Moj profil
A kaj da danas kuham? (539)
A kaj da danas kuham? (539)

A kaj da danas kuham? (539)

Znate da ja nemrem bez muzike pa me je jedan događaj v mojoj Podravini izazval da se još malo zadržim na toj temi. Naime neki je dan završil tradicionalni festival v Pitomači „Pjesme Podravine i Podravlja“. Dve večeri su zaljubljenici v podravsku, rekel bi i kajkavsku popevku, mogli uživati v prelepim negdašnjim popevkama ali i v ovim najnovešim. Ja sam se pak prisetil dvojice naših velkih podravski autora: Marijana Jergovića i Drageca Britvića. Marijan je zadužil nas Podravce pa i Slavonce a Dragec je pak zadužil sve poštovatelje lepe reči širom Lepe Naše.

Podravina lepa naša

Gospona Marijana Jergovića nema več punih jedanajst let al je njegov trag ostal za navek v srcima svih zaljubljenika širom Podravine al i pri svim kajkavcima kojima je stalo do lepe reči i lepe muzike. Pitomački doktor je godinama lečil ljude od kojekakvih zdravstvenih tegoba al je znal i napuniti dušu z prelepim popevkama v kojima je opisal sve lepote ovoga podravskoga kraja i dobrotu ovih vrednih ljudi. Bil je veran svojoj Pitomači i Podravini i nije čudo da se njegovo stvaranje ceni i danas dok ga više nema. „Pjesme Podravine i Podravlja“  se nemreju zamisliti bez njegovih popevki i svakak je jedna divna gesta organizatora da se prva večer toga festivala posvečuje baš njemu po nazivom „Čuvar uspomena“. Tu sam popevku čul davno na radiju  al sam ju štel imati i v svojoj diskoteki. Snimljena je 2009. v Croatia Recordsu na albumu „Sanjaj me“ đurđevačkog benda „Licitari“. Nebute verovali da sam ju nabavil prek veze i to od Kreše Kovačevića, pjevača koj je bil v to vreme frontmen Licitara. I samo usput: Krešo je sin mojega šulkolege Jože Kovačevića Koče.

Dal sam si malo truda i pogledal kaj je sve to gospon Jergović skomponiral i ostavil iza sebe. Imate kaj i videti. Ono kaj je mene kak staroga Podravca baš zadivilo je ta njegva ljubav prema Podravini i Podravcima. Dok slušate njegve popevke morete mam pred očima imati sliku Podravine, te naše predivne ravnice i prelepih bilogorskih bregi. Moram priznati da za neke popevke nisam ni znal da su njegove. Zbral sam još nekolko naslova koje morete često čuti na valovima naših radiostanici: Moj angelak, Lijepa Podravino moja, Tam gdi zvira kaj, Zbudi se Podravina, Cimbule na dar smo zeli, Čamac na Dravi i k tome dodajte još stotine drugih popevki koje se buju popevale za navek.

Na kraju  ovogodišnje večeri posvečeno gosponu Jergoviću svi su izvođači otpopevali jednu koja me nekak vodi do onoga drugoga velikana hrvatske estrade Drage Britvića. Popevka se zove I kaj, i ća, i što,  kaj je odličan uvod za predstaviti čoveka koj je pisal na svim mogučim našim dijalektima i to jako, jako uspešno.  Njemu sam posvetil jednu priču v mojoj knjigi „Ko to ne voli Podravce“ jer je to sigurno osoba koja je zadužila hrvatsku estradu za sva vremena. Tak skromnoga i samozatajnoga a tak velkoga čoveka, teško je sresti v životu. Jednom sam priliko čul od pokojnoga Zvonka Špišića  štiklec baš o Dragecovoj skromnosti i o tome kak mu je pomogel v njegvim nekim teškim životnim okolnostima. Dragec se je pak svima odužil prelepim stihovima i obogatil našu muziku z popevkama koje se buju popevale još desetlječima a neke buju sigurno postale tradicionalne kaj bi rekli narodne.

Kaj sam sve pronašel od njegvih popevki? To vam je nemoguće sve nabrojiti pa sam se odlučil samo za one koje dobro poznam ili pak one za koje, na moju sramotu, nisam ni znal da su njegve a morti to nisu znali ni oni jako informirani. Obično ljudi zapamte pjevača ili pjevačicu, kompozitora tu i tam a tekstopisce jako retko. Evo nekih fakat jako poznatih njegvih popevki: Golubovi, Kuća za ptice, Maslina je neobrana, Okrećem listove kalendara, Podravino sve bi dao za te, Potraži me u predgrađu, Proplakat će zora, Tebi mama, Zvona moga grada, Okraj jene hiže i još puno, puno toga. No moram vam otkriti tri koje su meni posebno drage i koje su za mene baš pravi evergrini koje morem navek i v svakoj priliki slušati.

Stareši poklonici muzike se buju setili prelepe šansone „Zadnji fijaker“. Tu vam je popevku popeval, il bolje reči odrecitiral, Viki Glovacki legendarni voditelj, komičar zagrebačkoga Varijetea. Stari se Zagrepčani sigurno sečaju kak je taj fijaker stajal pred Glavnim kolodvorom još tam početkom šezdesetih let prošloga veka. Ak to niste još čuli malo prosurfajte i mislim da vam se bu ta priča o zadnjem fijakeru jako dopala. Dok pak nekoga pitate koja je najpoznateša popevka Radojke Šverko, verojatno bu večina rekla „Kud plovi ovaj brod?“. Ja pak imam drugoga favorita. Zove se „Još mirišu kušini“, popevka koja vam mam dočara atmosferu našega Jadrana. Morti je mali problem kaj baš svi kajkavci ne razmeju sve dalmoške reči al Dragecov prekrasan tekst moraju svi osetiti.

Ona kaj je mnogima pa i meni posebno prirasla srcu je popevka „Svirci moji“. Čul sam ju bezbroj put i još mi je navek lepa i poučna. Imate puno verzija al mi se nekak čini da je Kičina morti najbliža onome kaj ja od te popevke očekujem. Doduše i Bogdanova je jako dobra jer je nekak i napisana v njegvom stilu. Znate več: svaka Bogdanova popevka je mala priča ako ne i roman.

Nesmem biti nepravedan prema Podravskim mužikašima, bendu koji letima širi podravski melos, imaju puno svojih popevki za koje takaj nisam znal da su baš njihove. Ako internet govori istinu ti naši mužikaši su autori dve prelepe popevke koje svaki Podravec sigurno dobro pozna: Tri ljubavi i Podravska zvona. A da me nebi  koj cepleni Podravec kaštigal bum svakak spomenuti i „Podravsku krv“ Vladimira Smiljanića koja je skoro pak podravska himna kak i „Podravino moja mila“. Znam da mi ni baš uspelo nabrojiti sve kaj je spopevano o našoj lepoj Podravini  al bi prosil one koje tak nekaj zanima nek malo pregledaju i poslušaju na internetu kaj sve to imaju Podravci i verujte da ne zaostajemo v bogatstvu melosa za nikim v Lepo Našoj. Svojevremeno sam čak urgiral na CMC-u da puštaju malo više kajkavske muzike a znate kaj su mi odgovorili? Nekaj v stilu da naši bendovi ne šalju dost snimki kak to delaju Slavonci i Dalmatinci. Sad jel to istina nek sam bog zna.

Baš zato sam negda malo i žalosten a znam da moremo to promeniti z malo dobre volje i malo više prodornosti. Naime kaj. Svi nas nekak prestignu, malo su brži od nas i imaju kojekakve „brendove“ samo zato kaj su se setili da ima nekaj kaj se zove marketing, kaj se zove reklama i funkcionira po sistemu „ko prvi njegva djevojka“. Oni kaj me malo više prate znaju da sam več nekolko put pisal o tome. „Fkrali“ su nam prge, štrukle, mlince i kojekaj drugo samo zato kaj su se prije zbudili nego mi. Podravska je kuhinja od navek bila bogata, imali smo odlične kuharice a tek su se nedavno zbudile Podravčice i počele se ozbilneše baviti z našom podravskom gastronomijom. Setite se samo gde su bili Zagorci ze svojim „kiselišom“ dok smo mi imali več jako dobru kapljicu. Danas imaju nekolko jakih vinogradari i brendova a mi smo se zbudili  tek zadnjih par let. Nadam se na vreme i na duge staze.

Kak bilo da bilo, Podravina ostaje v srcu a oživela bu baš nekak v sledečih dva-tri tjedna. Pred nama je jesen, berbe gorici su več pomalo počele makar nam ovo leto i priroda baš i nisu bili naklonjeni. Kak bu to sve završilo bum vas na vreme obavestil.

Pondelek

Juha: Nema je danas jer je tak zaželela Đuro i predložila ovo
Glavno jelo: Omlet šunkom i zdela zelene šalate
Desert: Sigurno bu ostal nekakav štrukl od jučer

Tork

Juha: Najte hititi vodu od knedli. Dodajte vrhnje i začine i zakuhajte nekakvu testeninu
Glavno jelo: Knedli šljivama
Desert: Tu vam desert ne paše

Sreda

Juha: Povrtna juha
Glavno jelo: Frigane sardelice; dodal bum samo nekakvu šalatu
Desert: Čaša vina

Četrtek

Juha/Glavno jelo:Čušpajz od vugorki, kranjske
Desert: Voče

Petek

Juha: Juha od kopra z krutonima
Glavno jelo: Faširanci i špagete na šalši; morti vam ne zgleda bogznakakva kombinacija al si je to zaželel Jan
Desert: Smuti od kojekakvoga voča

Subota

Dok bute ovo čitali ja bum imal berbu v kojoj bu jedna jako interesantna ekipa: naša veteransko-penzionerska i ona Janova studentska
Aperitiv: Rakijica ili nekakav likerček za moje dame
Predjelo: Kak i navek v mojoj berbi: moja pašteta, hladni narezak, klipiči i sve kaj nudi naš vrt v goricama
Juha:Pileči ragu z noklecima
Glavno jelo: Pečeni svinjski bunceki i bogata rebarca, pečeni krumpir i šalata od friškoga zelja
Desert: Dve vrste diganci: od maka i ružički; gemišt i kava se podrazumeva

Nedela

Obzirom da drugi dan ima puno posla oko podruma i čiščenja kleti posle berbe obed drugi dan ovak zgleda:

Predjelo: Ostanjki od jučer
Juha: Ostanjki ak bu kaj ostalo
Glavno jelo: Ostanjki od jučer; toga navek malo ostane
Desert: Ostanjki od jučer

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.