Moj profil
A kaj da danas kuham? (531)
A kaj da danas kuham? (531)

A kaj da danas kuham? (531)

Nadam se da vas prošli tjedan nisam preveč „razočaral“ z onim tekstom a srpnju al mi se iz dana v dan čini da sam baš nekak pogodil tu atmosferu toga vručega meseca. Moji penziči, koji takaj imaju slična razmišljanja kak i ja, z menom su se složili i skup smo se prisetili nekih naših ranijih leta života i zanimacija v srpnju. Naročito komentiramo i uspoređujemo prirodu negda i danas. A verujte da se je priroda jako promenila.

Sezona kiselih krastavci (?!)

Ite prosim vas lepo. Ko je to zmislil? Tu foru nam prodaju novinari več desetlečima a ak malo bolje prelistate novine i prosurfate po internetu bute skužili da nema nikakve razlike između vesti prije mesec-dva i v ovo letnje vreme. Novinari i “novinari” jednako donose i prije i sad, i one jako ozbiljne vesti ali bome i vrpu kojekakvih “veliki novosti” i tračeva najgorše vrste. Navek se najde događaj koj bu zainteresiral konzumente svih fela, kak v sečnju tak i v srpnju. Ak pitate mene svakidašnji ritam aktivnosti  mi je furt jednaki, svaki mi se dan čini jednako interesantan i ispunjen kojekakvim zanimacijama. Prošli sam tjedan napisal kak mi majstori hodaju po krohu, a činilo mi se da hodaju i ružiju po mojoj glavi al i to je prešlo. Dva-tri dana nakon  majstori več sam imal kojekakve nove zanimacije, kak je na pr. čiščenje dvorišta ili usisavanje hiže kaj su na opče zadovoljstvo napravile Đuro i Irena. Sad se hičem na gorice v kojima je malo drukčeši ambijent nego je to naša hiža. Nekak se lakše diše i podnosi ova žega. Dok bute ovo čitali morti bu se promenilo i vreme. Puno onih kaj sam ovih dana nazval su mi se javili da uživaju na moru, neki se spremaju tek krenuti a neki buju krenuli malo severneše prema Šoderici. Svojevremeno sam napisal tekst po naslovom “Zakaj opče iti na more?”, a tak mislim i dandanas. Znam ja da “iti na more” lepše zvuči al se pitam kaj fali Podravini i koprivničkoj okolici. Imamo bazen, imamo Šodericu, imamo Dravu, oaze zelenila i svežine v goricama od Ludbrega do Virovitice. Imali smo Podravske motive, prvi dio, ovih se dana sve na veliko svira v centru grada gde vladaju vrsni jazzisti a vidim i kojekakve najave kulturnih događanja sve do kraja leta.  Sve po sistemu za svakoga ponekaj.

Sad si morti mislite da sam jedan od penziči koji kritiziraju godišnji na moru zato kaj si to nemreju privuščiti? Ni govora. Sigurno bi se našlo nekaj kuni za desetak dana na moru, tim više kaj imam pozive od prijateli gde bi mogel prejti skoro zabadava. Osim onih radova kaj sam več spomenul imam još za obaviti nekakvoga sličnoga posla ala maleraj ali je tu v pitanju nekaj čisto drugo: zasičenje z godišnjim na moru! Ne sečam se da sam preskočil ferje na moru kak školarec zahvaljujuči tome kaj smo imali velke prijatelje i kumove v Kaštelima a kak muzikant sam provodil na moru od tri do šest meseci na Jadranu rekli bi “od Sušaka pa do lipe Boke”. Imal sam pauzu samo dok sam bil vu vojski i ona dva najgorša leta za vreme rata. Več tam 1992. smo mogli  na severni Jadran i tak sve do pred par let dok se je zmešala viša sila. A znate kak sam ja provodil ove familijarne godišnje zadnjih dvadesetak let? Uglavnom sam v jutro išel v nabavu namirnica za kuhanje, kuhal sam, kartal z našim Dalmošima i morti se tu i tam okupal. Ruku na srce to sve morem delati i doma. Sve v svemu more mi ne fali, zanimaciju si navek najdem a opuštam se dok ja to oču. No ne baš dok ja oču jer je tu i Đuro. Znate i sami da negda morate osluhnuti kaj oče i vaša životna partnerica.

Lakša kuhinja

Sve se ovih dana ipak svodi na to kak da si najdemo osveženje na kakvom mirnom mestu v stanu, hiži ili kleti, sa ili bez klime, ali je nekak važneše kak pripremiti osveženje v kuhinji a da dugo ne stojite za šparhetom. Dok su bili četri dana majstori v dvorištu, hranili su se sami, uglavnom sam improviziral a Đuro je tih dana čuvala vnuku Tiu pa ni bilo redovitoga obeda kak v normalnim danima. To vam je zgledalo ovak:

  • Kisela juha od želučeki i srci z puno povrča
  • Jajca na luku, papriki i malo špeka ili čak malo recimo šunkerice. Obavezna zdela šalate.
  • Knedli ze škrinje koje Đuro obožava. Ja si skuham par kobasi i narežem jednoga večega paradajza i začinim z koščičnim uljem.

Ima i drugih rešenja na brzinu kak su špagete na bilo koj način. Najčešče su to špagete-milanez. I tu morete dodati malo sitno narezanoga špekiča ili šunkerice/šunke. Rezanci z makom/orehima. Ak očete malo pojačati kalorije v onoj vodi od rezanci napravite juhu z vrhnjem. Naravno da rezanci moraju biti domači.

Kombinacije ze šalatama su sve moguče: mešane šalate od svega kaj imate pri ruki.

Kuhana jajca ze zelenom šalatom, povrtnicom, z hrenovkama i sl. Ja navek preporučam ovo: ak imate od dan prije pečenje od krmetine, piletine i sl.,  to fino iskoristite za odličan obrok. Narežete meso na rezance i dodate zelenu šalatu, paradajza, papriku ili kaj vam je več pri ruki. Još ak sve to posipate z kakvim dobrim sirom imate vrhunsku deliciju. Verujte da za tim morete itekak popiti čašu dobroga vina.

Stvar je samo v tome kolko očete uložiti truda i mašte. Uostalom na internetu imate svakodnevno vrpe savjeta kaj jesti v ovo letnje vreme.

Dobro došle palačinke

Teško da bute našli nekoga ko rado ne pojede finu palačinku. I tu su kombinacije nepregledne. Morti sam negde več napisal da kak klinac nisam baš bil zaljubljen v palačinke pogotovo ak bi mi ponudila mama nekojega pajdaša v susedstvu. Veroval sam samo v palačinke moje mame. Znate da su se negda palačinke jele uglavnom gole ili z domačim pekmezom. Filane ze sirom i zapečene su več bile oblizeki. Ljudi palačinke uglavnom jedu kak desert makar se moreju koristiti na sve mile načine. Kak desert ih morete filati ze svim mogučim slatkim namirnicama koje znate još od detinjstva. Danas naša Podravka na velko reklamira palačinke ze Čokolinom kakti dobrodošlu promenu okusa palačinki. Ono kaj je več oblizek su palačinke filane z orehima i prelejane z vajnšatoom. Sečam se da smo jemput davno v nekom finom restoranu dobili poslužene palačinke a vajnšato je bil vu velikoj zdeli pa si si mogel grabiti ze šeflom kak juhu. Bil sam negda davno iznenađen da smo dobili pačinke ze sladoledom kaj je posebni gušt baš v ovo letnje vreme. Đuro je često na moru delala tortu od palačinki filanu z orehima i čokolinom i nekakvim pekmezom, čemu su se veselila deca ali ni starešima to ni bilo mrsko ak je kaj ostalo od dece. Samo da znate: takva je torta kalorična bomba. V zadnje vreme Đuro zna napraviti i tzv američke iliti krem palačinke. Njih morete doduše jesti samo posle nekakvoga posnoga obeda jer i one imaju nekaj malo više kalorija.

Ak pak očete od palačinki napraviti glavni obrok i tu ima rešenja. Recimo napravite pohane palačinke. Nafilate ih z mesom ili sirom, zarolate ih kak sarmu i spohate kak i svako drugo meso. Osim šalate tu vam i netreba nekakav drugi prilog. Svojedobno sam spominjal nekaj slično: palačinke filane z sirom i šunkom, prelejane z vrhnjem i zapečene. Mesto kori za lazanje morete koristiti i palačinke samo kaj dodate sve one uobičajene začine za lazanje. Kaj vam treba boljeg obeda od palačinki filanih z dinstanim mesom kak za mesnu pitu, prelijete ih z vrhnjem i zapečete. I tu vam netreba nikakav prilog osim puno šalate.  Mogli ste več videti da ja od palačinki delam i sušim rezance za juhu ali friške rezance od palačinki koristim mesto mlinci z purom, racom, picekom ili bilokojim drugim pečenjem. Razlog znate: Đuro ima problema z glutenom a dobre palačinke se moreju napraviti i z bezglutenskim brašnom.

A kaj je z pičem? Pri nama doma smo uglavnom na vodi i retkim sokovima. Srečom kaj imamo dost sirupi pa moremo malo menjati: od koprive, bazge, maline,kupine, kruške, aronije, ribizla, a morti sam nekaj i zaboravil.

Morti nebute zadovoljni al bum ovaj tjedan fakat preporučil lajt kuhinju.

Pondelek

Juha/Glavno jelo:Pileče-povrtni ragu; zmešal bum pileče želučeke i srca, mrkvu, mladoga krumpira i šaku graška

Desert: Naravno pita od jučer

Tork

Juha: Prežgana juha
Glavno jelo: Zapečene palačinke z mesnim nadjevom; zdela šalate
Desert: Z tim bi morti pasala zdena pivica

Sreda

Juha/Glavno jelo: Čušpajz od tikve z hrenovkama; ako očete malo jakšu aromu na luku prodinstajte par falačevi špekiča
Desert: Zdena dinja; narežite na kockice i prelijte z malo ruma

Četrtek

Juha/Glavno jelo: Pileči rižoto, mešana šalata
Desert: Vočna šalata

Petek

Juha: Juha od osliča z rižom
Glavno jelo: Kuhani oslič, blitva i krumpir
Desert: Jedan lagani pol-pol

Subota

Juha/Glavno jelo: Špagete milanez, šalata od zelja
Desert:Zdena voda; imamo furt vu škrinji flaše z ledom tak da ne oskudevamo ze zdenom vodom

Nedela

Juha: Povrtna juha
Glavno jelo: Pohani šnicli, pire, zelena šalata
Desert: Štrukli od kruški; imamo puno kruški koje brzo propadaju pa ih bumo iskoristili

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.