Moj profil
A kaj da danas kuham? (533)
A kaj da danas kuham? (533)

A kaj da danas kuham? (533)

Neki sam dan pisal za Podravski zbornik jedan tekst o svojemu kvartu tam pedesetih i šezdesetih let prošloga veka i došel do malo zabrinjavajučeg saznanja. Uspel sam v nekolko vulici svojega kvarta nabrojiti svega pet-šest ljudi koji su v to vreme rođeni i još navek tu živiju na istim adresama. Neki su morti napravili na falačecu svojega grunta novu hižu ili obnovili staru. Naravno da su svi ti ljudi v jako ozbiljnim letima i nekak mi se činilo da moram zapisati koju reč z tih vremena.

"Opusteli kvart"

Posebno me na zapisivanje sečanja potaknulo vreme do moje mature 1963., jer su mi stanovniki i događaji v tom kvartu nekak najbolje ostali v pamčenju. Sledečih sedam let sam uglavnom manje više bil  gost vu vlastitom gradu i dok sam se 1970-te zaposlil v Podravki to je bil čist drugi kvart meni pomalo nepoznat. Nije bilo Slavenovog igrališta, negdašnji vrtovi puni voča i poljoprivredne površine su se pomalo pretvarale v industrijske zone, bilo je sve više auti i kamioni, pojavili su se neki novi ljudi.

Slavenovo igralište

Tom starom igralištu se navek rado vračam v mojim sečanjima iz jednostavnog razloga kaj je to sva ta leta bil naš dnevni boravak skoro vu doslovnom smislu reči. Ni baš bilo nekakve velike mogučnosti za zabavu vu slobodno vreme a igralište nam je bilo otprto “od ve do ve”. Ideš v školu v jutro popodne si na igralištu. Ideš v školu popodne na igralištu si v jutro. Popodne je Slavenov trening kojega nesmeš prepustiti jer imaš v živo prilike videti svoje uzore i skupljati lopte dok odleti prema klanjcu ili čak do Ivankovičevoga vrta. Našeg dragog prijatela Česku, Slavenovog centarfora, smo znali svojedobno zafrkavati da je imal tak jakoga šuta da je mogel stepati ruške na Plantičevom vrtu.  Onda je došlo vreme da i mi klinci krenemo v nogometne vode. Več z desetak let smo počeli trenirati v supionirima a treneri su nam bili gospon Tomljenović, veliki zaljubljenik v nogomet i Slaven, i Vino Zember nedavno preminuli veliki koprivnički sportaš, legendarni igrač Slavena i pedagog. Zadužil je koprivnički sport i iskreno me razveselilo kaj bu jedna koprivnička školska dvorana nosila njegovo ime. Drago mi je kaj sam pred tri lete o njemu napisal jedan prilog v našoj knjigi “Maturanti staroga kova 6”.

Ja se v nogometu baš i nisam preveč dugo zadržal makar su mi znali reči da imam nekakvoga talenta. Drago Kolarić, legendarni desni half Slavena, me je proglasil za svojega naslednika jer me je imal za volju i jer smo bili skoro pa susedi v istome kvartu. No ta leta v Slavenu su ostala za navek zapamčena kak prelepa druženja z decom ne samo z mojega kvarta nego i z mnogima z okolnih koprivničkih kvartova. Ono kaj je zanimljivo, a o tome svedoče mnogi zapisi v povijesti Slavena, z našega su kvarta bili mnogi igrači Slavena. Mogla se sastaviti odlična ekipa z rezervama samo z našega kvarta  a višak je mogel igrati za gradskoga rivala Lokomotivu. Doduše mora se reči da je bilo i dosta razmene igrača. Ak se neko pokazal jako dobar v Lokomotivi mogel je računati da bu završil ipak v Slavenu. Prelaskom Slavena na novu lokaciju čini mi se da je splasnul i interes za nogomet v našem kvartu.

Znate kaj mi je ostalo v posebnom sečanju z toga vremena? Treče poluvreme “Pri Sajdlu”. Dok smo kak juniori igrali predigru Slavenu ili utakmicu recimo v Peterancu, bili smo nagrađeni z Martinuševim roštiljom “Pri Sajdlu”. Porcija čvapa, ražnjiča ili kombinacija z dve šnite kruha bili su nezaboravna delicija. Za potjeru si mogel naručiti musolini ili čak gemišt. Kaj ti više i treba.

Kulturni život kvarta

Među onima koji su se odrekli “nogometne karijere” bil sam i ja. Čez školovanje v gimnaziji več sam i “ozbiljno” sviral i nekak sam procenil da je lepše biti muzikant nego desni half v Slavenovim juniorima ili čak v prvoj momčadi. To sam več zapisal v svojoj knjigi “Zvjezdana prašina”. Sve je počelo v tamburašima pri koprivničkoj muzičkoj legendi Štefu Miklaužiću Uči da bi onda več krajem osmogodišnje škole napravili “pravi bend”.  Svirali bi na popodnevni čajankama v školi ali prvi veliki javni nastup za koprivničku publiku se dogodil baš v Gornjem Banovcu na pravom plesnjaku pri starešem prijatelu i pjevaču v bendu Bošku Lukaču. Kaj je najvažnije: od šestorice članova benda su čak pet bili z našega kvarta. Jedino je Braco Šimunović bil z centra grada al kak je hodal po mleko v Banovec i njega smo priznali za svojega. V Gradskoj limenoj glazbi su svirala trojica naših sugrađana pod vodstvom poznatog kapelnika Ive Hegedušića. V mojoj je Ivanjskoj vulici se rodil i Ivica Martinčević koj je z već osamnajst let pjeval z našim bendom na moru i to v Opatiji.

Za kino predstave se pobrinul moj sused Boro koje v jednoj zamračenoj komori prikazival “filmove” za decu z kvarta. Delal je kak kinoaparater pa je nekakve falačece filmske trake spajal i prikazival nam prek nekakvoga aparata. Za ekran je služil beli zid v tok komori.

Bilo je i pravih kazališnih predstava v dvorištu obitelji Unger. Nekaj od nas stareša gimnazijalka Vlasta donesla je tekst “Umišljenoga bolesnika” okupila još nekaj dece z vulice i odigrala predstavu koja je bila za nas prava senzacija.

Stareši Koprivničanci, posebno gimnazijalci, se buju setili našega profesora Kazimira Sabola koj je v svakoj priliki znal naglasiti svoje ivanjsko poreklo i jako je držal do tradicije i ivanjskoga folklora. Tam negde polovicom pedesetih je organiziral prikaz ivanjskih svati z kvartovskom decom. Nabavil je ivanjske narodne nošnje, osmislil ceremonijal prema pravim ivanjskim svatima i dodal limenu glazbu bez koje se negda nisu mogli zamisliti svati v Ivancu al i drugim selima koprivničkoga kraja. Ti svati su bili dio “Zimskog cvetnog korza” koj je prodefiliral po celome gradu a sve se na kraju odigravalo v centru grada kod današnjega poglavarstva.

Mali ivanjski svati na “startu” v Gornjem Banovcu. Iza barjaktara je prof Sabol i njegova asistentica učiteljica Dunja Vladić. Glazbena pratnja je tadašnja Gradska limena glazba pod vodstvom Ive Hegedušića.

Bum vam otkril jednu malu tajnu nakon šezdeset i nekaj let. Kak je taj dan bilo fest zima meni je mama kak barjaktaru skuhala pol litre fest razređenoga vina da morem bolje juškati. Doduše to sam moral podeliti i z ostalim svatovskim glumcima.

I kaj da vam velim. Ljudi se v kvartu jako malo druže, skoro se i ne poznaju, deca se ne igraju po dvorištima skrivači i lovice, neka puca je zaboravljena igra. Nemam pojma kolko se družiju susedi ili sam jako neinformiran. Nekak mi se čini da smo se otuđili i sve završava na slučajnim susretima i z onim “Dobar dan, kak ste?” A da je korona sve to još malo pogoršala netreba ni spominjati. No nebumo očajavali. Treba se okrenuti prema sutra.  Znare onu: Ak od života dobiš limun napravi od njega limunadu!

Dok ovo pišem baš je jedan teški dan, sparina je, a prognoziraju nam par vručih srpanjskih dana.Bumo mi to sve zdržali samo ak se malo bolje organiziramo. Naravno mislim na iče, piče i hladovinu. Izbegavajte teške fizičke posle. Uživajte!

Pondelek

Juha/Glavno jelo:Povrtno mesni složenac; tu nema posebnoga recepta osim da imate dost povrča i pogledajte v škrinji kaj imate od mesa.
Desert: Naravno: rolada od jučer

Tork

Juha/Glavno jelo:Špagete na šalši; šalšu slažem v malo vekšoj količini i dio potrošim a dio zamrznem. Tak mi je obed goton za dvajst minut.
Desert: Zdena lubenica/dinja

Sreda

Juha/Glavno jelo:Čušpajz od vugorki i faširanci; mesto faširanci morete skuhati par kranjskih ili hrenovke
Desert:Kuruzna zlevanjka

Četrtek

Juha: Juha od ribane mrkvice, celera i krumpira
Glavno jelo: Pečena svinjska rebrica, krumpir na ploške, mešana šalata
Desert: Malo pivo

Petek

Juha/Glavno jelo: Oslič ala bakalar
Desert:Jako retki zdeni gemišt

Subota

Sutra imamo v Mirnom dolu jedan fakat važan događaj o kojem vam bum nekaj napisal drugi tjedan. Samo za informaciju jelovnik bu verovatno ovak zgledal:

Predjelo: Od svega pomalo
Glavno jelo: Mešani roštilj z kojekakvim prilogima
Desert: Nekakav kolač i naravno gemišta kolko buju gosti raspoloženi

Nedela

Juha: Juha od pilečega sitniša z vrhnjem
Glavno jelo: Pohana piletina, rizibiziDesert: Rolada od kostanji; nebute verovali al Đuro ima v škrinji još nekaj kostanj-pirea od prošle jeseni

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.