Ovo kaj se dogodilo ovih dana čekali smo več dva meseca: konačno je pala kakva-takva kiša. Za razliku od nekih drugih krajeva Lepe Naše gde je bilo i velkoga nevremena, mi smo Podravci jako dobro prešli. Dobili smo kišu koja je padala skoro jedan celi dan i tak bar malo natopila ovu žednu zemlju. Tak smo malo prišparali vode za zalevanje onoga našega „vrta“ v goricama. Kad bi ljudi vidli toga našega „vrta“ morti bi se smijali al verujte da mi več fajn vremena ne kupujemo ni paradajza ni papriku a za koj dan bumo imali i prvu „berbu“ naše raštike. Malo al čoveka veseli.
Vu velikom sam poslu
Kak sam nedavno i napisal, kolovoz more biti itekak dinamičan i v Podravini. Žale mi se neki poznanici kak im je dugočasno, kak neznaju kam bi sebom, kaj je meni čista nepoznanica. Fakat se furt nekaj događa. Taman završim jedan posel a več su druga dva na vratima. Neki sam dan predal v tiskaru materijale za našu novu knjigu „Maturanti staroga kova 10“, čekamo da bu gotova i onda treba splanirati kak i kad napraviti promociju. Priznajte da ni mala stvar dok jedna veteranska udruga, stara v projeku prek sedamdeset let, napiše v deset let deset knjiga. Moramo biti jako zadovoljni i, ak nebu pak nekakvoga zla, promocija te knjige bu i za nas i za generacije koprivničkih gimnazijalci pravi doživljaj. O tome vam bum nekaj napisal za otprilike mesec dana.
Kraj je kolovoza al mi nekak sve miriši na jesen. Suša je fakat ubrzala prirodu, dost je oko nas žutila i kak čujem od pajdašije mnogi su vinogradari več odredili datum berbe gorici početkom rujna. Razmem da se buju brale neke rane sorte kak je portugizec, zobatice su več skoro sve zrele, i nekak se bumo prilagodili tome kaj bu rekla priroda. Neču ništ v napred planirati jer dok imate nepunih tristo trsi i dovoljno težaki, lako to poberete pod gablecom. Problem je v nečem drugom: priprema podrumai mertučja za berbu i svi oni poslovi oko prešanja i pospremanje mošta. Tu se nebu ništ dogodilo bez Janove ekipe. Doduše moram vam se malo pojadati zbog jednog drugog „velkog problema“. Naime kaj? Ovo mi bu četrdeset i treča berba a v to vreme pred berbu nigda nisam imal tolko staroga vina. Verojatno morete pogoditi kaj je tome razlog: nema potrošnje kak negda. Mladi su na študiju, promenile su se navike v potrošnji, a mi stareši više nismo v kondiciji i manje se sastajemo nego je to bilo vu vreme nekih prijašnjih leta. Naravno da je i korona napravila svoje ili još navek dela. Kaj se tiče promene navika moram spomenuti kaj se svega najde vu frižideru posle tuluma neke mlajše ekipe. Krenem ja neki dan po nekakvo osveženje kad ono najdem: dve vrste minaralne vode, pivu vu flaši, pivu vu limenki, Coca Colu v velikoj ambalaži i v limenki, radlera crnoga, nekakvih čudnih piča za delanje koktela i nekolko vrsti sokova v tetrapaku. Evo kaj dela reklama v medijima ali i akcije za neka „moderna“ piča. Našla se tu i jedna flaša obične vode z kojom delamo domače sokove. Naravno da je ta voda za Đuru i mene. Da to vidi moja stareša pajdašija sigurno bi se ufrastila od muke. Negde do rata pri nam se v goricama pil skoro isključivo samo gemišt ili čisto vino. Retki među nama su bili od navek pivopije.
Taman dok sam se prijel pisanja ovoga teksta dobil sam poruku da bu tam početkom rujna promocija jednoga dokumentarnog filma o vinskoj tradiciji v našem podravskom kraju a tu bi i mi stari goričari z Draganovca imali kaj za reči. Ja bi trebal imati jednu posebnu zadaču al prvo moram dobro razmisliti jesam li ja to v stanju napraviti do toga datuma. Tu bi mi svakak moral v pomoč skočiti Atač i morti neki mlajši ljudi. Materijala imam dosta al treba čovek biti malo kreativan i to sve osmisliti na pravi način.Vreme mi baš ni prevelki saveznik.
Đurine „kreacije“
Kak sam v zadnje vreme malo v kuhinji improviziral, posegnul sam za nekim zamrznutim i blanširanim proizvodima da nas to ne dočeka v kasnu jesen dok bu vreme za zimnicu. I tak jedan dan ja odlučim potrošiti blaširanu raštiku. Bum ju napravil ala špinat, z dva jajca na oko i z kojom šnitom pohanoga kruha. I dok se taj zamotuljak malo bolje odmrznul, vidim da je to zapraf blanširani poriluk. I kaj sad? Veli Đuro:“Joj zaribala sam se. Sad bum ja zvadila i raštiku pa sve skup zmešaj i napravi ala špinat.“ I kaj mi je drugo preostalo nego da stvarno tak napravim i „otkrijem“ jedno novo jelo. Bilo je jestivo al bi vas prosil da vi tak ne eksperimentirate. Neki se dan pak dogodilo ovak nekaj. Taj dan je nakon ohoho vremena zapalo Đuru da sve skuha sama kak bi se ja mogel posvetiti jednom drugom poslu. Bu napravila belu juhu z kašicom vu vodi gde su se kuhale krpice, naravno krpice buju zeljem i bumo dodali par kranjskih. Svi kaj delaju ovo staro tradicionalno jelo znaju da se mora malo zašpinati cukora al gotovo jelo je v pravilu dost papreno. Rekli bi „tak je to navek delala moja mama“. I sve je bilo kak bog zapoveda, ja sam se nabubal krpici z pol para kranjske a Đuro je pojela sam frtalj para kobase i pol svoje porcije krpici a pol je ostalo v tanjuru. Kaj bu sad sledilo? Na ostatak svojih krpici posipala je fest cukora! Sad vi meni rečite jel to normalno? Još je dodala kak je to njoj baš fino! Da bi to ispravila ovih dana mora za kaznu napraviti za mene štrukle zeljem. Zelje se dela kak i za krpice, testo je kak i za sve druge štrukle al oni moraju svakak biti papreni. To more biti fino slano predjelo, glavno jelo al paše i kak desert. Neki bi to ljudi nazvali i pita zeljanica. Negda davno, dok sam još bil v Podravki mladi pripravnik, moja je mama spekla te štrukle več v jutro oko desete vure, ja bi skočil pod pauzom doma i donesel još tople štrukle za celu kadrovsku službu. Dobra stara vremena.
Ovak bi trebali zgledati pravi štrukli zeljem
Ak ste malo bolje pratili kojekakve štiklece po internetu mogli ste zapaziti kaj je rekel ovih dana Ljubo Jurčić, poznati ekonomist i negdašnji političar. Upozorava naše ljude da se pripreme za jesen i neka počnu razmišljati o zimnici. Poseban mu je naglasak bil na kiselom zelju i svinjskim polovicama. Kakti on to još navek zna delati a današnje generacije kupuju sve gotovo. E moj gospon Ljubo. Verujte da još navek ima ljudi koji znaju kaj napraviti z kiselim zeljem a još bolje kaj delati z svinjskim polovicama. Dok dojde vreme za pravu zimnicu, tam negde za dva-tri meseca, bu videl kaj i kak se za to pobrinuti i kak pripremiti da bu na jelovniku tam do prolječe. Znamo mi da bu sve poskupelo al z malo dobre volje i truda bumo sve to uspešno savladali.
Pondelek
Juha/Glavno jelo/Desert:
Ostalo je svega od nedele pa bum dodal samo friškoga priloga i frišku šalatu
Tork
Juha: Danas bez juhe
Glavno jelo: Friški sir z vrhnjem, malo pisanoga špeka ili jegera, tostani kruh
Desert: Čaša vina
Sreda
Juha: Jedna Podravkina krem juha
Glavno jelo: Junetina na lovački, rezanci od palačinki, cikla
Desert: Palačinke z pekmezom; ova kombinacija z palačinkama baš nebi prešla v nekom finom restoranu al pri nama doma bu tak.
Četrtek
Vreme je za čušpajz
Juha/Glavno jelo: Čušpajz od vugorki, pire; ak vam baš fali meso dodajte par kobasi
Desert: Kompot od kruški
Petek
Danas bu po Janovoj želji
Juha: Juha od kozici
Glavno jelo: Lignje na pariški, krumpir na putru, tartar umak
Desert: Lagana bevanda
Subota
Juha/Glavno jelo: Danas buju oni najavljeni štrukli zeljem, mi bi rekli paprenjaki, jer oni moreju biti i glavno jelo. Za opču upotrebu morete fakat to zvati i pita zeljanica.
Desert: Čaša crne pive jer buju verojatno jako žedni
Nedela
Juha: Juha od junečih kostiju z grisknedlima
Glavno jelo: Juneče rolice iliti gradiščanski odrezak, luleki od kolko-tolko testa, mešana šalata
Desert: Lisnato z makom, kapučino
:(Još nema komentara