Moj profil

A kaj da danas kuham? (549)

Morti ste primetili da retko kad preporučam nekoje vrste testenine za juhu ili pak kak prilog glavnom jelu. Ja to zovem debela testenina i nikak da počnem barem tu i tam probati makar nekakva slabašna volja za to postoji. No znate več onu: ni ga mama nafčila to jesti v ranom detinjstvu. Ni je to baš navek tak ali bum probal sve to malo pojasniti čez moje debelo životno iskustvo. Nokleci, debela kašica, knedli, šiškrli, taškrli, debeli rezanci, štrukli z črešnjama i višnjama nisu baš nekaj za čim bi ja poludel. Dok drugi ljudi za tim luduju ja to izbegavam dok god morem.

Moj greh moj preveliki greh

Oni čitatelji mojih let dobro pamte kaj se negda kuhalo i kaj je često bilo na jelovniku. Kak se god skromno živelo navek se je doma našlo barem brašna i beloga i kuruznoga. Kak je mama Marica nasledila nekaj zemlje zraslo je dovoljno pšenice i kuruze da se jedna manja obitelj prehrani od žetve do žetve. Mama ni nigda delala i njezina je briga bilo celo domačinstvo kaj je podrazumevalo v ono vreme i „proizvodnju hrane vu vlastitoj kuhinji“. Ruku na srce baš se i ne sečam da je v dučanima bilo nekakve ponude industrijske testenine. Eventualno su se spominjali makaroni koji su se retko našli na jelovniku nekoje podravske obitelji. Daklem ovak. Pečenje kruha je bila klasika ali se v klasiku podrazumevalo spremanje sve moguče testenine: sitni rezanci za juhu, široki rezanci za kojekakve priloge ili glavna jela, kašica sitna i krupna, knedli, šiškrli, nokrli, knedli a morti sam nekaj i zaboravil. I sad dolazimo do srži stvari i do „debele testenine“. Testenina se pripremala na „sto načina“ kaj ja nisam nikak mogel savladati. Bilo je galame, suza i durenja i jedino kaj je mama mogla napraviti je da ponudi „drugi meni“: mleko z kruhom. Morate priznati da ni baš neka delicija al v toj detinjoj dobi je nekak zadovoljilo moj „gastronomski ukus“. I tak vam je to ostalo nekak do studentskih i mužikaških dana. Na jelovniku v nekakvom restoranu ili hotelu znala se najti i testenina a na to nisam mogel izbeči. Tak je pomalo, sramežljivo krenulo oprezno konzumiranje nekoje testenine. Naravno da ta testenina ni bila domača nego industrijska ali ni bilo izbora. Čak bum i priznal da mi se to pomalo počelo donekle i dopadati pa sam rezance počel jesti i doma. Bil je samo jedan uvjet: da rezanci budu jako tanki. To je savladala negda i mama Marica a bome to dobro dela i Đuro. Sve ostalo je ostalo i dalje v „zabranjenoj zoni“ a špagete i fuže naravno i dalje kupujemo v dučanu. I sad se pitate kak to podnose moji ukučani? Ha čujte. Navek postoji izlaz. Dok oni jedu recimo knedle z pekmezom ili šljivama, ja pojedem par kranjskih. Ako se kuha anjgemahtec z noklecima ja noklece prehitim Đuri. Tak su svi zadovoljni. Ima jedna iznimka. Jedem semerknedle kak prilog z nekim saftom i divljači. Ipak je to čist nekaj drugo. Doduše z takvim jelima dobro pašu mesto testa ala luleki od kolko-tolko testa, pohani kruh ili žganci.

No zna vam se dogoditi pomalo nezgodba situacija. Recimo kuma Vinka je v Kaštelima delala „kunca na crno“, kaj če reči domačega zeca v crnom vinu, i naravno z njokima. To je v Dalmaciji velki specijalitet. Kaj sam sad? Onda si ja denem dva njokiča i pretvorim ih v kašicu. Kak se svi ostali za stolom „daviju v njokima“ niko ni ne primeti kaj se događa v mojem tanjuru. Nadam se da ste svatili moj „problem“ a morti i vi imate nekakav problem kojega bum ja probal svatiti.

Imam i „grešne“ prijatele

Srel sam vam ja i kojekakve „čudake“ koji ne jedu neke prave delicije kak su riba, plodovi mora, janjetina, ili bogomdanu povrčku kak je češnjak. Dok je baš češnjak v pitanju znam pak dvoje ljudi kaj “nemreju živeti” bez češnjaka. Bilo kuda češnjak svuda. Moj pajdaš Joso je z čista mira jemput izjavil:”Danas sam preteral. Jel sam knedle šljivama z češnjakom!” Fakat si preteral.

Z jednim sam suradnikom još negda v Podravki putoval po Lepoj Našoj i naravno da smo se punoput našli i na Jadranu.  Onda vam je to ovak zgledalo. Dobijemo za predjelo crni rižoto ili nekaj slično od plodova mora a on to „naganja po tanjuru“. Brzo sledi pitanje:“Jesi profo za još jedan rižoto?“ Naravno da jesam. Obično je bil vu uverenju da za glavno jelo dolazi „nekaj konkretno“. Kad ono za glavno je prekrasna bela riba koju bi anđeli jeli.Tek onda sledi njegovo razočaranje i pitanje konobaru:“Morem ja dobiti mesto ribe krmenadle i pomfrit?“ Morate priznati da posle rižota krmenadli baš i nisu nekakav izbor. Al kaj Podravec zna o morskim specijalitetima.

Moj prijatel i kolega Franjo z Varaždina ni pak mogel zamisliti janjetinu i ribu kak nekakav gastronomski zalogaj. Ide on z familijom na desetodnevno putovanje z brodom po Kvarneru na kojem je vlasnik broda i kuhar, sprema sve prave morske delicije, frišku ribu bu lovil sam a na otoku Cresu bu kupil janjca. Onda vam moj prijatel dojde k meni v Koprivnicu i ide v Podravkin diskont kupiti konzerve gulaša i ragua koje bu on “blagoval” v dane dok se familija časti z morskim oblizekima. To je posel.

Imal sam neke pajdaše koji su pak od svih stvorenja v moru jeli isključivo lignje ili kakvu sardinu. Jedan  je pak dobil živčani slom dok bi mu neko spomenul češnjaka ili luka v bilo kojem obliku. Da mi je samo znati kak mu žena dela nekakvoga safta bez luka? Moj je pokojni pajdaš Čvrknja bil dugogodišnji lovac v svojem Legradu al ni štel jesti divljač. Onda donese posle lova v gorice lepi komad srnetine da složim paprikaša al donese i junetinu da to sve skup zmešam. Nigda nisam otkril kak je on posle v paprikašu razlikoval junetinu od srnetine?  I još nekaj. Volil je pohance ali ne pileče nego samo “pohanu vratinu kak sprema moja mamika”.

Siguran sam da i vi poznate takve kak sam ja i ovi moji spomenuti prijatelji. Ali dragi moji: kolko ljudi tolko čudi.

MN: Neponovljivo Martinje

Ovak je zgledalo “ludo Martinje” v mojoj kleti...

...a nastavilo se lumpati pri pajdašu Tonču

Nekaj sam o Martinju prošli tjedan napisal al vam moram opisati kakvo je bilo ovogodišnje Martinje v Draganovcu. To svakak spada v povijest vinskih sveci na ovom našem koprivničkom vinogorju. Kak je naša stara klapa donesla odluku da ni ovo leto nebu našega tradicionalnoga Martinja, prihvatil sam predlog pajdaša Tonča da to obavimo nas dvojica sami. No onda smo v zadnji čas dobili i pojačanje v osobi budučeg vinogradara Jana koj nam je bil taksi služba na relaciji do Draganovca i natrag. Verovali ili ne naše je ovogodišnje Martinje trajalo jednu vuru i četrdeset i pet minut. V pol četri je Jan došel po mene, pokupili smo Tonča, došli do moje kleti, prigrizli zalogaj-dva race, popili po pol čaše mladoga vina, Tonč ga je pokrstil i pri meni je Martinje završilo. Seli smo v auto otišli do Tončove kleti, pojeli  zalogaj-dva jegera i peciva, popili po pol čaše mladoga vina, ja sam ga pokrstil pri njemu i tu je Martinje završilo. Vu frtal šest več smo bili doma. Da mi je videti pravoga goričara koj more ponoviti ovaj rekord: krštenje mošta v dve kleti, najesti i napiti se i to sve za vuru i tri frtalja. Mislim da bi o ovom slučaju trebali pisati i govoriti barem svi mediji v Koprivnici.

Ajde da se ja vrnem svojem starom poslu. Izgleda da mi bolje ide za rukom pisati o jelu nego  organizacija Martinja.

Pondelek

Juha/Glavno jelo:Kisela juha od pilečih želučeki
Desert: Verujte da bu pišingeri za danas i još koj dan

Tork

Juha: Koprova juha z kašicom
Glavno jelo: Carsko meso i pečeni krumpir na ploške, šalata od zelja
Desert: Zberite sami kaj vam tu paše

Sreda

Juha/Glavno jelo: Čušpajz od tikve z faširancima
Desert: Šnenokli

Četrtek

Juha: Kašena juha z gljivama
Glavno jelo: Jetrica na naglo, restani krumpir, turšija
Desert: Nekakav sok

Petek

Juha: Krem juha od graha i mrkve

Glavno jelo:Pržene sardelice, grah šalata z crnim uljem

Desert: Kaj drugo nego gemišt

Subota

Juha: Bela juha
Glavno jelo: Zapečeni domači rezanci ze sirom
Desert: Kompot od jabuki

Nedela

Juha: Povrtna juha
Glavno jelo: Krmenadli v pikantnom saftu, luleki od kolko-tolko testa, šalata
Desert: Pišingeri; Đuro je odlučila napraviti pišingere z kremom od lešnjaki.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.