A kaj da danas kuham? (524)

Zaboravljeni recepti Podravine

Pred par let sam imal jedno izlaganje v našoj Knjižnici “FG” na temu “Podravski zimski jelovniki” i verujte da su ljudi to jako dobro prifatili. Pogotovo je bilo lepih spomenki nakon izlaganja oko maloga švedskoga stola  a sve je još bilo nekak življe z čašom portugisca mojega pajdaša Tonča. Oni koji me malo bolje poznaju buju se setili da sam taman pred koronu predstavil svoju knjigu “Ko to ne voli Podravce?” v kojoj sam se malo “požalil” na odnos “grešnih struktura” prema Podravini i Podravcima ali sam isto tak zapisal puno lepih reči o koječemu kaj nam pruža naša Podravina. Da sam pisal o Koprivničancima, našemu lepome gradu Koprivnici i njezinoj okolici najte ni sumljati. Kak je čovek stareši tak sve više oseča sve vrednosti svojega rodnoga kraja i njegovih vrednih ljudi. Nekak se nadam da smo na početku jednoga bolšega vremena v budučnosti i da dolazi naše vreme za borbu za vrh tablice.

Od kud početi?

Pred dva sam meseca nekaj napisal  o Društvu Dravski peski z Kloštra Podravskoga jer sam baš bil sretan kaj su krenule na oživljavanje zaboravljenih recepti z podravskoga kraja  a sad sam još sretneši kaj su taj velki posel završile i kaj je film dostupan ljudima i svakom gurmanu na internetu a verojatno bu i javnih prikazivanja na veselje svim zaljubljenikima v podravsku kuhinju. Film je fest dugi, ima se fala bogu kaj i za pokazati, i treba si zeti malo vremena da se pogleda onak baš pažljivo. Samo prelepe slike naše Podravine su več hrana za oko a sve podravske delicije  su pak nekaj posebno. Nemam nameru ovaj put pisati o detaljima  filma, to morate doživeti sami, ali se bum podsetil nekih papica koje sam upoznal još kak dete, v njima užival, a i dandanas ih poželim na svojem stolu.

Prvo sečanje na tu “zaboravljenu kuhinju” je naravno na bakinu i maminu kuhinju. Teško bu danas deci z devet-deset let dočarati lepote i vrednosti te stare kuhinje jer oni danas fakat imaju sve “kaj im srce poželi” ali mi je z druge strane drago kaj buju počeli otkrivati jednu pravu, zdravu kuhinju koja je morala dojti pak v modu, jako je poželjna i prihvatljiva za nas stareše al iza  mlade naraštaje. Ono kaj se bu pak počelo jako ceniti su friške namirnice. Lepo je imati frižidera  i škrinju, lepo je videti onu neverojatnu ponudu voča i povrča v trgovačkim centrima, al verujte da sam puno zadovolneši z onim kaj nudiju sve mnogobrojneši OPG-eji. Naravno ak su pravi i ne kupuju na veletržnici v Zagrebu od mešetari ili meso nekolko put odmrznuto recimo  z Poljske.

Kak klinac nisam mogel svatiti veličinu bakinog i maminog kuharskoga umječa, dok mi je danas jasno da su zapraf znale “z ničega napraviti gozbu”. Več sam pred par meseci napisal da je baka Jela v Ivancu imala ogroman vrt  z nebrojenim gredicima na kojima je bilo baš sve kaj ti treba za jednu velku familiju, za zdravu i raznovrsnu kuhinju  i kaj je najvažneše sve je to bilo redovito okopano i oplevljeno jer se za nikakva sredstva zaštite nije ni znalo. Tak je bilo vu vrtu i pri nama doma na puno manjšoj površini al čist dost za jednu manjšu familiju. Zapraf nekakvih štetočina nije ni bilo a ak bi se kojim slučajem pojavile zlatice to smo rešili jednu “akcijom” skupljanja štetočina.

Znate kaj me negda ugodno znalo iznenaditi? Kak su naše podravske žene znale biti odlično organizirane dok se pripremal velki obrok recimo doma za svetke, kod velkih radova na polju ili pak dok se pripremalo za svate. Znalo se ko je glavna gazdarica al i sve ostale su znale svoju ulogu v to celom “projektu”. Za tu se reč onda ni znalo. Bil je to naprosto jedan velki posel kojega je trebalo obaviti na zadovoljstvo svih koji buju posle seli za stol. Za svate recimo ni još bilo profesionalnih kuharici i dobro se sečam da je moja mama odlazila par zimi kuhat v Ivanec za svate dok bi se ženile njezine nečakinje. Ona je kakti bila “Marica z varaša” koja zna nekaj više nego žene na selu.

Kaj se tiče podravskoga svatovskoga jelovnika verujte ja ni danas nebi odustal od onoga kak je to negda bilo. Em je bilo bogato, em je bilo odlično pripremljeno em je sve bilo friško jer su se svati delali v zimi, a zime su bile baš onak prave z velkim minusima tak da se hrana ni mogla pokvariti za dva-tri dana. Nekakve novotarije na podravskim svatima kak su hamburgeri i roštilj naprosto ne pašu na podravske svate. Samo primera radi bum spomenul dve “revolucionarne novotarije” na podravskim svatima koje srečom nisu realizirane. Jedan je mladenec v Prekodravlju štel da njegvi gosti dobiju hamburgere koji se buju pekli v nekakvom kiosku pred dvoranom a gosti buju samo dolazili po svoju porciju?! Jedna sam sprečil katastrofu. V drugom primeru sam pak i ja moral sudelovati da se napravi velka glupost. Domačini su naime šteli da na jelovniku buju i čvapi. A znate od kakvoga mesa? Od mesa stare krmače koja je bogica platila glavom samo kaj bu malo više mesa. Znate na kaj su zgledali ti čvapi? Ispale su male crne kuglice koje su sličine na..., znate več na kaj! Netreba delati cirkusa od jedne poznate i priznate kuhinje kakva je naša podravska.

Kaj se ipak menja?

Naravno da trebamo nekaj menjati, novo vreme je došlo i nove namirnice su naprosto dobro došle. To vam morem pokazati na primeru Vegete. Moja je mama fakat jako držala do tradicionalne kuhinje al dok je došla v njezinu kuhinju Vegeta više ni bilo povratka. Juhe i čušpajzi bez Vegete nisu se više mogli zamisliti. Sečam se jedne mlađe pajdašice koja je navek ovak govorila:”Kaj če ti Vegeta v juhi ak imaš puno povrča?” Ona je fakat tak i delala i verujte da su mi njezine juhe bile nekak “prazne”. Z Vegetom se naprosto “bolje jede”. Ak se očete v to uveriti napravite jemput nekoju juhu bez a onda z Vegetom. Javite mi kakav je bil rezultat.

Morti ste več primetili da znam spomenuti i jušne kocke. Njih imam navek vu frižideru. Ak delam nekakav sos ili saft, v njega hitim jednu povrtnu kocku i imate okus kakav vam treba. Kocku od gljiva morete koristiti v kojekakvim saftovima i pak bute dobili puni okus jela. Naravno da se danas koriste i kojekakvi negda nepoznati začini pa ni nikakav greh tradiciju malo oplemeniti z kakvim novim okusom. Ha čujte negda Evropa ni znala ni za krumpir ni paradajz a danas su to čisto “domače podravske namirnice”.

Nekaj vam moram iskreno priznati makar ste to več mogli prečitati v mojim tekstovima. Podravska kuhinja ima fakat na jelovniku puno testenine kaj meni ni danas baš preveč ne paše. Da bum malo precizneši. Radi se naravno od kuhanim testeninama kak su šiškrli, knedli i debeli rezanci ili recimo debelo ribana kašica.  No zato ne odustajem od recimo tankih domačih širokih rezanci i mlinci.

Ova tema zahteva još barem jedan nastavak al moram detaljno pogledati film. To mi ne smeta da ovaj tjedan splaniram baš podravskoga jelovnika.

Pondelek

Juha: Imam juhu od jučer i bum ju friško zakuhal.

Glavno jelo: Omlet ze šunkom. Zdela šalate.

Desert: Znate da imam diganci od jučer

Tork

Juha:Juha od vode gde bute kuhali krpice; naravno da morate dodati malo vrhnja i dobro začiniti i dodati nekakvu testeninu

Glavno jelo: Krpice zeljem; ja bum dodal falačec nekakvoga mesa

Desert: Dobar bu i domači sok

Sreda

Juha/Glavno jelo: Slatko iliti prisiljeno zelje z paradajzom; ja malo prije prodinstam junetinu od bočinga. To baš ne voli Đuro al volimo Jan i ja.

Desert: Pogačice sirom

Četrtek

Juha: Krumpirova juha

Glavno jelo: Pileča jetrica na saft, hajdinska kaša, cikla

Desert: Nekakvo voče

Petek

Juha: Krem juha od korenastoga povrča

Glavno jelo: Šaran v kuruznom brašnu, grah/krumpir šalata

Desert: Čaša vina

Subota

Ak bumo v goricama onda bu ovak

Predjelo: Prosta pogača (brašno, sol i voda), prga, špek

Glavno jelo: Dinstana svinjska lopatica na češnjaku z krumpirom; to je jako praktično jer denete dinstati meso i malo posle hitite par kockici krumpira da se sve lepo včini.

Desert: Znate i sami kaj bu v goricama

Nedela

Treba skoristiti celoga piceka

Juha: Juha od pilečeg sitniša z vrhnjem

Glavno jelo: Pečeni picek v komadu; morete ga nafilati ze smesom kruha, jetrici, špeka i začina. Tak je delala moja mama.

Desert: Štrukli sirom/črešnjama