Moj profil
A kaj da danas kuham? (542)
A kaj da danas kuham? (542)

A kaj da danas kuham? (542)

Nema toga kraja v Lepoj Našoj koj nema tradiciju spremanja zimnice al naravno na svoj način i ze svojim domačim namirnicama. To se nesme prekinuti makar nam naša prehrambena industrija i nebrojeni OPG-i nude vrpu toga kakti „domače“. Verujem ja da je to i kvalitetno al taj domači štih i atmosferu mi stareša gospoda moramo sami osetiti.

Akcija zimnica

Ima tome dva tri tjedna kak je Glas Podravine i Prigorja objavil tekst z familijom koja dela sama zimnicu a posebno  su se specijalizirali za ajvar i velikodušno ponudili svoj recept za one koji se sami odluče upustiti v tu avanturu. Pri nama doma je atmosfera zimnice več na programu dobrih mesec dana a to ima i svoje razloge. Znate onu poznatu rečenicu:”Ha čuj. Šteta mi je hititi pa bum složila još dve-tri flašice”. I tak z dana v dan. V tekstu kojega sam spomenul treba dodati završnu rečenicu naše novinarke Mateje Konfic:“Onima kojima računica i kvaliteta predstavljaju bitnu stavku najbolje je da kupe voće i povrće kao sastojke i da sami spreme svoju zimnicu“. Ja bi još dodal: nemojte samo kupovati voče i povrče nego pokupite sve kaj vam prijatelji ponude jer povrče, a posebno voče, ovo leto strašno brzo propada.  Primera radi bum vam rekel kaj se nama dogodilo z vočem:

  • Jedna jabuka je dala nula (0) plodova. Sve je več otpalo do prošloga tjedna a Đuro je par pobrala z poda i na brzinu ih zribala v štrukle ili hitila v nekakav smuti z još dve tri druge vočke.
  • Druga je jabuka svako leto dala i po desetak sanduki lepih zdravih plodova a neki dan smo pobrali točno jedan sanduk plodova koje moramo jako brzo potrošiti. Ostalo je završilo na kompostu.
  • Treča jabuka, koju zovu mucu, ima nekaj jabučici, a kak je to zimska bumo morali još koj dan pričekati i videti kaj se bu z njom dogodilo. Za jemput se dobro najesti bu valjda dost.
  • Breskva v goricama je imala morti desetak plodova ali ih je pol propalo več na stablu a pol je opalo i takaj je završilo na kompostu.
  • Rana kruška je dala nekaj ploda tek tolko da odvrnemo želju a viljamovka je totalno propala.

Zimnicu smo ipak spasili

 Sad ste več morti pomislili kak nebu ništ od  naše tradicionalne zimnice evo “dramatičnog preokreta” situacije. Kak Đuro skuplja sve kak hrčak ne odbija ni najmanju količinu koju nude dobri ljudi oko nas.

Kompota i pekmeza od breskvi bu za nas i za celu Ivanjsku vulicu. Naša prijateljica Ana je ponudila nekaj malo breskvi viška (?!) kad ono Đuro docuka dva puna mesarska cekera. Od onih tvrdeših, tzv duranciji, napravila je kompota a sve mekše su završile v pekmezu. Tak se nekaj dogodilo i z kruškama koje je dobila od sina: nekaj v kompot, nekaj v pekmez.

Jan je donesel kantu ribizla od prijatela i to je završilo v pekmezu.“Taj je posebno pikantan i bez njega se nemreju napraviti neki fini kolači”. Znate morti vi koji su to kolači koji se nemreju zamisliti bez toga pekmeza?

Od međašice Dubravke smo dobili kantu crnoga tuduma i opet sledi: “Taj je posebno pikantan i bez njega se nemreju napraviti neki fini kolači”. Mislim da bu ove zime puno baš takvih finih kolači.

Morti nam lepa jesen dozvoli napraviti bar još jednu peku v prirodi

Kuhanje paradajza je pak čist jedna druga priča. Morti se sečate kak sam nedavno napisal da imamo v goricama desetak betvi paradajza. Kojekakvoga: od starinskoga kvrgavoga do dve vrste onoga kaj ga zovu “šeri rajčica”. Najprije smo dugo čekali da naš dozreli jer nečemo jesti onoga kupljenoga koj ima “okus stiropora”. Z dana v dan smo ga brali i jeli ze svim mogučim obrokima. Dok smo se malo zasitili počelo je kuhanje. Kak je dozreval tak smo svakih par dana kuhali po tri-četri flašice. Onda je ona ista naša pajdašica Ana imala viška ne samo breskvi nego i paradajza. “Šteta je hititi pa bum skuhala par flašici”.Vam je poznata ta rečenica? I sad sledi finale kuhanja paradajza. Idemo vam mi prošli vikend z berbe pri kolegi Đuri i kaj nose moja Đuro i naše dve druge pajdašice? Vrečice paradajza naravno. Ste čuli tak nekaj? Idete z berbe gorici a mesto grožđa i mošta nosite najvekšu najlon-vrečicu paradajza. I kaj sledi drugi dan? Kuhanje paradajza naravno. Samo pet-šest flašici. Nek se najde.

Sad si morti mislite kak je to sve? Malo brus. Turšija prvi dio je več v podrumu puna dva tjedna. Z njom je sreča kaj se more dodavati još danima posle sve ono kaj turšija zahteva. Do sad je Đuro uspela hititi v ocet vugorke, papriku, karfiola, češnjaka a verojatno bu još nekaj sledilo. Ja sam predlagal filanu papriku z crvenim zeljem ali je to dočekano na nož:”Jesi ti normalan? Crveno zelje pusti boju i cela turšija  gubi na kvaliteti!” Pokušal sam z ciklom ali je to odbačeno kak “dosta priglupi predlog”.

Kad smo več kod cikle, to tek sledi. Jan obožava ciklu i baka to nemre nikak zanemariti. To buju pak dve-tri flašice ak ne dobimo višak od nekih dobrih ljudi.

Kaj se tiče  mamine zimnice ima nekaj kaj doma fakat malo ljudi dela. Tzv francuska šalata koja se navek delala v našoj hiži. Nema to naravno nikakve veze  z onom francuskom šalatom koja se dela za novo leto i prilog je krmetini. V ovu rečenu se fino narežu zeleni paradajz, paprika, luk, vugorki pa čak i mrkva. Naravno da se to ni delalo vu litrenim flašicama. Standard je bila flaša od pet litri.

Več ste pomislili kak se pri nama doma ne dela ajvar? Prevarili ste se. Več je napravljen pred više od tri tjedna v čisto primerenim količinama.

Za kiselo zelje još ni došlo vreme a za repu je vreme baš sad nekak v ovo vreme. Svojedobno sam napisal kak neki vinogradari-gurmani denu repu kiseliti v trop od grožđa. V ovo vreme imate tropa kolko vam volja. Neki od tropa peču rakiju ali ona služi uglavnom kak podloga za neke druge rakije kak je na pr travarica. Mislim da mi nebumo kiselili repu a ak si ju baš poželim bumo ju kupili pri nekoj proverenoj kumici  na placu.

Čekam koline

Za mene ona prava zimnica počinje otprilike za mesec i pol dana. Ak se malo dulje sečate v to je vreme počel sindikat z “akcijom svinjske polovice” ili se krenulo v potragu za pravim hranjenikom od kojega se more kojekaj napraviti: od šnicli, krmenadli, špeka i šunke do pravih podravskih delicija kak su  čurke, prezvuršti i kobase.  I čvarki naravno. No pri meni je v ovih zadnji par let situacija nekaj malo drukčeša. Zgubil sam partnera, pravoga i dobroga mesara je teško najti i moram se snalaziti na sve mile načine. O tome sam vam več nekaj napisal prošlo leto a mislim da bu tak i ovo leto. Jedno je sigurno: od kolini još jedno vreme ne odustajem. Morete vi svakaj kupiti v mesnici, nudiju ljudi i svoje proizvode prek oglasa ali dok si sam doma ne napravim proizvode po našem prastarom receptu nisam zadovoljan. Za koj dan moram početi planirati kaj mi sve treba i to pomalo nabavljati. Nebute verovali ali neke materijale za dobre domače proizvode kak su čurke i prezvuršt, nemrete nabaviti ili morate imati jako dobre veze i mesara od poverenja. Dok dojde vreme za koline bum vam otkril “tajni recept za čurke, prezvuršt i kobase”. Z njim nemrete nikak pogrešiti.

Sve v svemu morete lako zaključiti da je zimnica i dost velki strošek. Nebum sad špekuliral jel se to splati ili ne splati, kakva je kvaliteta i kaj je rešenje. Oni koji imaju vremena, nekaj malo penez i volje buju se sigurno hitili v avanturu “sam svoj majstor”. Sve kaj si sami napravite nekak  se više ceni i slajše je dok se najde na svakidašnjem jelovniku. Barem ja to tak osečam.  

Pondelek

Juha/Glavno jelo: Povrtno-mesni ragu
Desert: Budite sigurni da bu štrukli od jučer

Tork

Juha: Paradajzova juha z rezancima od palačinki; barem paradajza imamo v primerenim količinama.
Glavno jelo: Pečeni krumpir na ploške z par šniti špeka, zdela zelene šalate; dok vam se spoji okus dobro nasoljenoga krumpira i upije okus špeka to vam je prava delicija.
Desert: Tu svakak paše lagani gemišt

Sreda

Juha/Glavno jelo: Čušpajz od kelja z kranjskima
Desert: Morti čaša reskoga mošta?

Četrtek

Juha: Juha od ribane mrkve, celera i krumpira
Glavno jelo: Dinstana pileča jetrica, kuruzni žganci
Desert: Našla se bu nekakva vočkica

Petek

Juha/Glavno jelo: Čušpajz od mladoga graha z malo podinstanoga mesa; vele ljudi da je skupe kak dragi kamen al bum se hitil v tu investiciju. Z tim grahom je dobar i pretepeni grah.
Desert: Žemljača

Subota

Mislim da bum i ove subote dobro prešel. Na današnji dan je berba pri kumiču Vilku, sinu mojega pokojnog kuma Fjake. Ja bum se našel v ulogi kuhara ili da bum precizneši: bum zgotovil gulaša i pobrinul se da buju svi težaki zadovoljni. Za kompletni jelovnik  se bu pobrinula kuma Neda. Z tom berbom završavamo ovoletnje berbe unutar naše klape.

Nedela

Juha: Lagana pileča juha z rezancima
Glavno jelo: Pohana piletina, rizibizi, šalataDesert: Štrukli z jabukama; to bu sad nekaj novo jer je Jelena uspela nabaviti kore za štrukle od bezglutenskoga brašna pa to sme jesti i Đuro.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.