Moj profil
A kaj da danas kuham? (523)
A kaj da danas kuham? (523)

A kaj da danas kuham? (523)

Gledam vam ja tak neki dan televiziju v potragi za nekakvim programom koj je svetlosnim letima daleko od politike i ovih prestrašnih “elitnih političara” kad naletim na lepršavu emisiju “Klub 7” z kojom se fakat morete opustiti. Navek imaju bar jedan prilog o hrani, vinu ili nekojem OPG-u koj nudi pun stol obilja.

Nogomet, gastronomija i „Tajer“

I evo ti njega: Dražen Ladić, legendarni golman naše reprerezentacije i njegva familija. Otprli su v centru Zagreba restoran “Tajer”, kak Međimurci zovu tanjura a Dalmatinci bi rekli pijat. Naravno da sam prilog pogledal o početka do kraja. I naravno da sam se podsetil nekih lepih zgoda od pred puno let. Em sam pred sedam-osam let i ja pisal na Coolinariki o međimurskoj kuhinji, em imam nekakva iskustva z Međimurkama.

Morti si mislite da kak sam se ja primil pisati o nogometašima kad sam zadnji put loptu vritnul još na starom Slavenovom igralištu tam negde početkom šezdesetih? Ha čujte. V nogomet se odavno ne razmem al dok se pojavi jedan poznati nogometaš i otpre jedan ovakov restoran a ne kafiča, onda to mora zainteresirati i takve kak sam ja. Konačno več letima pišem kojekakve priče koje moraju biti vezane z dobrom klopom. Osim toga Međimurci su naši prvi susedi, imamo puno toga zajedničkoga pa je to mam jedan izazov.

Ajmo malo više o “Tajeru”. Navek je lepo videti i čuti dok se na takvom poslu pojavi jedna cela familija jer mi se nekak čini da takav posel i more uspeti samo ak si sam svoj gazda. Kak pojačanje su zeli i chefa z Međimurja pa se more čovek nadati da bu sve v tom tonu i da to more biti ponuda i za jako zbirljive goste. V Zagrebu ima jako puno Međimurci, svojedobno su održavali jemput na leto i “Dane međimurske kuhinje”, Ladić je poznata faca, ima puno pajdašije a naravno i puno gladnih znatiželjnika. Samo da se sve ovo oko nas malo smiri pa da i ugostitelji prodišu.

Nekak sam na početku mislil da bu to čisto međimurski jelovnik no dok sam se malo više zainteresiral videl sam da bu to ipak jedna kombinacija:Međimurje i ostali svet. V svakom slučaju čovek ima kaj za zbrati. Ono kaj je sigurno dobro i interesantno da je gazdama izvor nabave namirnica z Međimurja, lako ih je nabaviti jer od Zagreba do nekojega OPG-a v Međimurju ste na vuru vožnje. Tak se recimo race na ražnju nabavljaju na dan dok ih se priprema a slično je i z drugim namirnicama kak su piletina ili sir i vrhnje. Na jelovniku sam našel fakat prelepih domačih jela koja su i pri nama v Podravini često na jelovniku. Ladićeva je supruga pokazala v živo pohanu piletinu na svinjskoj masti koju obožava baš Dražen. Verujte meni da je friška piletima baš tak pripremljena najbolša. Doduše danas ljudi vole pohani pileči file a za mene to moraju biti bocka i lopar. Onda svinjski gulaš s trgancima naprosto mami samo kaj bi ja trgance zamenil z domačim širokim rezancima. Nudiju pileči zagrebački kaj malo odudara od standarda jer znate da se zagrebački dela od krmetine ili teletine. No nek se ljudi sami odluče kaj im je draže. Standard je naravno i meso z tiblice, ono kaj mi Podravci zovemo “meso z lodrice”. Ak se dobro sečam razlika je v tome dal pečeno meso denete v kosanu mast ili ga zalejete z običnom friškom maščom.

Ta se ponuda nebi mogla zamisliti da v ponudi nema pretepene juhe ili graha, da nema jela z hajdinom, recimo z pečenom racom, ili sira z vrhnjem.Plata tajer nudi kak i svaka plata od svega pomalo ali naravno da sve mora biti z pečatom Međimurja. Nije me iznenadilo ni kaj za desert nude međimursku gibanicu i kuruznu zlevanju,

Dok je v pitanju gibanica moram vam spripovedati jednu malu anegdotu o tom kolaču. Naime po mojem iskustvu tri su varijante te delicije: međimurska gibanica, prekmurska gibanica i naša bregovska pita.

Najprije sam imal prilike popapati prekmursku gibanicu, još tam prije rata, v ljubljanskom restoranu “Brinovc”. Ak tam niste za desert pojeli njihovu gibanicu kak da tam i niste bili. Ono kaj je interesantno da ju je pekla naša Međimurka a preporučivala ju je takaj konobarica Međimurka. Međimursku gibanicu ste mogli pojesti v svakom boljem međimurskom restoranu ili, kak je to meni uspelo, v jednoj familijarnoj atmosferi. A bregovska pita? Svaka Bregovka ima svoj “tajni recept” a svojedobno ste ju mogli pojesti i na našem PRC-u. V čemu je štos? Rekel bi Balašević: princip je isti sve su ostalo nijanse. Ja sam si to ovak prevel: sastojci su uglavno isti, ili slični, al je stvar samo v tome ko ju dela i z kolko ljubavi i iskustva. Meni su sve jako fine.

Drugi dio jelovnika  je pak čist drukčeši pa bi rekel čak za mene malo “neobičan”. Nude recimo lazanje, musaku, file od osliča, naravni ili pak biftek v zelenom papru. To fakat morete dobiti i v nekakvom standardnome restoranu širom Evrope, i nekak mi se čini da je to malo z viška. Kaj delaju lazanje ili file osliča v Tajeru?

Jedan bu pak podatak jako zainteresiral one jako gladne. Navodno su porcije ogromne i morti i najvekše v Zagrebu? E sad. Jel to samo trik za početak da privleče goste il bu to postal standard? Nadam se da bum to saznal dok bum imal prvu priliku dojti v Zagreb i v nekakvom ugodnom društvu proveriti dio onoga kaj se nudi kak velka kvaliteta.

Još reč dve o Međimurju

Nekaj me odavno vleklo prema tam. Još puno prije rata sam bil čak i zaručen v Međimurju samo kaj to ne baš završilo z trajnom vezom. Ono čega se jako dobro sečam je jedna divna večera z jednim odličnim predjelom. Bile su to filane palačinke z mesom i sirom, zarolane, panirane i pečene v mašči. Zgledale su kak malo veče sarme.To vam je energetska bomba. Svojedobno je to nudil čak i naš koprivnički hotel. Kad več nisam uspel prvi put uspel sam v drugom braku. Đuro je naime po tati Međimurka i jako voli krumpira, a kak znate, Međimurci su verojatno najvekši proizvođači krumpira v Lepoj Našoj.

Da su Međimurci i jako glazbeno navudreni, opče je poznata stvar. Njihove stare prelepe popevke obrađuju mnogi naši poznati muzikanti, teta Liza je napravila lepu karijeru z međimurskom popevkom, a za Žigu morti i nebi znali da nije zapopeval z bandistima međimurske popevke. Ovih sam dana čul i videl spot čak dve obrade popevke “Ljubav se ne trži niti ne kupuje” i  to od njihovih sjajnih opernih pjevačica poznatih i priznatih i doma i vu svetu. Na CMC-u morete skoro svaki dan čuti kak to popeva lepa, mlada Marija Vidović.  Žigini “Kajkavci” su pak na prelepi način povezali sva tri severozapadna kraja: Međimurje, Zagorje i našu Podravinu.

A ste morti znali da je negda i Legrad bil v Međimurju? Priroda se malo poigrala pak je Drava prešla malo severneše od Legrada samo kaj to naš dragi pajdaš Čvrknja nigda ni štel priznati jer je štel biti samo Podravec a ne Međimurec. Morali smo svojedobno v pomoč pozvati nekaj stareše Legrađane i stručnjake kak bi tu povijesnu činjenicu raščistili.

Prošli sam tjedan čak bil v Međimurju samo kaj to ni tema za onu kolumnu.

Pondelek

Juha: Višak juhe bum imal od jučer samo ju bim zakuhal z friškom testeninom
Glavno jelo: Dinstana pileča jetrica, hajdinska kaša, zelena šalata
Desert: Nekakav sok

Tork

Juha: Krumpirova juha;
Glavno jelo: Pohana piletina, krumpir pečen v onoj mašči od pohanja, šalata
Desert: Jagode šlagom

Sreda

Da ugodim Đuri koja obožava krumpira nek bu danas ovak
Juha: Prežgana juha z jajcima i krutonima
Glavno jelo: Francuski krumpir; za Đuru mora biti puno vrhnja jer kobase uglavnom završe pri meni v tanjuru
Desert: Ima v podrumu još nekaj flašici kompota od breskvi i kruški

Četrtek

Juha/Glavno jelo: Svinjski gulaš z trgancima ili kroketima od krumpira
Desert: Kuruzna zlevanjka; po mojoj želji Đuro ju dela tanku z dost pekmeza i vrhnja


Petek

Juha/Glavno jelo:Pretepeni grah; ja ga bum malo oplemenil z nekakvim falačecom suhoga mesa

Desert: Zemljača; morete ju napraviti od staroga beloga kruha ili od žemlji

Subota

Mislim da bumo otišli malo na zrak v Draganovec pa bum praktičan

Predjelo: Namaz od graha i malo nareska; od viška ščerašnjega kuhanoga graha bum napravil namaz ili ak baš očete paštetu od graha.
Glavno jelo:Još se kolebam između peke i kotlovine; v svakom slučaju bum zmešal bar dve vrste mesa. Recimo: piletinu i krmetinu z puno povrča
Desert: Gemišt i ništ drugo osim gemišta

Nedela

Juha: Juha od junečega repa z rezancima
Glavno jelo: Kuhani rep, pire, koparsos
Desert: Diganci z makom; ako se baš očete igrati, i imate vremena, spečite međimursku gibanicu pa ste rešili desert za bar dva dana.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.