Moj profil
A kaj da danas kuham? (543)
A kaj da danas kuham? (543)

A kaj da danas kuham? (543)

Prošli je vikend bila zadnja berba unutar naše stare klape i verujte da smo baš uživali. Prelepi rano jesenski dan, okupilo se jedno jako šareno društvo od nas veterana do mladosti i v takvom okruženju posel je pravo opuštanje. Zapraf sama berba gorici po lepom vremenu je najlakši posel i užitak. Na berbi najviše moraju povleči gazda i par njegvih pomagača v pripremi berbe, na prešanju, pospremanju iza berbe i naravno posle v podrumu gde se mora dobro paziti da bu vrenje kak bog zapoveda a vino održi svoju pravu kvalitetu.

Pak z kuhačom v ruki

Ovo sam leto pri kumiču Vilku, Fjakinom sinu, bil nakon par let  pak zadužen za kuhinju kaj mi ni bilo preveč teško. V tim sam naime goricama uglavnom spekel ovaj kuharski zanat. Počelo je tam nekak početkom sedamdesetih prošloga veka, onda sam v jednom momentu predal kuhaču našem Slavoju koj je tu odgovornu dužnost obavljal i pri Fjaki i pri meni sve do pred dve lete. Onda se v naš život zmešala viša sila i ja sam se pak našel v Pavlovićevoj kuhinji z kuhačom v ruki. Nije mi to posebno teško makar malo stradaju noge dok se motate oko peči i dok  celi dan “putujete” od jedne do druge kleti. Dobro vam dojde povremena pauza da se odmorite, pospominjate se z beračimai i popijete koju čašu vina. Baš tak: čašu vina. Naime skužil sam da mi čaša više paše nego dva gemišta. Ak imate problema želucom, muči vas recimo čir, verujte da je čisto vino puno zdraveše nego mineralna koja vas more samo napuhavati. Sprobajte to na sebi ak ne verujete mojemu iskustvu.

V toj kuhinji sam spekel zanat

Evo male povjesti mojega boravka v tim goricama. Prvi sam put došel v Draganovec, Mirni dol, pred točno pedeset i osam (58) let taman nekak kak sam maturiral. Na radnoj akciji na Šoderici sam upoznal nekaj mlađega gimnazijalca Fjaku  i nakon mesec dana akcijaškoga života zaključili smo da bi to lepo poznanstvo mogli okruniti odlaskom v gorice do njegvoga dede Jendraša. Z nama je krenul i Fjakin šulkolega Ruco čiji se sin ovo leto  pridružil beračima i tak me malo podsetil na taj davni dolazak v te gorice. Koje leto kasneše uspel sam kraj Fjake, z kojim sam se v međuvremenu i dva put pokumil, kupiti gorice, i tak se trajno vezati za taj prekrasni kraj na domak naše Koprivnice. No na moju žalost več pet let više ne čujem onaj poziv:”Gde si kume? Dojdi na gemišt!”

Tačke mesto pute

Moram spomenuti jednu novost koja se dogodila ovo leto v ovim goricama. Valda se prvi put dogodilo od kak su ove gorice da ne čujete z trsja onaj poznati zov:”Putar!” Naime kaj. Dečki, bivši putari, pretvorili su se v “tačkare”. Zaključili su da je lakše tačkati nego nositi putu na leđima a i više stane v tačke pa i ređe treba hodati po goricama gore-dole. Kibra i Tonči su leteli od trsja do muljače, ni bilo nikakvoga zastoja v proizvodnji i berba je z jednom velkom pauzom završena na opče zadovoljstvo i gazde Vilka i težaki. Fakat je bilo dost vremena da uživamo v obedu, vu vinu i gemištu a bome i vu slatkome moštu. Žene su izjavile da več dugo nisu pile tak slatkoga mošta. Kak i nebi kad je na graševini bilo devetnajst (19) posto cukora. Svojedobno, tam prije rata, smo bili jako zadovoljni dok bi graševina dosegla petnajst posto. Ovaj postotak cukora je drugi najbolji rezultat ikada. Rekord, koj se bu teško dostigel, bil je tam otprilike pred četrdesetak let dok se v goricama od hiljadu trsi nabralo svega 300 litri mošta al je graševina imala nezamislivih dvadeset i dva (22) posto cukora. Rekel je jen Podravkin inženjer da je to vino jako kak slavonska rakija. Sve v svemu jedan prelepi dan proveden v prirodi, v ambijentu draganovečkih gorici, bil je dan uživanja al i prisečanje na sve one prelepe dane koje je naša pajdašija provela v tom ambijentu čez zadnji pedeset i nekaj let. Nekak mi je pak drago da je ovo leto  bilo dost mladosti koja bu, nadam se, nastavila tradiciju goričarenja i obdržala sve ono kaj smo i mi baštinili od naših starih.

“Revolucionarna” novost v Draganovcu: tačke mesto pute

Jesenski štikleci

Vinoljupci se ovo leto moreju svakak nadati odličnome portugiscu. Ovih sam dana bil pri pajdašu Tonču, koj mi je takorekuč međaš, i probal sam njegovoga portugisca koj je bil još na tropu pred prešanje. Časkom je spekel malo kostanji i ponudil portugisca koj bi ovo leto mogel biti baš za pamčenje. Ja doduše nisam od onih kaj luduju za “kostanjom pucancom i moštom rezancom” al moram priznati da mi je baš pasalo. Čak je i Đuro, koja je više luda za kostanjom nego za portugiscom izjavila: “Ovo je leto portugizec odličan!” Kolko čujem na Podravskim motivima prošloga vikenda se mogel najti i Tončov portugizec samo još nisam doznal po kojoj ceni. Toga istoga Tonča moram i ovak javno pošpotati. Kak se pri meni v goricama zadnjih par let sadi i paradajz, i dobro uspeva, sledil je jedan malo zločesti Tončov savet:”Bolje ti je da uzgajaš paradajza nego lozu. To ti ide bolje od ruke!” Kaj da mu čovek na to veli?

Ni ova berba ni prešla bez Atača al kak i navek imal je i neke “korisne savete” za budučnost mojih gorici. Razgovor je išel ovak:

Čuj stari! Grožđe ti je prelepo. Šteta je te bobice združđeč za vino”.
A kaj da delam z grožđem?
Delaj konjaka?!?!
Kak to misliš. Kak bi mogel dobiti konjaka a da ne združđem bobice?
Ja to neznam. Budi kreativan. Ti buš prvi koj je tak nekaj napravil.
Imate vi morti ideju kak da to napravim?

Davor pjesnik

Se sečate one slike v mojem tekstu prošli tjedan gde se tri sede glave spominjaju o nekim prošlim vremenima? Nakon obeda, nekak posle deserta, taj draganovečki ambijent je nadahnul pajdaša Davora pa je napisal ovu pesmicu. Nije  joj dal nikakvoga naslova pa bum si dal slobodu da ju ovak nazovem:

Jesenski spomenki

Um, vitkost i ljepota
Nešto malo sjedih lasi
Zdrav duh u zdravom tijelu
To je to što muže krasi
Makovnjača il orehnjača
To Hamletovski tišti grud
Al zebnja bi nešto kraća
Najbolja je od rogača
I kad zadnja kriška pade
A bojazan zbori … nema nade
Ko Gabrijelom s visina
Stvori se to flajka vina
I spokoj opet bregim lebdi
Pod brajdam sve mirnije
Još koju za po putu

Pa poći doma … vreme je

Ak ovak nastavi morti jednoga dana otkrijemo njegov dugo vremeni skrivani talent. Čim se vrne z Tanzanije nastavlja stvarati.

Pondelek

Juha/Glavno jelo: A kaj da vam velim. Nedeljni obed se navek nekak po naviki kuha malo obilneši pa buju dobri i ostanjki od jučer. Pohance bumo podgrijali v mikrovalki i napravili friški prilog.Dok ovo prečita pajdaš Tonč pak bu rekel:”Najlakše je napraviti jelovnika z ostanjkima. To i ja znam!”
Desert: Štrukle takaj moremo imati dva dana

Tork

Juha/Glavno jelo:Prisiljeno zelje z paradajzom;svakak podinstajte z tim falačec lopatice ili bočinga; tome čušpajzu poseban okus daje malo kopra
Desert:Mazanica ze sirom; Đuro dela mazanicu obično od obreski od testa za štrukle. Moreju biti vu frižideru i par dana i još se navek moru fino razvleči.

Sreda

Juha: Povrtna juha
Glavno jelo: Musaka od krumpira, mešana šalata; nedavno sam videl recept za musaku koj mi se jako dopal. Bum ga sprobal pa vam javim kak je ispalo.
Desert: Još se navek najde čaša reskoga mošta.

Četrtek

Juha: Krem juha od žute tikve z krutonima
Glavno jelo: Krmenadli dinstani na češnjaku, restani krumpir, pečena paprika
Desert:Čaša crne pive

Petek

Juha: Juha od osliča z rižom; zmrznutoga naravno
Glavno jelo: Kuhani oslič, kuhano mešano povrče
Desert: Bevanda; ak ste trdi Podravec popite gemišt

Subota

Nadam se lepome vremenu pa morti padne još kakav roštilj ili peka. Recimo ovak:
Predjelo: Malo jegera, špeka, prga i malo paradajza i paprike
Glavno jelo: Za roštilj zmešajte klasiku: čavape, ražnjiče i vratinu. Ja bi recimo za sebe hitil na rešetku malo bogateša svinjska rebra. Priloge zberite sami.
Desert: A kaj drugo v goricama nego gemišt.

Nedela

Juha: Juha od goveđih kostiju z leberknedlima
Glavno jelo: Štefani pečenje, pekarski krumpir, zelena šalata; roladu prije pečenja svakak posipajte z parmezanom ili naribajte nekakvoga trdoga sira
Desert: Kostanj-rolada, kapučino

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.