A kaj da danas kuham? (285)

Jesenski darovi prirode

Pred dva tjedna sem se malo raznježil dok sam pisal o našemu Franu Galoviću al mi se čini da sam v tom raspoloženju još navek. Posebno zato kaj me iznenadila kiša i zahlađenje pa sem se povlekel v toplinu moje radne sobe. Rado bi poveroval Vakuli da bu pak došlo do zatoplenja pa bum pak mogel vloviti par lepih jesenskih dana i završiti one radove koje već letima delam v to vreme kak goričar. Verujte da je lepa jesen ugodneša za goričke posle nego je to v srpnju dok je fakat prevruče.

Svojedobno sam i na mojem blogu pisal na temu jesenskih darova prirode i bogatstvu prirode oko nas. Jedan moj pokojni prijatelj je znal reći:”V jesen se piceki broje”, kaj će reči da sad vidimo rezultate svojega celogodišnjega posla. Gorice smo pobrali, mošt lepo vri i već je pri kraju, pa oni kaj uživaju v mladom vinu dolaze na svoje. Ja ne spadam v zaljubljenike i poklonike mošta. Na Martinje se mora probati mlado vino ali tek pri prvom pretoku bum ga zapraf koštal i ocenil kakvu kvalitetu imam od ove berbe. No nije samo mošt na ponudi v jesen. V ovo vreme je priroda jako široke ruke. Čujem da je po šumi jako puno berača kostanja, kaj za sebe kaj za prodati. Navodno je cena još navek 20 kuna po kili kaj more biti pristojna dopuna kućnoga buđeta. Posebno ak ste penzić pa morete nabrati časkom par kil te jesenske delicije. A pravi gastronomi znaju kaj se sve more napraviti od kostanja. Bome i slane al posebno slatke delicije. Kak morem prečitati na sve se strane delaju kostanjijade i oko vatre se okupljaju kojekava velka društva. Od navek su događaji oko vatre bili poseban ugođaj i za decu i za odrasle. Moja je klapa već treći put upriličila pečenje kostanji naravno posle pristojnoga obeda. Ja si odvrnem želju z pet-šest kostanji al vam moram malo potračati neke naše žene. Em ga moreju fest pojesti em ga očiste i još odnesu doma za decu i vnuke.  Oni pak kaj obožavaju gljive su već fanj vremena v akciji. No za to morate imati i strpljenja i znanja. Nemrete pobrati baš svaku gljivu koju najdete. Kak laik v tom poslu nisam došel dalje od vrganja i sunčanice a pravi znalci tvrdiju da ima puno boljih i kvalitetneših gljiva od vrganja. Jemput sam pri prijatelju Davoru videl da se suše nekave crne gljive koje se zoveju trubači iliti mrtvačke glave. Ufrastil sam se od pomisli da tak nekaj probam al me je uveril da je to puno kvalitetneša gljiva od mojih vrganji. Sad mu i verujem. Dobil sam prošlo leto od dece mlevene trubače i da znate da odlično pašu kak začin za kojekakve saftove. Uživam i v pohanim sunčanicama. Svojedobno me je jen prijatelj testiral z „nekavim pohanim šniclima“.  Po okusu to je meni bil pohani šaran, pohana teletina i morti još nekaj al ne i nekakva gljiva. Nisam mogel verovati da bi to mogla biti sunčanica. Uživam i v kiselim kljukačima. Jen prijatelj je bil stručnjak za kisele kljukače. Navek je v njih del i jednoga feferona kaj im je dalo jedan posebno pikantan okus. Baka je pak delala odličnu kiselu juhu od onih prsteki i grmovači. Gljive su fakat dobra zamena za meso samo ak nisu ovi kupljeni „umjetni šampinjoni“. Već ih letima ne pripremam jer su mi „bez boje, okusa i mirisa“ i nikakav ih začin nemre spasiti. Ove pak jeseni se priroda ni pokazala baš darežljiva dok su v pitanju orehi. Napala ih je nekakva čudna boleština a navodno je tak i širom Lepe Naše. I kaj sad? Kuharice su od navek govorile:“ Bez orehi, jajci i čokolade nemreš speći poštenoga kolača“. Zamena za orehe moreju poslužiti i bademi i lešnjaki. Doduše fest su skupi pa buju kreativne domaćice morale zmišljati jeftineše al još navek dobre kolače. Naše Podravke su se navek dobro snalazile i v takvim pomalo kriznim jesenima. Moram vam se malo požaliti na kvalitetu mojega domaćega voća. Već sam  nekaj napisal kak su mi jabuke pristojno rodile al su većinom jako sitne i moreju biti uglavno za kolač ili ocet. Ove pak kaj smo spremili v podrum za svakodnevnu konzumaciju se strašno brzo kvare. Mislim da ih bumo ovo leto puno brže nosili z podruma v kantu za zeleni otpad. Srećom kaj smo napravili dost kojekakvih kompoti.

A kaj je z divljači? To navek dobro dojde v jesensko-zimskim mesecima samo naravno ako ju imaš. Znam da su podravske šume pune svakakve divljači al imam jedan problem. Šogor mi zbog zdravstvenih razloga nejde više v lov. Ipak se  nadam  da bu nekakva lovačka dobra duša imala razumevanja za moju ljubav prema divljačkim delicijama. 

Pondelek

Juha: jedna Podravkina z vrečice
Glavno jelo: Špagete ala francuski krumpir
Desert: Malo domaćega voća

Tork

Juha: Krem juha od kostanji i gljiva
Glavno jelo: Svinjska lopatica na saft z lulekima od kolko-tolko testa
Desert: Puding od vanilije

Sreda

Juha/Glavno jelo: Čušpajz od kelja suhim buncekom/rebrima
Desert: Biskvitna rolada z pekmezom

Četrtek

Pri nama bu danas malo siromašniji obed
Juha/Glavno jelo: Šalata od povrtnice z koščićnim uljem i kuhana jajca
Desert: Rolada od jučer i nekakav sokić

Petek

Juha: Krem juha od graha z rezancima
Glavno jelo: Pržene sardelice, krumpir šalata z koščićnim uljem
Desert: Nisam lud da vam posle ribe ja nekaj predlažem

Subota

Juha: Juha od ribane mrkvice
Glavno jelo: Rižoto od gljiva
Desert: Sok od jabuke

Nedela

Juha: Juha od goveđih kostiju
Glavno jelo: Ronada od svinjske vratine, pekarski krumpir, šalata od friškoga zelja
Desert: Štrukli sirom ili jabukama