probnu maturalnu zadaću za isto vreme sam uspel napisati i za kolegu z kojim sam sedel i za sebe. Sad kakva je bila kvaliteta nebi vam znal reči ali su i jedna i druga bile za prolaz. Pisali smo negda i ljubavna pisma. E to vam je bilo nekaj. Dugo bi se pripremal, zmišljal nekaj posebno kaj bi mogel reči sve ono kaj se onak v živo nisam usudil. Onda bi Ona odgovorila a tu je već bilo materijala za kaj se bum vlovil v mojem sledećem pismu. Danas to mladi ne delaju nego šalju SMS poruke ili sve hite na fejs. Al to vam ni to. Nema tu onoga žara i neizvesnosti kak je to bilo dok si danima čekal odgovor. Prek pisma se i ljubilo i svadilo a bome i mirilo. Bum vam otkril jednu malu moju intimu.Jednu svoju velku simpatiju još z gimnazije sam čist slučajno čul mobitelom prek jednog prijaelja. Malo smo se pospominjali,pa se malo podsetili na te dane naše jako rane mladosti, pa razmenili nekakve knjige i onda pak leto-dve tišina. I onda iznenađenje. Dobil sam pismo v kojem me obaveštava da nema smisla više čuvati ona moja pisma dok smo bili v gimnaziji. Pa tak si i ja mislim. Nismo se vidli ni čuli oko pedeset let, ona je baka nekolko unučadi a ja sam već odavno v drugom braku. Morti se pak sretnemo jednog dana dok se reinkarniramo.

Onda sam jedno vreme malo zaboravil na pisanje da bi kak mladi psiholog počel pisati v tvorničkom listu.Bile su to negda samo kratke informacije al i nekakve stručne teme z psihologije ili pak prikazi stručne literature koju sam preporučal čitateljima. Zapraf sam v mojem profesionalnom životu moral puno pisati. Dok održim seminar nemrem ljudima prepisivati z knjiga. Moral sam svaku temu prilagoditi mojim seminarcima tak kaj od toga moreju imati i nekakve koristi. Nakon par let sam moje tekstove tiskal v knjigi “Prodavati ali kako?”. Vele ljudi da je to bila prva knjiga na tu temu na našem tržištu. Nisam to išel proveravati.

I onda sam početkom 2010-te ponudil našem Glasu Podravine da pišem na temu poslovne psihologije i vama dobro poznatu temu “A kaj da danas kuham?” Znate kaj su mi rekli? Kao o psihologiji vam ljudi sve znaju pa im to ni interesantno a ovo oko kuhanja i jelovnika je zanimljivo svima kaj se muče svaki dan z jelovnikom.Doduše napisal sam oko 110 tekstova z psihologije, nekolko desetaka tekstova pod nazivom “Kaj reči sam vam štel” i  uskoro bum i v Glasu imal 300 tekstova kak i  na Coolinariki.

Mislite da sam gotov? Ni govora! sigurno se sečate da sam spominjal knjigu “Maturanti staroga kova” koju smo tiskali već četri lete za redom i već pripremamo petu koja bu promovirana početkom lipnja. Za svako izdanje napišem dva-tri teksta a upravo sam počel pripremati dva teksta o dvojici najstareših maturanti koprivničke gimnazije. Doktor Krešimir Švarc bu uskoro navršil devedeset tri (93) lete a gospom Zvonimir Tomac je neki dan navršil devedeset sedam (97) i još je navek aktivan. Takvi ljudi zaslužuju da se o njima nekaj napiše pogotovo dok znamo kaj imaju iza sebe. Svaka čast.

Ni to ni sve. Trenutno dovršavam materijl posvečen mojem pokojnom prijatelju Braci, o kojemu sam nedavno pisal i na Coolinariki, a radni je naslov “Život jednog benda”. Slutite već o čemu bu reč v tom tekstu. Namera mi je da se ne zaborave neki koprivnički bendovi i ljudi koji su doprinesli kulturnom i zabavnom životu jednog vremena v Koprivnici. Skupil sam i fanj tekstova o mojoj pajdašiji jer mi je nekak šteta te silne godine ostaviti zaboravu. I to bi mogla biti jedna knjižica onak za našu internu intimnu upotrebu.

Kaj bu z mojim tekstovima na Coolinariki? To još za sad niko nezna.Pokušavam to uskoro saznati. Materijala ima. Dok ovih 300-tinjak tekstova pretvorite v novinarske kartice to vam zijde prek 600 stranica. Najveći mi je zapraf problem kak to skratiti, kak to pretvoriti v jednu knjigu koja bi imala jedno pregledno, prihvatljivo štivo. No o tome dok bum pred finalizacijom.

E sad sam vam ja pred malim problemom: Kaj da predložim ovaj slavljenički tjedan za papicu? Mislim si ovak: najbolje da ja napravim mali pregled kaj ja to volim papati ovih zimskih dana i doma a bome i na obedima na koje nas zovu naši prijatelji. Vi si zberite kaj vam paše.

Predjela

Bilo je svega pomalo al mi se jako dopalo na rođendan naše prijateljice Ane hladno predjelo z kojekakvim narescima a posebno friško dimljena i kuhana šunka z hrenom. Ja sam pak neki dan imal za predjelo paštetu od guščje jetre. To je delicija sama za sebe. Jedan je prijatelj donesel pak slane srdele i crne pečene masline. To vam je fakat jako žedno. A baš jučer je Đuro spekla lepinjice i dodala naše suhe kobase.

Juhe

Tu baš zmišljam kaj bum skuhal. Zapraf samo improviziram jer mi se po ovom vremenu baš i nejde do mesnice i dučana. Kroz zadnjih par dana sam imal: dvaput bistru od kokošetine i junetine, pa onda koprovu z rižinim rezancima, sledila je paradajzova z noklecima, za Jana kobasičja z vrhnjem i rezancima a danas bu verojatno krem od mešanoga povrća z malim dodatkom mladoga graham.

Glavna jela

I tu sam impriviziral. Dvaput je bila piletina, jemput dinstana na češnjaku z rezencima a drugi put pohana z rižom. Kuhal sam hladnetinu v ogromnom loncu ali sam ju podelil i prijateljima i deci i vele da su retko kad jeli takvu finu hladnetinu. Za Jana budu baš danas špekfileki z dosta parmezana a za Đuru njezin tradicionalni francusku krumpir. Imam još falačec divljači pa bu to jedan dan na saft ze zemerklnedlima. Imam i jednog friško dimljenoga bunceka z kojim bum napravil restani krumpir ili samo krumpir šalatu.Jedan dan bu i riba i to najverojatnije v petek dok k nama dolazi Jan na obed. Fala bogu kaj dečec voli jesti sve kak i  normalni odrasli muškarci osim kaj ne pije alkohol. Barem dok mi vidimo. Morti bum napravil još nekaj od kiseloga zelja i kakav čušpajz suhim mesom.

A desert?

E tu vam bu svega pomalo. Onaj dan dok buju fileki baka je odlučila speči krafle makar još ni fašnik. Dobili smo jučer friškoga sira pa sledi pita sirom na Đurin način a po mojoj želji bu i kuruzna zlevanjka z puno vrhnja i pekmeza. A dok nam nekaj sfali odemo do podruma i zberemo nekakvoga kompota ili soka. Nebu falelo tu i tam kakvoga laganoga gemišta. 

I tak dragi moji iz dana v dan v nove radne pobede i lagano idemo prema novim tekstovima na Vašoj i mojoj Coolinariki. Nek potraje makar još tolko.

Veliki pozdrav i znanim i neznanim Coolinaričarima

Vaš Ivan944