A kaj da danas kuham? (255)

Kolači naši nesvakidašnji

Ovih vuzmenih dana se stvarno, kak i  navek, preteravalo z koječim pa i z kolačima. I onda se setim da vam zapraf nisam nigda otkril svoj pravi odnos prema kolačima. Ne mislim samo v smislu pečenja nego i konzumiranja.

Naravno da sam kak klinac obožaval kolače  iz jednog jedinog razloga: retko su se pekli. Dok se se pak pekli bili su to domaći kolači kakve danas mlade gazdarice retko pečeju. Moram doduše priznati da sve više prepoznajem trend v medijima: tak su pekle naše bake. Gledam neki dan na VTV-u emisiju koja je cela posvećena kolačima naših baka i mama. I to me fakat potsetilo na sve ono kaj sam negda jel za svetke i v nedelu. To će reći da su kak desert prevladavali kojekakvi diganci, štrukli, zlevanjke, slanci, pogače i pogačice. Ponuda je bila nekaj bogateša za Vuzem i Božić ili pak za svate. Moji su favoriti bili vanilkifli i svojedobno pita od sira. Baka je imala navek friškoga sira  pa je to bil kolač koj se na velko pekel baš za svate ili pak kod mlatidbe žita. Neznam kaj se dogodilo al najemput sam prestal jesti tu pitu i mislim da ju nisam okusil barem deset let. Ima još jedna pita za kojom nisam baš lud: pita z jabukama. I to iz dva razloga. Negda je bila kak desert v Studentskom centru i ni sličila na nikaj. Fila od jabuki je zgledala kaj da si ju nacrtal z dobro zašiljenom olovkom. Suha kaj barut.  V američkim pak filmovima i serijama zgleda da nema nikakvih drugih kolači osim pite z jabukama. Ona njihova čuvena “apple pie” mi već ide na vuha van. Uostalom kaj morete od Amerikanci i očekivati v gastronomskom smislu. Od srednje škole, nekak se poklopilo z mojim početkom bavljenja muzikom, skoro sam čisto prestal jesti kolače ili tek tu i tam. Sve si mislim da to ima nekakve veze z noćnim životom i davanjem prednosti nekim tekućim namirnicama. Utuvil sam si v glavu da kolači i gemišt nejdu nikak skupa. Nisam naravno jedini kaj tak misli jer i dandanas vidim muškarce v našoj klapi kaj na našim feštama uglavnom izbegavaju kolače, naročito one jako kremaste.  Kolače sam ponovno otkril kak nekaj fino dok su kumova deca, Marija i Vilko, bili klinci pa im je baka Lela za rođendan pekla kojekakve fine kolače. Zemete samo radi dece kolačić-dva, onda vam se dopadne pa zemete još kojega. Osim toga sam otkril da se posle onih kolača z puno orehi more itekak popiti gemišt. Tak je krenulo i nekak se ta navika zadržala i do danas. Sad mi želje ispunjava Đuro i teško se more dogoditi da se v tjednu barem dvaput ne peču kolači. Speče v nedelu malo više pa imamo i deca i mi za dva dana. Onda se v sredu stvar ponovi. Doduše malo sun am mogućnosti sužene jer se baš svi kolači nemreju speći od bezglutenskog brašna. Z druge pak strane kod nekih in ne primetimo razliku između tih i “normalnih” kolača.

Poznam neke mlade ljude koji nam se tu i tam pridruže za neke svetke koji imaju malo čudne navike. Tak sam jednoga mlađeg čoveka svojedobno videl da je počel jesti kolače prije nego je na stol došlo i predjelo. Probam ga upozoriti na sve kaj je na jelovniku a on mi onak hladnokrvno odgovori: “Bez brige. Imam je mesta i za kobase i špek, roštilj jako volim a posle se bum pak vrnul na kolače!” Ak mu paše nek jede kak ga volja.

Z jednim sam pak prijateljem često putoval službeno i naravno da smo jeli po kojekakvim hotelima i restoranima. Posle svakoga obilnoga obeda sledil je i nekakav fini kolač za desert. Taj bi prijatelj onda pozval konobara i rekel:”Znate ovaj vam je kolač odličan. Prelepo zgleda. Mogu vas zamoliti da mi ga zamenite za jedno zdeno pivo!”

Jas am pak imal duže vreme jednu “čudnu” naviku. Dok bi došel doma malo vessel, zbudim se oko četri-pet v jutro i samo mi je jedna stvar napameti: dojti kaj prije do kuhinje zeti nekolko napolitanki i zalejati ih z mlekom z frižidera. Nije bila loša ni kombinacija napolitanke i jogurt. jedna se dama jemput zgrozila nad tom kombinaciojom.

I kaj  da velim za kraj ovoga razmišljanja o kolačima. Jedem skoro sve al ima nekih koji nesmeju biti ni blizu mojega tanjurića. To su: svi kolači z kokosom i ananasom, pita sirom i štrukli z gnjecavim, debelim mlincima kak su štrukli z trešnjama ili višnjama. Verujte da takve štrukle nisam još nikad ni probal jesti. Neki sam dan na Srca televiziji pak videl nekaj “prestrašno”. Delal je jen mladi kuhar štrukle z tikvom i makom, kaj su moji najbolši štrukli. I sve je lepo zgledano dok nije zaribal stvar na kraju. On vam je v onu smesu maka, tikve i cukora počel ribati koricu limuna. Za mene je to bilo čisto svetogrđe. Gde se taj vučil peći štrukle?

V ovoj životnoj dobi mi kolači jednostavno fale. Posle popodnevnog odmora prvo se zapičim v one Đurine posude za kolače i zemem svoju dnevnu porciju slatkoga. Vele da su strari sve sličneši deci. Imai  tu nekaj istine.

Verujte da mi je posle velkih svetki baš teško delati jelovnik. Ništ si posebno ne poželim.

Pondelek

Juha/Glavno jelo/Desert: Samo ostanjki
Pogledajte samo na vuzmeni jelovnik. Kak da čovek kuha kad ima ostanjki za par dana. Nekaj smo podelili al je još ostalo za Đuru i mene.

Tork

Juha/Glavno jelo: Samo nekaj na žlicu. Mislim da bum složil kiselu juhu od janjećeg pajšleca. To bu baš pasalo.
Desert: Bez brige budite. Ima još kolača a našlo se bu i malo nekakvoga soka.

Sreda

Juha: Prežgana juha z krutonima
Glavno jelo: Dinstana janjeća jetrica, kuruzni žganci. Naravno da bum skoristil jetrica od vuzmenog janjeta.
Desert: Voćna šalata

Četrtek

Juha/”Glavno jelo: Fileki; to si je zaželel naš vnuk Jan samo nije siguran na koj način: špekfileke ili na moj način ala “teleća glava u škembetu”? Verojatno bu ovo drugo jer to čak i Đuro jede.
Desert: Kuruzna zlevanjka z puno pekmeza i vrhnja

Petek

Juha: Kobasičja juha
Glavno jelo: Zapečeni grah z kobasama (ala grahče na tavče), šalata od kiselog zelja
Desert: Ja bum žedan a Đuro bu popila soka.

Subota

Danas bu po mojoj želji jako skromno
Juha/Glavno jelo: Šalata od povrtnice z kuhanim jajcima i naravno z koščićnim uljem
Desert: Zasladil si bum z kompotom od breskvi ili kruški

Nedela

Juha: Juha od pileće sitnine i purećih vratova z leberknedlima i rezancima; kuhane vratove bumo malo zamezili z hrenom kak toplo predjelo
Glavno jelo: Filani picek i domaći rezanci na onoj finoj masti od pečenja, zelena šalata
Desert: Veli Đuro da bu složila nekaj od lisnatoga