ღ Beseda ,kot lipa rožica

Dok traje ovaj grdi šijun od  vrimena , nemore se baš puno okolo kampanat z kući .

Pa, neš si mislim ,morda i preveć  mislim ,da fali mi...  sih ovih dani ,  miseci  , let ...fali mi …

a ča mi fali?

Lipe rožice ?Ne, zima je .

Njih  je magar na slikama vavik.

Se se obraćen i gjedan okolo ,  ma  niš  mi ne fali.

Tješin  ja samu sebe .🙂

Ma i opet ni to to,  jušto nečega ni…

Pak se i v noći obrnjujen  po postiji ,ma ča fali???

I tako va neku sitnu noćnu uru, domislin se ...

Beseda. Beseda fali. 

Ona lipa beseda domaća ,eko ča je.

E ta beseda , ka je kot lipa rožica ku  treba njegovat od malena , aš potli lahko zgubi se i ni je , neanke depašajo.

Otkako  je otac partil,ko da su va kuće i domaće  besede partile z njin.🙁

Ni on  bil da se razumimo ,od velih besed ma, jušto smo se lipo znali po domaću malo ganat .

Beseda  bi nan po užanci  počela  pozdravon.

Va moje  vrime  ,učili su nas  da  je grdo  pasat pul čovika, i ne pozdravit ga.

I tako , naojemput  vrnjuju mi se sjećanja iz djetinjstva, leta pasana pul  babe i deda . 

Sjećanja na  ljudi  zi  mesta  ,ki bi usput  vavik  pozdravljali ,ni to moralo bit jušto" dobar dan "leh i

Ala, ča gremo? rekal bi  jedan , ...A gremo, gremo, mora se, odgovaral bi drugi.

Ili ko bi bilo grdo vrime ko ovih dani   i dažjilo bi ....Ava mene  ča dažji, ne more se niš delat....
Dažji!?!  A ča ćemo? Moramo zet ča pride.

"zet ča pride“  značilo bi  prit doma mokar , neč pojist ča je parićano  i gljedat u nebo ako će se razvedrit, da bi se potle magari jenu uru šlo čagod  udelat. 

Kuća  nan ni bila na putu , već nekako sred srede ,  mej drugimi kućami, kako to već užaju bit  zbijene primorske kućice jena mej drugu , pa i opet, je k nan saki dolazil  i vrata su sjećan se bila šempre bila odtprta . 

Baba je vavik malinac  i kogumu za kafe imela parićane  ,magari i  za ono šćeto kafe,  ko kuhalo se onako na kapići,to je bilo  falšo kafe od bruštulanoga žita i od cikorije.Kafe siromaško .

Dan po dan ,malo pomalo,  sused po sused , kafe na kafe,  pasivalo je vrime ,i saki  ki bi prišal   bi hitil ku  besedu ka je bila jušto  kako  Dobar dan.

ki put i bi to parilo  ovako 

Ala, je obed? 

A kuha se kuha, odgovorila bi  baba.

Ma, ča lipo vonja, vero nič dobroga kuhate
Maneštru, a je i malo prašćevine nutri ,ili drugi put , broskvu tučenu  s kumpirom  ,odgovarala  bi  sva  kuntenta .

A  danaska  mislin si da  bi se reklo: Ča te briga,tendi svoje delo.

Kada  je  bil štajun od kakovog  važnega dela   drva se siklo,ili  se kopalo,ili smokve pobirale, pa ovce spravjale, i  grozje trgalo,  ulike pobiralo…, on ki je tuda pasival bi pozdravil: Bog daj sriću!
Bog daj  bi se odgovorilo.

To je bilo lipo vrime ,  uz dobru volju mej susedi,  rodon, kumpari ,  furešti i domaći ljudi,  beseda je kot lipa rožica vavik  našla mesto.

A danaska?

Ljudi pasivaju jeni kraj  drugih, kako kraj  groblja,bez besed. Danaska su mobiteli , kompjuteri , društvene mreže mesta , kadi se hiti ka  beseda  , a i to leh on put kad rabi, i nedaj bože svakom  ,aš je i to postalo  teško  aš  ... majko božja a ča će  onaj drugi reć ili pomislit da  san besedu pušćal pul ovega , a i  opet kada ton iston  jušto nekako  pofali tepline, promrmori ili pusti glas.

 Pa se domislih i  jednog  stiha kog se rado spomenen  i danaska 

„Ne osvrći se na kletve
što ih govore mornari,

Gospo,

To je čeljad bez odgoja

ali dobra srca.
Kad šijuni kidaju jedra
svaki stiska škapular na mršava rebra."

Anton Bonifačić (1901. – 1986.) 

 To van je   tako, a besada meni je  je kot lipa rožica  i ja je duperan vavik  .Njegujte je ,  ne držite  te je samo za se, pustite je kad di god naći će već plodno tlo kadi se najmanje nadate i virujte neće vam kapja past ni niš loše dogodit se :)))

Dotle, ča se more se ,

dok traje  ovi šijun od vrimena  , dok  ova bura puše ,i dok mi  oganj va šparhetu  veselo plansa , leh da i ja  hitin besedu...

Ste mi ča, i  ča kuhate?