Sad mi je stvarno dosta tih pripovetki o štetnosti svinjske mašće. Svi svetski farmaceuti i njihovi "poslovni partneri" doktori se već desetljećima probaju dogovoriti jel svinjska domaća mast štetna ili zdrava. Nekad im paše ovak a nekad onak. Se sećate kak nas letima plaše z kravljim ludilom, svinjskom gripom, ptičjom gripom ili sličnim zvizdarijama, samo da bi ljude naterali na trošenje nekakvog leka? A po njima domaću mašću nesmemo ni pogledati. Sećam se da je još davno prije rata jedno američko istraživanje došlo do zaključka kak je domaća svinjska mast jako zdrava. Nažalost su oni kaj reklamiraju ulje i margarina bili glasneši.
Navalite ljudi na domaću mast
Već zadnjih par let v mojoj kuhinji se kuha na masti. Tu i tam trošim onoga omegola, maslinovo ulje za lešade i ribe a sve ostalo kuham na dobroj domaćoj svinjskoj mašći. Da dobro delam potvrdili su mi ovih dana neki članki, koje sam našel na internetu, a govore v prilog zdravim namirnicama kak su mast i domaći puter. Popljuvali su margarin i kojekakva jeftina punoput prerađena biljna ulja. I sad se ja lepo pitam: Kak smo mi svi Podravci i Slavonci preživeli ona "strašna leta" dok smo sve živo delali na masti pa čak su neke familije i šalatu začinjale z mašćom. Žutoga ulja baš ni bilo a ono domaće koščićno se ili delalo doma ili su ga tržili v dučanu na one plehnate merice. Nažalost kvalitetno koščićno ulje je danas dostiglo cenu kak i ono devičansko maslinovo. Nikad nisam doznal zakaj "devičansko" al je očito da je na dobroj ceni.
Imati dost mašće pri hiži značilo je negda jako puno za familiju. Ak si imal masti mogel si na njoj speči zafriga i napraviti kojekakve juhe, na njoj si spekel krumpir v rolu, grah na luku, prepekel domaće testo i puno toga kaj je i dandanas fino. Probajte nekom od moji pajdaša reći da bute spekli jajce na ulju. Mrtav si čovek. Jajca na masti ili nikak. Najbolji kuruzni žganci na svetu se delaju na masti, pogotovo ak je to ona mast z drobnim čvarkima. I još k tome dodate žlicu-dve vrhnja. Nekaj od klope! Probajte v Podravini napraviti nekakav čušpajz bez zafriga na masti. Nebu išlo. Morate sve to podmazati z mašćom kaj vam nebi pod zubima škripalo, kak bi rekel moj prijatelj Hus. Ako pak dinstate bilokakvo meso, recimo bočing na masti i češnjaku, denite to nekam na zdeno i za večeru vam bu ostala fina želatina i tanki sloj masti. To onda namažete na kruh i napravite šalatu od luka z koščićnim uljem. Delikatesa. Dok još ni bilo škrinji, meso smo sušili ili pak zalevali v mast. Međimurci delaju kosanu mast z tiblice, svaka im čast, a mi Podravci smo zalevali v lodricu pečene komade mesa ili kobase. Za zaposlene ukućane jako praktično a k tome i fino. Imate puno posla, ne stignete skuhati ništ na brzinu al morete začas zvaditi komad mesa ili kakvu kobasu z masti, i uz hrpu zelene šalate ili paradajza imate usred leta odličan obed. Deca su pak uživala v kruhu i masti. Najčešće je to bil kruh i mast z malo luka ili češnjaka, sve posipano z malo crvene paprike. Standardna klopica na koju bi se današnja deca zgrozila. Ili čujte ovo: kruh i mast posipano z cukorom. Moram priznati da se na to danas i ja zgrozim. V ono vreme mi je to bilo jako fino.
Sve u svemu mislim da je došlo vreme za povratak domaće mašće. Pak se buju domaćice spominjale za vreme kolinja: "Čuj kolko si dobila litri masti i pari kobasi" Samo primerena količina masti i kobasi je bil znak uspešnih kolina od pravih hranjenika. Uostalom kaj bi naši Slavonci rekli da se moraju odreći kobasi, kulena, čvarki i naravno domaće masti. Nisam baš čul da im je to nekad, kak ni danas, smetalo za zdravlje.
Imamo pri nama v društvu jednog doktora internistu kaj voli dobro papati, sklon je kojekakvim "porokima", pa ga znamo od vremena do vremena spitavati nekakve "važne stvari" dok nam treba zmeriti tlaka:"Čuj Mladen rekel mi je doktor da ne smem jesti to i to. Prepisal mi je ovaj lek. Kaj da delam?" Obično nam odgovori:"Znaš kaj. Najprije dobro prečitaj sve kontraindikacije i nuspojave. Onda buš videl da je najbolje taj lek mam hititi v koš!" Mislim da on ima praf. Desetljećima su nam trubili da je normalan tlak onaj godine plus sto. I sve je bilo normalno. Danas pak nesmeš prejti 125-130 jer si mam tlakaš i moraš redovito piti tablete do kraja života i moraš se odreći koječega pa čak i svinjske mašće.
Kak bilo da bilo ostajem na masti a moj Ivina z Gole bu se pobrinul svako leto za pravoga pajceka, onak oko 180 kil kak i prošle jeseni. Želim vam dobar tek.
Pondelek
Juha: Kren juha od kelja i friškoga zelja, dodajte jedan kuhani krumpir kaj dobite gustinu.
Glavno jelo: Pohani mesni narezak ili nekaj slično, pire, šalata
Desert: Siguran sam da imate komadić kolača od jučer
Tork
Juha: Podravkina Svatovska
Glavno jelo: Kajgana na mašći; ja bum najprije prepekel sitno narezanoga špeka, malo luka i zalejal z jajcima. Uz to navek ide zdela nekakve šalate.
Desert: To je jaka hrana. Išće nekaj konkretno za popiti.
Sreda
Juha/Glavno jelo:Musaka od krumpira, turšija. Ak vam ne paše krumpir skombinirajte musaku z nečim drugim.
Desert: Bilokakvi domaći sok
Četrtek
Juha/Glavno jelo: Slepi gulaš; ja ga bum ipak malo pojačal z kakvim falačecom kobase i dobro začinil
Desert: Mislim da buju palačinke z pekmezom od marelice
Petek
Juha: Krem juha od graha z kašicom
Glavno jelo: Pečenice/kranjske z pečenim grahom na svinjskoj masti, kiseli krastavci
Desert: Pogodili ste: gemišt!
Subota
Predjelo: Tostani kruh namazan z mašćom od pečenja, posipan z češnjakom i crvenom paprikom
Glavno jelo: Špagete karbonara; na masti naravno.
Desert: Ha čujte. Subota je. Delajte kaj oćete!
Nedela
Ovo bu čisti težački močni obed. Nisam siguran da bu odgovaral ljudima nježnijeg želučeka. To je onak obed više za šumske radnike.
Aperitiv: Štamprl domaće rakijice
Juha: Kisela juha od svinjskih iznutrica (jezik, srce, nogice)
Glavno jelo: Seljački zimski obed: domače kuhane kobase, suhi kuhani buncek, lepi šareni kuhani špek, dinstano kiselo zelje, kuhani krumpir v gulini. (K vragu i giht!)
Desert: Štrukli sirom; znam da bute trebali i primerenu količinu gemišta od malo kiselešega vina jer on pospeši probavu. Za taj obed vam od srca želim dobar tek!
:(Još nema komentara