Moj profil
A kaj da danas kuham? (521)
A kaj da danas kuham? (521)

A kaj da danas kuham? (521)

Prošli sam tjedan ostal malo tajanstven i nisam štel otkriti baš sve karte za jedan događaj prošlog vikenda. No sad kad je sve prešlo morem napisati koju reč makar bum i sad malo oprezno napisal nekolko rečenica i v ovom tekstu.

Okrugli rođendan

Sad bi ja imal vama kojekaj za reči al zbog mira v kuči bum neke stvari malo prešutel. Naime kaj. Mi smo vam prigodno mesto Prvoga maja skromno obilježili jedan veliki okrugli rođendan al ni za boga nesmen spomenuti kolko je okrugli samo vam morem otkriti da je rođendan imala Đuro, moja zakonita. Konačno vele ljudi da to i ni pristojno dok su v pitanju gospođe a i neznam kaj bi ja to mogel profitirati da otkrijem tu brojku “gradu i svetu”mojim Koprivničancima i svim Coolinaričarima. Nek to ostane vaša i moja mala tajna.

Daklem znali smo da nema nikakvoga velkoga okupljanja, nesmemo na taj dan zvati sve svoje drage prijatele z kojima smo se okupljali desetlečima. Odlučili smo se za najužeši obiteljski krug: deca,vnuki i dve najbližeše rođakinje. Taman nas je bilo tolko kolko stožer dozvoljava da se na friškome zraku sme okupiti ljudi. Na ruku nam je išlo i vreme jer je prošle subote fakat skoro celi dan bilo lepo vreme pa čak v jednom momentu i vruče tak da smo se za obed morali povleči v klet. I tu smo napravili odstojanje: žene i deca v jednoj a nas nekolko muških v dugoj prostoriji. Sve v svemu jedan lepi sunčani dan v našem Draganovcu, v Mirnom dolu, nekolko vur provedih z najbližima tak da se taj dan baš ne zaboravi. Več smo letima planirali proslaviti Đurin rođendan no kak je praznik rada v klapi bila dugogodišnja tradicija imal je nekak prednost. Moj kum Fjaka kak starosedilac nigda ni bil za spajanje svetki i sličnih prigodi. Sad se baš nekak poklopilo da spojimo i jedno i drugo. Verojatno vas zanima kaj smo blagovali? Ha čujte. Nismo mogli sedeti baš samo z kanapeima kak bi to rekel Atač. Bilo je tu svega pomalo.

Predjelo: meso z lodrice, naša domača buđola, domače kobase, prge, sir z vrhnjem i svi oni dodatki kaj z tim idu. Dodatak su naravno bili klipiči i dve tri vrste kruha.

Glavno jelo: da ne izneverimo prvomajsku tradiciju bila je naravno roštiljada. Bilo je tu od klasike do nečega novoga: čvapi, ražnjiči, pljeskavice pa onda krmeča fino rezana rebra i tzv rolice. Rolice sam delam od vratine,  špeka rezanoga kak flispapir i štapiči trdoga sira. Kak i na našem prvom proljetnome roštilju pak smo spekli nekaj punjenih šampinjoni i lepinji na žaru.

Desert: V to se nisam mešal. Glavnu reč su imale Đuro i Jelena. Đuro je napravila žutu mađaricu, baklavu ala Đuro, kifli z lešnjakom i salamu v oblatnu. Jelena je naravno dodalu rođendansku tortu z jagodama i jedan vočni kolač kojemu neznam ni ime. Naravno da je bila kava, kojekakvi sokovi jer su glavni gosti bila deca, i naravno za starešu gospodu par gemišti.

Sve v svemu bilo je tu za svakoga ponekaj jer nedaj bože da nam bilo ko od gostiju ode doma gladan ili žedan.

Da slučajno ne zaboravim. Negde pred kraj dana Zagreba je dospel i Atač tek da čestita godovnjači, pozdravi ekipu i nazdravi z čašom vina  slavljenici. Malo je zakasnim na friški roštilj ali verujte da ni ostal gladan.

Neznam kam bi od posla

Pred par dana sam več počel „kukati“ kak ima sve više posla oko prirode v goricama i oko kuče i verujte da je baš počela sezona intenzivnih radova. Več sam treči put kosil doma a tolko put je Jan pokosil v goricama. Sledi nam zaštita mlade loze a doma treba srediti tri vrste živice oko kuče i v dvorištu koja nenormalno buja. Za to barem jemput na leto moram zvati i ekipu profesionalci obzirom da je to za Đuru i mene prevelki zalogaj v ovo doba proletnoga umora. Posle bu to ipak malo lakše. No ima i kojekakvih drugih obaveza koje moram obaviti. Kak i zadnjih osam let krenuli smo v našoj udrugi na prikupljanje priloga za novu knjigu „Maturanti staroga kova 9“ kaj baš ni jednostavno ni lako. Znate več: nema okupljanja v živo, treba skupiti adrese, telefone i mailove ovogodišnjih slavljenika z pedeset let od mature a to je v današnje vreme dost velki problem. Prošlo smo se leto snašli, knjiga je ugledala svetlo dana zakašnjenjem od četri meseca ali nismo prekinuli tradiciju. Malo nam pomaže zadnje iskustvo pa se duboko nadam da bumo sve deli na vrpu do kraja lipnja. Največi je zapravo problem kaj nema onih tradicionalnih proslava mature na kojima moremo knjigu predstaviti i naravno prodati više nego ovak na daljinu. Jako sam zadovoljan kaj su se ostali maturanti dali več lepi broj priloga pa bu i druga korona-knjiga sigurno na kraju jako dobro ispala.

Natovaril sam si još jedan novi posel v kojega moram takaj uložiti nekaj truda. V Koprivnici več letima izlazi „Podravski zbornik“ v kojem se navek najde zgodnih temica ze života Koprivnice i Podravine. Ja bum ovo leto pisal na temu „Moj kvart pedesetih i početkom šezdesetih“ a verujte da se tu ima kaj napisati. Zapraf je to vreme od moje pete-šeste pa do devetnajste lete života. Ili da bum malo precizneši od prvoga razreda osnovne škole do odlaska na faks. Zakaj ne i dalje? Ha čujte. Posle povratka v Koprivnicu mojega staroga kvarta zapraf „više ni bilo“. Sve se promenilo, zgradile se nove kuče, došli neki novi ljudi, Slaven se preselil na novo igralište, Podravka se proširila na naše vočnjake i vrtove. Moj je kvrat otišel v povijest, došla su neka druga vremena. Kaj je najvažneše više ni ni bilo kuče v kojoj sam se rodil a na njezinom je mestu danas dvojni objekt v kojem živim več četrdeset let. Znate kaj mi fali? Oni negdašnji susedi i prijateli. Danas smo si v kvartu uglavno „stranci“.

Posle ovih dana iza nas treba malo pripaziti na svoj organizam i ne preterivati v ničemu.

Pondelek

Juha/Glavno jelo: Kisela juha od vrganji. (Imal sam ih za jednu juhu v škrinji). Dodal bum malo krumpira i sitno narezanoga špeka.
Desert: Znate več: kolač od jučer

Tork

Juha/Glavno jelo: Čuftice, pire krumpir; meni tu šalata ne paše
Desert: Čista čaša zdene vode

Sreda

Juha/Glavno jelo: Čušpajz od poriluka, dinstane nogice na češnjaku
Desert: Puding od vanilije

Četrtek

Juha: Juha od vode v kojoj su se kuhali rezanci
Glavno jelo: Kraljevski rezanci, sezonska šalata
Desert: Sok

Petek

Juha: Grahova juha z kašicom
Glavno jelo: Frigane srdelice, dinstani grah z puno povrča
Desert: Čaša vina

Subota

Juha: Krem juha od karfiola
Glavno jelo: Šunka z jacima, vrpa šalate
Desert: Kompot od jabuki

Nedela

Juha: Juha od junečeg repa z leberknedlima
Toplo predjelo: Kuhani rep blago posoljen z kuhanim povrčem
Glavno jelo: Junetina v pikantnom sosu, semerknedli, šalata
Desert: Štrukli sirom, kapučino

Znam da sam malo preteral al znam da imam obed i za sutra. Tak to delaju Podravci.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.