Zapraf mi ni jasno zakaj ja čez ovih nekaj više od pet let na Coolinariki nisam ništ napisal o Franu Galoviću makar sam ga tu i tam prigodice znal spomenuti. Tolko je desetljećima tu kraj nas i siguran sam da zavređuje velku pažnju svih Podravci a posebno goričara našega kraja.
Naš nezaboravni Fran
Velki razlog zakaj sam postal goričar je baš Franova poezija i atmosfera koju je v tim popevkama napravil. Moj je stari imal svojedobno gorice v Draganovcu, v tzv Piskačevom iliti Cipelovom jarku, morti samo petsto metri zračne linije od Galovićebe kleti, al ih je prodal taman dok sam ja krenul na faks. V tim našim goricama baš ko klinac i nisam preveć užival i to iz čist razumljivog razloga: bile su velke, kaj će reči bilo je puno posla, a nismo imali niti klet nego smo iz usluge koristili goričke prostore pri našoj međašici Piskačini. Zapraf i ni bila prava međašica, jer je bila i dvestotinjak metri dalje od naših goric, al je v ono doba, dok ni bila klet na kleti kak danas, svaki svakoga zval međaš.
Pravu domaću klet sam počel osećati pri mojem dedi Joški na Ivanjskim bregima i pri rođaku Dragecu čije su kleti bile baš onakve, z onakvim štihom, kak je to negda opisal naš veliki Fran. Onda nas je jemput, valda v prvom razredu gimnazije, naša profesorica i razrednica Božena Loborec otpelala do Galovićeve kleti i otkrila mi njegve prelepe stihove koji me prate i do današnjega dana. Kak je ona bila velki poklonik Galovićeve poezije, bila je jako tužna jer su nekakvim čudni ljudi par dana prije zrušili njegvoga kostanja. Dopelala nas je do toga panja, brojila je godove i nafčila nas je kak se odredi starost posečenoga drveta. Naravno da nam je i odrecitirali predivnu popevku „Kostanj“ koja je za navek ostala v mojemu vuhu. Ovak vam ide početak:
Prijatel moj stari, zakaj tak šumiš?
Kesno je i noč je, zakaj vre ne spiš?...
Dok ovih dana beremo kostanje furt mi zvoniju baš ti stihovi mort ii nekaj najlepše od našega Frana. Ne sećam se kad sam ja nabavil njegvu zbirku“Z mojih bregov“ al se sećam da je od navek bila v goricama mojega kuma Fjake. Bezbroj put je poslužila mnogobrojnim recitatorima i „recitatorima“ da odrecitiraju po koju pesmicu onak kak su oni to osećali. Dobro se sećam da je Galovića vu Fjakinoj kleti svojevremeno pokušal neuspešno recitirati Tonko Maroević, naš poznati akademik, al verujte da Dalmatinec nemre savladati ovu našu kajkavštinu. Jemput je to pokušal i legendarni zagrebački glumac Drago Krča al ni njemu to ni baš uspelo. Pravoga Galovića smo osećali bezbroj put samo uz recitacije našega Koprivničanca Joške Gudića. Kak dugogodišnji kazališni čovek, Brežančan i takoreći Galovićev međaš znal je izgovoriti svaku reč baš onak kak je to Galović i zapisal. Njegov Kostanj je svaki put bil melem za vuho a onaj pak stih „Jen debeli mrave plazi s trsa na brajdaš“ z pesmice „V trsju“ me letima prati. Kak god zemete naš nas je Peterančan Fran zadužil za navek. Svako doba leta je dobilo mesta v njegvoj zbirki al baš nekak ovo jesensko vreme je pravo vreme za osetiti Galovića. Ak poznate i samo jednu njegvu pesmicu bute mam v ovim slikama jesenske prirode prepoznali Galovićevu veličinu. Berbe, prešanje, druženje uz pečenje kostanja, uživanje v moštu i bojama jeseni je odavno prepoznato i zapisano vu neponovljivoj zbirki „Z mojih bregov“. Svi oni koji već uspešno letima organiziraju v Koprivnici „Galovićeve večeri“ zaslužuju sve pohvale za stvaranje jedne lepe tradicije pisanja kajkavske poezije.
Štel bi vam od tolko prekrasnih stihova zbrati samo delove jedne prigodne pesmice baš nekak za ovo jesensko vreme. Nadam se da buju ovo razmeli i oni kaj z kajkavskim baš nisu doma.
Jesenski veter
Najempot, naglo, kak da bi kaj zrušil,
V noči se je odnekod k nam zabušil
I obišel je klet,
Ves raspotan is pet,
Zaletel se je, stal,
Kam dale? Neje znal…
………………………
Mir je v kleti,
temno sveti
Lampica. Mošt nam curi
V čeber. Kočnica skeči.
Prešpan pritišče
Grozdje i stišče.
……………….
Striček popeva,
Peč se razgreva…
Za čas nazaj nas veter zbudi.
Galović se nebu nigda više ponovil, za nas je Podravce on besmrtan i tim je više zaslužil svu pažnju nas stareših goričara. Ko zna kaj bi nam Fran još podaril da ga ni zadesila zla sudbina i zalutali metak vu strahotama Prvoga svetskoga rata.
Nek mi Fran oprosti kaj ne spominjem njegvu štokavsku poeziju i prozu al nekak mi je njegva kajkavska poezija ostala zanavek v srcu kak i svim drugim Podravcima i kajkavcima koji su bar jemput osetili kakvu staru podravsku klet i čar podravskih bregi.
Nadam se da buju i mladi naraštaji znali ceniti velkoga Frana i održavati njegvu prevrednu ostavštinu.
Ovo je pravo vreme baš za pravi jesenski jelovnik.
Pondelek
Juha/Glavno jelo: Danas samo jedna okrepljujuća gulaš juha; morete ju obogatiti z kojom gljivom
Desert: Siguran sam da imate koj komdić kolača od jučer
Tork
Juha: Juha na vodi od kuhane domaće testenine; v ovu juhu ide dost vrhnja i dobro začinite
Glavno jelo: Pileći paprikaš z testeninom; pri meni su to obično široki rezanci
Desert: Bilo koje sezonsko voće. Mi smo još na grožđu z naših goric.
Sreda
Juha: Juha od ribane mrkve i krumpira
Glavno jelo: Mesna pita i zdela šalate
Desert: Pita z jabukama
Četrtek
Juha: Krem juha od mešanih semenki
Glavno jelo: Krmenadli na češnjaku, retani krumpir, šalata
Desert: To je vredno laganoga gemišta
Petek
Juha/Glavno jelo: Pretepeni grah; morti bute deli v taj grah i nekaj mesnato al pravi pretepeni grah podnaša samo fest vrhnja
Desert: Slane pogačice sirom
Subota
Morti bu lepo vreme pa ote v prirodu.
Predjelo: Onak kak i navek v prirodi od svega pomalo
Glavno jelo: Napravite mešani roštilj ili kotlovinu
Desert: Spečite dve-tri ponjgve kostanja i zalejte z reskim moštom. Znate onu jesenskuizreku: „Kostanjk pucanec i mošt rezanec!“
Nedela
Juha: Juha od racinog sitniša
Glavno jelo: Pečena raca z kostanjima, nekakva šalata
Desert: Rolada od kostanja; nije loš ni kostanj-pire šlagom
:(Još nema komentara