Morti ste primetili da ja svako malo posegnem za nekojom kuharicom od kakvih pedesetak koje imam na nekolko polica po stanu. Volim si pogledati o čemu pišu, koje namirnice predlažu za pojedina jela i kak se negda autori razijdu oko slaganja i najednostavnijih jela. Posebno mi je interesantno dok se dela o kuharicama z nacionalnim predznakom. Tak vam je neki dan najdem jednu lepo napravljenu kuharicu, velkoga formata, na finome papiru z naslovom HRVATSKA ZA STOLOM (Mirisi i okusi Hrvatske). Knjiga je objavljena 1996., kaj če reči pred punih dvadeset i šest let. Autorice su meni drage žene, negda v Podravki i drage suradnice, i jako mi je drago da to imam v svojoj gastronomskoj biblioteki. Jako dobro poznam i urednike, autora fotografija pa i neke suradnike koji su delali na pripremi jela čije su se slike našle v toj lepo opremljenoj knjigi. Ali...
To vam je kuharica v kojoj morete saznati puno prelepih stvari, odličnih recepti, puno zgodnih stvari o povijesti Lepe Naše, folkloru, obiležjima različitih kuhinji naših krajeva ali su tu i dva kratka poglavlja pod nazivom “Tko su Hrvati?” i “Hrvatski jezik”. Kak nisam povjesničar nebi se osudil ni za živu glavu komentirati tih nekolko rečenica o nama Hrvatima ali kak kajkavec i Podravec bum osudil i usudil se prokomentirati ono kaj piše o hrvatskom jeziku. Bum citiral tu jednu rečenicu z kojom se nikak nemrem i neču složiti. Na devetoj stranici te knjige stoji točno ovo: Kajkavsko narječje obuhvaća Hrvatsko zagorje, Međimurje, Prigorje i Gorski kotar;... Mislite da sam ni dobro prečital? Ni govora. Bil sam jako oprezan pa sam prečital nekolko put. I sad se ja pitam:A gde je tu Podravina? Kaj mi Podravci nismo kajkavci? Jel moguče da su nas autori i urednici preskočili i zaboravili a i neki od njih su i Podravci i kajkavci? Bilo bi dobro da čuju popevku “Kajkavci” koju tak lepo popevaju Adam, Žiga i naš Vid. Jedino mi je drago kaj sam među puno jela z cele Hrvatske našel puno slika i recepti za jela koja bi se bez ikakvoga oklevanja mogla nazvati “kajkavska” ili čak “podravska”.
Kak sam gore i spomenul neke autore osobno poznam samo posle tolko let je kasno pitati kak se to moglo dogoditi? Z druge strane ko mi je kriv kaj tu knjigu nisam na vreme nabavil i prečital a danas je “kasno v podne k meši iti”. To vam je morti još jedan razlog kaj sam pred tri lete objavil onu knjigu pod naslovom “Ko to ne voli Podravce”. Za to ima fanj “dokaza” al nekak mi se čini da smo si za sve to i sami krivi. Kroz ovaj moj več poduži život srel sam ljude koji su odavno došli v Podravinu i još navek su ostali verni svojemu narječju i kaj je najvažneše niti ne pokušavaju govoriti kajkavski. Tak je i bolje, jer se mi međusobno itekak razmemo osim ak nije “bednjanska kajkavština” ili ikakvica z nekoga našega otoka. Sam sam pak imal malih “problema” ak sam počel kajkati pred ljudima z recimo krajeva gde se govori “trda ikavica”. Jemput sam se na jednom svojem seminaru malo opustil pa sam tu i tam malo “zakajkal” ili ubacil malo šatre. I kaj se dogodilo? V završnoj anketi sam od tri sudionice dobil otprilike i ovakvu primjedbu: ”Gospodin vašega ugleda si nebi smio dozvoliti ovakav način komuniciranja.” Da napomenem da se to događalo sred Zagreba a, makar je anketa bila anonimna, znal sam da su dotične dame bile Spličanke. I da se vrnem na kuharicu. Bez obzira na moju primedbu, ak imate priliku prečitati tu knjigu, siguran sam da bute jako zadovoljni.
Dani okusa Podravine i Prigorja
Taman dok sam počel pisati ovaj tekst vidim ja jednu jako interesantnu objavu na internetu koja me jako razveselila i nekak se nadovezala na ovo kaj sam gore napisal. Pazite ovo: “Dani okusa Podravine i Prigorja” kaj se lepo slaže z onom “Dani okusa hrvatske tradicije”. Puno put sam pisal tekstove z mojih putovanja po Ex-Yu i po nekim evropskim zemljama ali nigde na svetu nema primera da se na tak malom prostoru, kak je Lepa Naša, najde takvo gastronomsko bogatstvo ponude. Ako se još malo podsetimo bogatstva i lepote prirode, folklora i glazbe onda smo zapraf jedno malo čudo. Ni onda iznenađenje kaj su stranci oduševljeni z onim kaj nudimo a posebno mi je drago kaj su počeli otkrivati kontinentalni dio naše domaje. To baš dokazuju ovi najavljeni Dani koji buju trajali punih deset dana širom naše Županije. I sad se ti odluči kam krenuti? Moram dobro proučiti celokupnu ponudu kaj baš ni laki zadatak. Ono kaj me najviše privlači su restorani v kojima sam negda davno ili opče nisam bil. To mi baš ni za diku al se nekak zgubila ona stara navika z nekih raneših vremena dok sam bil jako čest i rado viđeni gost naših birtija.
Veseli me kaj se na toj listi našlo i “Sunčano selo” v Jagnjedovcu v kojem sam pred nekolko let čak i kuhal. Bila je to suradnja domačina familije Hećimović i Podravke pa smo čak kuhali na dva razboja: Podravkini profesionalci i Danko i ja kak amateri. Nebum vam otkril ko je “pobedil” v toj utakmici jer je to bilo samo onak neslužbeno. Ovaj put najavljuju da buju obogatili jelovnik z nekim novim jelima kaj bi rado probal.
Današnji restoran “Zlatan” mi je čista nepoznanica. Negda smo znali tam zalutati al mislim da je to danas čist nekaj drugo. Videl sam da v jelovniku najavljuju svinjski file kaj bi mogla biti delicija za prste polizati. Doduše ja volim malo sočnije meso i nisam baš lud za friškim svinjskim butom koj je pomalo “dosadno meso” osim ak ga ne pohate ili je pak ponuđen kak sušena šunka kaj je za mene sigurno vekši specijalitet i od pršut. Znate ono: tri reda crvenoga i dva reda beloga. Ja znam tu i tam kupiti carsko meso, dobro ga začiniti, premazati ze senfom, dodati kak flispapir rezanoga lepoga pisanoga špeka i sve to zarolati. Dok je v reš spečeno i lepo narezano, morete to ponuditi i najvekšim gurmanima. Pravi mesoljupci buju v tome uživali.
V tom nizu podravskih restorana našel se i đurđevečki “Stari grad”. Svojedobno sam često sviral v tom kraju i malo sam znatiželjan kaj se to finoga danas nudi. Čist je prirodno da oni nudiju papicu z piletinom jer ko zna više o “picokima” od Picoki. Doduše videl sam da nudiju pohana pileča prsa kaj mene baš ne oduševljava. Od malih nogu sam obožaval bocke i lopare pa je to nekak prvo čega se setim dok se spominje piletina. Kolko se sečam da Picoki imaju i takmičenje v pripremanju piletine pa su morti i z pilečim prsima zamislili recept koj more zadovoljiti svakoga zaljubljenika v picekovo meso.
Naravno da nemrem spomenuti sve kaj se nudi tih deset dana, moram to još jemput dobro pregruntati, al je sve tak primamljivo da bi se svakak bilo dobro hititi v malu investiciju i sprobati nekaj od te primamljive ponude naših podravsko-prigorskih restorana.
Nisam ništ napisal o desertima jer to ni moj fah.
Ovu je medenu pitu Đuro napravila sinu za rođendan
I sad sam vam ja na mukama kaj ovih sedam dana kuhati doma a kaj predložiti vama za tjedni jelovnik? Bum predložil nekakvu kombinaciju svega pomalo od te naše tradicionalne kuhinje. Ovo baš ni jeftin jelovnik al se bumo malo počastili.
Pondelek
Juha: Bela juha z sitnim rezancima
Glavno jelo:Krpice zeljem; morete podinstati malo nekakvoga mesa ili dodati par kobasi
Desert: Vočna šalata
Tork
Juha/Glavno jelo: Pajšlec na kiselo; znate ono: praseča plučeca, srce i jezik
Desert: Salenjaki z pekmezom; ak ste si dobri ze svojim mesarom ni teško nabaviti falačec sala
Sreda
Juha: Kašena juha
Glavno jelo: Lungić vu vrganjima, domači rezanci
Desert: Pogačice sirom/čvarkima
Četrtek
Juha: Povrtna juha
Glavno jelo: Junetina ala vild, semerknedli, šalata
Desert: Kuruzna zlevanjka z pekmezom i puno vrhnja
Petek
Juha: Riblja juha ala fiš
Glavno jelo: File soma na pariški, kuhani krumpir na putru, tartar-sos
Desert: Čaša vina
Subota
Predjelo: Domača pašteta na putru i tostanom kruhu
Glavno jelo: Kajgana od šunke i sira, turšija
Desert: Čaša crne pive
Nedela
Juha: Pileča juha z leberknedlima i rezancima; imam navek kuhane juhe v škrinji
Glavno jelo: Rolano carsko meso, krumpir na pekarski, zelena šalata
Desert: Medena pita; treba dost vremena da se napravi al deca to voliju; pogledajte ju na sliki
:(Još nema komentara