Prošćenje, proštenje, kirbaj, kirvaj, god iliti fjera, kak vam srcu drago. Sve vam dojde na istu samo kaj to naši ljudi širom Lepe Naše drukče zovu. Glavno da se ljudi skupe, slave nekojega sveca i lepo se zabave.
Velika lipanjska prošćenja v koprivničkoj Podravini
Čini mi se da su prošćenja pak v modi. Pred par let sam nekaj napisal o prošćenjima v Lepoj Našoj al mi se čini da i naš kraj obiluje z prošćenjima tokom leta a baš v lipnju imamo v našoj koprivničkoj Podravini tri velka prošćenja vredna spomena. Morti sam nekaj zaboravil al mi bute oprostili. Evo ovak.
Prvo je pred nama Antunovo 13. lipnja. Dok ovo čitate baš je sv Antun, zaštitnik putnika. Meni je svojevremeno jedna draga gospođa poklonila lančić i privjesak z likom sv Antuna kojega sam još kak student zgubil v jednoj podstanarskoj sobi.Malo je nezgodno kaj je ovo leto v pondelek al to nemre smesti vernike da to proslave kak bog zapoveda. Prvo moje sećanje na Antunovo je ono pred našom fratarsko cirkvom na koje me je pelala moja baka Jela. V doba mojega detinjstva to se prošćenje odvijalo pred fratarskom cirkvom v Koprivnici, na ledinici prek puta Gradskog muzeja i ispred poznatekoprivničke zgrade Malančec. Nije to bilo nekaj preveliko al za mene jako interesantno. Sećam se da sam dobil od bake licitarskoga konjeka, a počastila me i z čašom Špičkovoga gverca. Kak su Špičkovi zadržali tradiciju licitarstva i do dandanas bilo bi lepo proveriti jer je i gverc još navek onak fini. Sećam se i obavezne limene glazbe koja je za mene v to vreme bila veća od bilokakve filharmonije. Imal sam žarku želju svirati nekakav limeni instrument al mi se to nažalost nigda ni ispunilo.
Na Antunovo sam svojedobno hodal v Golu k prijatelju Francu a kak je on sad Koprivničanec nakon par let se vraćam na Antunovo na poziv prijatelja Ivine. Golčani su ovo leto prehitili prošćenje na nedelu dvanajstoga lipnja jer imaju razlog da spoje z još jednim važnim datumom za Golu al sam, moram priznati, zaboravil o čemu se dela. O tome kak je to uspelo bum vam napisal nekaj drugi tjedan.
Drugi velki svetek je Ivanje 24. lipnja. To je od navek velko prošćenje v Koprivničkom Ivancu, rodnom selu moje mame, al moram priznati da već letima nisam tome prisustvoval. Deda, baka i vujci su odavno pomrli a z ostalom rodbinom baš i nemam nekakve bliske veze. Morti se ovo leto zaletim da se barem podsetim kak to danas zgleda. Ivanje je velki svetek i v Gotalovu, susedno selo kraj Gole, a obično ga slave prvu nedelu nakon 24. lipnja. To znači da Gotalovčani ovo leto Ivanje slave 26. lipnja. Kak to tam zgleda to vam nemrem reći jer tam nemam baš tak nekoga bliskoga koj bi me pozval.
Treći velki svetek je Petrovo i Pavlovo 29. lipnja. I sad glečte toga paradoksa. Na prošćenje, ili kaj bi naši prijatelji Slavonci i Baranjci rekli kirbaj, sam prije rata hodal čak nekolko put baš v Baranju gde imamo velke prijatelje Željka i Stipu, a tu pod nosom v Peterancu nisam još nigda otišel. Malo mi je neugodno al je čista istina. Morti to ispravim već ovo leto. To je svega pet-šest kilometri od Koprivnice i mogla bi biti jedna lepa lagana šetnja. A
kaj morete lepoga doživeti na prošćenju? Puno toga. Od klasične ponude pod licitarskim šatorima kak su konjeki, srčeka, medenjaki i gverc pa do roštilja i kotlovine. Imal sam čuti da bum ovo leto V Goli imal prilike prizalogajiti čak i dravsku ribu na kotlovini. To mi je od navek bilo nekaj posebno. A morete zamisliti sve one drangulije pod šatorima: narukvice, prsteni, ogrlice pa do kojekavih fučki, šaltvi i balona. A naravno da svaka familija ima i goste. Negde je to stvar prestiža: bolja ste familija i veći gazda ak imate više gostiju. Sastala se bu familija, prijatelji i kumovi pa pričama i blagovanju nigda kraja.
Ak imate prilike, i naravno ak vas pozovu, najte to prepustite: prihvatite poziv i pogostite se.
Z jelovnikom v ovo vreme svetki i obilja na placu imam slatke brige. Još sam osim toga ovih dana prečital knjigu “Istina i laži o hrani” pa sam malo v procepu između mojih želja i nekakve preporučene prehrane z te knjige. Bum vam o tome nelaj malo napisal kojom drugom prilikom.
Pondelek
Mislim da bu nama doma pasalo ovak nekaj:
Glavno jelo: Bogata šalata od ostanjki mesa (imate sigurno komadić mesa odjučerašnjeg obeda) zmešano z zelenom šalatom, paradajzom i paprikom. Ustvari ta šalata je stvar vaše mašte. Dodajte kaj vam tu paše.
Desert: Ako ima nekaj od jučer dobro ak ne onda bu dobra i zdena voda ili kakav sokić.
Tork
Juha: Kisela juha od pilećih želuci
Glavno jelo: Filane tikvice v bešamelu
Desert: Jagode kak ih je priroda dala; Đuro bere već danima one mirišljave šumske.
Sreda
Juha: Prežgana juha
Glavno jelo: Jetrica na naglo z puno češnjaka, hajdinska kaša, mešana šalata
Desert: Štrukli z trešnjama
Četrtek
Juha/Glavno jelo: Đuveč; po glavi ukučana jedan krmenadl na naglo
Desert: Kifli z pekmezom
Petek
Juha/Glavno jelo: Bogata riblja juha ala fiš
Desert: Zapečene palačinke i naravno jedan pol-pol
Subota
Znate već da svaku subotu jurim prema goricama.
Predjelo: Samo nekaj malo za prizalogajiti: sir z vrhnjem, malo špeka i jegera, mladi luk
Glavno jelo: Ovo je po želji moje gospođe: Piceki na ražnju i bogati prilogi: Napisal sam piceki jer neznam kolko nas bu na tom obedu.
Desert: To već i sami znate: gemišta kolko ti srce želi. Za desert me baš briga. To je Đurina briga.
Nedela
Baš sam ovih dana pri jednoj ženici v Goli kupil par domaćih piceki. Nemrem odoljeti da ne skuham nekaj od čiste friške piletine.
Juha: Anjgemahtec z noklecima
Glavno jelo: Pohana piletina, finio varivo i šalata ak vam paše
Desert: Torta z jagodama.
:(Još nema komentara