I to je iza nas. Več dugo ne pamtim da je bilo tolko kojekakvih napisa o onome kaj se bu događalo za prošli Praznik rada. Tradicija je svakak ono kaj se mora poštivati ali vele ljudi da se neki tradicionalni događaji moreju i prekinuti. Kak ste mogli i prečitati, v Zagrebu ni bilo povorke a bome i ona sirotinja na Kubi ni imala ni paradu ni dostojnu proslavu toga svetski poznatoga praznika. Večina je pak naroda to obilježila kak i navek na svoj način manje ili više standardno, verni tradiciji. I naša je klapa ostala verna tradiciji.
Kak je bilo v Draganovcu?
Niko nezna točno kad se je to počelo obilježavati v Draganovcu, v Mirnom dolu, al ova klapa to nekak obilježava več više od pol stolječa. Ni to baš malo. Nekak mi se čini da bi napravili velku nepravdu našim dragim pajdašima koji više nisu z nama a letima su na svojim plečima nosili organizaciju okupljanja i pripremu bogatoga stola na taj dan. Popili smo, kak je i red, jednu za pokoj duše.
Kak i navek: nije nam trebalo puno vremena da se dogovorimo, da se podele zaduženja i verujte da se tu najde svega obilja. Moram se malo i “požaliti”. Nekak je najlakše pripremati onaj “mesnati i tekuči dio” ponude za kaj su zaduženu muški. Za predjelo i desert je zadužen ženski dio klape i tu je bila baš jako bogata ponuda. Mogli bi otprti i malu pekaru i slastičarnu. Al nebum zbog toga kukal. Tak je od navek bilo i kamoli sreče da se to sve ponovi k letu. Imali smo i sreče da nam vreme bu baš jako naklonjeno. Mogli smo sedeti pod brajdom, doduše još ni prolistala, bilo nam je v jednom času i prevruče pa smo odlučili blagovati v hladu moje kleti. Na kraju smo se vudrili i na kipec kak morete videti na ovoj doljnjoj sliki.
Pri nama se nemre reči da nemamo dost zastupljenih žena.
Kakav je bil jelovnik napisal sam vam još prošli tjedan. Nije tu bilo nekakvoga iznenađenja osim kaj je bilo baš svega po svačijem izboru. Moj bi pokojni međaš Stipe rekel:”Ajme ljudi moji da je gladnih!”
Sve v svemu od navek smo mi v Draganovcu više bili naklonjeni ovome goričkome okupljanju nego negde gde se okupi velka masa ljudi. Ovak smo si nekak bliži, moremo delati v podkomisijama i po ko zna koj put pretepsti događaje z maše mladosti po onoj:”Se ti sečaš dok smo sedamdeset i treče išli...?” Kak se nebi sečal. Nekaj me je posebno iznenadilo. Osim pri mojem međašu Vilku na celom brdu nisam imal prilike čuti i osetiti praznično raspoloženje kak je to bilo negda. Ljudi su bili na produženom vikendu ili su se spustili v grad na novo otprti glavni koprivnički trg i naš prelepi park. Gradski su se oci potrudili da bu puno kojekakvoga programa čez celi vikend.
Grah kak delicija
Malo sam pregledal po internetu kaj se sve događalo diljem Lepe Naše i naravno da sam najčešče videl na jelovniku nezaobilazni grah. Nisam videl ništ novoga i nekak mi je drago kaj je ta namirnica stekla taj status među tolko “svetskih delicija”. Negda davno se jednoj skromnoj familiji v mojem kvartu rugalo z jednom ovakvom rečenicom:”Od nedele do nedele grah, vu nedelu žganci”. V sečanje na tu familju bum zapisal nekolko rečenica o grahu. Svojedobno sam imal pajdaša Matu koj je stanoval pri mojim starcima i koj je obožaval grah čušpajz. V petek naravno. Onda je jednog dana mama, v dobroj nameri, skuhala čist nekaj drugo da malo promeni standardni jelovnik. Moj je dragi pajdaš pogledal v tanjur, zel zalogaj-dva, zapalil cigaretu i otišel na popodnevni odmor. Mama više ni ponovila tu grešku. Slavo je pak imal jednu “čudnu” naviku. Idemo doma jako rano, tam negde iza polnoči, i razmišljamo kaj kuhati. Veli on:”Znaš Ivo kaj? Dok dojdem doma zel bum dve-tri šake graha i bum ga del kuhat. Dok se grah kuha bum si vužgal cigaretu i dok prečitam današnje novine grah je gotov”. Tak se to dela.
Ja sam graha počel kuhati vu vreme dok sam bil student. V novinama sam videl recept od jednoga poznatoga muzikanta pa sam to štel sprobati za moje cimere. I da znate da mi je dobro uspel. Nesreča je bila v tome kaj se brzo među koprivničkim studentima to pročulo i saki čas se znalo dogoditi da baš nekoj od njih zaluta k nama na grah kakti slučajno. Srečom kaj ga je navek bilo dost i za nas i za “putnike namernike”. Ak ste baš znatiželjni bum vam odala “tajnu”: bil je to bogati grah čušpajz z podinstanom govedinom.
Svima je poznato da je na posebnoj ceni i na glasu tzv “vojnički grah”. To nisam ozbiljno shvačal, mislil sam da su to samo priče gladnih ljudi, dok nisam došel vu vojsku. Dojdeš na nekakvu vežbu gde ima jako puno vojske, pa vidiš kaj sve kuhari meču v taj grah. Moraš biti fakat šeprtlja da z tim materijalom zaribaš stvar. I vu vesternima su kauboji kuhali graha samo sam se navek pital kak i z čim su oni mogli skuhati dobar grah v nekakvoj preriji bez suhoga mesa i Vegete? Bil je to verojatno dost skromni i pusti grah.
Kak sam mogel videti, grah se kuhal i diljem naše Podravine pa naravno i v našoj Koprivnici. Začudil sam se kak je bil velki red naših sugrađana v našem lepom parku i to različite dobi. Kaj se imam opče čuditi: to je naprosto tradicija. Grah je delicija koju se nesme taj dan preskočiti. Mam ga bum del v svoj jelovnik ovaj tjedan jer smo ga preskočili za praznik.
Oko graha se od navek ljudi sporiju: koj je najbolši? Jel to trešnjevec, putrek, zelenčec ili pak tetovac? Mislim da bi trebalo upriličiti jedno takmičenje poznatih kuhara z različitim vrstama graha ali z istim mesnim dodatkima. Ak imamo fišijade i gulašijade zakaj nebi imali i grahijadu.Kaj mislite o tome?
Ovaj tjedan moram biti praktični Podravec.Ostanjke kruha od praznika moram uklopiti v jelovnik.Zakaj je ostalo puno kruha? Bilo je čak tri vrste klipiča, slana pogača i tri vrste kruha a Jelena se pobrinula da z roštiljom bu i lepinja. Šteta je kruha hitati a stri se kruh more fino iskoristiti.
Pondelek
Juha/Glavno jelo: Raštika/blitva ala špinat, pohani starti kruh, jajca na oko
Desert: Kompot
Tork
Juha: Krem juha od povrča z krutonima; napravil sam krutone za celi mesec
Glavno jelo: Pečeni krumpir na ploške z nekolko šniti špeka, šalata od zelja
Desert: Razmislite malo: kaj bi tu najbolje pasalo?
Sreda
Juha: Paradajzova juha z fritatama
Glavno jelo: Zapečene palačinke sirom; najte štedeti na vrhnju. Posipajte po palačinkama i malo parmezana.
Desert: Smuti od voča koje imate doma
Četrtek
Juha/Glavno jelo: Fileki na kiselo; na kraju bum uvalil konzervicu kuhanoga graha; ovo se mora dobro začiniti.
Desert: To nebu prešlo bez čaše pive
Petek
Juha: Grahova juha z noklecima
Glavno jelo: Šaran na tročanski, dinstani grah, šalata
Desert: A kaj drugo nego gemišt?
Subota
Juha: Bela juha
Glavno jelo: Mesna pita, šalata; mesto lisnatoga bum koristil domače rezance.
Desert: Nekakva vočka
Nedela
Juha: Juha od goveđih kostiju z leberknedlima
Glavno jelo: Juneči šnicli v lovačkom saftu, zemelknedli, šalata; knedli naravno od staroga kruha.
Desert: Biskvitna rolada z pekmezom
:(Još nema komentara